24
Ovvoye ol wak Yo̱u̱do̱ Pa̱u̱lo̱ lo̱ki̱ka̱
1 Mazing ovvo edeccai i̱i̱nya̱ cik een tu̱r, uk alaani wa a̱ddi̱ki̱re̱ wawaco Ce̱e̱ze̱ ci Ta̱mu̱ta̱dde̱no̱ wa een Ananiyas o̱rge̱ ci een Sisiriya. Orkor ki ol wak Yo̱u̱do̱ a̱ddi̱ki̱re̱ ki e̱e̱t ci da gon abariz zozok lo̱ki̱ka̱ azi zar ne Tertulias. Ot ngati Vi̱li̱ce̱ ovvo a̱du̱wa̱k nonno zozok wak ovoolnge nege Pa̱u̱lo̱. 2 Utu zin Vi̱li̱ce̱ Pa̱u̱lo̱ ki̱ki̱ya̱ ecito, ma̱i̱je̱ Tertuliasi akate oba no̱ngi̱tto̱n cik ovolnge nege Pa̱u̱lo̱ kar ko̱o̱tte̱ ro̱ni̱a̱ ko̱ azi ne, “Kabakta azzine cugunnek labak, kar genyizi cunne kanyaha gi̱i̱ ci abunna lo̱o̱c cinna. 3 Ka̱gga̱ma̱na̱ kaal ne̱ko̱ lo̱o̱co̱we̱ do̱o̱k odohize, kar zin bo̱do̱k kirrezti oroot ddi̱ki̱ryo̱i̱t Ve̱li̱ce̱. 4 Iróng zin korongi kedeca i̱i̱ cunne ettede viyo zoza, abarik kalayi ulla kar zik zoz ci uturi ko̱ ju̱rru̱m. 5 Kamudana e̱e̱t cu ming gerza u̱la̱l ol. Egerzan olli Yo̱u̱do̱ lo̱o̱co̱we̱ do̱o̱k. Een enne ddi̱ki̱ryo̱i̱t ci ol wak annu e̱e̱t cu Ye̱su̱ wa Nazereti. 6 Orong zin bo̱do̱k ku̱tu̱l Ce̱e̱z wa Ta̱mu̱ta̱dde̱no̱, kar zin i̱ye̱ kecebtta niko. (Korongnya ke̱tte̱dda̱ zoz cinne lo̱ti̱nno̱we̱ waga̱k Yo̱u̱do̱. 7 Abarik alaani wa aciiru een Lisiyas amait i̱ba̱ti̱ne̱. 8 Bak erecanek ol wak ovvoye nonno lo̱ki̱ka̱ ki̱vi̱ta̱i̱ i̱nne̱ta̱.) I̱yo̱ko̱ ming a̱jji̱ni̱ i̱nna̱ bu̱k, Aziknna wo̱ye̱ enne ilya no̱ngi̱tto̱n ne̱k orong kecebtta nonno ke̱ ngatinne.” I̱llo̱i̱ no̱ngi̱tto̱n ne̱ko̱ Baibola uuganik. 9 Urumtozik ol wak Yo̱u̱do̱ do̱o̱k zoz orong kibilte Pa̱u̱lo̱, izeto ne, “Ilemnyai zo̱zo̱wa̱ ne̱ko̱ do̱o̱k.
A̱du̱wa̱k Pa̱u̱lo̱ zoz ci ebehe enne ele Ve̱li̱ce̱
10 Mazing o̱di̱k alaani wa een Ve̱li̱ce̱ Pa̱u̱lo̱ ebere kozoz, ize zin Pa̱u̱lo̱ ne, “Ka̱gga̱yi̱ niko ming e̱e̱ni̱ e̱e̱t ci appai no̱ngi̱tto̱n cik lo̱o̱c ci Yo̱u̱do̱, i̱yo̱ko̱ zin katallne ngati ka̱du̱wa̱ki̱ zoz wanani. 11 Ngati i̱yo̱ko̱ umuda bu̱k zoz cinanni, izeto wazin necu i̱i̱nya̱ omoto ki rama, nginti meer ba̱li̱ye̱ kokkoye Ce̱e̱ze̱ wa Ta̱mu̱ta̱dde̱no̱ Jerusalema. 12 Ngen Yo̱u̱di̱ ku̱mu̱dda̱ ming kadangona ki e̱e̱t imma Ce̱e̱ze̱ wa Ta̱mu̱ta̱dde̱no̱ icima ming kizoci ol ku̱ru̱kto̱ Ce̱e̱zi̱ne̱ wak Lawinto, icima ucca ngamani bu̱k Jerusalema. 13 Iróng bu̱k wo̱ye̱ anyahaki bbacak wak ovvoya annit lo̱ki̱ka̱ ko̱. 14 Kelemna atidic ku̱du̱wa̱u̱ng gi̱i̱ wa kogoni. Kaala anna Ta̱mu̱ta̱dde̱n wa ji̱ji̱ti̱ga̱c ngati gool wa Ye̱su̱ azi nege ne kabaci. Ma̱i̱je̱ bo̱do̱k elemna kaal wak e̱he̱rye̱ lo̱ti̱nno̱we̱ wak Musesi ki bu̱wa̱ni̱ne̱ wak a̱ri̱tto̱k wak zoz ci Ta̱mu̱ta̱dde̱no̱ veelek. 15 Kanyai zin bu̱k i̱no̱ni̱ ci ka̱tu̱we̱ Ta̱mu̱ta̱dde̱n ki i̱yo̱ko̱ ciinne̱ng ko̱. Ma tu̱we̱ne̱t neci obod ki nga̱zi̱ wa atin ingane ol do̱o̱k wak abunna ki ol wak gerzek bu̱k daiza. 16 Ma̱i̱je̱ zin gon odohize ka̱ha̱ci̱ kanyik zinin cinanni ko̱ kize voora Ta̱mu̱ta̱dde̱na̱ ki o̱lle̱ cik diirik bu̱k.
