23
1 Egelem Pa̱u̱lo̱ ol wak lo̱ki̱ka̱k zee kar kize ne, “Gotonogga, ka̱gga̱ zinina niko ming ngen ku̱tu̱gu̱we̱k Ta̱mu̱ta̱dde̱n gi̱i̱ imma ci gerze baize wanani zee rok wazin necu.” 2 Ma̱i̱je̱ zo̱ze̱ necu u̱du̱wa̱k Ananiyasi wa een alaan wa a̱ddi̱ki̱re̱ wawaco Ce̱e̱ze̱ ci Ta̱mu̱ta̱dde̱no̱ ol wak ojongoz Pa̱u̱lo̱ kapanit nonno utug. 3 Izek Pa̱u̱lo̱ nonno ne, “A̱ru̱ki̱ atin Ta̱mu̱ta̱dde̱n i̱nne̱t bu̱k niko, volongnyoit! Aave i̱nna̱ nginatu kar tediya annit ba̱ci̱ cinanni go̱o̱le̱ ci a̱du̱wa̱ lo̱ti̱nno̱wa̱ ming abaci i̱nna̱ bu̱k ngati a̱nne̱ke̱ ol ciko ne u̱ru̱we̱t annit ko̱!”
4 Ma̱i̱je̱ ol balik abile Pa̱u̱lo̱ ojonun ke̱ izeto ne, “Ma odomi alaan wa a̱ddi̱ki̱re̱ wawaco Ce̱e̱ze̱ ci Ta̱mu̱ta̱dde̱no̱.”
5 O̱bo̱de̱k Pa̱u̱lo̱ nogo izek ne, “Gotonogga, ngen ka̱gga̱ ming een ette enne alaan wa a̱ddi̱ki̱re̱ wawaco, ngiwa eherine zoz azi ne, ‘Ma ozozi zoz ci gerze obod ki ddi̱ki̱ryyo̱k wak ol wagunnek.”’
6 A̱gga̱ zin Pa̱u̱lo̱ niko ming een uggak ngatinne̱ng ol cik een Saddocis, ovvo uggak Varacis, egerenyek zin Pa̱u̱lo̱ kolle wa ozoz lo̱ki̱ko̱nya̱ iizek ne, “Gotonogga, ke̱e̱ni̱ e̱e̱t ci Varacisi ngerrti e̱e̱t ci een Varacis. Kabili i̱yo̱ko̱ lo̱ki̱ka̱ ma̱rri̱t ming kazi ne ingazi atin ol wak adai rugeta.” 7 Nginti a̱du̱wa̱ne̱ niko, itinga jo̱o̱re̱ o̱lle̱ cik een Varacis ki Saddocis kengerto ol orgena. 8 Azi Saddocis ne, a̱zze̱ nga̱zi̱ daiza to, kar bo̱do̱k kizeto ne, a̱zze̱ rok anjilonya wak Ta̱mu̱ta̱dde̱no̱ i̱llo̱i̱ rok vongizok. Ma̱i̱je̱ Varacisi azi ne, aavtte kaala ne̱ko̱ do̱o̱k to.
9 A̱vvu̱ walwali ci a̱ppwe̱ to, ma̱i̱je̱ de̱me̱zo̱wa̱ uggak wak lo̱ti̱nno̱k wak Musesi een Varacis, ibilet je̱e̱na̱ kar zin kadangto oroot kizeto ne, “A̱zze̱ gi̱i̱ imma ci gerze kamudana ogon e̱e̱ti̱ cu to.” Kar zin bo̱do̱k kizeto ne, “Ogon wo̱ye̱ ku̱ ming ozozik anjilo ci Ta̱mu̱ta̱dde̱no̱ icima vongizi nonno?” 10 Ize a̱ppwa̱ dongonet oroot zee kotongoole alaani bali aciiru ke̱, kize ne obboc atidic ol ne̱k oyoho ko̱ ozerye Pa̱u̱lo̱ azzine. Erecanek zin aciir kot kanyaktta Pa̱u̱lo̱ o̱lle̱ ne̱k oyoho ke̱ i̱ba̱ti̱ne̱ kar zin ko̱tte̱ o̱rge̱ wa aciiru abahe.
