Ti̱mo̱te̱yo̱ 1
Waraga wa oowu eherik Pa̱u̱lo̱ Ti̱mo̱te̱yo̱
1
Zawinet
1 Ki̱tto̱na̱ki̱ waraga cu anna Pa̱u̱lo̱ to̱ni̱a̱t ci Ki̱ri̱sto̱ Ye̱su̱, atahala Ta̱mu̱ta̱dde̱n Ti̱ri̱zo̱i̱t kar kize zoc ci Ye̱su̱ Ki̱ri̱sto̱, okko atin aanyyet ruget wa aave udut.
2 Keheriki i̱nne̱t Ti̱mo̱te̱yo̱ wa e̱e̱ni̱ ngeranni de̱de̱ tu̱we̱nta̱. Kala Ta̱mu̱ta̱dde̱n Be̱e̱ti̱nna̱ ki Manyitinna Ye̱su̱ Ki̱ri̱sto̱ kar kaanyi eezet ki a̱vvu̱ze̱t ci aave labak.
Zuute ol wak edemez volong
3 Korongi la̱du̱n i̱i̱ bali kokkoye o̱rge̱ ci een Macedonia ke̱, a̱vvu̱ i̱nna̱ o̱rge̱ ci een Evesos kar gerenyek ol wak edemezek ol wak a̱tu̱we̱ zoz ci een volong. 4 Ma anyike ol ne̱ke̱ kecebtta ol wak a̱tu̱we̱ o̱o̱tti̱ nga̱ri̱de̱te̱ wak reentik ki borzet wa obod ki ji̱ji̱ti̱gga̱c, ma̱rri̱t kaala ne̱ke̱ ming anyaha dangonet ci gerze do̱ niko. Iróng dangonet neci eela e̱e̱t imma kabak baiz ci a̱tu̱we̱ Ta̱mu̱ta̱dde̱n zinine ci abunna.
5 Keheraki zin waraga cu kar ti̱lo̱ ol wak a̱tu̱ Ye̱su̱ kireztto zi̱nze̱ti̱nne̱ cik voorik per, kar ki̱no̱ni̱t kaal cik abunna go̱o̱le̱ ci i̱no̱ni̱ne̱ ol wak a̱tu̱ Ta̱mu̱ta̱dde̱n de̱de̱. 6 Utungtek zin demezyaha uggak de̱mzi̱ne̱t ci Ta̱mu̱ta̱dde̱no̱ lo̱o̱c, abarik u̱u̱ktto̱ ki dangonet ci ozoze darace. 7 Orong kizeto de̱me̱zzo̱k cik ti̱lo̱wi̱ne̱t wa Musesi, iróng zin nege e̱le̱tti̱ne̱ a̱gga̱ zo̱zzo̱k cik a̱du̱wa̱ ko̱, iróng bo̱do̱k a̱gga̱ u̱nge̱tti̱ cik de̱mzi̱ne̱t neci.
8 Ka̱gga̱ ri̱t naga do̱o̱k niko ming abunna lo̱ti̱nno̱wa̱ ngati ka̱li̱ngli̱nge̱ go̱o̱le̱ ci abunna Ta̱mu̱ta̱dde̱no̱. 9-10 Eci ka̱gga̱ niko iróng lo̱ti̱nno̱wa̱ een cik ol cik abunna, abarik e̱e̱ggi̱n cik ol wak een i̱rrki̱ryo̱k ki giilcak, ki ol wak mu̱nye̱nu̱, ki wak abure zoz ci Ta̱mu̱ta̱dde̱no̱, ki wak a̱ru̱k be̱e̱ti̱gge̱k ki e̱e̱ti̱gge̱k kadaito, ki ol wak orooto ki ngaai, ki ol cik macik otodo kiwagon ming oogin ol ki ngaai, ki ol wak ogoroz dooli cik ollu koot kutuyyui, ki ol wak e̱e̱ggi̱n volongnyok, ki ol wak iróng a̱du̱wa̱ zoz ci een de̱de̱ ngu̱me̱ ci Ta̱mu̱ta̱dde̱no̱, ki ol wak abure de̱mzi̱ne̱t wa een de̱de̱. 11 E̱e̱ggi̱n la̱du̱n lo̱ti̱nno̱wa̱ cik Musesi ko̱ cik a̱li̱ngli̱nge̱ go̱o̱le̱ ci orkor ki zoz ci ka̱di̱ngdi̱nge̱ Ta̱mu̱ta̱dde̱n bali amuca kaviyahe cik abunna kar kuwahek ol do̱o̱k.
