Îîrutaneeni kuumania na bûra gwakarîkire kîrî Aisiraeri
10
1 Aruayia na aarayia, inkwenda bûririkana bûra gwakarîkire kîrî biûyûûyû beetû bara batongorereetue i Musa rwanda. Bonthe baatongoreerue n'îtu baaringa îria na magûrû bathiîrîîte nthîgûrû îmbûmo. 2 Bonthe baabaatithîîrue îtuuni na îriani baatuîka athingati ba Musa. 3 Na bonthe i baarîîre irio bimwe bia gîîkîrundu beetwe i Ngai birî kîama. 4 Na kûnyua ibaanyuire gîakûnyua kîmwe gîa gîîkîrundu n'ûntû baanyuire kuuma kîrî iiga rîa gîîkîrundu rîra rîathiyanagia nabo. Narîo iiga rîru i rîo Kîrîstû. 5 Îndî amwe na ûgu, Ngai ataakenua i baingî baao. Na i kîo gîatûmire bakua, biimba biao bianyagaara rwanda rûrû.6 Mantû mama maakarîkire matuîka ngerekano kîrî tiû, kaingo tûtiga kwendaga kûrûthaga mantû maathûûku ta bûra Aisiraeri baarûthire. 7 Na kaîrî, i kaingo tûtaromba ngai cia ûrongo, ta bûra bamwe baao baarûthire. Na wa ta bûra kwandîkîîtwe *Maandîkooni Maatheru, “Antû baarûthire kîatho, baakara nthî baarîa, baanyua, rîru baarûngama baina ndanci.”
8 Tûtikeeyieni wîyia bwa ûmaramari, ta bûra bamwe ba Aisiraeri baarûthire, baakua antû ngiri mîrongo îîrî na bathatû ntugû îmwe. 9 Tûtikaagerieni Mwathani, ta bûra bamwe baao baarûthire, baarûmangwa i njoka baakua. 10 Na tûtikaanunguneeni ta bûra bamwe baao baarûthire, baûragwa i mûraîka ûra aathiranagia.
11 Mantû mamu maakarîkire kîrî bo, maakarîkire matuîka ngerekano kîrî tiû, matûrutana, tiû tûrî ku ntugûûni ino cia kwingia mûbango wake. 12 Kwoogu, ûra akûthûgaania narikîîte wîtîgioni abatîîrue eemenyeera atikaaye kûthûngîra wîyiani. 13 Na ririkanagaani atî, magerio mara mabûûyagîîra matirî mûkûûrani na ma antû bara bangî. Na Ngai i mwîtîgua. Atiireka bûgerua nkûrûki ya bûra bûûmba kûûmîîria. Akabwonagia bûra bûkaarûthaga bûtacindîîrwe i magerio.
14 Kwoogu, eendwa baakwa, bûtikaarombageeni ngai cia ûrongo. 15 Ndîaria naabi ta antû baûgî nkwaria nabo. Wana biû i bûkûmenya n'ûmma nkwaria. 16 Rîra tûnyunyanagîra gîkombeeni kîra tûûragia Ngai athaarime, anga ti ngwatanîro ya nthakame ya Kîrîstû wîgagua tûrî n'yo? Na rîra tûrîîyaga mûgaate ûra tûng'enyûranaga, anga ti ngwatanîro ya mwîrî wa Kîrîstû wîgagua tûrî n'yo? 17 Kûrî mûgaate ûmwe, kwonania twinthe wana kinya ûkeegua tûrî baingî, tûrî mwîrî ûmwe n'ûntû twinthe tûrîîyaga mûgaate ûyu ûrî ûmwe ûgu.
18 Tathûgaanîriani Aisiraeri. Bara barîîyaga igongwana anga ti ngwatanîro îra barî n'yo na kîra kîrî kîthînjîrooni boonanagia? 19 Tika nkuuga ngai ya ûrongo i gîntû kûrî, kana irio bira irutîrîîtwe i gîntû. 20 Bûra nkuuga n'atî, bira birutagwa birutagîrwa irundu bithûûku, îndî ti Ngai arutagîrwa bio. Na ntikwenda bûgwatana na irundu bithûûku. 21 Bûtiinyua kuuma gîkombeeni kîa Mwathani na kîa irundu bithûûku. Na bûtiirîîra meethaani ya Mwathani na ya irundu bithûûku. 22 Ga tûkwenda Mwathani agwatwa i rûriitho? Ga tûkwona taka tûmûkîria inya?
Ûtigaatûme mwîtîgîri ûra ûngî eeyia
23 Bamwe beenu baugaga, “Tiû gûtirî ûntû twonaga bûrî bûthûûku.” Nwa buuge ûgu, îndî narîo mantû mara tûûmba kûrûtha ti meega monthe. Nwa buuge, “Tiû gûtirî ûntû twonaga bûrî bûthûûku,” îndî ti mantû monthe mateethia bara bangî. 24 Ûtikeende ûganîrwa wenka. Enda muntû ûra ûngî wana we aganîrwe.
25 Muntû nwa arîe nyama ira ciendagua thokooni. Ûtikaûrie biûria ûgîcûa kûmenya kana i nyama ira ûthûgaanagia i mabîtia gûcirîa. 26 Nwa ûcirîe n'ûntû *Maandîkooni Maatheru kwandîkîîtwe, “Nthîgûrû n'ya Mwathani, na bionthe bira birî ku.”
27 Muntû atarî mwîtîgîri agakûthookia gwake bûrîyanîra, ûkaaya kûthi, îrîa kîonthe kîra gîkaareetwa. Ûtikaûrie biûria ûgîcûa kûmenya kana i gîntû kîra ûthûgaanagia i mabîtia gûkîrîa. 28 Îndî muntû agakwîra, “Nyama îno nîrarutîrîtwe ngai cia ûrongo,” ûtikaamîrîe n'ûntû muntû ûyu agûkwîra ûgu, waûmba kwîgua akîthûgaanagia i mabîtia kûmîrîa. 29 Ntikuuga i thîîna kîrî woû kûmîrîa, îndî i kîrî muntû ûra ûngî. Na i kî n'ûntû mantû mara mbûmba kûrûtha matabatîîrue makûrûkana na bûra mwîtîgîri ûra ûngî athûgaanagia? 30 Ûkaaya kwîgua incookagîria Ngai nkaatho ampa irio bina rî, i kî n'ûntû muntû akauga i nkûbîtia ndabirîa na n'irio ncookeretie Ngai nkaatho n'ûntû bwa gûmpa bio?
31 Kwoogu gîntû kîonthe kîra bûkaarîa kana bûkaanyua, kîrîyageeni na kînyunyageeni bûgîkumagia Ngai. 32 Bûtikaarûtheeni ûntû bûûmba kûreetera Ayaundi, bara batarî Ayaundi, kana kanica ya Ngai, thîîna. 33 Rûthagaani bûra ndûthaga. Ncûûgagia gûkenia muntû wonthe na mantû monthe mara ndûthaga. Nticûaga nganîrwa ninka. Ncûaga kwona nkûrûtha bûra bûgaateethia antû bonthe, kaingo boonokua.