20
Okko Pa̱u̱lo̱ Masadoniakte ki Gi̱ri̱ya̱
1 Ma baling a̱vvu̱to̱ ol cik orog ci een Evosos labak, utu zin Pa̱u̱lo̱ nuyak wak Ye̱su̱, kar ki̱ti̱lo̱. Kar zin kiizek nogo ne, “Abunna kotowa.” Kar kuk lo̱o̱ce̱ ci een Masadonia. 2 Imma gon goola, i̱lo̱t ol wak a̱tu̱we̱ o̱ro̱gjo̱we̱ ne̱k owoye enne ke̱. Kar zin kuluce kuk o̱rge̱ ci een Gi̱ri̱k, 3 ngin wa okko abahe nye̱lo̱wi̱ i̱i̱yo̱. Orong keron go̱o̱le̱ ci li̱i̱lu̱ i̱bo̱wa̱ rok lo̱o̱c ci Suriya, baling okko a̱gga̱ zoz ci orong ol cik Yo̱u̱da̱k ongik ko̱, odola zin zinine cinne orong koboda ki orog ci een zara Masadonia.
4 Orkor da Pa̱u̱lo̱ ki ol cik meelek, zar cik ol ne̱ke̱ iciko: Sopatar ci orog ci een Beriya, ngerrti Pairas orkor ki Aristakas ki Sikondo ci orog ci een zara Te̱se̱lo̱ni̱ka̱, ki Gayas ci a̱kku̱ Derbekte, Ti̱mo̱ti̱ ki Taikas ki Trovimas balik a̱vvu̱ lo̱o̱ce̱ ci een zara Asiya. 5 Ot zin oowa ot e̱re̱ye̱t o̱rge̱ ci een Toras. 6 Baling okko edeccai i̱i̱te̱ni̱ wa adahe ol da̱i̱ne̱t wak iróng amukcari, ko̱to̱dda̱ (Pa̱u̱lo̱ ki Lu̱ka̱) zin i̱bo̱ o̱rge̱ ci een Vilipi lo̱o̱ce̱ ci Masadonia, ke̱de̱cca̱ zin gwo̱o̱ye̱n tu̱r goola, kar eci een torkonom kuzuca orog ci een Toras, kar kabakta nginati i̱i̱nya̱ turgerem.
Aruguz Pa̱u̱lo̱ do̱le̱c ci adai
7 Imma i̱i̱te̱ne̱ wa een oo biranoca, ku̱lu̱tte̱wa̱ kar kadakta umune wa kaadane daiz bali Ye̱su̱ ke̱. Uwak Pa̱u̱lo̱ zee kize ba̱li̱n keng, eci orong kar koto nge̱rre̱ti̱n ci reeng. 8 Ma̱i̱je̱ ce̱e̱ze̱ neci uwahe Pa̱u̱lo̱ ke̱, anyak urezwa cik alanycek ol meelek. 9 Baling ngen Pa̱u̱lo̱ uwak niko, anyak da logut imma ci een zara Itukas, aave lopildinge ci ce̱e̱zu̱ ta̱dde̱na̱ ngiwa atadzone ce̱e̱zi̱ lak i̱i̱yo̱, a̱da̱k da ungnyaha oroot. Imma vu̱rrta̱, a̱gga̱mi̱t ungnyaha kar zin ku̱yu̱we̱ meer ta̱dde̱na̱ rok lo̱o̱c kadak. 10 Uluce zin Pa̱u̱lo̱ uk lo̱o̱ta̱, kar zin ku̱lu̱le̱ kar katabong azzine. Kar kize ne, “Ma ongoolinu, aruge enne!” 11 Kar zin ki̱mi̱rte̱ do̱o̱k o̱to̱di̱t ot ce̱e̱z ta̱dde̱na̱, kar kadait da̱i̱ne̱t wak aadane daiz bali Ye̱su̱ ke̱ nga̱to̱de̱. Ozozik bo̱do̱k Pa̱u̱lo̱ nogo kaal kaala looci, kar zin kuk. 12 O̱tte̱ zin ol logut wanai i̱i̱na̱ ke̱ ce̱e̱za̱ labak, a̱ta̱li̱t zin ol oroot eci enne uruge.
Okko Pa̱u̱lo̱ o̱rge̱ ci een Miletus
13 Okko zin Pa̱u̱lo̱ zoone rok orog ci een Assos, ngin bali i̱lo̱ti̱kke̱t abunna karumona ki nonno ke̱, kar ko̱tta̱ oowa i̱bo̱wa̱. 14 Urubait Assos kar zin kotoda i̱bo̱ ki nonno bu̱k rok orog ci een zara Mitylene. 15 Imma i̱i̱te̱ne̱ ci reeng, kedecceka zee bak kovvo karawana lo̱o̱c ci azi zar ne Kuus. Ma bo̱do̱k i̱i̱te̱ne̱ co̱de̱ ke̱, ka̱vvu̱na̱ka̱ orog ci azi Samos ci aave mame orgena. Kedecceka kovvoya o̱rge̱ ci een zara Miletus.
16 Iróng zin Pa̱u̱lo̱ ngen orong kar ki̱ye̱be̱zta̱ o̱rge̱ ci azi zar ne Evesos lo̱o̱ce̱ ci een Asiya, eci orong kar kurubak kwo̱o̱r wa azi pentakost (i̱i̱ bali a̱ku̱na̱ke̱ Vongizi ci A̱li̱le̱ ol) ko̱ Jerusalem.