Aanyik Pa̱u̱lo̱ Ta̱mu̱ta̱dde̱n zany ngati alalneke nonno mu̱nye̱n
12 Kanyik zin zany Manyitinna Ye̱su̱ Ki̱ri̱sto̱. Kanyik bo̱do̱k zany ngati a̱gga̱we̱ zinin cinanni ming karike nonno. Kar zin a̱gga̱ya̱ annit ke̱e̱ni̱ e̱e̱t ci abunna kar kaanya komiz ci ka̱li̱ngli̱nge̱ li̱ngli̱ngo̱n wainne. 13 Baling ka̱ggi̱di̱ ol wak a̱tu̱ zoz ci Ye̱su̱, kar zin kodom nonno nu̱nu̱n, ngen Ta̱mu̱ta̱dde̱n elemnanna de, alaleya mu̱nye̱n wagannik ma̱rri̱t ngen bali kelema zoz cinne, kar bo̱do̱k ngen ka̱gga̱ kaal ne̱k balik kogoni ke̱. 14 Aanya zin Manyitinna eezete wainne, tu̱we̱ne̱t ki rezinet wa karuba ngati Ye̱su̱ Ki̱ri̱sto̱.
15 Een zoz cu de̱de̱, orong kelemtta, i̱ki̱ya̱k Ye̱su̱ Ki̱ri̱sto̱ wa atahalai lo̱o̱c kar ki̱ki̱ya̱ ki̱ti̱ri̱z ol wak mu̱nye̱nu̱ ki bali ming ke̱e̱ni̱ anna e̱e̱t ci mu̱nye̱nu̱ kommogo ke̱. 16 Alaleya Ta̱mu̱ta̱dde̱n annit e̱e̱t wa mu̱nye̱nu̱ wa ommog veelek kar ol kicinta bunnat ci Ye̱su̱ Ki̱ri̱sto̱ ngatinanni, kar ol kicinnet laliz ci zinin ci Ta̱mu̱ta̱dde̱no̱. Kar ol cik a̱tu̱ zoz ci Ye̱su̱ kuruget udut. 17 Kala Alaan kar bo̱do̱k ki̱di̱ngdi̱nga̱ni̱t nonno wa abak udut, wa iróng a̱da̱i̱, wa iróng kacin eberene, nonno Ta̱mu̱ta̱dde̱n o̱de̱ ṯok! Ko̱to̱ngo̱o̱ltte̱ nonno udut. I̱i̱ny.
I̱lo̱t Pa̱u̱lo̱ Ti̱mo̱te̱yo̱
18 Ti̱mo̱te̱yo̱ wa e̱e̱ni̱ ngeranni tu̱we̱nta̱, kamitaneki zoz necu niko kar zuute ele olle wak edemezek gonoggi volong azi ne zoz ci a̱kku̱ Ta̱mu̱ta̱dde̱na̱. Kozozi zin niko ngibali a̱du̱wa̱ne̱ a̱ri̱tto̱wa̱ muluk ci a̱kku̱ Ta̱mu̱ta̱dde̱na̱ obod ki i̱nne̱ta̱. Zik ti̱lo̱wi̱ne̱t necu ju̱rru̱m kar nyak tu̱we̱ne̱t, abunna atin ming u̱u̱li̱ a̱ri̱tto̱k ne̱k edemez ol volong ke̱. 19 Anyak ol u̱gge̱ cik iróng arike tu̱we̱ne̱t zi̱nze̱tti̱, bak a̱ddu̱te̱ tu̱we̱ne̱t cinne̱ng ki i̱ra̱na̱ cik dho̱la̱k. 20 Ma̱i̱je̱ zin ol ne̱k ogon kaal ne̱ko̱ ko̱, ciko Emaniyas ki Alisanduru, kodoteya lo̱o̱c iróng ngen ki̱lo̱ti̱ nogo kar kedemez Sitani nogo gerza ming odom nege Ta̱mu̱ta̱dde̱n.