4
U̱zzu̱tte̱ de̱me̱zzo̱k wak edemez ol volong
1 U̱du̱wa̱ Vongizi wa A̱li̱le̱ zoz de̱de̱, anyak atin vu̱rrta̱ ol cik odotik lo̱o̱c de̱mzi̱ne̱t ci a̱tu̱we̱ ol Ye̱su̱ ki Ta̱mu̱ta̱dde̱n, abarik ovvo azunne de̱mzi̱ne̱t ci een volong anyaha kuulo cik lo̱rye̱nta̱k. 2 Edemez demezyaha ne̱ke̱ ol wak a̱tu̱we̱ zoz ci volongo, edemez volong neci a̱li̱b lo̱o̱c ke̱, ki̱zzi̱ ngatinne̱ng rok a̱lya̱n. 3 Edemez nege ol zoz ci azi ne, “Gerza rucenet, ma bo̱do̱k adakku da̱i̱ne̱t u̱gge̱.” Abarik ka̱gga̱ eenycak Ta̱mu̱ta̱dde̱n da̱i̱ne̱t ne̱ke̱ ol cik diirik, ming ovvo ol wak a̱tu̱we̱ adakce, ala arrak Ta̱mu̱ta̱dde̱n kar kaanyik zany, kar zin kadakto ngati nege a̱gga̱ de̱me̱zi̱ne̱t wa een de̱de̱. 4 Abunna da̱i̱ne̱t cik adimana Ta̱mu̱ta̱dde̱n do̱o̱k, i̱llo̱i̱ gi̱i̱ ci gerze, ming kadak da̱i̱ne̱t ngati arrak kalayye Ta̱mu̱ta̱dde̱n kar zin kaanycik zany, i̱llo̱i̱ kaal cik kabure. 5 Adiman zoz ci Ta̱mu̱ta̱dde̱no̱ ki lawinet nonno da̱i̱ne̱t ne̱ke̱ ki̱li̱le̱c.
Du̱ca̱i̱t ci Ye̱su̱ abunna
6 Ming edemzike i̱nna̱ ti̱lo̱wi̱ne̱t ba̱li̱ye̱ ol wak a̱tu̱we̱, e̱e̱ni̱ atin du̱ca̱i̱t ci abunna ngati Ye̱su̱ Ki̱ri̱sto̱, adaizi i̱nna̱ ele ogon ki i̱yo̱ko̱ ming adaizi i̱nna̱ ele zo̱ze̱ ci a̱tu̱we̱ Ta̱mu̱ta̱dde̱n ki de̱mzi̱ne̱t wa een de̱de̱ azunne i̱nna̱ ko̱, ki e̱e̱ti̱ ci adaizi ele da̱i̱nte̱. 7 Ngera zin ele cunne nga̱ri̱de̱te̱ cik gerzek adang zoz ci Ta̱mu̱ta̱dde̱no̱, cik iróng agano ming i̱zzo̱ iin. Abarik demezek ele zoz ci Ta̱mu̱ta̱dde̱no̱ odohize. 8 Ming edemezi i̱nna̱ vi̱ra̱ ele abunna oroot, imma de̱mzi̱ne̱t baiz ci Ta̱mu̱ta̱dde̱no̱ eelannet go̱o̱lo̱we̱ cik meelek. Anyak baizi ci Ta̱mu̱ta̱dde̱no̱ bunnat oroot, eci aanyyet i̱yo̱ko̱ baiz ci abunna ki ci atirena. 9 Een zoz ci ku̱du̱wa̱ ko̱ de̱de̱, a̱gga̱mtta̱ zi̱nze̱ti̱nne̱ ju̱rru̱m. 10 Imma zin zo̱ze̱ cu, ka̱li̱ngli̱ng oroot, eci karikka zi̱nze̱tti̱ baiz ci Ta̱mu̱ta̱dde̱no̱, wa een Ti̱ri̱zo̱i̱t wa ollu do̱o̱k, ommogje ol wak a̱tu̱ nonno.
11 Gga̱m ti̱lo̱wi̱ne̱t necu ju̱rru̱m kar zin demez ol zo̱ze̱ necu. 12 Ma anyike ol kibbezttin eci i̱nna̱ e̱e̱ni̱ idica, abarik anyik ol cik a̱tu̱we̱ kicinet gool ci uwahe i̱nna̱ Ta̱mu̱ta̱dde̱n, gool ci owowonu ki ol, gool ci ireze Ta̱mu̱ta̱dde̱n ki ol, gool ci a̱tu̱we̱ Ta̱mu̱ta̱dde̱n, ki gool ci abahe labak. 13 Arik zinin cunne ke̱bi̱ne̱t zoz ci Ta̱mu̱ta̱dde̱no̱ ki lawinet, ki de̱mzi̱ne̱t ol zoz neci zee nginti kobodane rok i̱nne̱ta̱. 14 Ma uungi arizet bali aanyi Ta̱mu̱ta̱dde̱n ke̱, bali amuda go̱o̱le̱ ci a̱du̱wa̱ki̱ a̱ri̱to̱i̱ti̱ ci zoz cinne, kar lo̱ddi̱ki̱re̱ cik Ce̱e̱z ci Ta̱mu̱ta̱dde̱no̱ kalayyei Ta̱mu̱ta̱dde̱n. 15 I̱no̱n zo̱zzo̱k cik ka̱du̱wa̱ki̱ ko̱ odohize, li̱ngli̱ng ju̱rru̱m kar kicinnet ebere do̱o̱k ming u̱u̱li̱ i̱nna̱ de̱de̱. 16 Zuute ele cunne ki kaal cik edemezi ko̱. Tu̱gu̱ kaal balik ki̱lo̱ti̱ki̱ ke̱. Ming u̱tu̱gu̱ niko, a̱ti̱ri̱zi̱ ele cunne ki ol cik aziknin bu̱k.