18
Urumto Pa̱u̱lo̱ ki Piricila ki Akuila o̱rge̱ ci een Ko̱ri̱nto̱
1 Bali vu̱rrta̱ utungek Pa̱u̱lo̱ Atenz lo̱o̱c kar kuk o̱rge̱ ci een zara Ko̱ri̱nto̱. 2 Urumto zin nginati ki e̱e̱t ci een Yo̱u̱d azi zar ne Akuila ci a̱ri̱ta̱i̱ lo̱o̱ce̱ ci azi Pontas. Orkora da ki ngaa cinne azi zar ne Prisila lo̱o̱ce̱ ci azi zar ne Italiya. O̱tto̱kyye̱ da Italiya, eci alaani Kalaudio Kesari iróng orong ol cik Yo̱u̱do̱ kabaito Roma, utungtek zin Roma lo̱o̱c. 3 Okko zin Pa̱u̱lo̱ abak ki nogo kar bo̱do̱k ki̱li̱ngli̱nge̱t bu̱k, eci nege adiman kaal cik utene ru̱ce̱ne̱ cik ti̱i̱nu̱, a̱gga̱ Pa̱u̱lo̱ li̱ngli̱ngo̱n necu bu̱k.
4 Imma I̱i̱nya̱we̱ wak Yu̱bze̱nto̱, okko gon Ce̱e̱ze̱ wa Lawinto, okko a̱du̱wa̱k ol cik Yo̱u̱do̱ ki Gi̱ri̱k zoz ci Ye̱su̱. 5 Kar baling ovvo ciko Sailas ki Ti̱mo̱ti̱ a̱vvu̱ o̱rge̱ ci een Masadonia ke̱, i̱li̱ngli̱ng zin Pa̱u̱lo̱ li̱ngli̱ngo̱n co̱de̱ ci uwahek ol cik Yo̱u̱do̱ kaviyak cik Ta̱mu̱ta̱dde̱no̱. A̱nne̱k nogo ne, “Ki̱ri̱sto̱ ci orongnyu ko̱, nonno bali ci een Ye̱su̱.” 6 Baling a̱da̱ngi̱t ol cik Yo̱u̱do̱ nonno kar bo̱do̱k kodomit, u̱du̱l zin keet ngati aburnne nong kar kize ne, “Ullta daizok cugo̱k ma̱ci̱gja̱, kimira. Akane i̱yo̱ko̱ kokko atin kuwahek kaviyak cik Ta̱mu̱ta̱dde̱no̱ ol wak iróng een Yo̱u̱d.”
7 U̱lu̱k zin Pa̱u̱lo̱ Ce̱e̱ze̱ wa Lawinto uk abak ce̱e̱ze̱ ci e̱e̱t ci een i̱do̱nge̱ni̱t azi zar ne Ti̱to̱ Justus ci gon ala Ta̱mu̱ta̱dde̱n. Okko bo̱do̱k ce̱e̱z ci e̱e̱t neci ojonzo ki baali. 8 Elema bo̱do̱k zin e̱e̱t ci een Krisapas ddi̱ki̱ryo̱i̱t ci Ce̱e̱ze̱ wa Lawinto ki ol cik ce̱e̱z cinne bu̱k. Izeto zin ol cik meelek Ko̱ri̱nto̱ balik a̱tu̱ nonno kar zin ka̱gga̱mte̱k ol ba̱ti̱ti̱mo̱.
9 Anyak ba̱li̱n co̱de̱ ci ozozek Manyi Pa̱u̱lo̱ o̱no̱zo̱we̱, a̱nne̱k ne, “Ma o̱ngo̱o̱le̱, zoz zoz cinanni! Ma ijakje li̱i̱m! 10 Eci karume ki i̱nne̱ta̱, i̱llo̱i̱ e̱e̱t imma ci kar ku̱tu̱gu̱we̱ gi̱i̱ ci gerze, eci o̱rge̱ cu kanyai ol cik meelek.” 11 Abak zin Pa̱u̱lo̱ o̱rge̱ neci e̱rki̱t co̱de̱ ki nyolowi torkonom, edemez ol zoz ci Ta̱mu̱ta̱dde̱no̱.
12 Baling ize Galio alaan ci abal lo̱o̱c ci een zara Akaiya, u̱lu̱tte̱ ol cik Yo̱u̱do̱ uggak kar ki̱vi̱ta̱ ka̱gga̱mi̱t Pa̱u̱lo̱ kar zin ko̱tte̱ lo̱ki̱ka̱ ngati ddi̱ki̱ryo̱to̱, kettedozik zoz. 13 Ovvoye Pa̱u̱lo̱ alaane ci een Galio zo̱ze̱ ci azi ne, “Orong Pa̱u̱lo̱ ol kar kalac Ta̱mu̱ta̱dde̱n go̱o̱le̱ ci aave do̱, iróng e̱he̱rye̱ lo̱ti̱nno̱we̱.” 14 Mazing orong Pa̱u̱lo̱ kozoz, a̱nne̱k zin alaani Galio ol wak anyaha Pa̱u̱lo̱ ko̱ ne, “Izikto da, ol cik Yo̱u̱do̱, ming wo̱ye̱ da zoz neci kize zoz ci gerze, kaziknung wo̱ye̱ te. 15 Abarik ette ulla zoz ci een ji̱ne̱ne̱t zar ki bo̱do̱k lo̱ti̱nno̱k wak Yo̱u̱do̱, edeccak ma̱ci̱gja̱. Kaburi ming kettedi kaal cik ogon ki ne̱ko̱.” 16 Kar zin kottok nogo lo̱ki̱ka̱ kot renna. 17 A̱gga̱mi̱t zin ol ne̱ke̱ Sovoni alaan ci Ce̱e̱ze̱ wa Lawinto, kar zin ku̱ru̱we̱t nonno lo̱ki̱ka̱ ele. Ma̱i̱je̱ alaani Galio iróng edeconik nogo.
