22
A̱du̱wa̱k Pa̱u̱lo̱ Ol kaal balik ogone
1 Iizek zin Pa̱u̱lo̱ nogo ne, “Zu̱we̱ tik baba ki zu̱we̱ tik ya̱i̱, iziktang di̱, ku̱du̱wa̱u̱ng kaal balik kogoni ke̱.” 2 Mazing aziye ming ozozik Pa̱u̱lo̱ nogo zo̱ze̱ ci Aramaik, ijakte ne lai.
Ozoz zin Pa̱u̱lo̱ ize ne, 3 “Ke̱e̱ni̱ e̱e̱t ci Yo̱u̱do̱ ci ka̱ri̱ta̱i̱ o̱rge̱ ci een Tarasis lo̱o̱ce̱ ci azi zar ne Cilicia. Bak korokte zee ki̱ddi̱ki̱r ngatu Jerusalema kar zin kize demezait ci Gamilia, wa bali edemeza gool ci kar kazunne lo̱ti̱nno̱k wak ji̱ji̱ti̱ga̱c oroot. Korongi ki̱li̱ngli̱ngo̱zi̱k Ta̱mu̱ta̱dde̱n oroot ki i̱yo̱ko̱ niga, wazin necu ngatu ko̱. 4 Ka̱gi̱di̱ bali gon ol wak a̱tu̱ gool wa Ye̱su̱, ku̱ru̱wa̱ u̱gge̱ kadaito. Ka̱gga̱mi̱ ol cik macik ki ngaai kar zin karik cikin kecebte. 5 I̱yo̱ko̱ alaani wa a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ ki ol wak ro̱ni̱a̱k do̱o̱k a̱gga̱ kaal ne̱ko̱ ming een kaal cik elemnyai de̱de̱. Ma̱rri̱t bali gon nege e̱le̱tti̱ne̱ ming aanya waraganya cik eherik ol wak Yo̱u̱do̱ o̱rge̱ wa een Damaskas. Bak baalete kokko nginati kar kuk ka̱gga̱m ol wak a̱tu̱we̱ kar kanyahak nogo Jerusalem ngati ecebine diditai kar zin ki̱vi̱ta̱ kodokte.
A̱du̱wa̱ Pa̱u̱lo̱ gool wainne a̱tu̱we̱ Ye̱su̱
6 “Ma i̱i̱te̱ne̱ immani ngati kowoye goola ngati ize ojon Damaskasi, ngati okko ki wazin keng, atarrana ucca gwa̱a̱ imma ci a̱kku̱ ta̱mu̱-kenga ne paa, 7 bak ka̱ddu̱i̱ lo̱o̱c ne ru̱k. Abarik kazi muluk ci a̱nne̱ka̱ ne, Saul, Saul, ma amarrinnan niko. 8 Bak ka̱jji̱ne̱ kazi ne, i̱nne̱t ngene Manyi kaal do̱o̱k? Bak o̱bo̱de̱ka̱ a̱nne̱ka̱ ne, annit Ye̱su̱ wa Nazereti gon amarinna ko̱. 9 Ma̱i̱je̱ ol balik korkorya ke̱, icinet vo̱ri̱te̱n neci bu̱k, abarik iróng aziye muluk ci ozozika ko̱. 10 Bak ka̱jji̱nni̱ ka̱nne̱i̱ ne, ma i̱yo̱ko̱ ku̱tu̱gu̱ gi̱i̱ tazi Manyi kaal veelek? Bak o̱bo̱de̱ka̱ Manyi kaal a̱nne̱ka̱ ne, “Tinga je̱e̱na̱. Bit Damaskate. Ngen kokko ka̱du̱wa̱ki̱ kaal do̱o̱k wak orong Ta̱mu̱ta̱dde̱n tu̱gu̱ nginati. 11 Ma nginti neci ilya utuzawa vo̱ri̱te̱n neci bali atarrana ko̱ ebere kiize ru̱be̱n. Bak abarik a̱gga̱mnya̱ ol wak korkorya ke̱ a̱zzi̱t, bak itoya ovvoya Damaskasa.
12 “I̱ki̱ya̱ e̱e̱ti̱ imma ci een zara Ananiyas i̱vo̱na̱n. Een enne e̱e̱t ci gon a̱di̱ngdi̱nga̱n Ta̱mu̱ta̱dde̱n, kar zin bo̱do̱k kuzzute lo̱ti̱nno̱k waga̱c. O̱ngo̱o̱le̱ Yo̱u̱di̱ wak abak nginati do̱o̱k nonno. 13 I̱ki̱ya̱ ibileya abanyca kar zin kize ne, “Gotona Saul, cinno bo̱do̱k. Ataman niko kicino de̱de̱, kar zin kegelem nonno. 14 Bak a̱nne̱ka̱ ne, angarwi Ta̱mu̱ta̱dde̱n wa ji̱ji̱ti̱ga̱c i̱nne̱ta̱ kar gga gi̱i̱ wa orongiki tu̱gu̱, kar cin Ye̱su̱ wa een du̱ca̱i̱t wainne, abunna kar zin bu̱k zin zoz wainne a̱du̱wa̱ muluwe wainne manyonni. 15 Ngiwa atahalai kar ize bbacait cinne, kar du̱wa̱k ol do̱o̱k kaal wak icinu ki wak iziu bu̱k. 16 Ma ereye nya u̱u̱mu̱c. Tinga je̱e̱na̱ gga̱m ba̱ti̱ti̱mo̱ kar kutuunycai mu̱nye̱na̱ wagunnek go̱o̱le̱ ci alawe Ta̱mu̱ta̱dde̱n zare wa manyonni ki bali anna ke̱.’
