2
Gool ci kalawe Ta̱mu̱ta̱dde̱n
1 Korongnyung zin arrak oowa alayozik ol do̱o̱k kar keela Ta̱mu̱ta̱dde̱n, kar aanycik Ta̱mu̱ta̱dde̱n zany kaale wak ogonik enne nogo. 2 Alayyek Ta̱mu̱ta̱dde̱n alaat cik abal lo̱o̱c ki ol wak a̱ddi̱ki̱re̱ abal ol, ki ol wak abal nege, kar kabait labak go̱o̱le̱ ci kireze Ta̱mu̱ta̱dde̱n zi̱nze̱ti̱nne̱ cik abunna. 3 Abunna zin ming kogon niko kar katal Ta̱mu̱ta̱dde̱n wanna een Ti̱ri̱zo̱i̱t. 4 Orong Ta̱mu̱ta̱dde̱n ol do̱o̱k kurubta ruget, kar ka̱gga̱c zoz wa een de̱de̱. 5 Ngiwa kanyahe Ta̱mu̱ta̱dde̱n co̱de̱ ṯok, kanyak bo̱do̱k e̱e̱t co̱de̱, Ye̱su̱ Ki̱ri̱sto̱ wa atahalai o̱de̱ ṯok kar kaganiz ol cik diirik ki Ta̱mu̱ta̱dde̱n. 6 Aanyik zin enne ele cinne ku̱ru̱we̱ ka̱da̱k kar kaara ol mu̱nye̱n. 7 Atahala Ta̱mu̱ta̱dde̱n kar kize zoc ki to̱ni̱a̱t ci kedemezek ol cik iróng een Yo̱u̱d tu̱we̱ne̱t ci een de̱de̱. Iróng kovolongi, ka̱du̱wa̱ zoz ci een de̱de̱.
8 Korongi ol wak macik a̱tu̱we̱ do̱o̱k kalayyo kabanycek azzin wak a̱li̱le̱ Ta̱mu̱ta̱dde̱n tu̱we̱nta̱. Ming ovvo ala Ta̱mu̱ta̱dde̱n Odongek azzin, gerza ming anyak kaal cik gerzek zi̱nze̱ti̱nne̱. Orong arrak ming agano ki e̱e̱t imma ci da̱ oyoho iróng ngen audo maam bu̱k.
9 Korongi bo̱do̱k ngaai ki̱ti̱i̱me̱t ru̱u̱ma̱ni̱ cik abunna iróng adak o̱ro̱bi̱ya̱ cik meelek, iróng e̱e̱ggi̱n ru̱u̱ma̱ni̱ cik u̱tu̱ri̱k ki̱ye̱ltta̱i̱ vaana. Gerza ming a̱bbu̱k otir. Gerza ming aburuc zu̱rte̱ne̱n ki alben cik i̱rra̱ne̱. 10 Abunna ngaai wak a̱tu̱ Ta̱mu̱ta̱dde̱n ming eela ol. 11 Anyik ngaai wak a̱tu̱ zoz ci Ta̱mu̱ta̱dde̱no̱ kizeto gunune kar ke̱de̱me̱zzi̱t kaal cik meelek ngati ijaine, kar ka̱gga̱c ngatinne ce̱e̱za̱. 12 Iróng korongi ngaa ci edemez e̱e̱t ci maci icima kar a̱gga̱ma̱ baiz. Abarik anyik kiziyo li̱m. 13 Eenyca ri̱t ba̱li̱ye̱ Ta̱mu̱ta̱dde̱n Adam oowa kar zin ketehenya Eeva vu̱rrta̱. 14 Iróng bo̱do̱k ba̱li̱ye̱ een Adam nenen ci alaba lo̱rye̱nti̱, ngaa ci ba̱li̱ye̱ alaba lo̱rye̱nti̱ kanyahak ba̱ci̱ ol lo̱o̱ta̱ do̱o̱k. 15 A̱ti̱ri̱z atin Ta̱mu̱ta̱dde̱n ngaai go̱o̱le̱ ci aritane dooli, ming Emena nege tu̱we̱nta̱ ki rezinet Ta̱mu̱ta̱dde̱n kar kabaito baiz ci A̱li̱le̱.