Merikisendeki mûthînjîri wa Ngai
7
1 Merikisendeki aarî mûnene wa Saremu, na aarî mûthînjîri wa Ngai Ûra Arî Îgûrû Mûno. Rîra Îburaîmu aacookeete agûcinda anene, Merikisendeki akûrîîkana n'we naamûthaarimire. 2 Îburaîmu aathûkia gîcuncî gîa îkûmi gîa into bionthe bira aataîte ndûani aapa Merikisendeki. Riîtwa Merikisendeki riugaga “Mûnene wa wagîru.” Kaîrî eetagwa “Mûnene wa ûkiri,” n'ûntû Saremu i ta kuuga “ûkiri.” 3 Îthe na gina wa Merikisendeki batiiyîkeene, na gûtirî we aiyî antû baao.a Gûtirî muntû aiyî rîra aaciarirwe kana rîra aakuire. Aiyîkeene ataatiga kwîgua arî mûthînjîri wa Ngai, ta bûra Mwana wa Ngai akari.4 Kwoogu i bûkwona bûra Merikisendeki aarî na gîtûmi kîgana. Kîûyûûyû gîetû, Îburaîmu, amwaa gîcuncî gîa îkûmi gîa wa kîra gîntû aataîte. 5 *Watho bwa Musa buugîîte bara bagaatuîkaga *athînjîri ba Ngai barî ba rûrîîyo rwa Rawi nwa mwanka beeyagwe gîcuncî gîa îkûmi kuuma kîrî antû, yaani kuuma kîrî antû baao bongwa, amwe na kwîgua i ba rûrîîyo rwa Îburaîmu tabo. 6 Tika Merikisendeki aarî wa rûrîîyo rwa Rawi, îndî Îburaîmu naamwere gîcuncî gîa îkûmi. Amwe na ûgu, Merikisendeki naathaarimire Îburaîmu, na Îburaîmu eetwe mawîrane i Ngai. 7 Gûtirî nkanja ûra athaarimanaga n'we mûnene kîrî ûra athaarimagwa. 8 Athînjîri ba Ngai bara baarî ba rûrîîyo rwa Rawi, baarî antû na i baakuire. Îndî amwe na ûgu i beeyagwa gîcuncî gîa îkûmi. Îndî Merikisendeki we twîragwa atûûraga mwoyo. 9 Kwoogu nwa tuuge Rawi ûra akwewa gîcuncî gîa îkûmi, wana we neeyanire kîo rîra Îburaîmu eere Merikisendeki. 10 N'ûntû wana kinya ûkeegua ataarî agûciarwa rîru, mbeû îra yamûciarire n'yarî na Îburaîmu rîru Merikisendeki aarîîkanîîte nwe.
11 Aisiraeri i beerwe *watho na baarutanagwa bûra buugîîte n'athînjîri ba Ngai ba rûrîîyo rwa Rawi. Îndî ûkaaya kwîgua ngûgî îra athînjîri baba ba Ngai baarutîîre antû yaûmbire gûtûma beegua barî baatheru kûrû kîrî Ngai, gûtiîgua kûrî na gîtûmi gîa kwîgua kûrî na mûthînjîri wa Ngai ûngî mûtariini wa Merikisendeki, na ti mûtariini wa Arûni. 12 Mûthînjîri wa mûtari ûngî akaaya kûreetwa, wana watho nwa mwanka bûgarûrwe. 13 Kîrîstû ûra mantû mama magûkonia aarî wa mûgongo ûngî, na gûtirî we wa mûgongo wao aatuîka mûthînjîri wa Ngai. 14 Gûtirî we ataiyî Mwathani wetû n'wa mûgongo wa Njunda, na Musa ataarogweta nwa ata îgûrû rîa athînjîri ba Ngai bakuuma mûgongooni wao.
Mûthînjîri ûngî wa Ngai atuatîîtie Merikisendeki
15 Kûgarûka gûku kwa mûtari wa *athînjîri ba Ngai igûkwoneka gûtarî na kîrigicano rîra tûkwona kûrî na mûthînjîri ûngî akari ta Merikisendeki. 16 We ataatuîkithua mûthînjîri wa Ngai na njîra ya maathana makoneetie kûringana na kûra muntû aciarîrîtwe. Îndî we aatuîkithiirue mûthînjîri wa Ngai n'inya ya mwoyo ûra atûûraga mwanka tene na tene. 17 *Maandîko Maatheru maugîîte ûûgû îgûrû rîake,
“Ûgaatûûra ûrî mûthînjîri wa Ngai
mûtariini wa Merikisendeki.”
18 Watho bûra bûkûrû bwarekanirwe nabu n'ûntû bûtaarî na ûrito, na n'ûntû bwarî bwa ûtheri. 19 Watho bûbu gûtirî gîntû bwaûmba gûtûma kîîgua kîrî kîtheru kûrû. Kwoogu îîndî itwetwe wîrîgîîro bwega nkûrûki bûra bûtûmaga tûthi kîrî Ngai.
20 Na bûngî nabu, ûyû aatuîkithiirue mûthînjîri na kûthiîtia kwa Ngai, ûntû ataarûtha rîra aatuîkithagia bara bangî athînjîri baake. 21 Îndî Kîrîstû aatuîkire mûthînjîri na njîra ya kûthiîtia kûra Ngai aathiîtiirie rîra augire ûûgû îgûrû rîake,
“Mwathani akûthiîtia na atiigarûka,
‘Ûgaatûûra tene na tene ûrî mûthînjîri wa Ngai
mûtariini wa Merikisendeki.’ ”
22 Ûgu i ta kwonania Yiesû n'we agaatwotithia kwîgua tûrî na kîrîîkanîro kîega nkûrûki na Ngai.
23 Mwanya ûngî ûra ûrî oogo, i kwîgua i kwarî na athînjîri babu bangî baingî n'ûntû ibaakuyaga bagatiga kûruta ngûgî. 24 Îndî Yiesû arî mwoyo mwanka tene na tene. Na kwoogu wana kinya ngûgî yake ya kwîgua arî mûthînjîri wa Ngai ataatigana n'yo. 25 Kwoogu rî kana rî noonokagiab bara bathiyaga mbere ya Ngai gûkûrûkîîra kîrî we, n'ûntû arî oogo magiita monthe kaingo aaranîria na Ngai n'ûntû bwao.
26 Ûyu n'we mûthînjîri wa Ngai ûra aagîrîîte kîrî tiû. I mûtheru, atirî mabîtia na atirî meeyia. N'ûmwathûrane na eeyia eetithua kûra îgûrû mûno. 27 Gûtirî gîtûmi gîake kûruta igongwana ntugû cionthe ta athînjîri bara bangî bara mbere baambaga kûruta kîgongwana kîa meeyia maao bo bongwa, rîru bakaruta gîku kîngî n'ûntû bwa meeyia ma antû bara bangî. Yiesû we aarûthire ûgu na njîra ya kûruta kîgongwana rîmwe gûtarî kaîrî, rîra eerutire aambwa mûtharabaani. 28 Watho bwa Musa bûtuîkithagia antû athînjîri bara banene ba Ngai na antû nwa bagwe magerioni. Îndî kûthiîtia kwa Ngai ûra aathiîtiirie nyuma ya rîra eeyanîîte watho i ku gwatuîkithiirie Mwana wake mûthînjîri ûra mûnene, ûra athereetue cwe tene na tene.