4
1 Kwoogu bûra nkûbwîra n'atî, mwene rûgai rwa îthe arî ûmûniini atirî mwanya na nkombo, amwe na kwîgua n'we mwene ûtonga bunthe. 2 Arî ûmûniini kûrî bara bamûmenyagîîra, na bara bamwîraga bûra akaarûtha mwanka rîra kagiita kara kaagîrîîte gagaakinya. 3 Wana tiû rîra twarî baaniini twarî wathooni bwa mawatho ma nthîgûrû îno. 4 Kagiita kara kaagîrîîte gagûkinya, Ngai naatûmire Mwana wake. Aaciarirwe i mûka wathooni bwa Kîîyaundi. 5 Aatûmirwe aaya gûkûûra bara baatûîre baathagwa i watho, kaingo twîtîgîîrîka tûrî aana ba Ngai. 6 N'ûntû îîndî naabi bûrî aana baake, Ngai natûmîîte Kîrundu wa Mwana wake nkorooni cienu, Kîrundu ûra eetanaga, “Aba,” nabu i ta kuuga “Baaba.” 7 Kwoogu i ta kwonania atî, woû ûtirî nkombo kaîrî, ûrî mwana. Na n'ûntû ûrî mwana wake, îîndî Ngai agûtuîkithîîtie mwene rûgai rwake.Kîmako gîa Paûrû kîrî Agaratia
8 Mbereeni rîra bûtaiyî Ngai bwarî nkombo cia ngai gûtarî. 9 Îîndî i bwiyî Ngai. Kana nwa tuuge Ngai nabwiyî. N'ata kaîrî bûûmba gûcooka kîrî irundu bia ûtheri, bitarî ûteethio? I kî n'ûntû bûkwenda gûtuîka nkombo cia bio kaîrî? 10 Bwonaga ntugû nna, kana mîeri mîna, kana îgiita rîna, kana mîanka mîna îrî gîtûmi, bûkîthûgaanagia kwathîkîra cio i gûkenagia Ngai! 11 Bûmmakîîtie mûno n'ûntû waûmba kwîgua ngûgî îra yonthe ndutîîte n'ûntû bwenu îraarî ya ûtheri!
12 Aruayia na aarayia, nkûbwereka karaani ta niû n'ûntû wana niû Indaakarire ta biû. Gûtirî ûthûûku bwandûthîra. 13 I bwiyî thîîna ya mwîrî îra ndaarî n'yo nîatûmire mbona kaanya ga kûbûtûmîîria ntheto îmbega kagiita ka mbere. 14 Îndî amwe na kwîgua ndaarî magerio kîrî biû, bûtambûthia kana bûnthekeera n'ûntû bwa bûra ndaakari. Bwanthûkiirie ta bûra bûkîthûkia mûraîka kana Kîrîstû Yiesû we wengwa. 15 Mbereeni bwarî antû ba nkena. N'ata îîndî bûrakarire? Nwa mbuge gûkîûmbîkire bûgînkûûrîra meetho meenu bûgampa. 16 Ntikûbûûria, ka ndaratuîkire mûnthû wenu n'ûntû bwa kûbwîra ûmma?
17 Antû babu bangî babwenagîîria bakîîriragîîria kûbûkuuyia kîrî bo, îndî ti na wega. Beendaga kûbûtigithania naani kaingo bûboonia bûrî bata nabo. 18 I bwega kwîrirîîria ûntû, bunka gîtûmi kîrî kîega. Kwoogu ûgu i bu bûbatîîrue bûrûthaga rîonthe, ti warîra rîonka ndî amwe naabi. 19 Aana baakwa, mwanka rîra bûgaakara ta Kîrîstû kaîrî ntiitiga kwîgua rûgakaî ta rwa mwekûrû arî akubî kûgîa na mwana. 20 Ûtakîîgua i ndî akubî naabi thaa ino bûkoona bûra bûmmakîîtie bûgana. Bûndigarîîtie mûno mûno!
Ngerekano ya Aga na Saara
21 Tatiga mbûûrieni biû bara bûkwenda gûkara *wathooni. Anga bûtiiyî bûra watho buugîîte? 22 Îbukuuni rîa watho kwandîkîîtwe atî, Îburaîmu naarî na nthaka ciîrî. Îmwe aaciarire na mûka nkombo, îra îngî aaciara na mûka ataarî nkombo. 23 Nthaka înu ya mûka nkombo yaciarirwe kûringana na wîthîre. Îndî înu îngî ya mûka ûyu ataarî nkombo yaciarirwe kûringana na bûra wîrane bwa Ngai bwakari. 24 Mantû mamu i ngerekano. Eekûrû babu baîrî i ngerekano ya irîîkanîro biîrî. Kîrîîkanîro kîa mbere i kîra gîa Kîrîma gîa Sinai. I kîo kîonanîîtue n'Agari. Aana baake bonthe baaciarîîrwe ûkombooni. 25 Agari i ta Kîrîma gîa Sinai kîra kîrî nthîgûrû ya Arîbia, na i ngerekano ya taûni ya Njerusaremu îra îrî oogo îîndî. Yoo na antû ba yo bonthe i nkombo. 26 Îndî Njerusaremu ya îgûrû i Njerusaremu îtarî ûkombooni na n'yo taata wetû twinthe. 27 Ûûgû i bu kwandîkîîtwe *Maandîkooni Maatheru,
“Kena, woû mwekûrû nthaata!
Tûmîîria, ugîîria na inya îra nene ûkeneete,
woû ûteegua ûrûrû bwa gûciara!
Gîtûmi n'atî mwekûrû aatigirwe wenka
akaagîa na aana baingî mûno,
acinde ûra ataatigwa wenka.”
28 Biû, aruayia na aarayia, bûrî aana ba wîrane bwa Ngai ta Isaka. 29 Îndî bûririkanage, ta bûra mwana ûra aaciarirwe kûringana na wîthîre aanyamaaragia ûra aaciarirwe na njîra ya Kîrundu, nwa ta bu gûkari kinya ntugûûni ino. 30 Maandîko Maatheru maugîîte ata? Maugîîte, “Îngatia mûka ûyû nkombo amwe na mwan'wake, n'ûntû mwana wa mûka ûyû nkombo atiigaana rûgai na mwana wa mûka atarî nkombo.” 31 Kwoogu, aruayia na aarayia, tiû tûtirî aana ba mûka nkombo, tûrî aana ba mûka atarî nkombo.