17
Uwahek Pa̱u̱lo̱ ki Sailas ol zoz ci Ta̱mu̱ta̱dde̱no̱ Te̱se̱lo̱ni̱ka̱
1 Eronit zin Pa̱u̱lo̱ ki Sailas kar zin kettedit orog ci een zara Amvipolis ki Apolonia bo̱ro̱ye̱ kuzzuca orog ci azi zara Te̱se̱lo̱ni̱ka̱, ci anyak Ce̱e̱z wa Lawinto Yo̱u̱do̱. 2 Uk zin Pa̱u̱lo̱ Ce̱e̱ze̱ wa Lawinto kiwagon keere cinne̱ng, uk biranine cik een i̱i̱yo̱ I̱i̱nya̱we̱ wak Yu̱bze̱nto̱, kar zin ku̱du̱wa̱k ol ungec ci zoz wa e̱he̱rye̱ warage ci Ta̱mu̱ta̱dde̱no̱. 3 Oobek nogo zoz ci Ta̱mu̱ta̱dde̱no̱ kar bo̱do̱k ku̱du̱wa̱k zoz bali a̱du̱wa̱ a̱ri̱tto̱wa̱ obod ki pirnanet ci okko Ki̱ri̱sto̱ amuda, ozoz bo̱do̱k nga̱zi̱ ci Ye̱su̱ daiza. Kar zin kiizek nogo ne, “Imma Ye̱su̱ ci ka̱du̱wa̱ku̱ng ko̱, nonno ele ci een Ki̱ri̱sto̱.” 4 Elemtta zin kolle balik aziye zoz ci Pa̱u̱lo̱ ki Sailas zoz ci Ta̱mu̱ta̱dde̱no̱, e̱e̱ggi̱n kolle ne̱ke̱ Gi̱ri̱k balik ala Ta̱mu̱ta̱dde̱n wa ala Yo̱u̱di̱, i̱vi̱ta̱k ngaai ki ol cik macik Pa̱u̱lo̱.
5 Ma̱i̱je̱ zin alaata cik ol cik een Yo̱u̱d emederanit nogo, u̱lu̱tta̱ zin ol cik i̱llo̱i̱ li̱ngli̱ngo̱n go̱o̱lo̱we̱, kar kovolongtek nogo abunna ming aburnnek Pa̱u̱lo̱ ki Sailas nong. Oyoit zin ol ce̱e̱ze̱ ci e̱e̱t ci een Jason, orong Pa̱u̱lo̱ ki Sailas kar ku̱tu̱gu̱re̱t ol orgena. 6 Baling iróng ngen amuda nogo nginati, u̱tu̱gu̱re̱t zin Jason o̱tte̱ renna ki ol u̱gge̱ wak a̱tu̱ zoz ci Ta̱mu̱ta̱dde̱no̱, abarik zin o̱tte̱ nogo alaate cik o̱rgu̱. Kar kegerenyit, kizeto ne, “U̱la̱li̱t Pa̱u̱lo̱ ki Sailas lo̱o̱c, i̱yo̱ko̱ zin aavtte ngatu orong u̱la̱l orog cinna ko̱ bu̱k. 7 Kar bo̱do̱k kizeto ne, “Jason ci anyike nogo ki̱vi̱ta̱ ce̱e̱z cinne. I̱yo̱ko̱ zin iróng nege ngen azune lo̱ti̱nno̱k wak Kesari een alaan cinna a̱ddi̱ki̱re̱ Roma. Abarik nege azi ne, “Alaan do̱o̱k ci abal ol ju̱rru̱m Ye̱su̱ nennen.”
8 Baling ovvo alaata cik o̱rgu̱ ki ol do̱o̱k aziye zoz neci, utuburet zin nong oroot. 9 Ma̱i̱je̱ alaata ovvo a̱gga̱ zoz neci vu̱rrta̱, ngati u̱ru̱ktte̱ Jason ki gonoggi kaal cik a̱gu̱re̱ne̱ gala ke̱re̱yye̱ wazin ci atin ozozine zoz.
Ovvo Pa̱u̱lo̱ ki Sailas o̱rge̱ ci azi zar Baria
10 I̱tto̱ni̱t ol wak a̱tu̱ zoz ci Ta̱mu̱ta̱dde̱no̱ ciko Pa̱u̱lo̱ ki Sailas rok orog ci azi zara ne Baria. Baling arayya orog neci, ot zin Ce̱e̱ze̱ wa Lawinto Yo̱u̱do̱. 11 Ma̱i̱je̱ ol cik Baria, ol cik abunna elemi de̱mzi̱ne̱t co Pa̱u̱lo̱, iróng ogon ki ol wak orog wa azi zara Te̱se̱lo̱ni̱ka̱ ke̱ bali abure zoz co Pa̱u̱lo̱ ki Sailas. Ikebit zin zoz ci Ta̱mu̱ta̱dde̱no̱ odohize, acin kaal cik edemez ciko Pa̱u̱lo̱ ki Sailas ming een de̱de̱. 12 Baling a̱gga̱c zoz ci Ta̱mu̱ta̱dde̱no̱ ju̱rru̱m, elemtta ol cik Yo̱u̱do̱ meelek zoz ci Ta̱mu̱ta̱dde̱no̱, elemtta bo̱do̱k lo̱ddi̱ki̱re̱ cik ol wak een Gi̱ri̱k ki ngaai.
