2 Njoana 1

1 NJOANA

Kiugo kîrî mwoyo

1 Tûbwandîkîrîte tûkîenda kûbûmenyithia mantû ma ûra aarî oogo kuuma kîambîrîria, ûra twîgîîtue, twamûkûnîîra meetho, na njara cietû ciamûtongithia, ta we kiugo kîa mwoyo ûra tûkûbûtûmîîria. 2 Rîra ûra aarî na mwoyo ûyu aayire itwamwonire na tûkûûyagîîra mantû maake. Tûrîbwîra mantû ma ûra aarî na mwoyo wa tene na tene. N'we aarî kîrî Baaba na twagwûrîrwa we. 3 Bûra twoneete na tweegua i bu tûkûbwîra kaingo bûgwatanîra naati ngwatanîrooni îra tûrî n'yo na Baaba, na Mwana wake Yiesû Kîrîstû. 4 Tûrîbwandîkîra mantû mama kaingo tûkena mûno.

Gûtûûra werûûni

5 Ino i cio ntheto ira twîgîîtue ciake. Na i cio tûkwenda kûbwîra, atî, Ngai i werû na kîrî we gûtirî mwindu nwa aniini. 6 Ûkeegua tuugaga tûrî ngwatanîro n'we na tûgîkaraga mwinduuni, n'ûrongo twaragia tûtithingataga ûmma. 7 Îndî tûkathiyagîra werûûni, ta bûra we arî werûûni, tûkeegua tûrî na ngwatanîro twinthe, na nthakame ya Yiesû Kîrîstû Mwana wake îgatûthambia meeyia monthe.

8 Tûkaaya kuuga tûtirî na meeyia i tûkwîbenia na ûmma bûtirî ndeeni yetû. 9 Îndî tûkaaya kuumbûra meeyia meetû kîrî Ngai, we i mwîtîgua na wa ûmma. Agatûrekera na atûthambie moothûûku monthe. 10 Tûkaaya kuuga tûtiîyîîtie, i ta kuuga Ngai i mûûrongo na kiugo gîake gîtirî ndeeni yetû.