119
1 Kîthaarimo i kîrî bara mûtûûrîre wao ûtarî ûguute,bara bathiiyaga kûringana na watho bwa Mwathani.
2 Kîthaarimo i kîrî bara bamenyeerete mookûûyî maake,
bara bamûceragia na nkoro ciao cionthe,
3 Bara batarûthaga ûthûûku nwa bûrîku,
îndî bathiyaga na njîra cia Mwathani!
4 Woû nûtûnenkerete maathana maaku,
kaingo tûmamenyagîîra bwega.
5 Ata rî, ûtakîîgua mîkarîre yakwa îrî îmîega,
nkamenyagîîra maathana maaku!
6 Rîru i rîo ntagîa îgi,
n'ûntû meetho maakwa makeethîrwa maraithîîte bwega maathana maaku.
7 Ngagûcookagîria nkaatho na nkoro întambûrûku,
ndeerutana maathana maaku mara matheru.
8 Nkamenyagîîra maathana maaku,
itû menya ûûya gûntiganîria.
9 N'ata mwana ûmwîthî aûmba kwaiga mîkarîre yake îrî îmîtheru?
I na njîra ya gûtûûra kûriingana na kiugo gîaku.
10 Ngûceragia na nkoro yakwa yonthe,
ûtikaareke mbenyeenya mbuumauma maathanaani maaku!
11 Mbaigîîte kiugo gîaku nkorooni yakwa ndeeni,
ntikaaye kwîyia kîrî woû.
12 Ûrookumagua, woû Mwathani.
Ndutana mawatho maaku.
13 Ingweteete na kanyua gaakwa,
mawatho monthe mara warîîtie na kanyua gaku.
14 Inkenagîîra kûthiingata mawatho maaku,
ta bûra muntû akenagîîra ûtonga bwingî.
15 Nkathûganagîria mawatho maaku,
na ntarîîrie bwega njîra ciaku.
16 Ngakeneera maathana maaku.
Na ntiiriganîrua i kiugo gîaku.
17 Ndûtha bwega, niû mûruti ngûgî waku,
kaingo ntûûra mwoyo na mbathîkagîra moorutani maaku.
18 Nkunûra meetho kaingo mbona,
mantû ma kûrigaria mara marî wathooni bwaku.
19 Niû ndî mûgeni nthîgûrû,
menya ûmbitha maathana maaku.
20 Nkoro yakwa ninogeete i gweteera,
yîîgua mawatho maaku îgiita rîonthe.
21 Nûgondokagîra eekumia, bara barume
na bara bataathîkagîra maathana maaku.
22 Nthirîria irumi na kûmenwa,
n'ûntû imenyeereete maathana maaku.
23 Kinya anene bakambîndîra njûri,
niû mûruti ngûgî waku nkathûganagîria mawatho maaku.
24 Nkenagîîra mawatho maaku,
n'ûntû i mo mampeyaga ûkûrû.
25 Nkurumeene mûthetuuni ndî ûmûciindîîre,
ndiûkia wa ta bûra kiugo gîaku kiugîîte.
26 Rîra ndaumbûrire mara monthe ndûthîîte, n'wambîgiirue,
ndutana mawatho maaku.
27 Tûma nciûkîrwa bwega i maathana maaku,
nkarage nkîthûganagîria ngûgî ciaku cia kûrigaria.
28 Nkoro yakwa îrî na kîeba,
mbîkîra inya wa ta bûra kiugo gîaku kiugîîte.
29 Menya ûreka nthi na njîra îtarî mbega,
n'ûntû bwa ûtugi ûndutane mawatho bwaku.
30 Inthuurîte njîra ya mma
na ndeetîgîîria mawatho maaku mantongoragia.
31 Ndîbigîkanîtie na mawatho maaku itû Mwathani,
menya ûûya kûreka ngîa îgi.
32 Nkarûthaga wa bûra maathana maaku makuuga,
n'ûntû ûkandutana mamenye bwega.
33 Mwathani nteethia kûthingata maathana maaku,
kaingo mathingata mwanka mûthia.
34 Nteethia gûciûkîrwa bwega kaingo menyeera watho bwaku,
mbumenyagîîre na nkoro yakwa yonthe.
35 Nteethia nthingate njîra îra maathana maaku maugîîte,
kaingo nkaraga nkeneete.
36 Îkîra nkoro yakwa wîru bwa kwathîkîra watho bwaku,
na ti bwa gwîcwîra ûtonga.
37 Kaania meetho maakwa kûraithagîîria mantû matarî na gîtûmi,
na ûmenyeere ûtûûro bwakwa kûringana na kiugo gîaku.
