3
1 Gotonogga wak tu̱we̱nto̱, korongnyung alayettu Ta̱mu̱ta̱dde̱n kar kanyik zoz wa Manyonni kuzuca ol u̱gge̱ ataman ki baling azucanung o̱to̱ngo̱o̱lte̱ zoz cinne ke̱. 2 Alayettu Ta̱mu̱ta̱dde̱n kanyit kizeta reene olle wak gerze iróng abak baiz ci abunna. Orong zin enne de̱de̱ ol cik meelek a̱tu̱we̱. 3 Ma̱i̱je̱ Manyi abunna, ka̱gga̱yya̱ niko ming a̱a̱nyyu̱ng komiz kar zin bo̱do̱k kebehung ngati lo̱rye̱nto̱. 4 Ka̱gga̱yya̱ niko ming ebekung Manyi u̱zu̱tte̱ kaal balik ke̱de̱me̱zu̱ng ke̱ ju̱rru̱m. 5 Kala Manyi a̱a̱nyyu̱ng a̱gga̱c rezinet ol ki Ta̱mu̱ta̱dde̱n kar zin bo̱do̱k kalaltung zi̱nze̱tti̱ ki nimenet zoz ci Ki̱ri̱sto̱.
Gerza gu̱rrze̱t
6 Gotonogga ki ngonogga tu̱we̱nta̱, kerecanekung zare cik Manyitinna Ye̱su̱ Ki̱ri̱sto̱, e̱di̱ya̱ e̱le̱tti̱ ngati gotonogget wak a̱tu̱we̱ imma ngatu iróng a̱li̱ngli̱ngi̱. A̱gga̱mi̱t zoz wa li̱ngli̱ngo̱nto̱ bali ki̱lo̱ti̱ku̱ng ke̱ ju̱rru̱m. 7 Abunna ming a̱li̱ngli̱ngnyyu̱ ki bali gon naga ke̱. Iróng ba̱li̱ye̱ naga ke̱e̱ggi̱nna̱ gu̱rwa̱, baling kaavtte bu̱k ke̱. 8 Iróng ba̱li̱ye̱ kadakka da̱i̱ne̱t cik e̱e̱t imma ollin. Iróng ba̱li̱ye̱ korongnyya kuluteung kaal do̱o̱k kar a̱gga̱mte̱ttu̱. Ka̱li̱ngli̱ngnya̱ ba̱li̱ye̱ wazin ki ba̱a̱li̱n bu̱k oroot. 9 Kaburna wo̱ye̱ da̱ naga li̱ngli̱ngo̱n kar ka̱vvu̱tta̱ gaganiko, korongnyya zin ba̱li̱ye̱ ki̱ye̱ltte̱u̱ng baiz ci abahe ol wak a̱tu̱we̱. U̱tu̱gu̱z ki naga ko̱. 10 Ku̱du̱ktta̱u̱ng ri̱t ba̱li̱ye̱ kizeung ne, “Ming aave e̱e̱ti̱ ci a̱tu̱we̱ abure li̱ngli̱ngo̱n to, u̱ju̱rta̱i̱ da̱i̱ne̱t.” 11 Ka̱du̱wa̱kku̱ng zoz necu ma̱rri̱t ming kazikna azi ne, aavtte ol uggak ollin iróng a̱li̱ngli̱ng, eceba o̱o̱tti̱ kaale cik ogon ol uggak. 12 Karecanekka zin i̱yo̱ko̱ naga zare wak Manyi Ye̱su̱ Ki̱ri̱sto̱, ol wak iróng orong ki̱li̱ngli̱nge̱t kar keeltta e̱le̱tti̱ cigge̱k da̱i̱nte̱ ma̱ci̱gja̱. 13 Gonogga wak zininak, ma apirnannu zo̱ze̱ ci ogonnu kaal cik abunna. 14 U̱zu̱tte̱ e̱e̱t ci abure zoz ci keherakku̱ng naga ko̱ ju̱rru̱m. E̱de̱yya̱ e̱le̱tti̱ ngatinne kar kadait a̱lya̱ni̱. 15 Ma zin anyikku ku̱tu̱gu̱zzo̱ ki mo̱ddo̱, abarik i̱ti̱lo̱zzo̱ ki ming i̱lo̱ttu̱ ol u̱gge̱ ko̱.
Lawinet wa een vu̱rru̱t edeccane zoz
16 Kala zin Manyi wa atahalai wa anyaha gano, ka̱a̱nyu̱ng gano go̱o̱llo̱k do̱o̱k.
17 Keheri zin anna Pa̱u̱lo̱ a̱tte̱ cinanni kiwagon ko̱. 18 Kala Manyitinna Ye̱su̱ Ki̱ri̱sto̱ ka̱a̱nyu̱ng deten i̱ge̱t do̱o̱k.