Yiesû n'we mûcabiibû wa mma
15
1 Yiesû eera arutwa baake, “I niû mûcabiibû wa mma, na Baaba n'we muurîmîri. 2 Rwong'i rwakwa runthe rûra rûtaciaraga narutemaga, na rûra rûciaraga narutheragia kaingo rûciaro nkûrûki. 3 Biû i bûrîîkîîtie kûtherua i kiugo kîra mbûrutanîîte. 4 Karagaani ndeeni yakwa, naani ngaakaraga ndeeni yenu. Wa ta bûra rwong'i rûtaûmba gûciara rûrî runka rûtarî mûcabiibûûni, i ta bu kinya biû bûtaûmba kûrûtha ûntû bûtarî ndeeni yakwa.5 “I niû mûcabiibû, naabi i biû mpong'i. Ûra akaraga ndeeni yakwa naani ngakara ndeeni yake naciaraga rûciaro rwingî. Gûtirî bu bûûmba kûrûtha bûtarî na ûteethio bwakwa. 6 Muntû ûra atakaraga ndeeni yakwa, akari ta rwong'i rûra rûtemagwa rûgateegwa rûkaûma. Na mpong'i ta inu iciîthîranagua ikagerwa mwankiini, ikabîîthua. 7 Wegua bûgaakaraga ndeeni yakwa na biugo biakwa bigaakaraga ndeeni yenu, ûntû kinya bûrîkû bûra bûkeendaga, bwaromba bûkaarûthagîrwa bu. 8 I bûtûmaga Baaba akumua bwaciara rûciaro rwingî na bwonanagia bûrî arutwa baakwa.
9 “Mbwendeete ta bûra Baaba ambendeete. Bûtikaareke wendo bwakwa buuma kîrî biû. 10 Nkabwendaga wegua bûkaathîkagîra maathana maakwa ta bûra na niû mbathîkagîra maathana ma Baaba, akaambenda.
11 “Ndabwîra mantû mama kaingo gîkeno kîra kiumanagia naani gîkaraga ndeeni yenu na kaingo bûkaraga bûkeneete mûno. 12 Yathana rîakwa narîo i rîrî, endanagaani ta bûra mbwendeete. 13 Gûtirî wendo bûkûrûkîîte muntû kûruta mwoyo wake n'ûntû bwa acoore baake. 14 Na i biû acoore baakwa wegua bûkaarûthaga bûra nkûbwîra. 15 Ntibwîta aruti ngûgî kaîrî, n'ûntû mûruti ngûgî atimenyaga mûbango wa mûnene wake. Ndîbwîta acoore baakwa n'ûntû biû ndabwîra bunthe kûrû, bûra Baaba aambîîrîîte. 16 Ti biû bwanthuurire. I niû ndaabûthuurire, ndabwathûra ndabûtuîkithia ba kwongeera maciaro nkûrûki, kwongeera kûra gûtagîtaûka. Na kaîrî, kaingo Baaba abwaa kîonthe kîra bûkaamûromba kwa riîtwa rîakwa. 17 Yathana rîakwa kîrî biû i bwendanage.”
Kûmenwa kwa arutwa ba Yiesû n'antû ba nthîgûrû
18 Yiesû eera arutwa baake, “Wana bara barî ba nthîgûrû babûmena, i bwiyî i niû baamenire mbere. 19 Ûkeegua bûgwatanagîra nabo babwenda, n'ûntû wîgua bûrî baciao. Îndî n'ûntû bwa bûra ndaabûthuurire kuuma kîrî kîrîndî gîku kîonthe, babûmeneete bûra bûtarî baciao. 20 Ririkanagaani bûra ndaabwîrire atî, ‘Nkombo t'yo îrî gîtûmi nkûrûki ya mûnene wayo.’ Ûkoona baannyamaariirie, wana biû bakabûnyamaaria. Na ûkoona baathîkîîre kiugo gîakwa, wana biû bakaathîkîra bwabeera kîo. 21 Bakaabûnyamaaria n'ûntû bwakwa, i kwîgua batiiyî ûra antûmîîte. 22 Ûtiîgua bagîtarîrwa marî meeyia ûkeegua ntaaya mbaria nabo. Îndî îîndî bûra kûrî, bationa bwa kwîgwatia boonania batirî na meeyia. 23 Ûra ammeneete kinya Baaba namûmeneete. 24 Ûtiîgua bagîtarîrwa marî meeyia, ûkeegua ntaarûtha mantû matoororûthwa kaîrî i muntû ûngî bakîonaga. Îndî îîndî bûra kûrî, i boonire mara ndaarûthire, îndî amwe na ûgu baammena na baamena Baaba. 25 Îndî narîo, gûkarîkîîte ûgu kaingo bûra kwandîkîîtwe *Maandîkooni maao Maatheru bûûyûra; ara kwandîkîîtwe, ‘Baammeneete woogu mana maatheri.’