38 Ûyûrîria mûruti ngûgî waku wîrane bwaku
kaingo ûtîîyagwa.
39 Nthirîria îgi na irumi bira nkuthûkaga,
n'ûntû mawatho maaku imeega.
40 Inkwenda mûno kwathîkagîra maathana maaku,
ntûûria mwoyo n'ûntû bwa ûtheru bwaku.
41 Mwathani, wendo bwaku bûra bûtathiraga ibûnkinyîre,
na wonokio bwaku wa ta bûra uugîîte.
42 I rîo ûkeegua ndî na îcookio kîrî bara bandumaga,
n'ûntû i mbîtîgîîtie kiugo gîaku.
43 Teethia kanyua gaakwa kwaragia ûmma îgiita rionthe,
n'ûntû wîrîgîîro bwakwa bunthe bûrî maathanaani maaku.
44 Nkaathîkagîra maathana maaku rîonthe,
yîî, tene na tene.
45 Na nkathiyaga ndî ûmûthaûre,
n'ûntû i mbathîkîrîîte moorutani maaku.
46 Na nkeranaga mookûûyî maaku mbere ya anene
na ntiigia îgi,
47 n'ûntû i nkenaga i maathana maaku,
na i mendeete.
48 I mbendeete na gûtîîya maathana maaku,
na rionthe nkeerekagîria mathûgania maakwa mawathooni mara wathanîîte.
49 Ririkana wîrane bwaku bûra werire mûruti ngûgî waku,
n'ûntû i bûmpete wîrîgîîro.
50 I bu kîmbûmagîîria rîra nkûnyamaara,
atî wîrane bwaku i bûtûmîîte ngatûûra mwoyo.
51 Antû bara eekumia na bataiyî Ngai bakaraga bakîndumangaga,
îndî ntiigarûka mbuuma wathooni bwaku.
52 Ndaririkana bûra watuyanagîra magamba kuuma tene,
imbûmagîîria Mwathani.
53 Inkûthûûra mûno n'ûntû bwa bara bathûûku,
bara baunaga watho bwaku.
54 Watho bwaku i bûtuîkîte rwîmbo rwakwa,
wa ara ndararaarîîra.
55 Mwathani, ndirikanaga riîtwa rîaku kinya ûtugû,
na nkamenyeera maathana maaku.
56 Kîthaarimo gîkî kîmbûyîîrîîte n'ûntû imenyeereete watho bwaku.
57 Mwathani n'we îgai rîakwa,
na i nthiîtîîtie kûmenyeera biugo biaku.
58 Ingûkûromba na nkoro yakwa yonthe,
ûmbîgîîrue kîao wa ta bûra uugîîte.
59 Rîra nthûgaanagîria njîra ciaku,
ngarûraga mûkarîre wakwa ûkathingatana na mawatho maaku.
60 Nkayiûka na ntiiceererwa,
kwathîkîra maathana maaku.
61 Kinya nkagwatwa i mîtego ya bara bathûûku,
ntiriganîrua i watho bwaku.
62 I mbindûkagîra gûgûkumia ûtugû gatî,
n'ûntû bwa watho bwaku bûtheru.
63 Ndî mûcore wa bonthe bara bagûtîîyaga,
na wa bara bamenyagîîra mawatho maaku.
64 Mwathani, nthîgûrû îno yûyûri wendo bwaku bûra bûtathiraga,
ndutana maathana maaku.
65 N'ûrûthîrîte mûruti ngûgî waku bwega,
kûganaana na kiugo gîaku Mwathani.
66 Ndutana kûmenya na kwathûranaga mantû bwega,
n'ûntû i mbîtîgîîtie maathana maaku.
67 Mbere ntiranyamaarua i ndabîtangagia mûno;
îndî îîndî imenyagîîra kiugo gîaku.
68 Woû ûrî ûmwega na ûrûthaga wega,
ndutana maathana maaku.
69 Eekumia na bara bataiyî Ngai ibambakaga magi,
îndî niû menyagîîra maathana maaku na nkoro yakwa yonthe.
70 Nkoro ciao itiathûranaga wega na ûthûûku,
îndî niû i nkenaga i watho bwaku.
71 I bwarî ûntû bwega kûnyamaara kûra ndaanyamaarire,
kaingo ndîîrutana mawatho maaku.
72 Kîrî niû watho bwa kanyua gaaku i bwega,
nkûrûki ya ngiri cia thaabu na fetha.
