3
Baiz ci ddi̱ki̱ryyo̱k wak Ce̱e̱z ci Ta̱mu̱ta̱dde̱no̱
1 Zoz zin wa een de̱de̱ icu: Ming arik e̱e̱ti̱ zinin orong kize alaan ci ce̱e̱z wa Ta̱mu̱ta̱dde̱no̱, li̱ngli̱ngo̱n ci abunna oroot. 2 Abunna zin alaani ci ce̱e̱z wa Ta̱mu̱ta̱dde̱no̱ een e̱e̱t ci abak baiz ci iróng anyak mu̱nye̱n. Abunna bo̱do̱k ming o̱de̱ ngaa ṯok niko. Abunna ming een u̱wa̱kco̱i̱t, abariz no̱ngi̱tto̱n ju̱rru̱m, abunna ming i̱i̱rke̱, abunna ming elemi de̱mzi̱ne̱t. 3 Gerza ming een e̱e̱t ci een bba̱kco̱i̱t, gerza ming avaraci gaganiko. Abunna abarik ming een e̱e̱t ci gununi. Kar zin iróng irez o̱ro̱bi̱ya̱. 4 Abunna ming een e̱e̱t ci abal orog wainne ju̱rru̱m, kar dooli kiziyet ti̱lo̱wi̱ne̱t wainne ju̱rru̱m kar bo̱do̱k ko̱to̱ngo̱o̱ltte̱ nonno. 5 Ming iróng e̱e̱ti̱ abal orog wainne ju̱rru̱m, iróng wo̱ye̱ azunne ol wak a̱tu̱we̱ Ce̱e̱ze̱ ci Ta̱mu̱ta̱dde̱no̱.
6 Ma anyikku e̱e̱t ci a̱tu̱we̱ jor ki̱ddi̱ki̱r Ce̱e̱ze̱ ci Ta̱mu̱ta̱dde̱no̱. Ming anyciu nonno ki̱ddi̱ki̱r, okko atin odong ele kar zin kapahozik ba̱ci̱ ki bali lo̱rye̱nti̱. 7 Abunna bo̱do̱k ming irez ol wak iróng a̱tu̱we̱ nonno, ming iróng ol ne̱ke̱ elemi nonno, ogon ki ci edeteke lo̱rye̱nti̱ nonno lo̱vi̱di̱t.
Baiz ci ol wak een kuye a̱li̱ngli̱ng Ce̱e̱ze̱ ci Ta̱mu̱ta̱dde̱no̱
8 Abunna zin bo̱do̱k ol wak een kuye Ce̱e̱ze̱ ci Ta̱mu̱ta̱dde̱no̱ ming e̱e̱ggi̱n ol cik abak baiz ci a̱zi̱ze̱. Gerza ming etted ebere, icima a̱bu̱re̱ merta. Gerza ming a̱bu̱re̱ o̱ro̱bi̱ya̱i̱. 9 Abunna ming a̱gga̱m zoz wa tu̱we̱nto̱ ju̱rru̱m zi̱nze̱ti̱nne̱ cik caalek paz. 10 Iróng kanyike e̱e̱t kize kuye ming ngen kicinet baiz cinne. Korota arrak oowa baiz cinne abahe ki ol ka̱gga̱c ju̱rru̱m. Ming anyak baiz ci a̱zi̱ze̱ kar zin a̱gga̱mtte̱k li̱ngli̱ngo̱n kize kuye. 11 Anyik ngaai cik ol wak een kuye kabait baiz ci abunna, iróng ozoz ol volonga. Anyik kizeto gunune kar ku̱zu̱tte̱ zoz ci Ta̱mu̱ta̱dde̱no̱ ju̱rru̱m.
12 Anyik e̱e̱t ci een kuye a̱li̱ngli̱ng Ce̱e̱ze̱ ci Ta̱mu̱ta̱dde̱no̱ ki̱ti̱k ngaa co̱de̱ ṯok niko. Kar zin kabal dooli ki orog wainne do̱o̱k ju̱rru̱m. 13 Aruba ol wak e̱e̱ggi̱n een kuye Ce̱e̱ze̱ ci Ta̱mu̱ta̱dde̱no̱ ming a̱li̱ngli̱ng ju̱rru̱m, tinawinet ci abunna olle. Kar zin nege kinimet zoz ci Ta̱mu̱ta̱dde̱no̱ olle tu̱we̱nta̱ wanne̱ng ngati a̱tu̱we̱ Ye̱su̱ Ki̱ri̱sto̱ wa atahalai.
Zoz wa titinyi tu̱we̱nte̱ wanna
14 Korongi anna bu̱k eliya ki̱ki̱ya̱ ki̱vo̱ni̱n, ma i̱yo̱ko̱ keheriki ti̱lo̱wi̱ne̱t warage cu ko̱ 15 ming iróng ngen kayiha ataman. Korongi ki̱ye̱la̱i̱ gool ci abahe ol wak a̱tu̱ zoz ci Ta̱mu̱ta̱dde̱no̱. Een ol wak a̱tu̱ zoz ci Ta̱mu̱ta̱dde̱no̱ ko̱ boor ci Ta̱mu̱ta̱dde̱no̱, nogo cik a̱gga̱m zoz ci Ta̱mu̱ta̱dde̱no̱ kiwagon rooti ming i̱i̱ti̱r le̱be̱le̱, abile zoz ci Ta̱mu̱ta̱dde̱no̱ lo̱o̱ta̱ ngatinne̱ng.
16 I̱llo̱i̱ gi̱i̱ imma ci ommog li̱ngli̱ngo̱n wa obod ki gool wa Ta̱mu̱ta̱dde̱no̱ bali arrak alugnye ke̱. I̱ye̱la̱i̱ Ye̱su̱ wa atahalai lo̱o̱ta̱ kize e̱e̱t ci diiri. Kar zin ki̱ye̱la̱ Vongizi wa Ta̱mu̱ta̱dde̱no̱ bunnat wainne kize de̱de̱ enne Ngerrti Ta̱mu̱ta̱dde̱no̱. Kar zin anjilonya wak Ta̱mu̱ta̱dde̱no̱ bu̱k kicinet nonno. U̱wa̱ktte̱k ol zoz wa obod ki nonno lo̱o̱cco̱k do̱o̱k. U̱tu̱we̱t zin ol cik meelek lo̱o̱cco̱k do̱o̱k, kar zin Ta̱mu̱ta̱dde̱n kodong nonno kuuwe ta̱mu̱-kenga.