11 Bak a̱kku̱ Manyi kaal do̱o̱k ba̱li̱n neci ele, ki̱ki̱ya̱ kibilek Pa̱u̱lo̱ o̱no̱zo̱we̱ kar zin kizek ne, “Ma o̱ngo̱o̱le̱ gi̱i̱ imma, i̱yo̱ko̱ iize bbacait cinanni Jerusalema, korongnyi zin bo̱do̱k ming okko e̱e̱ni̱ bbacait lo̱o̱ce̱ wa a̱ddi̱ki̱re̱ een Rom.”
A̱ma̱gi̱k ol Pa̱u̱lo̱ ku̱ru̱we̱t kadak
12 Ma̱i̱je̱ nge̱rre̱ti̱n cu, u̱lu̱tte̱ Yo̱u̱di̱ uggak kar zin ku̱wa̱i̱t, kizeto ne, kettedda e̱le̱me̱ti̱ da̱i̱nte̱ ki udenet mam zare cik Ta̱mu̱ta̱dde̱no̱ zee ku̱ru̱ktta̱ Pa̱u̱lo̱ kadak. 13 Een ucca ol cik azi niko moten we̱c ki u̱gge̱ bu̱k. 14 Kar zin kot ngati alaat wak wawaco Ce̱e̱ze̱ ci Ta̱mu̱ta̱dde̱no̱ ki lo̱ddi̱ki̱re̱ wak o̱rgu̱ ot izetek ne, “Kanyica Ta̱mu̱ta̱dde̱n kize bbacait cinna̱ng ngati iróng kadaka gi̱i̱ imma zee ku̱ru̱kta̱ Pa̱u̱lo̱ kadak. 15 I̱yo̱ko̱ niga ki ol wak gon lo̱ki̱ka̱k i̱tto̱nti̱k ddi̱ki̱ryo̱i̱t wa aciiru zoz kar ki̱tto̱nna̱u̱ng Pa̱u̱lo̱. Allabta izetek ne korongnya bo̱do̱k ki̱jji̱nta̱ Pa̱u̱lo̱ ju̱rru̱m. Mazing ovvo anyaha nonno, kar zin kataguzeyya goola ku̱ru̱ktta̱ kadak ming ngen kuzuccaung i̱ge̱ta̱.”
16 Abarik da ngerrti ngooni Pa̱u̱lo̱ izik zoz ci amagike ol molotinne ko̱, kar zin kuk o̱rge̱ ci aciiru uk u̱du̱wa̱k molotinne. 17 Kar zin Pa̱u̱lo̱ utu ddi̱ki̱ryo̱i̱t imma ci aciiru kar zin kizek nonno ne, “Bite di̱ logozit cu kuk ku̱du̱wa̱k ddi̱ki̱ryo̱i̱t zoz imma.” 18 Inyaman zin e̱e̱ti̱ neci logozit neci uwe ddi̱ki̱ryo̱kta̱, kar zin kizek ddi̱ki̱ryo̱i̱t ne, “Awuya e̱e̱ti̱ wa E̱ce̱bje̱ een Pa̱u̱lo̱ ke̱, kar zin kizeya ne bite logozit cu ngatunne kar ku̱du̱wa̱i̱ zoz ci anyai.”
19 A̱gga̱m ddi̱ki̱ryo̱i̱ti̱ a̱zzi̱t ci logozit necu kar zin ki̱jji̱n kizek ne, “Orong a̱du̱wa̱ka̱ zoz ci azi ne?”
20 Ize zin enne ne, “Elemtta olli Yo̱u̱d kar ki̱jji̱nti̱n kar nyaha Pa̱u̱lo̱ lo̱ki̱ko̱ loza, a̱ru̱k talaben orongit ku̱cu̱btta̱ zoz ngatinne. 21 Ma edeconik ngiwa atin ongike ol cik een moten we̱c ki u̱gge̱ nonno goola. Ma̱i̱je̱ abarik aanycik Ta̱mu̱ta̱dde̱n kize bbacait ngati i̱ya̱wi̱ne̱ da̱i̱nte̱ ki mame zee ku̱ru̱we̱t Pa̱u̱lo̱ kadak. Odolta abarik a̱vvu̱to̱ ju̱rru̱m, e̱re̱yi̱ zar i̱nne̱ta̱ tto̱ne̱k Pa̱u̱lo̱ kuk.”
22 Iizek ddi̱ki̱ryo̱i̱ti̱ logozit necu ne, “Ma a̱du̱wa̱i̱ e̱e̱t imma a̱nne̱k ne u̱du̱wa̱ha̱ ette i̱nna̱ annita zoz necu udut.” Kar zin kanyik logozit neci kuk.
