Mwathani nairigîrîîte antû baake
Rwîmbo rwa antû beetîîtie Njerusaremu kûgonga.
125
1 Bara beetîgagia Mwathani bakari ta Kîrîma gîa Sayuuni,kîra gîteenyenyeka îndî gîtûûraga tene na tene.
2 Wa ta bûra irîma bicîgîîrîîtie Njerusaremu,
woogu nwabu Mwathani airigîîrîîte antû baake,
kuuma îîndî ûûgû mwanka tene na tene.
3 Mûraagi wa antû bara bathûûku ûtiathana
nthîgûrû îra îgaîrîîtwe bara baagîru,
kaingo babu baagîru batataambûrûkia,
njara ciao barûtha ûthûûku.
4 Rûthagîra antû bara beega mantû meega, woû Mwathani,
bara baagîru nkorooni ciao.
5 Îndî bara bagarûkangaga bagacooka njîraani ciao ira nkîîgamu,
Mwathani akabatongorokania bathiiyanie na bara barûthaga mantû maathûûku.
Ûkiri bûrookaraga îgûrû rîa Isiraeri.