13 Baling iziyet ol cik Yo̱u̱do̱ o̱rge̱ ci een Te̱se̱lo̱ni̱ka̱ zoz ci azi ne uwahek Pa̱u̱lo̱ ol cik Baria zoz ci Ta̱mu̱ta̱dde̱no̱, i̱vi̱ta̱k zin orog neci bu̱k, kar ki̱vi̱ta̱ kizzocit kolle abunna ming ooyok Pa̱u̱lo̱ ki Sailas. 14 I̱tto̱ni̱t ol wak a̱tu̱ zoz ci Ta̱mu̱ta̱dde̱no̱ ko̱ ciko Pa̱u̱lo̱ kunec liil ti̱ti̱ma̱. Ma̱i̱je̱ Sailasi ki Ti̱mo̱ti̱ iraktek vu̱rrta̱. 15 Korkorit zin ol balik inyaman Pa̱u̱lo̱ ke̱ rok orog ci azi zar ne Atenz. Kar zin ko̱bodda orog cinne̱ng Baria ki zoz ci azi ne aanycik Sailas ki Ti̱mo̱ti̱ ki̱vi̱ta̱ ataman kurubtak Pa̱u̱lo̱ orog ci een zara Atenz.
Uwahek Pa̱u̱lo̱ ol cik Atenzi zoz ci Ta̱mu̱ta̱dde̱no̱
16 Baling ngen Pa̱u̱lo̱ ere Sailas ki Ti̱mo̱ti̱ o̱rge̱ ci een Atenz, icin zin kaal cik anyike ol ne̱ke̱ kize ṯo̱do̱yo̱k cik ala nege meelek giir. Utubur zin nong oroot kaale ne̱ko̱. 17 Uk zin Ce̱e̱ze̱ wa Lawinto okko adango ki ol cik Yo̱u̱do̱ ki i̱do̱ngi̱ wak elemi zoz ci Ta̱mu̱ta̱dde̱no̱ go̱o̱le̱ ci alawe Yo̱u̱di̱ Ta̱mu̱ta̱dde̱n, kar bo̱do̱k kuwak zoz ci Ta̱mu̱ta̱dde̱no̱ odohize vara ngati ol ne̱k aavtte nginati.
18 Adangtto zin bo̱do̱k Pa̱u̱lo̱ ki ol u̱gge̱ wak azi zara Epikuran ki Sitoik ci gon edemez gonoggi de̱mzi̱ne̱t wa aave do̱. Baling a̱du̱wa̱k nogo zoz ci Ye̱su̱ ki nga̱zi̱ cinne daiza, izeto zin ne, “Anyaha e̱e̱ti̱ ci een ga̱lya̱i̱t a̱zu̱k zoz de̱mzi̱ne̱t ci aave do̱.” Ovvo uggak azi ne, “Ogon ki ci ozoz ta̱mu̱ta̱dde̱ne̱t cik ol u̱gge̱.”
19 O̱tte̱ zin Pa̱u̱lo̱ kolla ci ol wak gon edemez ol de̱mzi̱ne̱t wa aave do̱ ce̱e̱ze̱ ci een Eropagac. Kar kizetek ne, “I̱jja̱ oobet ju̱rru̱m gool ci alawe ol Ta̱mu̱ta̱dde̱n ci een nge̱ju̱k. (Ta̱mu̱ta̱dde̱n ci aave do̱ ko̱.)” 20 Kar bo̱do̱k kizeto ne, “Anyak kaal cik Aziknna a̱du̱wa̱nu̱, abunge een nge̱ju̱we̱ ngen kizikta, orongnya zin ming oobeket ungeti cik zozok ne̱ke̱.” 21 Eci ol cik abak o̱rge̱ ci een Atenz ko̱ ki i̱do̱ngi̱ do̱o̱k, orongit kadangto zo̱zo̱we̱ cik een nge̱ju̱we̱ odohize.
