5
1 Ûtigaacenge mûkûrû. Aria n'we ta muntû akwaria na îthe. Aana anyi ba antû arûme bathûkagie ta aruanyûkwe 2 na eekûrû baakûrû ta banyûkwe. Na aana ba aarî bathûkagie ta aaranyûkwe ûtakwîrirîîria bo nwa aniini.Eekûrû ntigwa
3 Kanica n'îbatîîrue îteethia eekûrû ntigwa, bara batarî na wa kûbateethia. 4 Îndî eekûrû ntigwa bara barî na aana baao, kana aana ba aana baao, aana babu mbere i baambe beerutane boonanie ûngai bwao na njîra ya gûteethia antû ba mîciî yao bongwa, kaingo barea aciari baao na booyûûe, n'ûntû ûgu i bu bûkenagia Ngai. 5 Ntigwa yongwa, i mwekûrû ûra atûûraga wenka, ûra wîrîgîîro bwake bunthe bwîgagua bûrî kîrî Ngai, ûra akaraga rîonthe akîrombaga ûtugû na mûthenya. 6 Îndî mwekûrû ntigwa ûra eethûngagîria mantûûni maingî, ûyu i ta ûmûkuû. 7 Bamenyithie mantû mama kaingo beegua barî antû barî na riîtwa rîega. 8 Îndî muntû ûra atagîteethia antû baao, na mûno mûno, antû ba mûciî wao ungwa, ûyu we i taka areganîîte na wîtîgio bwetû kîrî Kîrîstû. Na kwoogu i mûthûûkia nkûrûki ya kinya ûra atarî mwîtîgîri.
9 Ntigwa îtarî na ûkûrû bwa mîanka mîrongo îthanthatû, gwîtia, înu ûtikaamîîkîre îthaabuuni rîa bara tûûmba kuuga i bakwenda ûteethio.a Ûra tûûmba kuuga wabu nakwenda ûteethio nwa mwanka eegue aratûûraga arî mûka wa mûrûme ûmwe, 10 na akîgwetanagîrua na mantû meega. Nwa mwanka eegue arereete aana baake bonthe bwega, na antû bonthe baaya mûciî wake akabagwataga ûgeni bwega bûra kûbatîîrue.b Nwa mwanka eegue atûûraga ateethagia bara barî na thîîna, na eerutîîte kûrûthaga mantû meega ma mîthemba yonthe.
11 Na bara batuîkaga ntigwa barî eekûrû baîthî, kinya bo ûtikaabeekîre îthaabuuni rîa ntigwa. N'ûntû rîra mîîrî yao îkeerirîîria kûgûrwa, ibakeenda kûgûrwa bantû a beepeeyana kîrî Kîrîstû, 12 na ibakaagambithua n'ûntû bwa kûrega kwingia wîrane.c 13 Batarî baagûre bacookaga bakagîa ûthao bagatua kûriûngaga na mîciî. Batuîkaga aguutani na antû ba kwîthûngagîria mantûûni ma antû bangî bakîaragia mantû mara batabatîîrue beegua bakîaragia. 14 Kwoogu ndeenda eekûrû bara barî ntigwa barî baîthî bagûragwe, bagîîyage na twana, na bamenyagîîre mîciî yao, kaingo anthû beetû batoona kaanya ga gûtûgweta na njîra înthûûku. 15 Ndîgweta ûgu n'ûntû eekûrû ntigwa bamwe ibagarûkîîte baatua kûthingata Saitaani.
16 Îndî mwekûrû mwîtîgîri ûra arî na eekûrû ntigwa mûciî wake, n'we abatîîrue abamenyeera na tikûrekeria kanica mûrigo ûyu unthe, kaingo kanica n'yo îmenyeera ntigwa ciongwa, bara batarî na muntû wa kûbateethia.
Akûrû ba kanica
17 Akûrû ba kanica bara batongoragia antû bwega i babatîîrue beegwa gîtîîyo maita maîrî.d Na mûno mûno, bara barutaga ngûgî na inya ya gûtûmîîria na kûrutana. 18 Gîtûmi i kwîgua *watho buugîîte ûûgû, “Ûtikaathaîke ng'ombe mûcomo rîra ûkûmîtûmîra kûbûûra ngano.” Na kaîrî bwauga, “Mûruti ngûgî nabatîîrue arîagwa ngûgî yake.” 19 Ûtikeende kûthikîîria mathitango îgûrû rîa mûkûrû, nwanga kûrî na ankûûyî baîrî kana nkûrûki. 20 Kaanagia bara barûthaga meeyia antû bakîîgagua kaingo babu bangî bakuthûka.
21 Ngai akîîgagua amwe na Kîrîstû Yiesû na araîka bara batheru, ndîkwîra atî, ûtikaarege kûrûtha mantû mamu monthe ndakwîra ûrûthe na ûtigaatûmîre kîmenyano. Rîonthe thûkagia antû bûmwe kîrî mantû monthe mara ûkaarûthaga.
22 Ûtikaugîrie rwîro kwaigîîra muntû njara ûkîmwambîîria kîrî ngûgî ya Ngai. Ûtikaagwatanîre na muntû meeyiani. Îmenyeera wagîru bwaku bwa nkoro.
23 Tiga kûnyunyaga rûûyî rûûtheri runka. Înyunyaga kandibei kaniini n'ûntû bwa thîîna îra ûrî n'yo ya nda na n'ûntû bwa mbayua ira ingî ûgûkara ûkîayangagua.