6
Li̱ngli̱ngo̱n ci e̱e̱t ci een du̱ca̱i̱t
1 Anyik du̱cca̱k wak a̱tu̱ zoz ci Ta̱mu̱ta̱dde̱no̱ ko̱to̱ngo̱o̱ltte̱ ddi̱ki̱ryyo̱k wagge̱k, kar iróng e̱e̱ti̱ imma ozoz gerzet zare cik Ta̱mu̱ta̱dde̱no̱ ki de̱mzi̱ne̱t cinne. 2 Ma̱i̱je̱ du̱cca̱k cik a̱li̱ngli̱ng ki ol cik a̱tu̱ zoz ci Ta̱mu̱ta̱dde̱no̱, ma ibbezzu nogo, eci nege e̱e̱ggi̱n ol cik a̱tu̱ zoz ci Ta̱mu̱ta̱dde̱no̱ bu̱k. Abarik i̱ti̱ri̱zze̱t nogo ju̱rru̱m eci ol wak atin amuda mediz li̱ngli̱ngo̱ne̱ cinne̱ng, ol wak a̱tu̱ zoz ci Ta̱mu̱ta̱dde̱n wa irez nege ko̱.
De̱mzi̱ne̱t wa gerze
Demez ol kar bo̱do̱k du̱wa̱k ku̱tu̱gu̱zzo̱ zoz necu, 3 ming edemez e̱e̱ti̱ lo̱ti̱nno̱k wak aavtte do̱ ngati lo̱ti̱nno̱k wak Manyitinna Ye̱su̱ Ki̱ri̱sto̱ een de̱de̱ ki gool ci kanu ko̱, 4 een enne e̱e̱t ci odong ele. Iróng enne a̱gga̱ gi̱i̱ imma. Abarik orong kadang ol gaganiko kar zin kanyaha jo̱o̱re̱. Anyaha zin dangonet neci meder, ki zoz ci irawone ol, ki torinet, ki i̱no̱ni̱ ci gerze, 5 anyaha ol wak een giilcak dango ki̱zzi̱ zoz ci een de̱de̱. I̱no̱n ol ne̱ke̱ azi ne, gool ci okko e̱e̱ti̱ een bo̱to̱ro̱c ko̱, gool ci annuwe e̱e̱ti̱ Ta̱mu̱ta̱dde̱n. 6 Ming kabak baizi ci ko̱ngo̱o̱li̱ne̱ Ta̱mu̱ta̱dde̱n, kar bo̱do̱k kalalit zi̱nze̱tti̱, aanyyet Ta̱mu̱ta̱dde̱n kaal kizet bo̱to̱ro̱. 7 Ka̱ri̱ta̱k lo̱o̱c cu ollin, i̱llo̱i̱ gi̱i̱ ci kanyaha. Ka̱da̱i̱ atin bo̱do̱k ollin, i̱llo̱i̱ gi̱i̱ ci kovvoye bu̱k. 8 I̱yo̱ko̱ zin, ke̱le̱zzo̱ ki kaal cik kanyak lo̱o̱ta̱ ngatu ko̱. 9 Ma̱i̱je̱ ol wak orong kizeto bo̱to̱ro̱, ovvo i̱nna̱k zoz ci gerze atimane lo̱rye̱nti̱ kar atin kidita nogo pid. 10 Eci ming irez e̱e̱ti̱ kaal oroot, anyak no̱ngi̱tto̱n cik gerzek do̱o̱k. Abarik ol uggak utuburet tu̱we̱ne̱t zoz ci Ta̱mu̱ta̱dde̱no̱ aartik zi̱nze̱tti̱ kaal, kar kanyakttak e̱le̱tti̱ u̱u̱ce̱z.