22 Itinga zin Pa̱u̱lo̱ ibil je̱e̱na̱ ngu̱me̱ ci ol cik een lo̱ddi̱ki̱re̱ biye ci een zara Eropagac. Kar kiizek nogo ne, “Niga ol cik orog ci een Atenz, kacinni akatkatanu zoz ci to̱do̱yo̱k cik anyakku ko̱ oroot kize Ta̱mu̱ta̱dde̱n cinno̱ng, 23 eci bali kowo orgato ko̱, kacini i̱te̱le̱nya̱ cik meelek gi̱i̱r ala ol. Kar anyak i̱te̱le̱ co̱de̱ ci eheronik zoz ci azi ne, ‘NGINTI TA̱MU̱TA̱DDE̱N CI IRÓNG KA̱GGA̱.’ Ala nonno ci iróng een enne ngene, i̱yo̱ko̱ zin orongi ku̱du̱wa̱u̱ng zoz ci Ta̱mu̱ta̱dde̱n neci.
24 Ize zin bo̱do̱k Pa̱u̱lo̱ ne, “Een enne Ta̱mu̱ta̱dde̱n bali eenyca ta̱mu̱-keng ki lo̱o̱c ki kaal cik aavtte ngatu ko̱. Eci enne een Manyi lo̱o̱c ki ta̱mu̱-keng, iróng zin abak Ce̱e̱zi̱ne̱ wak Ta̱mu̱ta̱dde̱no̱ eenyca e̱e̱ti̱ ci diiri azzine. 25 Iróng zin e̱e̱ti̱ ci diiri adimanek kaal azzine, eci anyak kaal do̱o̱k. Nonno ele ci anyet ruget ki vongiz do̱o̱k, kar bo̱do̱k kaanyet kaal do̱o̱k cik korongi. 26 Eteenya Ta̱mu̱ta̱dde̱n ol do̱o̱k ngati e̱e̱t co̱de̱ ṯok niko, kar i̱ki̱ya̱ e̱e̱ti̱ neci ki̱ti̱ra̱ ol cik lo̱o̱cu̱ ko̱ do̱o̱k. Baling ngen Ta̱mu̱ta̱dde̱n keteenya e̱e̱t, a̱gga̱ niko nginti atin abahe e̱e̱ti̱.
27 Kar zin bo̱do̱k Pa̱u̱lo̱ kize ne, “Orong Ta̱mu̱ta̱dde̱n zo̱ze̱ necu ko̱, kar icima i̱no̱n ol nonno, kar zin korongit, kar kurubta, ma̱i̱je̱ nu̱nu̱n iróng enne aave renna ngatinna do̱o̱k. 28 Eci azi zoz ne, “Karuge ngatinne kar bo̱do̱k kadait ngatinne.” Azi gon be̱ni̱no̱wa̱ ciggo̱k ne, “Ke̱e̱gi̱n dooli cik Ta̱mu̱ta̱dde̱no̱.” 29 Kar zin ming een zoz neci de̱de̱, gerza zin ming ki̱no̱n kazi ne adimanai Ta̱mu̱ta̱dde̱n azzine ki i̱yo̱ko̱ a̱ri̱tto̱k wak adiman kaal keere icima biyene icima ziknyai. 30 Iróng zin Ta̱mu̱ta̱dde̱n ngen acin zoz bali ebeze ol ke̱ kaale ne̱ko̱, abarik i̱yo̱ko̱ a̱du̱wa̱k ol lo̱o̱co̱we̱ do̱o̱k abunna obodak nonno. 31 Eci aarik i̱i̱te̱n ci okko ettede lo̱ki̱ko̱ ju̱rru̱m. Okko atin e̱e̱ti̱ bali atahala ke̱ etted lo̱ki̱ko̱ neci, kar zin ki̱ye̱le̱k ol do̱o̱k eci itingawe e̱e̱t neci daiza.”
32 Baling ovvo aziye Pa̱u̱lo̱ ming ozoz e̱e̱t wa ingazi daiza ko̱, a̱ta̱ra̱ri̱t ol uggak, ma̱i̱je̱ uggak azi ne, “Korongnya kizikta zoz necu atidic.” 33 U̱tu̱re̱ dangonet cinne̱ng ki Pa̱u̱lo̱ ngatu, 34 urumtek zin ol uggak e̱le̱tti̱ Pa̱u̱lo̱, izeto nege bu̱k ol cik a̱tu̱ zoz ci Ta̱mu̱ta̱dde̱no̱. Imma o̱lle̱ ne̱k elemi zoz ci Ta̱mu̱ta̱dde̱no̱ ko̱, anyak e̱e̱t ci een zara Dinosias ci gon alute ki ddi̱ki̱ryyo̱k cik o̱rgu̱ ki bo̱do̱k ngaa ci azi zar ne Damaris ki bo̱do̱k ol cik o̱rgu̱ u̱gge̱.