5
Gool ci owowone ol cik a̱tu̱ Ta̱mu̱ta̱dde̱n
1 Ma i̱ye̱le̱k e̱e̱t ci a̱ddi̱ki̱re̱ utug, abarik ti̱lo̱ utuge ci alali kiwagon ming ozozik baatunne. Gga̱m logoz wak kidik kiwagon ming a̱ti̱ri̱zi̱ gotonoggu. 2 Ti̱ri̱z ma̱ti̱yo̱ cik nga̱ye̱k kiwagon ming a̱gga̱mi̱ yatunne, imma dooli cik nga̱ye̱k, gga̱m nogo kiwagon ming anyai ngonoggu.
Ti̱ri̱z ngaai cik boyek ju̱rru̱m
3 Ti̱ri̱z ngaai cik boyek wak iróng anyak ol cik eela nogo. 4 Anyik dooli cik ngaa ci boye ki dooli cik dooli ciginnek keeltta nonno, eci ming u̱tu̱gu̱zzo̱ nege ki i̱yo̱ko̱, atalne Ta̱mu̱ta̱dde̱n zo̱ze̱ necu. 5 Aarik ngaa ci boye a̱zze̱ rok e̱e̱t co̱de̱ ci eela to zinin Ta̱mu̱ta̱dde̱n, ala nonno tu̱p kaal. 6 Imma ngaa ci boye aminye ele cinne, ogon ki ci a̱da̱ha̱ ming ngen aruge nu̱nu̱n. 7 Benek ngaai cik boyek ti̱lo̱wi̱ne̱t cu, kar atin iróng ol angany nogo. 8 Imma ming iróng e̱e̱ti̱ azunne tatug cinne̱ng, ommogje ol cik ce̱e̱z cinne, utubur enne zoz ci a̱tu̱we̱ ol Ta̱mu̱ta̱dde̱n, ommog abarik enne e̱e̱t ci ngen kelema Ta̱mu̱ta̱dde̱n.
9 Teherik zar cik ngaa ci boye waraga wa engere ngaai cik boyek da̱i̱ne̱t ming u̱zzu̱cca̱ e̱rki̱nya̱ ciginnek moten torkonom, kar bo̱do̱k iróng ngen arumze ki e̱e̱t imma. 10 Anyik bo̱do̱k ol ku̱du̱ktta̱ bunnat cinne, ki zoz ci azi ne, azunne ba̱li̱ye̱ dooli ju̱rru̱m, i̱i̱rke̱, a̱gga̱m erenok wak a̱tu̱we̱ ju̱rru̱m, kar gon keela boyyok.
11 Ma̱i̱je̱ ngaai wak boyek ngen een uturtta, ma eherik zar cigge̱k waraga wa engere ngaai cik boyek da̱i̱ne̱t, eci ming i̱tta̱zza̱k zi̱nze̱tti̱ ol cik macik, orongit ti̱ye̱ne̱t, utuburet abarik zoz ci Ki̱ri̱sto̱. 12 Aridak e̱le̱tti̱ ba̱ci̱ ci ovvo ol ettedik nogo, eci abure tu̱we̱ne̱t zoz ci Ye̱su̱ Ki̱ri̱sto̱ bali elemi nege arrak ke̱. 13 Kar gon ku̱lu̱cce̱t orog to eci i̱llo̱i̱ gi̱i̱ ci ogoni. Abarik aggir volong kar kilamtozzik no̱ngi̱tto̱n cik ollu kar ku̱du̱ktta̱ zoz ci iróng agano ki zoz.
14 Korongi ngaai cik boyek wak ngen een uturtta ki̱ti̱ktte̱ kar ki̱ti̱rtta̱ dooli bak azune ju̱rru̱m, kar zin moddena iróng ngen arane. 15 Cin da̱, anyak ngaai cik boyek wak een uturtta u̱gge̱ utuburet zoz ci Ta̱mu̱ta̱dde̱no̱ unuwet zoz ci Sitano. 16 Ming anyak ngaa ci a̱tu̱we̱ ngaane cik boyek tatuge cinne̱ng, anyik keela nogo, abunna iróng anyike ol wak a̱li̱ngli̱ng Ce̱e̱ze̱ ci Ta̱mu̱ta̱dde̱no̱ li̱ngli̱ngo̱n ci atame nogo. Kar zin keela ngaai cik boyek a̱zze̱ e̱e̱ti̱ ci eela to.
Ti̱ri̱z lo̱ddi̱ki̱re̱ cik Ce̱e̱z ci Ta̱mu̱ta̱dde̱no̱ ju̱rru̱m
17 Anyik ol cik a̱tu̱we̱ ki̱ti̱ri̱zze̱t lo̱ddi̱ki̱re̱ cik a̱li̱ngli̱ng Ce̱e̱ze̱ ci Ta̱mu̱ta̱dde̱no̱ ju̱rru̱m eci nege a̱li̱ngli̱ng ju̱rru̱m. Ommogje ming uwahek ol kar ke̱de̱me̱zzi̱t zoz ci Ta̱mu̱ta̱dde̱no̱. 18 Azi zoz ci Ta̱mu̱ta̱dde̱no̱ ne, “Ma alami tuwayoit ngati obonye tang,” kar bo̱do̱k, “Ma a̱ju̱ra̱ke̱ ol cik a̱li̱ngli̱ng o̱ro̱bi̱ya̱ cigge̱k li̱ngli̱ngo̱nta̱k.”a 19 Ma elemi zoz ci a̱du̱wa̱ e̱e̱ti̱ co̱de̱ ngati ovolonge zare cik ddi̱ki̱ryo̱i̱t ci Ce̱e̱z ci Ta̱mu̱ta̱dde̱no̱, orong bbaccak rama icima i̱i̱yo̱. 20 Imma ol wak anyak mu̱nye̱n, gerenyek vocek zoz orgene ci ollu kar ol do̱o̱k ko̱to̱ngo̱o̱ltte̱ gerza ming ogon mu̱nye̱n.
21 Ki̱lo̱ti̱n Ti̱mo̱te̱yo̱ zare cik Ta̱mu̱ta̱dde̱no̱ ki cik Ye̱su̱ Ki̱ri̱sto̱ ki cik anjilonya wak Ta̱mu̱ta̱dde̱no̱, zuute lo̱ti̱nno̱k wak ka̱du̱wa̱ki̱ ke̱, ma ahali ol. Ti̱ri̱z ol do̱o̱k ju̱rru̱m. 22 Ma avileke e̱e̱t imma li̱ngli̱ngo̱n ci Ta̱mu̱ta̱dde̱no̱ ming ngen gga̱ nonno ju̱rru̱m, ma i̱zzo̱ mu̱nye̱n cik ol u̱gge̱, zuute ele kize caala paz.
23 Ma ngen audi maam do̱, taar merte cidici kar keela keng cunne eci gon i̱nna̱ omori keng.