73 I njara ciaku ciambûmbire na ciandûtha ûgu nkari,
nteethia gûciûkîrwa kaingo mbûmba kwîrutana maathana maaku.
74 Bara bagûtîîyaga bambona bagakena,
n'ûntû mbîrîgîîrîîte kiugo gîaku.
75 Imbiyî Mwathani ûtuuyanagîra magamba bwega,
na ûûnyamaarîîtie n'ûntû bwa gwîtîgîka gwaku.
76 Wendo bwaku bûra bûtathiraga bûrombûûmagîîria,
wa bûra wîrane bwaku bûkari kîrî mûruti ngûgî waku.
77 Mbîgîîrua kîao kaingo ntûûra,
n'ûntû watho bwaku i bu bûnkenagia.
78 Eekumia baroogîa îgi
n'ûntû bwa gûntuîrîîra ntarî na meeyia,
îndî niû ndîtua kûthûgaanagîria mawatho maaku.
79 Bara bagûtîîyaga ka baaye kîrî n'yû,
kaingo bamenya mawatho maaku.
80 Nkoro yakwa îroîgua îtarî na ûthûûku îgûrû rîa mawatho maaku,
kaingo ntagîa îgi.
81 Nkoro yakwa n'înogeete i gûgweteera ûmbonokia,
mbîrîgîîrîîte kiugo gîaku.
82 Meetho maakwa i manogeete i kûraitha wîrane bwaku,
mbûûragia, “Irî ûkambooreria?”
83 N'ûntû nkari ta îthatwa ntoogooni,
amwe na ûgu ntiriganîrîîtue i mawatho maaku.
84 Mûruti ngûgî waku akaûmîîria mwanka rî?
Irî ûkagambithia bara banthîînagia?
85 Eekumia i bambînjîrîîte marinya,
bara batathingataga watho bwaku.
86 Mawatho maaku monthe imawîtîgîka,
antû barînthîînia gûtarî na gîtûmi, nteethia!
87 Baarî akubî kûmbûraga,
îndî ntitiganîrîîtie mawatho maaku.
88 N'ûntû bwa kîao gîaku, onokia ûtûûro bwakwa,
kaingo nthiingata mawatho mara warîîtie.
89 Kiugo gîaku Mwathani gîtûûraga tene na tene,
kîrûngi kîrikîîte îgûrû.
90 Wîtîgîka gwaku gûtûûraga kîrî nciarwa cionthe,
waigîîte nthîgûrû bantû aayo na n'îtwîre îrikîîte.
91 Gûkûrûkîîra watho bwaku bitwîre kinya îmunthî,
n'ûntû into bionthe birî ruungu rwa watho bwaku.
92 Ûkeegua watho bwaku bûteegua bûrî gîkeno gîakwa,
wîgua ndaakuire i thîîna ciakwa.
93 Ntikooro ndiganîrua i maathana maaku,
n'ûntû gûkûrûkîîra mo n'ûntwîrie mwoyo.
94 Mbonokia, n'ûntû ndî waku,
n'ûntû indîîrutîîte kûgwata maathana maaku.
95 Antû bara bathûûku ka bambeteereete bambûraga,
îndî niû ndîîthûgaanîria mawatho maaku.
96 I menyeete ûntû bunthe bûrî na mûthia,
îndî maathana maaku matirî mûthia.
97 I mbendeete watho bwaku mûno!
Mbuthûgaanagîria mûthenya unthe.
98 Maathana maaku matûmaga mbûgîa nkûrûki ya anthû baakwa,
n'ûntû ndî namo rîonthe.
99 Ndî na kîrîra nkûrûki ya aarimû baakwa bonthe,
n'ûntû nthûgaanagîria mawatho maaku.
100 Inciûkagîrwa nkûrûki ya akûrû,
n'ûntû imenyeereete maathana maaku.
101 Indîîrigîîrîîtie kûthingata njîra inthûûku,
kaingo mbûmba kwathîkîra kiugo gîaku.
102 Ntaagarûka ntiga mawatho maaku,
n'ûntû woû wengwa n'ûndutanîîte.
103 Biugo biaku birî mûrîo mûno kîrî niû,
birî mûrîo nkûrûki ya ûkî!
104 Ingwataga ûûme kuumania na maathana maaku,
kwoogu inthwîre mûthiîre uunthe ûmûthûûku.
105 Kiugo gîaku i taa ya magûrû maakwa
na werû bwa njîra yakwa.
106 I nthiîtîîtie na ndanyua muuma,
ndauga nkaathîkîra mawatho maaku maagîru.
107 Îî Mwathani, inthangîkîîte mûno,
cookanîîria ûtûûro bwakwa, wa ta bûra waugire.
