Matigari ma Aisiraeri
11
1 Kwoogu i ta kwonania Ngai naarekanire na antû baake kana? Arî buru! Niû ningwa ndî Mûisiraeri wa rûrîîyo rwa Îburaîmu, wa mwîrîga wa Benjameni. 2 Ngai atirekanîîte na antû baake ba Isiraeri, bara aathuurire kuuma kîambîrîria. Ka bûtaiyî bûra Eriya eerire Ngai rîra aathetaga n'antû ba Isiraeri? Maandîkooni Maatheru kwandîkîîtwe augire, 3 “Mwathani, iroria biaku i biûrage na ithînjîro bienyangua. I niû ninka ntigeere, îndî wana niû i bakwenda kûmbûraga.” 4 N'ata Ngai aamûcookeerie amwîra? Aamwîrire, “Ndî na antû ngiri mûgwanja Isiraeri bara bataaromba ngai ya ûrongo, Mbaari.” 5 Na kwoogu, kinya îîndî i bu gûkari. Kûrî na antû baakai bara Ngai athuurîîte kuumania na ûtugi bwake. 6 Ngai abathuurîîte n'ûntû bwa ûtugi bwake, t'ûntû bwa ûntû bwega bûra baarûtha. Ûkeegua n'ûntû bwa ûntû bwega, ûtugi bûtiîtwa ûtugi.7 Na kuuga ûgu i ta kwonania ata? I ta kwonania Aisiraeri batoona kîra baacwaga. Bara baakîonire i baakai, bara Ngai aathuurire. Îndî bara bangî ibaûmiirue biongo, 8 wa ta bûra kwandîkîîtwe Maandîkooni Maatheru,
“Wana îmunthî Ngai nabaindiganîîtie mathûgaania,
abaingîîte meetho kaingo batoona.
Abaingîîte matû kaingo bateegua.”
9 Na Ndaundi nwe augîîte,
“Biatho biao birootuîka mûtego bikabarîîkîîria,
bikabathiria, birootûma bagwa meeyiani
bakeewa îkaanûkia rîra baagîrîtwe kwewa.
10 Barootuîkithua ntûngi bagatiga kwona,
barootûûraga bagunkuîte i gûkamata mathîîna.”
Gûcooka kwa Aisiraeri kîrî Ngai îgiita rîkaaya
11 Rîra Ayaundi baagwîre wîyiani bwa kwaga wîtîgio ka gwatuîkire gûtirî kîo kîbaruta ku kaîrî? Arî buru! Kûgwa kwao kwarî mûbango wa Ngai, kaingo bara batarî Ayaundi boonokua. Na i kaingo Ayaundi bacooka kwîgua rûriitho, beenda kwonokua wana bo. 12 Woona bara batarî Ayaundi baathaarimirwe mûno gîîkîrundu gûgûtuîka Ayaundi bakûgwa, n'ata antû bonthe bakaathaarimwa bûgana rîra Ayaundi bagaacooka kîrî Ngai?
13 Ndaaria mantû mamu n'ûntû bwenu biû bûtarî Ayaundi. Ndî mûtûmwa kîrî bara batarî Ayaundi. Na kagiita gaka ndî na ngûgî înu, ka mmîthûkie îrî ya gîtûmi mûno. 14 Ndaûmba gûtûma antû beetû ba Ayaundi beegua rûriitho, kwaûmbîka bamwe baao boonokue. 15 Ngai agûtiganîria Ayaundi aatumire ûcoore na bara bataarî Ayaundi. Bara bakuû bakeewa mwoyo rîra Ayaundi bagaacooka kîrî Ngai.
Ngerekano ya mûtî wa mûceituuni
16 Woona biûyûûyû bia Ayaundi biarî biitheru, wana nciarwa ciao n'intheru. Ûkeegua mîri ya mûtî îrî mîtheru, wana mpong'i cia uu ciîgua irî intheru. 17 Tathûkia ngerekano ya mûtî wa mûceituuni ûtemetwe mpong'i imwe, rwong'i rwa mûceituuni wa kîthaka rûkagwatithanua na uu. Woû ûtarî Mûyaundi ûkari ta rwong'i rûru. Mûceituuni ûra mûteme mpong'i n'Ayaundi. Woû ka ûgwatithanîîtue na uu. Ûteethekaga kuumania na inya na mwoyo wau. 18 Îmenyeera ûtigeekumîrie kwîgua woû ûrî ûmûgwatithanie na uu îîndî îra mpong'i imwe itemetwe kuuma kîrî uu. Ririkana woû ka ûrî rwong'i. Ti woû ûreraga mîri, i mîri îkûreraga. 19 Îndî naawe waûmba kuuga, “Mpong'i inu ciatemirwe kaingo ngwatithanua.” 20 Bûbu n'ûmma. Mpong'i inu ciatemirwe n'ûntû bwa kûrega gwîtîgia. Ûrikîîtue kîrî mûceituuni ûyu n'ûntû bwa wîtîgio bwaku. Kwoogu ûtigeekumie, ûbatîîrue ûkaraga wînyiîtie. 21 Wegua Ngai ataacaamîra mpong'i ira ciarî cia mûceituuni ûyu ciongwa rî, nûkwona taka woû agaagûcaamîra?
