Kîîwîthîre kîa Ayaundi na watho bwa Ngai
7
1 *Afarisai bamwe na aarimû bamwe ba watho ba kuuma Njerusaremu beethîranîra Yiesû. 2 Boona arutwa bamwe ba Yiesû bakîrîa irio na njara irî na mûgiro n'ûntû bataithambîîte. 3 Afarisai na Ayaundi batirîa irio batambîîte kûthamba njara baithiria mûgiro kûringana na kîîwîthîre gîa akûrû baao. 4 Bakauma thokooni batirîa gîntû bataambîîte kûthamba njara mbere. Na barî na mawîthire mangî ma mîthemba na mîthemba mara bathingataga ta kûthambagia ikombe, nyûngû, mbakûri [na ûrîrî].a5 Afarisai babu na aarimû babu ba watho baûria Yiesû, “I mbi n'ûntû arutwa baaku batakûthingata kîîwîthîre gîa akûrû beetû? I kî n'ûntû bakûrîa bataambîîte kûthamba njara mbere?”
6 Yiesû abacookeria abeera, “Isaya naaroriirie mantû meenu bwega, biû eebwithia baba! Aandîkire auga,
‘Antû baba baankumagia na tûnyua akî,
nkoro ciao irî kûraaya mûno naani.
7 N'ûtheri bangongaga, mantû mara barutanaga
i maathana magûtuîgwa n'antû.’
8 “Bûtiganaga na maathana ma Ngai bûkathingata kîîwîthîre gîa antû.”
9 Yiesû abeera, “Bûrîona ta mantû meega mamu bûrûthaga, rîra bûregaga maathana ma Ngai kaingo bûthiingata kîîwîthîre kîenu? 10 Musa aandîkire auga, Ngai augire, ‘Tîîyaga abaagu na nyûkwe.’ Na aacooka kaîrî aandîka, ‘Ûra akaaruma îthe kana gina abuîrîîte aûragwa.’ 11 Îndî ûrutaniini bwenu biû buugaga, muntû nwa arege gûteethia îthe kana gina na arî na gîntû abateethia nakîo, bunka akabeera gîntû gîku i ‘Kurubani’,b kana i gîa kûrutîra Ngai. 12 Na kûringana na ûrutani bwenu bûtiîtîgîîrîîtie muntû ta ûyu ateethia îthe kana gina kaîrî. 13 Kûringana na kîîwîthîre kîenu bûtionaga ntheto ya Ngai îrî gîtûmi. Na kûrî mantû mangî maingî ta mamu bûrûthaga.”
14 Yiesû aacooka eera kîrîndî, “Nthikîîriani bwinthe bwîgue na bûciûre bûra nkuuga. 15 Gîntû kîra kîthûngagîra kîrî muntû kiumîîte ome gîtiûmba kûmwîkîra mûgiro. Îndî bûra buumaga kîrî muntû i bu bûûmba kûmwîkîra mûgiro. [ 16 Ûra arî na matû neegue.]”c
17 Yiesû akuuma kîrî antû aathi aathûngîra nyomba. Arutwa baake bamûûria abeere bûra eendaga kuuga na ngerekano înu. 18 Yiesû abaûria, “Anga wana biû nwabu bûrî baarige ûûgû? Ka bûtaiyî atî, kîra kîthûngagîra kîrî muntû kiumîîte ome gîtiûmba kûmwîkîra mûgiro 19 n'ûntû gîtithûngagîra nkorooni, i nda kîthiiyaga na nyumaani gîkauma gîgateegwa kîorooni?” (Kwoogu irio bia mîthemba yonthe ibiagîrîte. Yiesû naabitheriirie.)
20 Yiesû aathi na mbere, auga, “Bûra buumaga ndeeni ya muntû, i bu bûûmba gûtûma muntû agwatwa i mûgiro, 21 n'ûntû nkorooni ya muntû i ku kuumaga mantû ta meeciiria maathûûku, ûmaramari, wamba, ûûragani, 22 ûthûngîîri, wîrirîîria bûûthûûku, moothûûku, wenania, mantû ma îgi, rûriitho, gûtuyanîîra, wîkumia, na ûtaku. 23 Mantû mamu monthe maathûûku maumaga ndeeni ya muntû. Na i mo matûmaga muntû agwatwa i mûgiro.”
Wîtîgio bwa mûka Mûfoenîcia
24 Yiesû akuuma naagu aarî, aathi gûntû kwarî akubî na taûni cietagwa Turo na Sindoni. Agûkinya noogo aathûngîra nyomba. Ateenda muntû nwa ûmwe amenya ara aarî, îndî gûtaûmbîkana. 25 I kwarî na mûka ûmwe kaarî gaake kaathûngîrîtwe i kîrundu kîîthûûku. Mûka ûyu akwîgua Yiesû aagwetwa, aathi warîo amûturîria maru agu magûrûûni. 26 Mûka ûyu ataarî Mûyaundi. Aaciarîrîtwe gûntû gweetagwa Foenîcia. Mûka ûyu aûria Yiesû eengatie kîrundu gîku kîîthûûku kîathûngîrîte kaarî gaake, kiume.
27 Yiesû amwîra, “Ga twana twambe tûrîe, tûbae. Ti bwega kûgerera kurû irio bia twana.”
28 Mûka ûyu amwîra, “Bûbu bu n'ûmma, Mwathani. Îndî wana kurû nirîyaga tûng'enyua tûra tûgwîyaga rungu rwa meetha twana tûkîrîa.”
29 Yiesû eegua ûgu amwîra, “N'ûntû bwa ûgu wauga, mwekûrû, kîrundu kîra gîkûthûngîrîte kaarî gaaku gîkuuma, înûka.” 30 Mûka ûyu aacooka mûciî. Agûcooka eethîra kaarî gaake kamaami ûrîrî, kîrundu kîra gîakathûngîrîte kiumire.
Yiesû ooria gîpûra kîarî maamu
31 Yiesû akuuma Turo aageendeera Sindoni, eendama aathi bwa îria rîa Gariiri, aathi gûntû gweetagwa Ndikaporis. 32 Antû bamwe baareeta gîpûra kîarî maamu. Baûria Yiesû aigîîre muntû ûyu njara, amworie.
33 Yiesû aarutaruta muntû ûyu kîrî antû baathi gataaria. Amwîkîra biara matû, aacooka aatuîra mata njara, amûtongithia rûrîmî. 34 Aacûûba îgûrû, aanogokeera. Auga, “Efatha.” Kuuga ûgu i kuuga, “Rugûka.” 35 Akuuga ûgu, warîo matû ma muntû ûyu maarugûka, kîra kîathaîkîîte rûrîmî rwake kîatharûka, muntû ûyu aatua kwaria atarî na thîîna.