108 Îî Mwathani, îtîgîîria nkaatho ciakwa,
na ûûndutane mawatho maaku.
109 Ûtûûro bwakwa bûrî ûgwatiini rîonthe,
îndî ntiiriganîrua i watho bwaku.
110 Antû baathûûku bambigîrîîte mûtego,
îndî ntitiganîrîîtie mawatho maaku.
111 Mawatho maaku i rûgai rwakwa tene na tene,
i mo gîkeno gîa nkoro yakwa.
112 Mberekereetie nkoro yaakwa kûrûthaga wa bûra watho bwaku buugîîte,
rîonthe, tene na tene.
113 Inthwîre antû ba nkoro ciîrî,
îndî i mbendeete watho bwaku.
114 I woû wîbitho bwakwa na rong'o yakwa,
kiugo gîaku i kîo mbîrîgîîrîîte.
115 Umaani akubî naani, biû bûrûthaga mantû maathûûku,
kaingo mbûmba kûmenyeera maathana ma Ngai waakwa.
116 Ûngwatîîre kûringana na wîrane bwaku, kaingo ngaatûûra mwoyo,
na ûtikaareke ngîa îgi n'ûntû bwa wîrîgîîro bwakwa.
117 Nkaragia, naani nkeegua ndî mayîîga,
na ntîîyage mawatho maaku rîonthe.
118 N'ûregeete bonthe bara baunaga mawatho maaku,
n'ûntû kwîbenia kûra beebenagia i kwa ûtheri.
119 Bonthe bara barûthaga ûthûûku nthîgûrû îno, ûbathûkagia ta rûko.
Kwoogu i mbendeete mawatho maaku.
120 Inkwinaina n'ûguaya n'ûntû bwa gûgûtîîya,
ingûkuthûka mawatho maaku.
121 Mantû mara ndûthîîte i mara meega na maagîru,
ûtigantiganîrie na bara bambinyagîîria.
122 Nenkera mûruti ngûgî waku wîrane bwa gûtûma akara bwega,
na ûtikaareke bara beekumagia bambinyîîria.
123 Metho maakwa makûûra wa mbeteereete wonokio bwaku;
na kûûyûrua kwa wîrane bwaku bûûtheru.
124 Rûthira mûruti ngûgî waku kûringana na wendo bwaku bûra bûtathiraga,
na ûûndutane mawatho maaku.
125 N'ûntû ndî mûruti ngûgî waku tûma nciûkîrwe,
kaingo menya mawatho maaku.
126 Kagiita i gakinyîîte gaku woû Mwathani kûruta ngûgî,
n'ûntû watho bwaku i bûbuune.
127 Na mma i mbendeete maathana maaku,
nkûrûki ya thaabu, kinya nkûrûki ya thaabu îra nkeembe.
128 I kîo nthûkagia mawatho maaku marî ma mma,
Inthwîre njîra cionthe ira nthûûku.
129 Moorutani maaku i ma kûrigaria,
kwoogu nkoro yaakwa n'îmaathîkagîra.
130 Bûra werecaga mantû i bûtîmaga menya werû,
i kûreetagîra bara bia ûmenyo.
131 Mbatîkîîtie kanyua gaakwa nkîbeebaga,
n'ûntû bwa weteera maathana maaku.
132 Ngarûkîra na ûmbîgîîrue kîao,
wa ta bûra bûrî wîthîre bwaku kîrî bara beendeete riîtwa rîaku.
133 Rikia magûrû maakwa wa ta bûra wîrane bwaku bûkari,
na ûtikaareke ûthûûku bûmbûûmba.
134 Mbonokia ntige kûnyamaarua n'antû,
naani mbathîkagîre mawatho maaku.
135 Tûma ûthiû bwaku bûthararîre mûruti ngûgî waku,
na ûndutane maathana maaku.
136 Metho maakwa marîtûûra meethori ta miuro ya rûûyî,
n'ûntû antû batikwathîkîra mawatho maaku.
137 Woû Mwathani ûrî ûmûtheru,
na mawatho maaku imaatheru.
138 Mawatho mara ûnenkanîrîte,
i ma mma buru na i maganîîru.
139 Mûthûûro wakwa gwankanaga ndeeni yakwa ta mwanki,
n'ûntû anthû baakwa i bareganîîte na kiugo gîaku.
140 Nûntû wîrane bwaku i bûûtheru mûno,
mûruti ngûgî waku nabuendeete.
141 Ndî muntû ûmûniini i kîo n'ûntû nkûmenwa,
amwe na ûgu ntiriganagîrua i moorutani maaku.