Arumo Pa̱u̱lo̱ ki lo̱ddi̱ki̱re̱ cik ke̱le̱ca̱k Evesosa
17 Baling arawa Pa̱u̱lo̱ orog ci een zara Miletus, i̱tto̱n zin zoz abunna ming arumo ki lo̱ddi̱ki̱re̱ cik Ce̱e̱z ci Ta̱mu̱ta̱dde̱no̱ o̱rge̱ ci een Evesos, 18 i̱vi̱ta̱k zin nonno, iizek zin nogo ne, “A̱gga̱yyu̱ nginti karike zo̱o̱ cigannik ko̱ lo̱o̱c ci Asiya (Tu̱rki̱ya̱), 19 ka̱li̱ngli̱ngi̱ zoz ci Manyi zinine ci voori ki gi̱de̱ne̱t ci a̱gi̱dda̱ ol cik Yo̱u̱da̱k. 20 Ka̱du̱wa̱ku̱ng zoz ci een de̱de̱ odohize zuwa ki bo̱do̱k ce̱e̱zi̱ne̱ ciggo̱k. 21 Ki̱lo̱ti̱ ol cik Yo̱u̱da̱k ki Gi̱ri̱k wak uunge ba̱ci̱nno̱k lo̱o̱c kar kout ngati Ta̱mu̱ta̱dde̱no̱ abunna a̱tu̱ zoz ci Manyitinna Ye̱su̱.
22 Kar bo̱do̱k Pa̱u̱lo̱ kize ne, “I̱yo̱ko̱ kokko Jerusalema, okkoya Vongizi ci A̱li̱le̱, iróng ka̱gga̱ gi̱i̱ ci atin okko adaka nginati. 23 Abarik a̱du̱wa̱ka̱ Vongizi ci A̱li̱le̱ o̱no̱zo̱we̱ goola o̱ro̱gjo̱we̱ zoz ci azi ne anyak atin kaal cik aavtte o̱o̱we̱ cinanni ogoneka atin ol, a̱gi̱dda̱ ol kar bo̱do̱k kecebta lagama. 24 Abarik i̱llo̱i̱ gi̱i̱ imma ci kebera baize cinanni, ming iróng ka̱li̱ngli̱ngi̱ li̱ngli̱ngo̱n bali aanya Manyi Ye̱su̱ ke̱, li̱ngli̱ngo̱n ci uwahek ol kaviyak cik abunna Ta̱mu̱ta̱dde̱no̱.
25 Azi zin bo̱do̱k Pa̱u̱lo̱ ne, “I̱yo̱ko̱, ka̱gga̱ iróng atin ngen acinna̱ng udut, ommogje ol balik kuwahek nogo ba̱a̱li̱ne̱t ci Ye̱su̱ ke̱. 26 I̱yo̱ko̱ zin, ka̱du̱wa̱ku̱ng zoz ci een de̱de̱, ming iróng e̱e̱ti̱ imma amuda ruget wa aave udut, iróng neci een ba̱ci̱ cinanni. 27 eci ku̱du̱wa̱u̱ng kaviyak cik orong Ta̱mu̱ta̱dde̱n ol ciginnek ka̱gga̱c do̱o̱k.
28 Emmena Pa̱u̱lo̱ ti̱lo̱wi̱nta̱ de, kar kize ne, “I̱yo̱ko̱ u̱zzu̱te̱ e̱le̱tti̱ ciggo̱k zo̱ze̱ ci Ta̱mu̱ta̱dde̱no̱ ki ol cik Ta̱mu̱ta̱dde̱no̱ ce̱e̱ze̱ cinne, bali atala bi̱ye̱te̱ ciginnek kar Vongizi ci A̱li̱le̱ katahalaung izet to̱wa̱yo̱k cik ol ciginnek. 29 Ka̱gga̱ anyak atin ol cik gerzek ki gu̱lu̱ze̱ cik atin iyowa orgene cunno̱ng, egerzan atin ol Ce̱e̱ze̱ ci Ta̱mu̱ta̱dde̱no̱. 30 Anyak atin ol cik ingazi orgene cunno̱ng kar kovolongtek nuyak wak Ye̱su̱ abunna ming anu zoz cinne̱ng. 31 U̱zzu̱te̱ e̱le̱tti̱, a̱a̱dda̱ e̱rki̱nya̱ balik een i̱i̱yo̱ ke̱, ki̱lo̱tu̱ng kilalekung ki̱vi̱ta̱ ti̱la̱lo̱ wazin ṯup ki ba̱li̱n kaal ke̱.
32 Kar zin bo̱do̱k Pa̱u̱lo̱ kize ne, “I̱yo̱ko̱ kalawekku̱ng Ta̱mu̱ta̱dde̱n ki bunnat ci zoz cinne, adimanung kaviyaha ciginnek okomit, kar ka̱a̱nyu̱ng izet dooli ciginnek ki ol balik atahala enne ke̱.
33 Azi bo̱do̱k Pa̱u̱lo̱ ne, “Ngen katamatek o̱ro̱bi̱ya̱ icima ru̱u̱m ci e̱e̱t imma ci a̱zi̱ze̱. 34 A̱gga̱yyu̱ ju̱rru̱m ka̱li̱ngli̱ngi̱ azzine cigannik ko̱ kar kuruge, kar bo̱do̱k keela ol wak kaavtiya bu̱k ko̱. 35 Ki̱ye̱le̱ku̱ng gool ci ka̱li̱ngli̱nge̱ oroot kar keela ol cik amati. Abunna ming a̱a̱da̱nnu̱ zoz ci Manyi Ye̱su̱, azi ne, ‘Amuda e̱e̱ti̱ ci anyike ol kaal eezzet oroot ngati e̱e̱t ci anyike ol nonno kaal.”’