Îromba rîa gûcookia nkaatho n'ûntû bwa kûûmbana
118
1 Cookeriani Mwathani nkaatho, n'ûntû n'ûmwega.Wega bwake bûrî wendo bûtûûraga tene na tene.
2 Aisiraeri i bauge,
“Wendo bwake bûtûûraga tene na tene.”
3 Antû ba mûciî wa Arûni i bauge,
“Wega bwake bûrî wendo bûtûûraga tene na tene.”
4 Bara nabo batîîyaga Mwathani bauge,
“Wega bwake bûrî wendo bûtûûraga tene na tene.”
5 Ndî kînyamaarani indakayîîre Mwathani,
Mwathani n'aancookerie na aantharia.
6 Mwathani n'we mûnteethia, ntiîgua ûguaya.
N'ûû ûmbûûria?
7 Mwathani arî amwe naani, n'we mûnteethia,
na nkaaraitha mbone anthû baakwa bagûcindwa.
8 Kaaba kwîbitha kîrî Mwathani
nkûrûki ya kwîgwatia muntû.
9 Kaaba gwîtîgia Mwathani
nkûrûki ya kwîrîgîîra anene.
10 Mîgongo yonthe n'yanthiûrûkîrîte,
kwa inya ya Mwathani ndabathiria bonthe.
11 I banthiûrûkîrîte, bancereera mbarî cionthe,
îndî kwa inya ya Mwathani ndabathiria.
12 Bancerereete ta njûkî,
nthûti îmwe baagwa nkororima ta mwanki ûkûbîîthagia nyaki.
Kwa inya ya Mwathani ndabathiria bonthe.
13 Indagerirwe mûno kaingo ngwa nthî,
îndî Mwathani n'we aanteethia.
14 Mwathani n'we inya yakwa, na rwîmbo rwakwa,
na n'we aambonokeetie.
15 Nyîmbo cia nkena na cia ûûmbani n'ikwinwa
maremaani ma antû bara baagîru.
“Inya ya Mwathani n'yo yarûtha ûgu,
16 Inya yake îgûtûreetera ûûmbani
inya yake îînene îkûrûtha mantû manene.”
17 Ntiikua, îndî ngaatûûra mwoyo,
na mbuge bûra Mwathani arûthîîte.
18 Mwathani n'ankaanûkîîtie mûno,
îndî atandekeeria nkua.
19 Ndugûrîra mîîrîga ya wagîru,
kaingo nthûngîra oogo ncookeria Mwathani nkaatho.
20 Ûyû i mwîrîga wa kûthi kwa Mwathani,
bara baagîru n'ogo bagakûrûkîîra.
21 Ingûgûcookeria nkaatho, n'ûntû bwa kwîgua maromba maakwa,
na n'ûntû i woû ûmbonokeetie.
22 Iiga rîra rîongwa aaki baaregire,
îîndî i rîo rîtuîkîîte rîa koona.
23 I Mwathani atûmîîte ûntû bûbu bûkarîka,
na tûbuonaga bûrî bwa magegania.
24 Îno n'yo ntugû îra Mwathani abangîîte,
tûkeneeni na tûgwîrue n'yo.
25 Itû tûgûkwereka, Mwathani twonokie
Tûgûkwereka Mwathani, t'wee ûtonga
26 N'ûmûthaarime ûra aayîîte riîtwani rîa Mwathani!
Tûrî kûthaarima kuuma Nyomba ya Mwathani.
27 Mwathani n'we Ngai,
na n'atûmîîte werû bwake bûtûthararîra.
Reteeni kîgongwana aaga mbere
na bûgîtûûgîîrie kîthînjîrooni.
28 I woû Ngai wakwa, na ngagûcookeria nkaatho.
I woû Ngai wakwa, naani nkeera antû mantû ma ûnene ngagûkumia.
29 Cookeriani Mwathani nkaatho, n'ûntû n'ûmwega.
Wega bwake bûrî wendo bûtûûraga tene na tene.