I̱tto̱ni̱t ol Pa̱u̱lo̱ kuk alaane wa een Ve̱li̱ce̱
23 Ma̱i̱je̱ alaani ci aciiru ko̱, utu alaat u̱gge̱ cik idik een rama ngatinne kar zin kizek ne, “Engerta aciir u̱gge̱ cik een obet ram (200) kar o̱rge̱ wa een Keseria ki ol cik otod vartange moten turgerem (70) ki ol cik illanyau obet ram (200). U̱lu̱tte̱ i̱jjo̱ waggo̱k kar otoz ming ize koor torkoc a̱ti̱ja̱. 24 Aanycik vartange u̱gge̱ Pa̱u̱lo̱ kar kotod enne co̱de̱ kar zin uggak kanyait i̱jjo̱ ciginnek, inyamanit nonno labak zee rok alaan Ve̱li̱ce̱. 25 Eteher zin alaani necu warage ci e̱he̱rye̱ ki cu Ve̱li̱ce̱ izek ne, “ 26 Arrak oowa, kizzaye oroot, ki̱tto̱na̱ki̱ Kalaudios Lasiyasi waraga necu i̱nne̱ta̱ Ve̱li̱ce̱ e̱e̱t wa a̱ddi̱ki̱re̱ abali lo̱o̱c ju̱rru̱m. 27 A̱gga̱mi̱t ol wak een Yo̱u̱d e̱e̱t necu kar zin abarik orongit ku̱ru̱we̱t kadak. Ma baling kumuda ming een e̱e̱ti̱ necu cinna Romi, ko̱tta̱ ki aciir kot keeltawa. 28 Korongi bali ka̱gga̱ zoz ci aburnnek nonno nong kar abarik orong ku̱ru̱we̱t kadak ko̱? Kuuwe zin rok lo̱ki̱ko̱ wanne̱ng. 29 Kumuda a̱zze̱ gi̱i̱ imma ci da gerze ogon e̱e̱ti̱ necu to, kar ke̱le̱zo̱ ki daiz icima E̱ce̱bje̱ lagama. Ovvoye ol ne̱ke̱ nonno lo̱ki̱ka̱ zo̱ze̱ ci obod ki lo̱ti̱nno̱k wage̱k do̱. 30 Ma baling kiziya zoz ci orong ol ku̱ru̱kte̱ nonno, ataman niko kodola kar zin ki̱tto̱na̱i̱ i̱nne̱ta̱. Ku̱du̱wa̱ha̱ ol balik orong kibilte nonno ro̱ni̱a̱ ke̱ ki̱vi̱ta̱ ku̱du̱ktta̱ zoz neci abaci e̱e̱ti̱ necu ke̱ ngatunne.”
31 Iziyet aciiri zoz ci erecanek ddi̱ki̱ryo̱i̱ti̱ ko̱, kar zin ko̱tte̱ Pa̱u̱lo̱ ba̱li̱n neci zee rok orog ci azi ol ne Antipatis. 32 Ma̱i̱je̱ nge̱rre̱ti̱n cu obbodda aciir wak owo zoone orog wa aciiru, utungtek ol wak otod vartange ki̱nya̱ma̱ni̱t Pa̱u̱lo̱. 33 O̱tte̱ nonno rok Keseria, oot aanycik waraga alaan wa a̱ddi̱ki̱re̱ een Ve̱li̱ce̱, kar zin bo̱do̱k kanycik Pa̱u̱lo̱ azzin ciginnek. 34 Ikeb bo̱do̱k alaani waraga zee kar zin ki̱jji̱n Pa̱u̱lo̱ kizek ne, “A̱kku̱ni̱ o̱rge̱ jang?” Mazing okko acin nonno ming a̱kku̱ o̱rge̱ ci een Cilicia, 35 izek nonno ne, “A̱vvu̱ izong ku̱zu̱cca̱ ol balik ovvoyyi lo̱ki̱ka̱ ke̱ lo̱o̱c, kar zin kizik izong kar zin ketted ro̱ni̱ cunne.” Erecanek zin aciir zoz kecebit Pa̱u̱lo̱ ce̱e̱ze̱ bali a̱ddi̱ki̱re̱ eenyet E̱ro̱di̱ ke̱.