142 Ûtheru bwaku i bwa tene na tene,
na watho bwaku i bwa mma.
143 I ngwetwe n'inyamaara na thîîna,
îndî maathana maaku i mo maangwîragia.
144 Mawatho maaku i maagîru tene na tene,
mpa gûciûkîrwa kaingo ntûûra mwoyo.
145 I ngûkûrîrîra na nkoro yakwa yonthe, ncookeria Mwathani,
na nkaathîkîra mawatho maaku.
146 I ngûkûrîrîra, mbonokia
na nkamenyeera mawatho maaku.
147 Mbûkagîîra rûkîîrî mbere kwereerûka nkîrîragîra ûteethio,
mbaigîîte wîrîgîîro bwakwa kiugooni gîaku.
148 Meetho maakwa makaraga marancûkîîtie mathaa monthe ma ûtugû,
kaingo nthûgaanîria wîrane bwaku.
149 Thikîîria kayû gaakwa n'ûntû bwa wendo bwaku,
n'ûntû bwa wagîru bwaku, itû Mwathani, menyeera mwoyo wakwa.
150 Bara bambîîndagîra njûri barî akubî naani,
na barî aaraaya na watho bwaku.
151 Îndî woû ûrî aakubî, Mwathani,
na maathana maaku i ma mma.
152 Tene i ndeerutanire na mawatho maaku,
mara warûngamiirie matûûra tene na tene.
153 Raitha wone kûnyamaara gwakwa, ûmbonokie
n'ûntû ntiriganîrîîtue i watho bwaku.
154 Ndwîrîîra na ûmbonokie,
ndigîîria ntigaakue n'ûntû bwa wîrane bwaku.
155 Wonokio bûrî aaraaya na bara bathûûku,
n'ûntû baticeragia mawatho maaku.
156 Kîao gîaku i kîînene, Mwathani,
ndigîîria ntigaakue kûringana na mawatho maaku.
157 Anthû bara baanyamaaragia i baingî
îndî ntiathûkîra kuuma maathanaani maaku.
158 Ndaithagîîria bara batagwîtîgîîtie na kabûthia,
n'ûntû batiathîkagîra kiugo gîaku.
159 Ene bûra mbeendeete maathana maaku
Mwathani, ndigîîria ntigaakue kûringana na wendo bwaku.
160 Biugo biaku bionthe i bia mma,
mawatho maaku matheru i ma gûtûûra tene na tene.
161 Aathani baanyamaaragia gûtarî na gîtûmi,
îndî nkoro yakwa n'inainaga i n'ûntû bwa gûtîîya kiugo gîaku.
162 Nkenagîîra wîrane bwaku
ta muntû ûra eethagîra into bia gûtaa.
163 Inthwîre na nkamena ûrongo
îndî i mbeendeete watho bwaku.
164 Ngûkumagia maita mûgwanja wa îra ntugû
n'ûntû bwa maathana maaku maagîru.
165 Bara beendeete watho bwaku barî na ûkiri bûûnene,
na gûtirî gîntû kîûmba kûbakooria.
166 Mbetagîîra wonokio bwaku, woû Mwathani,
na nkaûyûria mawatho maaku.
167 Nkoro yakwa n'yathîkagîra mawatho maaku,
n'ûntû i meendeete mûno.
168 I mbathîkagîra mawatho na watho bwaku,
n'ûntû nwiyî mîkarîre yakwa yonthe.
Îromba n'ûntû bwa gûcwa ûteethio
169 Kîrîro gîakwa kîroogûkinyîra Mwathani,
nenkera gûciûkîrwa kûringana na kiugo gîaku.
170 Maromba maakwa marogûkinyîra,
mbonokia kûringana na wîrane bwaku.
171 Ka mîromo yakwa îgûkumagie,
n'ûntû n'ûndutanaga mawatho maaku.
172 Ka rûrîme rwakwa rwinage îgûrû rîa kiugo gîaku,
n'ûntû mawatho maaku monthe i maagîru.
173 Njara yaku îroîgua îîthuuranîrîte gûnteethia,
n'ûntû i nthuurîîte mawatho maaku.
174 Mbetagîîra wonokio bwaku, woû Mwathani,
na watho bwaku i kîo gîkeno gîakwa.
175 Ga ntûûre mwoyo kaingo ngûkumia
na watho bwaku bûntethie.
176 Mbangîîte ta ng'ondu îmbûru.
Nceria niû mûruti ngûgî waku,
n'ûntû ntiriganagîrua i mawatho maaku.