Bu̱k wa To̱ni̱a̱u̱ 19

Aave Pa̱u̱lo̱ o̱rge̱ ci een zara Evesos

¹ Baling ngen Apollo aave o̱rge̱ ci een zara Ko̱ri̱nto̱, eron Pa̱u̱lo̱ lo̱o̱co̱we̱ cik a̱ddi̱ki̱re̱ meelek. Bali vu̱rrta̱ i̱ki̱ya̱k orog ci een Evesos, ngin bali okko amudane nuyak u̱gge̱. ² I̱jji̱n zin Pa̱u̱lo̱ nogo, a̱nne̱k ne, “Ma dim ming a̱tu̱we̱nu̱ ko̱, i̱ki̱ya̱u̱ng da Vongizi ci A̱li̱le̱?”

O̱bo̱dde̱k zin nonno, a̱nne̱k ne, “I̱llo̱i̱, iróng ka̱gga̱ya̱ zoz ci ozozi i̱nna̱ ko̱. Ngen zin bo̱do̱k kizikta gi̱i̱ ci een Vongiz ci A̱li̱le̱ ko̱.”

³ I̱jji̱n zin bo̱do̱k Pa̱u̱lo̱ nogo, a̱nne̱k ne, “A̱gga̱me̱ku̱ng da ol ba̱ti̱ti̱mo̱ wa ngene?”

O̱bo̱dde̱k bo̱do̱k, azi ne, “A̱gga̱mnya̱ ba̱ti̱ti̱mo̱ wa Joni.”

⁴ Ize zin Pa̱u̱lo̱ ne, “Een ba̱ti̱ti̱mo̱ ci Joni ci anyike ol kutunget ba̱ci̱nno̱k kar koboddak Ta̱mu̱ta̱dde̱n. A̱du̱wa̱k Joni ilya ol a̱nne̱k ne elemtta Ye̱su̱ ci a̱kku̱ atin vu̱rrta̱ ke̱.”

⁵ Baling ovvo aziye zoz neci, a̱gga̱mi̱t zin ba̱ti̱ti̱mo̱ zare cik Manyi Ye̱su̱. ⁶ Baling attadek Pa̱u̱lo̱ azzin o̱o̱ti̱ cigge̱k alawek Ta̱mu̱ta̱dde̱n, i̱ki̱ya̱k zin nogo Vongizi ci A̱li̱le̱, kar kozozit zo̱ze̱ ci iróng nege do̱o̱k a̱gga̱ kar bo̱do̱k ku̱du̱ktta̱ zoz ci Ta̱mu̱ta̱dde̱no̱ ogon Manyi atin. ⁷ E̱e̱ggi̱n ol balik a̱kku̱na̱k Vongizi ci A̱li̱le̱ ko̱ do̱o̱k omoto ki rama.

Uwahek Pa̱u̱lo̱ zoz ci Ta̱mu̱ta̱dde̱no̱ ol cik orog ci een Evesos

⁸ Uk zin Pa̱u̱lo̱ Ce̱e̱ze̱ wa Lawinto kar kuwahek ol zoz ci Ta̱mu̱ta̱dde̱no̱ ngati anime zoz nyolowi i̱i̱yo̱. Adango ki ol cik Yo̱u̱do̱ zoz ci okko Ta̱mu̱ta̱dde̱n abale ol ciginnek. ⁹ Ma̱i̱je̱ ol uggak utuburet zoz ci Pa̱u̱lo̱, kar zin ka̱da̱ngi̱t nonno orgene ci ollu. Utungek zin Pa̱u̱lo̱ baali lo̱o̱c kar zin kuwe nuyak bu̱k. Kar zin kakate gon kuwahek ol zoz ci obod ki Ta̱mu̱ta̱dde̱n odohize ce̱e̱ze̱ ci azi zara ne Tairnias wagon edemzine ol ko̱. ¹⁰ Edemez Pa̱u̱lo̱ ol nginati e̱rki̱nya̱ i̱i̱yo̱, abunna ol do̱o̱k Yo̱u̱d icima Gi̱ri̱k wak abak lo̱o̱ce̱ ci azi zar ne Asiya ko̱ aziye zoz ci Manyi.

¹¹ Aanyik Ta̱mu̱ta̱dde̱n Pa̱u̱lo̱ komiz ci ogone kaal cik a̱vu̱la̱, ¹² ming u̱u̱m ol cik omori ru̱u̱me̱ ci anyak, i̱zze̱c morizowa dakdak, kar bo̱do̱k ol cik anyak kuulo, ungna kuulo ol ne̱ke̱ niko.