I̱lo̱t Pa̱u̱lo̱ Ti̱mo̱te̱yo̱ kuzute zoz ci Ta̱mu̱ta̱dde̱no̱
11 Imma i̱nna̱ e̱e̱ti̱ ci Ta̱mu̱ta̱dde̱no̱, liit no̱ngi̱tto̱n ne̱ko̱ do̱o̱k. Abarik tu̱gu̱ kaal cik abunna, zuute zoz ci Ta̱mu̱ta̱dde̱no̱, nyak tu̱we̱ne̱t zo̱ze̱ ci Ta̱mu̱ta̱dde̱no̱, irez ol, ize gunun kar zin niim pirnanet. 12 Zuute zoz ci a̱tu̱we̱ Ye̱su̱. Abunna ming a̱gga̱mi̱ zoz ci baiz wa aave udut bali aanyi Ta̱mu̱ta̱dde̱n. I̱ye̱la̱ i̱nna̱ tu̱we̱ne̱t zoz ci Ta̱mu̱ta̱dde̱no̱ kicinnet kiziyet ol cik meelek ke̱. 13 Ki̱lo̱ti̱ kicin Ta̱mu̱ta̱dde̱n wa anyik kaal do̱o̱k ruget ko̱, kar bo̱do̱k kicin Ye̱su̱ Ki̱ri̱sto̱ bu̱k bali a̱du̱wa̱k alaan Pontius Pilato tu̱we̱ne̱t cinne ke̱, 14 abunna ming azunne ti̱lo̱wi̱ne̱t cu zee ki̱zzi̱ rok zoz ci anganyi ol kobodak Manyitinna Ye̱su̱ Ki̱ri̱sto̱ lo̱o̱c. 15 Aanyik atin Ta̱mu̱ta̱dde̱n zoz neci kita i̱i̱te̱ne̱ ci a̱gga̱ enne, een zin Ta̱mu̱ta̱dde̱n wa e̱de̱te̱ kar kize ba̱a̱lo̱i̱t, kar bo̱do̱k kize alaan ci alaat do̱o̱k, een bo̱do̱k Manyi ta̱mu̱ta̱dde̱ne̱t do̱o̱k. 16 Ta̱mu̱ta̱dde̱n do̱ niko ci iróng a̱da̱i̱ udut. Abak enne vooritene ci ataltali, i̱llo̱i̱ rok e̱e̱t ci anime kuk ojonun, ngen e̱e̱ti̱ imma kicin nonno udut, i̱llo̱i̱ bo̱do̱k atin ol cik acin nonno. Anyak enne komiz, ki̱di̱ngdi̱nga̱ni̱t nonno udut. Anyik ku̱tu̱gu̱ niko (Amin).
17 Ti̱lo̱ ol wak e̱e̱ggi̱n bo̱to̱ro̱ lo̱o̱ta̱ ko̱, gerza ming arik zi̱nze̱tti̱ kaal ne̱k anyak nege ke̱. Abarik du̱wa̱k nogo karttik zi̱nze̱tti̱ Ta̱mu̱ta̱dde̱n wa een bo̱to̱ro̱c aanyyet kaal do̱o̱k kar naga katalte baiz. 18 Recanek nogo ku̱tu̱gu̱zzo̱ kaal cik abunna kar bo̱do̱k keeltta ol do̱o̱k, anyik bo̱to̱ro̱ kozollit kaal ki ol. 19 Ming u̱tu̱gu̱zzo̱ niko, ogon ki ming i̱i̱ta̱ng kaal kizeto ja̱mi̱te̱n, kar ka̱gga̱c baiz wa een de̱de̱.
20 Ti̱mo̱te̱yo̱, zuute zoz bali aanyi Ta̱mu̱ta̱dde̱n ke̱. Ma edeconik zoz ci een darace ki dangonet ci uhu ol volong kize genyiz. 21 Ma̱i̱je̱ nu̱nu̱n ming i̱ya̱kza̱ ol uggak kanyait genyiz, utungtek abarik tu̱we̱ne̱t zoz ci Ta̱mu̱ta̱dde̱no̱ lo̱o̱c.
Kala Ta̱mu̱ta̱dde̱n ka̱a̱nyyu̱ng eezet.