Bu̱k wa To̱ni̱a̱u̱ 21

We̱t ci kovvoya ki Jerusalem

¹ Ma baling artawa e̱le̱tti̱ ngatinne̱ng, ko̱tta̱ ki moro wa a̱ddi̱ki̱re̱ een ippang kar zin kabaktewa ṯop ki orog ci een Kos. Ma̱i̱je̱ nge̱rre̱ti̱n ci reeng, ko̱tta̱ o̱rge̱ ci een Rodes kar bo̱do̱k nginati ko̱tta̱ ngati een Patara. ² Kamudana i̱bo̱ ci etted moro okko ki Vonicia, ko̱tta̱ i̱bo̱wa̱ kar zin kabaktewa. ³ Ma baling kicinta orog ci een Saiporos, kozoroyya orog neci o̱to̱ne̱ ci i̱do̱lyo̱ kabaktewa ko̱tta̱ Suriyakte, kulucawa ngati een Tyre, orog ci bali okko i̱bo̱ ciinna̱ng a̱ti̱ye̱k i̱jjo̱. ⁴ Ma baling ku̱mu̱dda̱ nuyak nginati, ka̱vvu̱tta̱ ki nogo i̱i̱nya̱ turgerem. U̱du̱ktta̱k Pa̱u̱lo̱ miningun izetek ne, ma okko Jerusalema. ⁵ Ma̱i̱je̱ baling edeccai i̱i̱nya̱ cik kavtiya nginati, korongta zin ko̱tta̱. Inyamanntet zin nuyaha ki ngaai ki dooli orog abanyca, kar zin kalayya Ta̱mu̱ta̱dde̱n liil ti̱ti̱ma̱. ⁶ Ma baling izayeit gool, ko̱to̱dda̱ i̱bo̱, ma̱i̱je̱ nege i̱mi̱rte̱ ot olo.

⁷ Kabaktewa ngati een Tyre kot ki̱tta̱zza̱ ngati een Ptolemais ci bali kizzaya gotonogget kar zin komonnta ngatinne̱ng wazin. ⁸ Kitingazza wazin ci ko̱tta̱ ngati een Keseria, kar zin ka̱vvu̱tta̱ ce̱e̱ze̱ ci Vilipi wa een de̱me̱zo̱i̱t ci zoz ci Ta̱mu̱ta̱dde̱no̱, e̱e̱t ci o̱de̱ o̱lle̱ balik een turgerem ahala ol abunna engerek ngaai cik boyek da̱i̱ne̱t ke̱. ⁹ Anyak dooli cik nga̱i̱ye̱k ngen ki̱tti̱kte̱ do̱ we̱c, anyak bo̱do̱k dooli ne̱ke̱ a̱rri̱ze̱t ci a̱du̱wa̱ke̱ ol zoz ci Ta̱mu̱ta̱dde̱no̱.

¹⁰ Ma baling ka̱vvu̱tta̱ nginati i̱i̱nya̱ cik arabane, i̱ki̱ya̱ ulucai a̱ri̱to̱i̱ti̱ ci zoz ci Ta̱mu̱ta̱dde̱no̱ een zara Agabas lo̱o̱ce̱ ci Ju̱de̱ya̱. ¹¹ Ma baling i̱ki̱ya̱ rok agita, idima o̱lo̱ ci Pa̱u̱lo̱ kar zin kecebe azzin ki zo̱o̱ ciginnek, kar zin kize ne, “Azi Vongizi ci A̱li̱le̱ ne, ‘Eceb atin Yo̱u̱di̱ cik Jerusalemo manyi o̱lo̱ cu ki i̱yo̱ko̱, kar zin kaanycik ol wak iróng een Yo̱u̱d kecebit.”

¹² Ma baling kizikta zoz necu, kilalteya ki ol balik nginati ke̱ Pa̱u̱lo̱ kutubur we̱t ci okkoye Jerusalema.

¹³ O̱bo̱de̱ke̱t zin Pa̱u̱lo̱ izet ne, “Ma a̱lu̱yyu̱ gerza ming a̱ku̱le̱k zinin je̱e̱n. Iróng anna kelemi ce̱bi̱ne̱t do̱, kelemi abarik kadak bu̱k Jerusalema zare cik Manyi wanani Ye̱su̱.” ¹⁴ Baling iróng ngen aziye zoz cinna̱ng, kutungteya nonno do̱, kar zin kalayya Ta̱mu̱ta̱dde̱n kizeta ne, “Anyik Manyi Ta̱mu̱ta̱dde̱n ku̱tu̱gu̱ gi̱i̱ ci orongi.”

¹⁵ Ma baling edeca Pa̱u̱lo̱ zoz, kitingazza ko̱to̱dda̱ ko̱tta̱ Jerusalema. ¹⁶ Inyamanntet nuyaha uggak Keseriyakte rok ce̱e̱z ci Manson wa bali kar ka̱vvu̱tta̱ ke̱. Een enne e̱e̱t ci a̱kku̱ ngati een Saiporos. Kar zin bo̱do̱k kize nuyait bali elema Ye̱su̱ oowa.

