Yiesû ooria muntû aarî na kîrundu kîîthûûku
5
1 Yiesû na arutwa baake baathi baakinya rûgongo rûra rûngî rwa îria, nthîgûrû ya Angeraca. 2 Yiesû agûkinyûka îtarûûni ûgu, aarîîkana na muntû ûmwe aarî na kîrundu kîîthûûku aumîîte makurunguuni, kûra antû baakuû baathikagwa. 3 Muntû ûyu aakaraga gûku makurunguuni mamu na antû ibaarî bakûnoga i kûmûthaîka kinya na nyororo agîtuîkagia. 4 I maita maingî mûno oogagwa na nyororo magûrû na njara, îndî woogwa agaituîkangia ikagwa naara. Gûtirî muntû akîûmba kûmûmaarîîria. 5 Mûthenya na ûtugû aakaraga naagu makurunguuni mamu na irîmaani akîringaga gîtuma, agîîtemangaga mwîrî wake na nthengeecû cia maiga.6 Muntû ûyu akwonera Yiesû kûûraaya, augia rwîro, aathi aagwa magûrûûni maake. 7 Auga na inya, “N'ata ûkwenda naani, Yiesû, Mwana wa Ngai ûra atûûraga îgûrû mûno. Itû ngûkwereka kwa riîtwa rîa Ngai, menya ûnnyamaaria.” 8 Muntû ûyu augire ûgu n'ûntû Yiesû naarî akwîra kîrundu gîku kîarî kîrî we kiume.
9 Yiesû amûûria, “Wîtagwa ata?”
Muntû ûyu amwîra, “Mbîtagwa ‘Mbûtû,’ n'ûntû ntirî ninka tûrî mûkondo.” 10 Kîrundu gîku gîakaîra Yiesû mûno gîkîmwîraga atigakîîngate kiuma gûntû gûku.
11 Akubî na bantû agu i kwarî na ngûrwe inyingî ciarîîthîîtue kîrîmaani. 12 Kîrundu gîku kîereka Yiesû kîamwîra, “Twîre tûthi ngûrweeni iira.”
13 Yiesû agîîtîgîîria. Irundu bibu biauma kîrî muntû ûyu biathûngîra ngûrweni. Ngûrwe inu cionthe ciaugia ciîndamîîte na mpara, ciemina îriani ciaûra na rûûyî. Ciarî ngûrwe ta ngiri ciîrî. 14 Bara bairîthîîtie bakwona ûgu baugia, baatoorooka. Baathi baatambia ntheto inu taûni na ntûûraani. Antû baathi kwîbonera bûra mantû mamu maakarakari. 15 Bakûthi kîrî Yiesû kwîbonera, beethîra muntû ûyu aatûûraga arî na mbûûtû ya irundu biithûûku akari nthî, eekîrîte nguo, na kîongo gîake gîtarî ûntû. Baatua kwîgua ûguaya.
16 Bara booneete mantû mamu magîkarîka i bo beerire antû bûra gwakarîkire kîrî muntû ûyu aarî na irundu biithûûku, na bûra ngûrwe ciakarire. 17 Antû baatua kwîra Yiesû aume kwao. 18 Yiesû agûtwa îtarûûni athi, muntû ûyu aarî na irundu biithûûku amûûria kana akîenda bakathi n'we. 19 Îndî Yiesû amûregeera. Amwîra, “Înûka ûkeere antû beenu bûra Mwathani akûrûthîra, akwîgua kîao.”
20 Muntû ûyu akuuma agu, aathiire aanjîîria kwanga akîîraga antû ba naagu Ndikaporis mantû mamu Yiesû aamûrûthîîre. Antû bonthe baarigara bakwîgua.
