2
Kaal wak atin i̱ye̱la̱i̱ i̱i̱ wa obodane Manyi
1-2 U̱du̱kta̱u̱ng da̱ i̱yo̱ko̱ ol uggak izeteung ne oboda Manyitinna Ye̱su̱. A̱nne̱kku̱ng obboc ol uggak ne kazikna ming uwahek e̱e̱ti̱ imma ol azi ne a̱du̱wa̱k Vongizi ci A̱li̱le̱, icima a̱nne̱kku̱ng ne kikeba waraganyai cik gon ki̱tto̱na̱ku̱ng ko̱. Ma zin anyikku e̱e̱t imma kalabaung izet tarbale. 3-12 A̱a̱dda̱ zoz bali ka̱du̱wa̱kku̱ng baling ngen kaavtte bu̱k ka̱nne̱kku̱ng ne, Akane arrak atin gerziten ci lo̱o̱tu̱ ngati aburnne ol Ta̱mu̱ta̱dde̱n kar zin Manyi Ye̱su̱ ki̱ki̱ya̱ vu̱rrta̱. I̱li̱ngli̱ng enne burnenet ci aburnne ol Ta̱mu̱ta̱dde̱n la̱du̱n. Atali abarik ol ming ogon kaal cik gerzek iróng abarik ngen a̱tu̱ Ye̱su̱ kar keela nogo. Ungna zin atin Ta̱mu̱ta̱dde̱n ol kelemtta volong ci Sitano arrak veelek. Ngen zin i̱yo̱ko̱ e̱e̱ti̱ imma alam e̱e̱t neci abure Ye̱su̱ ke̱ ngati a̱kku̱nne̱. Ming uk e̱e̱ti̱ neci utunga, i̱ki̱ya̱ e̱e̱ti̱ neci abure Ye̱su̱ ke̱. Ogone atin kaala cik meelek a̱vu̱la̱ u̱la̱l ol. A̱nne̱k atin ol ne ke̱e̱ni̱ Ta̱mu̱ta̱dde̱n kar zin ku̱ju̱ra̱i̱ ol tu̱we̱ne̱t ta̱mu̱ta̱dde̱ne̱t u̱gge̱. Anyik atin Ce̱e̱z wa Ta̱mu̱ta̱dde̱no̱ kize orgen. Ma̱i̱je̱ zin atin Ye̱su̱ obodak lo̱o̱c kar zin kidita nonno komize wainne. O̱to̱wo̱ni̱k atin e̱e̱ti̱ neci abure Ye̱su̱ ke̱ ki ol wak anu nonno abure abarik tu̱we̱ne̱t koot ngiwa atuzene ol wak mu̱nye̱nu̱.
A̱gga̱mi̱t zoz ci Ta̱mu̱ta̱dde̱no̱ ju̱rru̱m
13 Gonogga ki ngonogga tu̱we̱nta̱, kalayya Ta̱mu̱ta̱dde̱n kar bo̱do̱k kanyciyya zany odohize kaale cik ogonnu niga ko̱. Elemnyung Manyi zee katahalaung izet ol cik eela enne oowa. A̱a̱nyyu̱ng Vongizi ci A̱li̱le̱ elemtta zoz wa Ta̱mu̱ta̱dde̱no̱ een de̱de̱, nonno zin i̱yo̱ko̱ nenen ci a̱a̱nyyu̱ng izet dooli ciginnek. 14 A̱a̱nyyu̱ng zin Ta̱mu̱ta̱dde̱n elemtta zoz cinne baling kuwahekung naga kaviyak cik abunna ciginnek kar urubta ba̱a̱li̱ne̱t ci okko atin Manyitinna Ye̱su̱ Ki̱ri̱sto̱ abale lo̱o̱c. 15 I̱yo̱ko̱ zin, gotonogga, u̱zu̱tte̱ de̱mzi̱ne̱t bali ke̱de̱mze̱ku̱ng ke̱, icima go̱o̱le̱ bali kaavtte bu̱k ke̱ icima warage bali ki̱tto̱na̱ku̱ng ke̱.