Rawanet ci arawane Pa̱u̱lo̱ Jerusalem

¹⁷ Baling karayyawa Jerusalem, elemtaet gotongeta ne̱k abak nginati ke̱, ka̱vvu̱tta̱ bu̱k. ¹⁸ Ma̱i̱je̱ bali wazin co̱de̱ ke̱, ko̱tta̱ do̱o̱k ki Pa̱u̱lo̱ bu̱k kot ki̱vo̱nta̱ Je̱mi̱s, aavtte ba̱li̱ye̱ ol wak a̱ddi̱ki̱re̱ do̱o̱k bu̱k nginati. ¹⁹ Izza zin Pa̱u̱lo̱ nogo do̱o̱k kar zin koobek kaviyak cik ogonik Ta̱mu̱ta̱dde̱n i̱do̱ngi̱ wak amire iróng een Yo̱u̱d go̱o̱le̱ ci a̱li̱ngli̱nge̱ enne ko̱.

²⁰ Ma baling iziyet zoz necu, a̱ta̱li̱t kar zin kanycik Ta̱mu̱ta̱dde̱n zany zo̱ze̱ ci ogon enne ko̱, kar zin bo̱do̱k kizetek Pa̱u̱lo̱ ne, “Ma dim i̱ye̱ i̱nna̱ acinni gotonogget cik een Yo̱u̱d a̱tu̱ Ta̱mu̱ta̱dde̱n kar zin bo̱do̱k kuzzute ti̱lo̱wi̱ne̱t wa Musesi ju̱rru̱m ko̱ nu̱nu̱n ming meele? ²¹ Aziye zoz ci azi ne, edemezi i̱nna̱ Yo̱u̱d wak abak ki ol wak iróng een Yo̱u̱d kar kutuburret lo̱ti̱nno̱k wak Musesi, a̱nne̱k nogo ne ma etteddu dooli e̱le̱tti̱ cik ti̱rra̱k, icima abak go̱o̱le̱ ci keer cinna. ²² Ki̱no̱ni̱t gi̱i̱ ci kar ku̱tu̱gu̱z. Aziye atidic nege nginti i̱ki̱ya̱i̱ i̱nna̱. ²³ I̱yo̱ko̱ tu̱gu̱ gi̱i̱ ci ka̱du̱wa̱ki̱. Kaavtiya ngatu ki ol cik een we̱c u̱tu̱gu̱zzo̱ olom zare cik Ta̱mu̱ta̱dde̱no̱ elemtta nonno. ²⁴ Dima ol ne̱ko̱ kar zin rumek burcenet cinne̱ng ko̱, kar zin ru̱k o̱ro̱bi̱ya̱ cigge̱k. Kar ol kizeto ne een da zoz bali aziye ke̱ volong, ngen da i̱nna̱ ilya bak ki nege go̱o̱le̱ ci keer wanna i̱lo̱ti̱kke̱t Musesi. ²⁵ Ma̱i̱je̱ zo̱ze̱ ci elemnane ol wak iróng een Yo̱u̱d Ta̱mu̱ta̱dde̱n, ketehertteya ba̱li̱ye̱ nogo kodolttawa kizetteya ne, ma adakku i̱di̱ng ci e̱le̱gi̱t ci i̱bbo̱ri̱k ol ngintik annu ne akatkati, ma auddu bi̱ye̱ icima adakku i̱di̱ng ci e̱le̱gi̱t ci a̱da̱lle̱, ma otodonu cabak ki wagon elegje ki ming a̱du̱wa̱ keer ci Yo̱u̱do̱. Iróng zin keeri cu een ci i̱do̱ngi̱nu̱ een ci Yo̱u̱do̱ do̱.”

²⁶ Bali wazin ci uwe Pa̱u̱lo̱ ol ne̱ke̱ kar zin kuburice bu̱k ki nogo nga̱to̱de̱. Uk zin Ce̱e̱ze̱ wa Ta̱mu̱ta̱dde̱no̱, u̱du̱wa̱k ol wazin ci atin oṯornike i̱i̱nya̱ cik burucentak, kar mucenet ci amuce ngengene Ta̱mu̱ta̱dde̱n kakate.