¹³ Anyak gon ol cik Yo̱u̱do̱ u̱gge̱ cik ozob lo̱o̱co̱k do̱o̱k ngati ottowe kuulo o̱lle̱ zare cik Manyi Ye̱su̱. Zoz ci a̱du̱wa̱ gon nege odohize icu ming ottok kuulo o̱lle̱, azi ne “Ko̱tto̱ku̱ng zare cik Ye̱su̱ wagon uwahek Pa̱u̱lo̱ ol ko̱, iyokta re̱e̱nu̱n!” ¹⁴ Anyak alaani wa wawaco Ce̱e̱ze̱ ci Ta̱mu̱ta̱dde̱no̱ ci een zara Sekeva, een enne Yo̱u̱do̱, anyak dooli turgerem cik gon ovvo ogon kaal ne̱ko̱. ¹⁵ Imma baling ovvo atiman orongit kotoit kuuloci ci lo̱rye̱nta̱k ngati e̱e̱t imma, o̱be̱de̱k zin kuuloci neci nogo, a̱nne̱k ne, “Ka̱gga̱ anna Ye̱su̱, kar bo̱do̱k ka̱gga̱ Pa̱u̱lo̱. Ma̱i̱je̱ niga e̱e̱gi̱nu̱ ciko ngene?” ¹⁶ Baling ojongoz e̱e̱ti̱ neci anyak kuulo cik lo̱rye̱nta̱k ko̱ nogo kar ku̱ru̱g nogo bak kommog voror, kar zin ki̱vi̱re̱t ce̱e̱ze̱ neci nga̱dhi̱ri̱ ki ngodocet.

¹⁷ Uzzuca zin zoz neci orog ci Evesosi veelek, iziyet ol cik Yo̱u̱do̱ ki ol cik een Gi̱ri̱k bu̱k. Otongoolte zin ol o̱rge̱ neci kar kelemtta zar cik Manyi Ye̱su̱ oroot. ¹⁸ Imma ol balik u̱tu̱we̱c zoz ci Ta̱mu̱ta̱dde̱no̱ ko̱, ubunget u̱tu̱ge̱ti̱ne̱ cigge̱k azi ne, kutungta zoz bali gon gerze kogon ke̱. ¹⁹ Anyaktta zin ol cik meelek balik eher warganya cik ogone kaal cik lo̱rye̱nta̱k ki waraganya ne̱ge̱k ki̱vi̱ta̱ ku̱tu̱zze̱ gwo̱o̱ya̱ kicinet zu̱we̱ do̱o̱k. Utai ba̱li̱ye̱ buwani ne̱ke̱ orobiyai cik meelek giir. ²⁰ U̱zzu̱ca̱ zin kaviyaha ci Manyi ol cik meelek.

Abure ol cik orog ci een zar Evosos nong

²¹ Bali vu̱rrta̱, ozozik Vongizi ci A̱li̱le̱ Pa̱u̱lo̱ abunna ming azuca arrak orog ci een Masadonia ki Akaiya ming ngen ki̱mi̱re̱ kuk Jerusalema. Azi zin Pa̱u̱lo̱ arrak ne, “Korongi kuk rok orog ci een Roma.” ²² I̱tto̱n zin ol wak gon eela nonno een rama Ti̱mo̱ti̱ ki Erestas, kot oowa rok orog ci een zara Masadonia, baling ming ngen enne aave arrak do̱yo̱i̱t lo̱o̱ce̱ ci een zara Asiya.

²³ Ma̱i̱je̱ i̱i̱te̱ne̱ neci anyait ol jo̱o̱re̱ ci a̱ppwe̱ zo̱ze̱ ci obod ki de̱mzi̱ne̱t zoz ci Ta̱mu̱ta̱dde̱no̱ o̱rge̱ ci een Evesos. ²⁴ Akane jo̱o̱re̱ neci ngati e̱e̱t ci een zara Demetiras wagon adiman aduwet cik ta̱mu̱ta̱dde̱ne̱t cik ol cik een Gi̱ri̱k, azi zar cik ta̱mu̱ta̱dde̱n neci ne Artemis. Aanyik ol cik meelek ki̱li̱ngli̱nge̱t oroot. ²⁵ Ulutai zin ol wak oova gon biyen cik anyike ol cik Gi̱ri̱ko̱ kize ta̱mu̱ta̱dde̱n ki ol do̱o̱k wak a̱li̱ngli̱ng li̱ngli̱ngo̱no̱k cik ogon ki ne̱ko̱, kar zin kuwahek nogo zozok ciko:

“Logoze, a̱gga̱yyu̱ kamuda naga o̱ro̱bi̱ya̱ li̱ngli̱ngo̱nte̱ necu. ²⁶ Eci iziyktu kar bo̱do̱k icintu zoz ci Pa̱u̱lo̱. I̱ti̱ye̱ Pa̱u̱lo̱ ol cik meelek tu̱ o̱rge̱ ci een Evesos zoz ci azi ne, ‘Iróng kaala cik okovan ol azzine ko̱ een ta̱mu̱ta̱dde̱n de̱de̱. Iróng zin zoz wa ozoz Pa̱u̱lo̱ ko̱ aave o̱rge̱ cu do̱, uzzuca zoz necu lo̱o̱co̱k cik Asiya ko̱ do̱o̱k! ²⁷ Iróng kozozi zoz ci okko atin li̱ngli̱ngo̱ni̱ cinna gerza do̱, kozozi zoz ci ce̱e̱z ci Ta̱mu̱ta̱dde̱n wanna a̱ddi̱ki̱re̱ een Artemis, iróng atin ol ngen edeconik ta̱mu̱ta̱dde̱n wa ala ol cik lo̱o̱c ci een Asiya ko̱ do̱o̱k. I̱ra̱n atin bo̱do̱k ol kaal ciginnek do̱o̱k!”

²⁸ Baling iziyet ol zoz neci, utuburet nong oroot, kar zin kegerenyit kizeto ne, “Ommog Ta̱mu̱ta̱dde̱n wanna wa een zara Artemis wa a̱ddi̱ki̱re̱, ci olli Evesosi!” ²⁹ U̱lu̱tte̱ zin zu̱we̱ nga̱to̱de̱, ataman niko u̱la̱le̱ orogi. Kar zin kot ka̱gga̱mi̱t e̱e̱t ci een zara Gayas ki Aristakas ol balik erona ki ciko Pa̱u̱lo̱ lo̱o̱ce̱ ci een Masadonia ke̱. ³⁰ Orong Pa̱u̱lo̱ ki̱tto̱ orgen ci ollu, imma nuyaha alam nonno. ³¹ Imma ddi̱ki̱ryo̱wa̱ cik orog neci uggak wak een gonoggi Pa̱u̱lo̱ i̱tto̱nta̱ zoz ci azi ne ma i̱zzo̱we̱k ele zoz ci ol ne̱k u̱la̱l ol ko̱.

³² Egerenyit ol ecito oroot, ongonyce kaala cabak. Iróng ol uggak a̱gga̱ a̱vvu̱na̱k nege ngin neci ku̱. ³³ I̱yo̱ti̱t zin ol uggak cik een Yo̱u̱d e̱e̱t ci een zara Alizanduru kuk oowa abunna oobek nogo zoz neci. I̱jji̱n zin ol abunna ming ijakje kar keela ele zo̱ze̱ necu. ³⁴ Abarik baling a̱gga̱c zu̱we̱ nonno ming een e̱e̱t ci Yo̱u̱do̱, akate bo̱do̱k gernyi bak egereny sanya rama, anno ne, “Ommogje Ta̱mu̱ta̱dde̱n cinna Artemis wa aave Evesosa do̱.”

³⁵ Imma vu̱rrta̱ ibiliz zin alaani nogo. Kar kize ne, “Niga ol cik Evesosi, a̱gga̱yyu̱ do̱o̱k anyak Evesosi ce̱e̱z ci ta̱mu̱ta̱dde̱no̱ wa een Artemis wa a̱ddi̱ki̱re̱, bali i̱i̱na̱ ele cinne meer ta̱mu̱-kenga ke̱. ³⁶ Eci iróng kadangone zoz ci ogon niko, ma ongoolinu gaganiko, ma aziknu zoz wa ozoz ol. Ma ogonnu gi̱i̱ imma ataman. ³⁷ Anyakttau ol ne̱ko̱ ngintu, ngen zin kogorozit gi̱i̱ imma ce̱e̱ze̱ ci ta̱mu̱ta̱dde̱ne̱t ciggo̱k ko̱, ngen zin bo̱do̱k kozozit zoz ci gerze obod ki ta̱mu̱ta̱dde̱n cinna. ³⁸ Ming anyak e̱e̱ti̱ ci een zara Demetiras ko̱ ki ol wak oova kaal ko̱ lo̱ki̱ko̱ ki nogo, aavtte ol cik etted zoz to lo̱ki̱ka̱, adiman atidic ol wak etted zoz ko̱ lo̱ki̱ka̱ necu e̱co̱de̱. Anyik nogo ko̱tte̱ zoz necu go̱o̱le̱ ci abunna lo̱ki̱ko̱. ³⁹ Ming aavtte zo̱zo̱wa̱ uggak cik abure nege nong to, adimanai atin baala. ⁴⁰ Kongoole ovvo atin gala cik ol cik een Roma ecebjet eci kogone zoz ci gerze orgato. Ming a̱jji̱ne̱t gala azi ne, oobtettu da ungec ci zozo, ka̱nne̱k atin ne i̱llo̱i̱ gi̱i̱ imma ci ka̱gga̱ya̱.” ⁴¹ Ijahe zin enne liim kar kazzan nogo ke̱le̱ci̱a̱.