Awu Ta̱mu̱ta̱dde̱n Pa̱u̱lo̱ kuk kuwak i̱do̱ngi̱ne̱
17 “Ma baling kobodaha Jerusalema i̱i̱te̱ne̱ immani, kuwa lawinet Ce̱e̱ze̱ wa Ta̱mu̱ta̱dde̱no̱, bak konoze je̱e̱na̱. 18 Kicina Manyi kaal do̱o̱k bak a̱nne̱ka̱ ne, “Tinga ataman tungek Jerusalem lo̱o̱c ngiwa ol nginatu iróng elemna zoz ci a̱du̱wa̱ obod ki annit ko̱. 19 Bak ko̱bo̱de̱ke̱ nonno ka̱nna̱i̱ ne, Manyi kaal do̱o̱k, a̱gga̱ ol gi̱i̱ bali kokkoye Ce̱e̱ze̱ wa Lawinto kar zin keceb bak karui ol wak a̱tu̱yi̱ i̱nne̱ta̱ ke̱. 20 Ma i̱i̱te̱ne̱ bali a̱ru̱we̱ ol bbacait wainne een Istiven kadak ke̱, kaave ba̱li̱ye̱ to. Bak katallne i̱i̱te̱n neci daize cinne. Bak ke̱be̱i̱ ru̱u̱ma̱ni̱ wak ol balik abutun nonno ke̱. 21 Izeya Manyi kaal do̱o̱k ne, “Tinga je̱e̱na̱ tungek Jerusalem lo̱o̱c, kar ki̱tto̱ni̱ bit olle wak iróng een Yo̱u̱d.’ ”
22 Bak aziye ol Pa̱u̱lo̱ zee abarik acin u̱du̱wa̱ zoz ci obod ki i̱do̱ngi̱. Egerenyit oroot izeto ne, “U̱ru̱we̱t kadak! Iróng enne agano ki ruget.” 23 Bak egereny oroot kar zin kerecit ru̱u̱ma̱ni̱ wage̱k, kar bo̱do̱k kadamuta todowa kazacek ta̱mu̱-keng azi keere cinne̱ng kaburna nong oroot. 24 Erecanek ddi̱ki̱ryo̱i̱ti̱ wa aciir wak Romi aciir kar ko̱tte̱ Pa̱u̱lo̱ ce̱e̱ze̱ cinne̱ng, kar zin bo̱do̱k erecanek izek ne, i̱bi̱cce̱t a̱lla̱ kar ku̱du̱wa̱ zoz ci anyik ol kegerenyit oroot niko ko̱. 25 Abarik ming ovvo eceb Pa̱u̱lo̱ kar zin we̱da̱ kadoit, izek Pa̱u̱lo̱ ddi̱ki̱ri̱yo̱i̱t ci da abile nginati ne, “Iróng i̱nna̱ elemi ming a̱do̱ku̱ e̱e̱t ci een Romenit ngati ngen kettedozik nonno zoz ci abaci ro̱ni̱a̱.”
26 Ma baling izik e̱e̱ti̱ neci zoz necu, uk ddi̱ki̱ryo̱kta̱ kar zin kizek ne, “Ogonik dim i̱ye̱ e̱e̱t necu nya? Een e̱e̱ti̱ Romenit ci ngen kettedozik zoz lo̱ki̱ka̱!”
27 Uk zin ddi̱ki̱ryo̱i̱ti̱ i̱jji̱n Pa̱u̱lo̱, izek ne, “Du̱wa̱ka̱ di̱, e̱e̱ni̱ e̱e̱t ci Romi de̱de̱?”
O̱bo̱de̱k zin Pa̱u̱lo̱, azi ne, “I̱i̱n.”
28 Iizek alaani neci a̱ddi̱ki̱re̱ ko̱ nonno ne, “Karui ba̱li̱ye̱ o̱ro̱bi̱ya̱ cik meelek giir kar zin kize Romenit.”
O̱bo̱de̱k zin Pa̱u̱lo̱ ke̱e̱ni̱ e̱e̱t ci ka̱ri̱ta̱i̱ lo̱o̱ce̱ ci Romi.
29 Ataman niko, i̱mi̱rte̱ ol balik orong ki̱jji̱ne̱t Pa̱u̱lo̱ ke̱. Ma zin baling iróng ddi̱ki̱ryo̱i̱ti̱ amuda ba̱ci̱ cinne ngati ecebe Pa̱u̱lo̱ diditaca e̱e̱t ci een Romenit, ngati ngen kabace zoz imma, otongoole lo̱o̱c.
Abile Pa̱u̱lo̱ lo̱ki̱ka̱
30 Orong ddi̱ki̱ri̱yo̱i̱ti̱ ci Romi ka̱gga̱ ju̱rru̱m gi̱i̱ ci anyaha Yo̱u̱d ko̱tte̱ Pa̱u̱lo̱ baala ko̱. Ma bali nge̱rre̱ti̱n ci reeng, ooga didita wak ecebine Pa̱u̱lo̱ ke̱, kar zin kerecanek alaat wak wawaco Ce̱e̱ze̱ ci Ta̱mu̱ta̱dde̱no̱ ki lo̱ddi̱ki̱re̱ wak lo̱ki̱ko̱ wak gon i̱ro̱n no̱ngi̱tto̱n do̱o̱k, ku̱lu̱tte̱ kar ku̱wa̱i̱t. Uwe zin Pa̱u̱lo̱ kar zin kuk kanyik kibil orgene cinne̱ng.