22 Raitha wone bûra Ngai atarî mathee na bûra arî ûmwega. Ataarî na mathee na mpong'i ira aatemire. Îndî kîrî woû, n'ûmwega. N'ûmwega kîrî woû wegua ûkaathingataga mantû maake meega. Wegua t'ûgu, wana woû nagaagûtema. 23 Na mpong'i ira, ta cio Ayaundi, ikaaya gwîtîgia, Ngai agacicookia kaîrî mûtîîni kûra ciarî, n'ûntû nwa aûmbe kûrûtha ûgu. 24 Woona Ngai aûmbire kûrûtha kîînyume kîa wîthîre akûthûkia akûgwatithania na mûceituuni wa kwandwa na warî wa mûceituuni wa kîthaka kûringana na wîthîre, n'ata ataûmba kûgwatithania kaîrî mpong'i cia mûceituuni ûyu na mûceituuni mwene cio?
Mûthiani Isiraeri îkoonokua
25 Ndîenda, aruayia na aarayia, bûmenya kîriga kîra kîrî oogo, n'ûntû kûmenya gûkabûteetheeria bûtikeethûkie taka bûrî na gîtûmi mûno. Kîriga kîra kîrî oogo i kwîgua baingî ba Aisiraeri ibaûmîîtue biongo. Na kûûma biongo kwao gûkaathira rîra bara Ngai athuurîîte batarî Ayaundi bageetîgia Kîrîstû na ûtari bwao bûra bûkwendekana bwagana. 26 Na rîru i rîo Isiraeri îkoonokua yonthe. Wa ta bûra kwandîkîîtwe *Maandîkooni Maatheru,
“Mwonokia akauma Sayuuni athirie ûthûûku bunthe
bûra bûrî na nciarwa cia Njakubu.
27 Na rîru i rîo nkaabathiria wîyia bwao
wa ta bûra ndaarîîkanîîre nabo.”
28 Kagiitaani gaka tûrî Aisiraeri bakari taka barî anthû ba Ngai, kaingo ntheto îmbega îbûkinyîîra biû bûtarî Ayaundi. Îndî wana îîndî bo n'eendwa baake bara athuurîîte n'ûntû bwa mawîrane mara eere biûyûûyû biao. 29 Ngai ageeta muntû, we atigarûkaga. Kana wegua i kîewa kîna eete muntû, we aticookaga kûmûtunya kîo kaîrî. 30 Kûrî rîra biû bara bûtarî Ayaundi bûtaathîkagîra Ngai. Îndî îîndî n'Ayaundi batamwathîkagîra îîndî îra biû abwîgîîtue kîao. 31 Îîndî n'Ayaundi bataathîkagîra Ngai. Îndî i kaingo Ngai acooka kûbeegua kîao, ta bûra îîndî kaanya karî keenu. 32 Ngai atuîkithagia antû agwate ba wîyia bwa kûrega kwathîka kaingo eegua antû bonthe kîao.
Gûkumia Ngai
33 N'ata Ngai arî ithaarimo biingîîte bûgana!
N'ata arî ûûme na ûmenyo bwingîîte bûgana!
N'ûû wacietû aûmba kûmenya mîbango yake?
Kana n'ûû wacietû aûmba kûmenya bûra arutangaga ngûgî?
34 N'ûû aiyî bûra mathûgaania ma Mwathani makari?
N'ûû aûmba kûmwatha?
35 N'ûû aûmba kuuga Mwathani arî na îrandû rîake
rîra abatîîrue amûrîa?
36 Bionthe biumaga kîrî Ngai,
na bionthe bitwîrue n'inya yake, na birî oogo bitûmîka na njîra ya gûtûma akumua.
Mwathani arookumagua tene na tene! Aameni.