17 “Baling arabante i̱i̱nya̱ cik kaave Jerusalema renna, kanyaha o̱ro̱bi̱ya̱ cik kokko kanyik ol cigannik Yo̱u̱d wak amati ki cik kokko kamuce Ta̱mu̱ta̱dde̱n. 18 Ma baling ngen kogoni kaal ne̱ko̱ urubta annit reene ci Ce̱e̱z wa Ta̱mu̱ta̱dde̱no̱ ecito, ngati orong kedeccane tu̱ve̱ne̱t. A̱zze̱ bali kolle imma cik korkorya ki annit to rok bu̱k gernyi. 19 Ma̱i̱je̱ abarik bali Yo̱u̱di̱ uggak cik a̱vvu̱ lo̱o̱ce̱ ci Asiyo (Tu̱rki̱ya̱) aavtte nginati. Abunna abarik ming a̱vvu̱ nege e̱le̱tti̱ne̱ bu̱k ki̱vi̱ta̱ ko̱tta̱ ro̱ni̱a̱ ming da aave gi̱i̱ ci gerze ku̱tu̱gu̱wa̱ to. 20 Icima abarik anyik ol cik aavtte ngatu ko̱ ku̱du̱kta̱i̱ zoz ci da gerze ku̱tu̱gu̱ i̱i̱ bali kabillne lo̱ki̱ka̱ ke̱. 21 Ka̱gga̱ gi̱i̱ co̱de̱ ṯok niko ci bali ku̱du̱wa̱ muluwe ci a̱bu̱le̱ kiziyet nege do̱o̱k ne, apahekang annit gerziten wazin necu ko̱, ma̱rri̱t ming ka̱tu̱ gi̱i̱ ci atin bo̱do̱k arugne ol wak a̱da̱i̱to̱?”’
22 Ma̱i̱je̱ Ve̱li̱ce̱ wa a̱gga̱ gool ci obod ki Ta̱mu̱ta̱dde̱n ju̱rru̱m, ibiliz ro̱ni̱, kar zin kizek nogo ne, “Ngen kettedi ro̱ni̱ cinno̱ng ko̱, i̱i̱te̱ne̱ wa a̱kku̱ne̱ alaani wa aciiru een Lasiyas.” 23 Kar zin kerecanek alaan wa dici aciiru kebek Pa̱u̱lo̱ kar kuzzute nonno ju̱rru̱m, kar bu̱k gon kanyik i̱i̱ ci ettede viyo reena, bak anyik gonoggi kanyaktta̱k gi̱i̱ ci ette orong enne bu̱k labak.
Abile Pa̱u̱lo̱ ro̱ni̱ ngati Ve̱li̱ce̱ ki Dersila
24 Ma̱i̱je̱ i̱i̱nya̱ u̱gge̱, i̱vi̱ta̱ Ve̱li̱ce̱ ki ngaa wainne een Yo̱u̱do̱c azi zar ne Dursilla. I̱tto̱n ol kot kanyaktta Pa̱u̱lo̱ ki̱ki̱ya̱ kozoz zoz wa obod ki tu̱we̱ne̱t wa Ye̱su̱ Ki̱ri̱sto̱. 25 Ma baling ozoz Pa̱u̱lo̱ zoz ci obod ki gool ci anyahe e̱e̱ti̱ ele kubunna ki gool wa alame e̱e̱ti̱ ele kaale wak gerzek, ki gool wa kar kabale Ta̱mu̱ta̱dde̱n ol atin, otongoole Ve̱li̱ce̱ lo̱o̱c kar zin kizek Pa̱u̱lo̱ ne, “Bit di̱ wazin necu, mang ette ka̱nyi̱ i̱i̱ ci ettede viyo, ngen bo̱do̱k kawuyin.” 26 Abarik da bo̱do̱k Ve̱li̱ce̱ orong kanyik Pa̱u̱lo̱ nonno o̱ro̱bi̱ya̱. Wa zin gon enne awane Pa̱u̱lo̱ i̱i̱nya̱ u̱gge̱ ki̱vi̱ta̱ kozozzo bu̱k ko̱ nenne.
27 Ma baling e̱de̱cca̱i̱ e̱rki̱to̱wa̱ cik een ram, uk Ve̱li̱ce̱ ngamani, a̱ra̱gi̱z nonno alaani ci azi zar ne Porsias Vestas. Ma̱i̱je̱ Ve̱li̱ce̱ orong Yo̱u̱d ka̱ta̱li̱t nonno, utungek zin Pa̱u̱lo̱ kecebe lagama.