Mîûra yarûmûrwa
6
1 Ndoona Kagondu kaarûmûra mûûra wa mbere kîrî îra mûgwanja yarûmanîîrîîtie îbuku. Gakûrûmûra, ndeegua kîûmbe kîmwe kîrî bira bina kîagondoka ta nkwa, kîauga, “Ncû!” 2 Ndaacûûba ndoona muntû atwete mbaraathi înjerû arî na mîgwî na ûta. Ndoona muntû ûyu eekîrwa nthûmbî ya ûnene. Na agwîkîrwa yo aathi gûcinda.3 Kagondu gakûrûmûra mûûra wa îîrî, ndeegua kîûmbe kîa biîrî kîauga, “Ncû!” 4 Waagu mbaraathi îngî yaumîîra, întuune. Ûra aamîtwete eewa watho bwa kûthiria ûkiri nthîgûrû na bwa gûtûma antû baûraganaga. Aanenkerwa rûûyiû rûûnene.
5 Kagondu gakûrûmûra mûûra wa îthatû, ndeegua kîûmbe kîa bithatû kîauga, “Ncû!” Ngûcûûba ndoona mbaraathi înjirû na muntû amîtwete agwete thatiiri ciîrî na njara. 6 Na kuuma kîrî biûmbe bibu ndeegua gîntû ta kayû kauga, “Kathimi kaniini tu ka ngano kariuma îrîi rîa ngûgî ya ntugû yonthe. Na tûthimi tûthatû tûniini twa sayiri tûriuma îrîi rîa ngûgî ya ntugû yonthe. Ûtikeenyangie mîceituuni kana mîcabiibû!”
7 Kagondu gakûrûmûra mûûra wa îna, ndeegua kîûmbe kîa bina kîauga, “Ncû!” 8 Ngûcûûba ndoona mbaraathi yarî na rangi ya rûbiti. Ûra aamîtwete eetagwa Gîkuû na ûngî eetagwa Nthiko amûrûmarûmîîte nyuma. Beewa watho îgûrû rîa antû gîcuncî kîmwe kîrî bina. Beerwe watho bwa kûûraga antû na njîra ya ndûa, mayûûra, ndwari, na nyamû cia kîthaka.
9 Kagondu gakûrûmûra mûûra wa îtaano, ndoona rungu rwa kîthînjîro mîoyo ya bara baûragîîtwe n'ûntû bwa kiugo kîa Ngai na n'ûntû bwa gûkûûyîîra ûmma. 10 Mîoyo înu yaaria na inya, yauga, “Mûtheru, Mwathani wa mma, i mwanka rî tûgeeteera ûgambithia antû ba nthîgûrû, ûrîie nthakame yetû?” 11 Ndoona wa kîra mwoyo wanenkerwa rwambambio rûûyerû, yerwa înogokange yeteere aniini. Yeerirwe înogoke yeteere aruagina na aaragina bara baarutagîra nabo Kîrîstû ngûgî. Yeerirwe ibeeteere baûragwe tabo, bagane.
12 Ndaacooka ndoona Kagondu gakîrûmûra mûûra wa îthanthatû. Gakûrûmûra, nthîgûrû yainaina mûno. Riûa rîayirûa biri ta îkara, na mweri unthe watuunea tunî ta nthakame. 13 Nthata cia îgûrû ciagwa nthî ta ûgaa bûûkûûrûrûka ruuo rûkîbuutana. 14 Îgûrû rîarima ta bûra maandîko marimaga îbuku rîakûnjwa.a Irîma bionthe na icîgîîrio bia îria biakûûrwa ara bitûûraga. 15 Ndoona anene ba nthîgûrû, aathani, anene ba njûûrî, itonga, bara barî îgweta, nkombo na bara bataarî nkombo bonthe beebitha makurunguuni na maigaani ma irîma. 16 Beera irîma na maiga, “Tûgwîreeni. Twitheeni tûtikoonwe n'ûra akarîrîte gîtî kîa ûnene, na tûrigîîrieni mûthûûro wa Kagondu tûtigaakaanûkue! 17 Ntugû îra nene ya kwonania mûthûûro wao îgûkinya na îtiûmîîrîka kinya n'ûû!”