Yiesû ooria kaarî ka Njairû na mûka aaruaga nthakame
21 Yiesû aacooka bwa rûgongo rûra baumîîte. Agûkinyûka îtarûûni, eethîranîrwa i kîrîndî gîa antû agu rûteere rwa îria. 22 Mûtongoria ûmwe wa *sinagoogi eetagwa Njairû aaya eegwîthia nthî magûrûûni maake. Amwereka mûno akîmwîraga, “Kaarî gaakwa karî akubî gûkua i kwayua. 23 Itû ncû tûthi ûgakaigîîre njara kabue, gacooke mwoyo.”
24 Yiesû baanjîîria kûthi. I kwarî na ntundu înene ya antû yamûthingatîîte îkîmwinyîkaga. 25 Na ntunduuni înu i kwarî na mûka aayîîtue ndwari ya kûrua nthakame mîanka îkûmi na îîrî. 26 Mûka ûyu naanyamaarîîte mûno agîcûa kûragûrîrwa abua. Naathiîte kîrî ndagitaarî baingî atakûbua, eenyangia into biake bionthe nabo. Bantû abua, ndwari yake nîatororagîria.
27 Mûka ûyu neegîîtue mantû ma Yiesû. Kwoogu aaya nyuma yake arî mûkondooni ûyu wa antû, aatonga nguo yake 28 akîîbîîraga na nkoro, “Ngatonga nwa nguo yake yonka, nkaabua.”
29 Agûtonga nguo ya Yiesû ûgu, nthakame îra yaruaga yatiga warîo. Aathikîîria eegua akwora. 30 Yiesû eegua kûrî inya yamuuma. Aûndûka aûria antû, “N'ûû aantonga nguo?”
31 Arutwa baake bamwîra, “Nûkwona bûra kîrîndî gîkwinyîkîîte bûgana na nûkûûria n'ûû agûtonga?” 32 Yiesû akûraitha oona ûra aamûtongire.
33 Mûka ûyu n'ûntû naiyî n'we aarî, aaya aagwa nthî magûrûûni ma Yiesû akiinainaga n'ûguaya, eera Yiesû ûmma bungwa. 34 Yiesû amwîra, “Wîtîgio bwaku bûgûtûma wora. Ithi na ûkiri, mwarî wakwa. Thîîna yaku îkûthira kûrû na itigûcookera kaîrî.”
35 Yiesû wakîaragia woogu, atûmwa baaya kîrî Njairû baumîîte mûciî wake. Bamwîra, “Nootanyamaaria mûrutani, kaarî gaaku gagûkua.”
36 Yiesû akwîgua atûmwa babu bakîîra mûtongoria ûyu ûgu, amwîra, “Ûtikaamake, îgua ûrî na wîtîgio.” 37 Yiesû ateetîgîîria kûthiiyania na muntû ûngî, tatiga Petûrû, Njakubu, na mûruagina Njoana.
38 Bagûkinya kwa mûtongoria ûyu wa sinagoogi, beethîra antû bakîrîraga na bamwe bakiugagîîria na inya îra nene. 39 Yiesû aathûngîra nyomba. Abaûria, “I kû thîîna îrî îra îgûtûma bûrîra ûûgû? Kaana gaka ti gakuû i kamaami.” 40 Yiesû akuuga ûgu, antû boona ta gûtarî bu augaga. Yiesû abaruta gûku bonthe. Baathûngîra gûku kaana kaarî barî na îthe wa kaana gaku, gina, na arutwa bara baake aarî nabo.
41 Yiesû aagwata kaana gaku njara. Auga, “Taritha, kumi!” Tûgîtaûra, kuuga ûgu i ta kuuga, “Kaarî, ka ngûkwîra ûkîîra!” 42 Kaarî gaku gaûkîîra warîru, kaanjîîria kwanganga gûku. Kaarî na ûkûrû ta bwa mîanka îkûmi na îîrî. Babu baarî na Yiesû bakwona ûgu baarigara mûno. 43 Yiesû abakaania mûno abeera batikeere muntû mantû mamu. Auga kaarî gaku keewe gîntû gîa kûrîa.