Obodak Pa̱u̱lo̱ orog ci een Antiok
18 Abak Pa̱u̱lo̱ ki ol wak a̱tu̱ zoz ci Ta̱mu̱ta̱dde̱no̱ o̱rge̱ ci een zara Ko̱ri̱nto̱ i̱i̱nya̱ cik meelek. Imma vu̱rrta̱ izza ol do̱o̱k kar zin kotoddit i̱bo̱ kot Suriyakte nonno ki ciko Prisila ki Akuila. Ma̱i̱je̱ arrak baling ngen Pa̱u̱lo̱ kotod i̱bo̱ o̱rge̱ ci azi zar ne Seneseria, odot zin Pa̱u̱lo̱ imma cik oo cinne, ki wagon keere ci Yo̱u̱do̱, eci enne orong ki̱ye̱la̱ ming okko amuc Ta̱mu̱ta̱dde̱n. 19 Baling arayya orog ci een zara Evesos ci aave liil ti̱ti̱ma̱, utungek zin Pa̱u̱lo̱ gonoggi vu̱rru̱t. Baling ngen enne aave nginati, uk zin Ce̱e̱ze̱ wa Lawinto ozozzo ki ol cik Yo̱u̱do̱. 20 I̱jji̱nne̱t zin ol cik Yo̱u̱do̱ Pa̱u̱lo̱ kar kabak u̱u̱mu̱c arrak ki nogo, utubur zin. 21 Uk zin kar kize ne, “Kobodakung atin ming aanya Ta̱mu̱ta̱dde̱n gool.” Otod zin Pa̱u̱lo̱ i̱bo̱ Evesosa kar zin kuk. 22 Kar zin bo̱do̱k kuk kibil o̱rge̱ ci azi zara ne Keseria aave ti̱ti̱me̱ ci li̱i̱lu̱. Imma nginati uk icin ol wak a̱tu̱we̱ Jerusalema kar zin kuk ki̱mi̱re̱ kuk bo̱do̱k o̱rge̱ ci een zara Antiyok.
23 Baling a̱vvu̱ arrak Pa̱u̱lo̱ o̱rge̱ ci een zara Antiyok ko̱ do̱yo̱i̱t, i̱mi̱re̱ zin Pa̱u̱lo̱ uk o̱rge̱ ci een zara Ga̱la̱ti̱a̱ ki Vagiriya, okko acin nuyak wak Ye̱su̱, i̱lo̱t nogo kar bo̱do̱k keela abunna ming azune zoz ci Ta̱mu̱ta̱dde̱no̱.
Oobtek Prisila ki Akula Apollo zoz ci Ye̱su̱
24 Ma̱i̱je̱ i̱i̱nya̱we̱ ne̱ke̱ anyak e̱e̱t ci een Yo̱u̱d azi zar ne Apollo a̱kku̱na̱k Evesos. A̱ri̱ta̱i̱ da o̱rge̱ ci azi zar ne Alikzandria lo̱o̱ce̱ ci Masiro. A̱gga̱ da uwak oroot kar bo̱do̱k ka̱gga̱ zoz ci Ta̱mu̱ta̱dde̱no̱ oroot. 25 Edemezit da ba̱li̱ye̱ ol nonno go̱o̱llo̱k cik Manyi kar ka̱gga̱ ju̱rru̱m, kar zin kozozik ol zinine ci vori zoz ci een de̱de̱ obod ki Ye̱su̱. Abarik zin ulla da a̱gga̱ zoz ci ba̱ti̱ti̱mo̱ bali a̱gga̱me̱k Joni ol ke̱. 26 Baling iziyet Prisila ki Akuila nonno ming uwahek ol zoz ci Ta̱mu̱ta̱dde̱no̱ Ce̱e̱ze̱ wa Lawinto, u̱tu̱yya̱ zin nonno abanyca kar zin koobtek gool ci zoz ci Ta̱mu̱ta̱dde̱no̱ ju̱rru̱m.
27 Imma bali vu̱rrta̱, i̱no̱n da Apollo orong kuk rok lo̱o̱c ci een zara Akaiya, kar zin Kiristiani o̱rge̱ ci Evososi ku̱du̱kta̱k nonno azi ne zoz ci abunna necu. Eteherit zin waraga ci okko ngati nuyak o̱rge̱ ci een Gi̱ri̱k, a̱du̱wa̱k nogo azi ne elemtta Apollo labak.