13
1 Wana ûkeegua mbûmba kwaria ndwaria cia antû bara bangî, kana kinya cia araîka, ntarî na wendo i gîtuma nkûringa mana ta kîa ngonia kana gîa kîgamba. 2 Kana ûkeegua ndî na kîewa kîa ûroria ûkeegua imbiyî iriga bionthe na ndî na ûmenyo bunthe, kana ndî na wîtîgio bûûmba gûtûma kîrîma gîkûûka, ntarî na wendo, ndî wa mana. 3 Kana wana nkaa nkîa into biakwa bionthe, kana nkeeruta nkabîîthua, ntarî na wendo bûbu gûtirî bu bûnteethia nabu.4 Wendo i bwetagîîra, na bûrî kîao. Bûtirî rûriitho, bûtiîbûkagîîria kana bwîkumia, 5 bûtiagaga nthoni, bûtiîbendagîîra, bûtithûûrangaga na mpwî, na bûtitaraga maita mara muntû abîtîrîîtue. 6 Wendo bûtikenagîîra ûthûûku, bûkenagîîra ûmma. 7 Bûtikuyaga nkoro, bûkaraga bwîtîgîîtie, bûrî na wîrîgîîro, na kûûmîîria.
8 Wendo bûtithiraga, îndî kîewa kîa ûroria kîo gîkaûra. Kîewa gîa kwaragia ndwaria i ngeni kinya kîo gîkaathira. Wana kîewa kîa ûmenyo gîkaûra. 9 Biewa bia ûmenyo na ûroria bira twetwe bititwîraga mantû caû. 10 Rîra ûntû bungwa bûkaaya, bibu bitatwîraga mantû caû ibikaûra. 11 Rîra ndaarî mwana, ndaaragia ta mwana, ngeeciiria ta mwana, na nkathûgaania ta mwana. Ngûtuîka muntû ûmûnene, indatiganire na mantû mamu ma wana. 12 Mara twonaga îgiitaani rîrî tûkari taka tûmaraithîîte na kîyici tûkoonaga marî marundurundu. Îndî îgiitaani rîkaaya tûkoona mantû caû. Bûra mbiyî îîndî ti bûganu. Îndî îgiita rîakinya nkaamenya mantû kûrû ta bûra Ngai ambiyî.
13 Kwoogu mantû mama mathatû makaathi na mbere kwîgua marî oogo. Namo i wîtîgio, wîrîgîîro, na wendo. Na kîrî mo, wendo i bu bûkûrûkîîte monthe.