Orong Yo̱u̱di̱ ku̱ru̱we̱t Pa̱u̱lo̱

²⁷ Baling orong edeccai i̱i̱nya̱ cik een turgerem, edenyca Yo̱u̱di̱ uggak cik abak tuluwanine cik Asiya Pa̱u̱lo̱ ngati Ce̱e̱z wa Ta̱mu̱ta̱dde̱no̱. U̱du̱kta̱k kolle do̱o̱k kitingazzo ka̱gga̱mi̱t Pa̱u̱lo̱, ²⁸ egerenyit izeto ne, “Ol wak Israilo, eeletu! E̱e̱t zong wa do̱o̱k edemez ol lo̱o̱co̱k do̱o̱k kar kuburet ol cigga̱c ki keer wa ti̱lo̱wi̱ne̱t wanna ki ngintu ko̱ nenen cu. A̱du̱nye̱k abarik bo̱do̱k ngati anyahane ol cik een Gi̱ri̱k ki̱vi̱ta̱ ku̱tu̱hu̱le̱t re̱e̱nu̱n ci Ce̱e̱z wa Ta̱mu̱ta̱dde̱no̱ a̱li̱le̱ ko̱.” ²⁹ Acin abarik da nege e̱e̱t ci een Trovimas ci orog ci een Evesos ming orkor ki Pa̱u̱lo̱ orgato, i̱no̱ni̱t izeto ne anyaha i̱yo̱ko̱ da Pa̱u̱lo̱ e̱e̱t neci bu̱k rok re̱e̱nu̱n ci Ce̱e̱z wa Ta̱mu̱ta̱dde̱no̱.

³⁰ Uturantai ol olo do̱o̱k, i̱vi̱ta̱ ot do̱o̱k ki Ce̱e̱z wa Ta̱mu̱ta̱dde̱no̱ ke̱. A̱gga̱mi̱t Pa̱u̱lo̱ kar zin ku̱tu̱gu̱rte̱k re̱e̱nu̱n ngati lawinto, kar zin arani kunyuge ataman. ³¹ Ma baling ngen nege azi ne ku̱ru̱we̱t, u̱zu̱cca̱ kaviyaha ne̱ko̱ ddi̱ki̱ryo̱i̱t ci aciir cik Romi, azi ne izeto ol cik orog ci een Jerusalem gerze walwalinta. ³² Idima i̱ye̱ ddi̱ki̱ryo̱i̱ti̱ aciir u̱gge̱ ataman niko kar zin ki̱vi̱re̱ kulucoi kuwe ki ngin neci alutene kolle ke̱. Ma baling icinet ol ne̱ke̱ ddi̱ki̱ryo̱i̱t ki aciir, ibilet ngati a̱ru̱we̱ Pa̱u̱lo̱.

³³ Otodozik ddi̱ki̱ryo̱i̱ti̱ neci nogo kar zin keceb Pa̱u̱lo̱, erecanek ol kecebit diditai cik een ram, kar zin vu̱rrta̱, ki̱jji̱n kizek ne, “Een enne ngene, ogon arrak ette enne nya?” ³⁴ A̱du̱wa̱ uggak kolla zoz ci owo do̱, ovvo bo̱do̱k uggak a̱du̱wa̱ ungec imma. Baling iróng ddi̱ki̱ryo̱i̱ti̱ ngen amuda ungec ci abunna, kar zin bo̱do̱k walwaloni ci o̱llu̱ kotore, izek aciir ne o̱tte̱ Pa̱u̱lo̱ o̱rge̱ wa abahe aciiri. ³⁵ Baling uzzuca nginti aciiru, izeto ol mote, kar zin aciiri ko̱do̱ngi̱t nonno. ³⁶ Imma kolle bali ngen a̱kku̱, izeto ne, “U̱ru̱we̱t nonno kadak.”

Ozozik Pa̱u̱lo̱ kolle

³⁷ Ma baling orong aciiri ovvoye Pa̱u̱lo̱ o̱rge̱ wa abahe nege, i̱jji̱n Pa̱u̱lo̱ ddi̱ki̱ryo̱i̱t izek ne, “Ma ucca ming ka̱jji̱nni̱ zoz imma nya?”

O̱bo̱de̱k zong ddi̱ki̱ryo̱i̱ti̱ Pa̱u̱lo̱ a̱nne̱k ne, “A̱gga̱ i̱nna̱ zoz ci ol cik een Gi̱ri̱k?” ³⁸ “Ki̱no̱ni̱ e̱e̱ni̱ i̱nna̱ Masirenit bali ingane jo̱o̱re̱, kar zin kuwe ol cik meelek balala.” ³⁹ Obodeke Pa̱u̱lo̱ nonno a̱nne̱k ne, “Ke̱e̱ni̱ Yo̱u̱do̱c ci kakuni o̱rge̱ ci een Tarasis ngati een Cilicia, e̱e̱t ci orog wa a̱gga̱ ol ju̱rru̱m. Kilaleki nya kozozik ol.”

⁴⁰ Ma baling anyik ddi̱ki̱ryo̱i̱ti̱ kozoz, ibil Pa̱u̱lo̱ lo̱ti̱ti̱ya̱, kar zin ki̱ti̱va̱n kolle azzine kiziyet nonno. Ma baling ijakte do̱o̱k, izek zin nogo utuge ci Aramaik ne,