Gûkumia Mwathani n'ûntû bwa kîao gîake
135
1 Kumiani Mwathani!Kumiani riîtwa rîa Mwathani,
mûkumieni biû aruti ngûgî ba Mwathani,
2 biû bara bûrutaga ngûgî Nyomba ya Mwathani,
kîaragooni kîa nyomba ya Ngai wetû.
3 Kumiani Mwathani, n'ûntû Mwathani n'ûmwega,
Inaani bûgîkumagia riîtwa rîake, n'ûntû bûbu i bwega!
4 N'ûntû Mwathani n'ethurîrîte Njakubu atuîka wake,
Isiraeri îtuîka ûtonga bwake bwa gîtûmi.
5 N'ûntû imbiyî Mwathani n'ûmûnene,
Mwathani wetû n'ûmûnene nkûrûki ya ngai ira îîngî cionthe.
6 Mwathani arûthaga wa bûra bûmûkenagia,
îgûrû na nthîgûrû,
mariani na mborokerooni cionthe.
7 N'we ûtûmaga matu meetia kuuma mîthia ya nthî,
agatûma rweni rwenia na mbura yura,
na akareeta ruuo kuuma biandaani biake.
8 Nwa we aûragire biîmbere bionthe bia Miisiri,
bia antû amwe na bia nyamû.
9 Aatûma biama biake na magegania gatîgatî ka Amiisiri,
îgûrû rîa Faraû na aruti ngûgî baake bonthe.
10 Aaringa mîgongo imiingî
na aûraga anene baarî na inya mûno.
11 Sioni mûnene wa Amori,
Ogu mûnene wa Mbasani,
na anene bonthe ba Kanaani.
12 Na aneenkanîra nthîgûrû inu ciao bûrî ûkua,
bûrî ûkua kîrî antû baake Isiraeri.
13 Yîî Mwathani riîtwa rîaku rîtûûraga tene na tene,
rîririkanagwe i nthuke cionthe.
14 N'ûntû Mwathani agaatuunyûkia antû baake,
na egîîrue aruti ngûgî baake kîao.
15 Mîbuanaano ya mîgongo i thaabu na fetha,
îra îrûthîîtwe na njara cia antû.
16 Îrî na tûnyua îndî îtiaragia,
îrî na meetho îndî îtionaga.
17 Îrî na matû îndî îtiîgagua,
kana îbeeba na tûnyua twayo.
18 Bara bamîrûthaga bagaakara t'yo,
na nwa ta bu kîrî bara bonthe bamîîtîgagia.
19 Antû ba Isiraeri kumiani Mwathani,
woû mûciî wa Arûni kumiani Mwathani,
20 mûciî wa Rawi kumiani Mwathani,
biû bûmûtîîyaga, mûkumieni.
21 Mwathani arookumua arî Sayuuni,
we ûra ûtûûraga Njerusaremu.
Kumiani Mwathani.