16
Eroni ci Pa̱u̱lo̱ wa een rama
1 Ovvo Pa̱u̱lo̱ ki Sailas arrak rok orog ci azi zara ne Derbe, kar zin kot rok orog ci een Listra. Urumto zin ki logut ci een zara Ti̱mo̱ti̱, nuyait wa Ye̱su̱, een yatinne ol cik Yo̱u̱do̱, a̱tu̱ zoz ci Ta̱mu̱ta̱dde̱no̱, ma̱i̱je̱ batinne een ol cik een Gi̱ri̱k. 2 Imma ol wak a̱tu̱ zoz ci Ta̱mu̱ta̱dde̱no̱ ko̱, wak aavtte o̱ro̱gjo̱we̱ ciko: Listra ki Aikoniya, atali Ti̱mo̱ti̱ oroot. 3 Orong zin Pa̱u̱lo̱ Ti̱mo̱ti̱ korkorit ki nogo kar zin ketted nonno ku̱u̱l ki keer ci Yo̱u̱do̱, eci ol do̱o̱k a̱gga̱ een batinne i̱do̱nge̱ni̱t ci een Gi̱ri̱k. 4 Kar zin kunuwet o̱ro̱gjo̱k e̱co̱de̱ e̱co̱de̱, oobek ol zoz bali u̱du̱ktta̱ to̱ni̱a̱ha̱ ki lo̱ddi̱ki̱re̱ Jerusalema ke̱, abunna ming azune. 5 U̱tu̱we̱t zin ol cik ke̱le̱ci̱a̱k zoz ci Ta̱mu̱ta̱dde̱no̱ kar bo̱do̱k ol kotorte ki̱vi̱ta̱k Ce̱e̱z ci Ta̱mu̱ta̱dde̱no̱ odohize kolla.
Ozozik Pa̱u̱lo̱ e̱e̱t ci orog ci een Masadonia
6 Ma bali vu̱rrta̱, eronit Pa̱u̱lo̱ ki Sailas ki Ti̱mo̱ti̱ rok lo̱o̱co̱k ciko: Vagiriya ki Ga̱la̱ti̱a̱, eci Vongizi ci A̱li̱le̱ a̱du̱wa̱k nogo zoz ci azi ne, “Ma ovvoyyu rok lo̱o̱c ci een Asiya i̱i̱te̱n neci. 7 Kar zin baling ovvo arawa lokore ci lo̱o̱c ci ol cik een Maisia, ozoroc zin ot lo̱o̱ce̱ ci een Betenia, ma̱i̱je̱ bo̱do̱k Vongizi ci Ye̱su̱ iróng anyike nogo kot. 8 Abarik zin ot ettedit lo̱o̱c ci een Maisia bo̱ro̱ye̱ kozoroc kot rok orog ci een zara Toras.
9 Imma ba̱li̱n neci, onoze Pa̱u̱lo̱. Acin o̱no̱zo̱we̱ e̱e̱t ci lo̱o̱c ci een zara Masadonia, ilalek Pa̱u̱lo̱, azi ne, “I̱jja̱k Masadonia kar eelaweta.” 10 Baling okko Pa̱u̱lo̱ ingazi ungyahe, itingazzo ot Masadoniakte e̱co̱de̱ niko. Eci a̱gga̱we̱ Ta̱mu̱ta̱dde̱n nenen ci awu nogo abunna ming ovvo uwahek ol kaviyak cik abunna.
A̱tu̱ ngaa ci azi zar ne Lidia Ta̱mu̱ta̱dde̱n
11 Ko̱to̱dda̱ i̱bo̱ wa a̱ddi̱ki̱re̱ o̱rge̱ ci azi zara Toras, kar ketteda liil wa a̱ddi̱ki̱re̱ bo̱ro̱ye̱ rok orog ci een zara Samotarac aburuk mama, kar i̱i̱te̱n ci reeng karayya orog ci azi zar ne Niapolis. 12 Imma nginati ko̱tta̱ rok orog ci aave liil ti̱ti̱ma̱ azi Vilipi, orog ci a̱ddi̱ki̱re̱ aave lo̱o̱ce̱ ci Masadonia. Abahe orog neci ol balik a̱vvu̱ lo̱o̱ce̱ ci een Roma. 13 Imma I̱i̱te̱ne̱ wa Yu̱bze̱nto̱, ko̱tta̱ zin ti̱ti̱me̱ ci li̱i̱lu̱, ki̱no̱na̱ aave i̱yo̱ko̱ nginti alutene ol cik Yo̱u̱do̱ alawe Ta̱mu̱ta̱dde̱n. Ka̱vvu̱tta̱ zin lo̱o̱ta̱ kozozikka ngaai cik alute nginati. 14 Anyak zin ngaane ne̱ke̱, ngaa co̱de̱ ci een zara Lidia ci a̱kku̱ o̱rge̱ ci een zara Taitira. Atala gon enne ru̱u̱ma̱ni̱ cik okkomi tu̱we̱nta̱. Een bo̱do̱k enne ngaa ci ala Ta̱mu̱ta̱dde̱n, oo zin Manyi zinin cinne abunna aziye zoz ci a̱du̱wa̱ Pa̱u̱lo̱. 15 Baling a̱gga̱mte̱k ol nonno ki ol cik ce̱e̱z cinne do̱o̱k ba̱ti̱ti̱mo̱, utu zin ciko Pa̱u̱lo̱, a̱nne̱k ne, “I̱vi̱ta̱ a̱vvu̱t ce̱e̱ze̱ cinanni, ming u̱du̱wa̱ i̱nna̱ ke̱e̱ni̱ ngaa ci a̱tu̱ zoz ci Manyi Ye̱su̱.” Ilalet abunna kovvoya rok ce̱e̱z cinne, kar zin kemeda zee bak kelemnana we̱t.
E̱ce̱bi̱t ol Pa̱u̱lo̱ ki Sailas
16 Bali i̱i̱te̱n imma kovvoya rok ngin wa alawe ol Ta̱mu̱ta̱dde̱n, kurumtowa ki du̱ca̱i̱t ci nga̱ye̱ cidici ci anyak kuulo ci anyike nonno ku̱du̱wa̱ zoz ci atin a̱kku̱ atirena. Anyike ol manyi du̱ca̱i̱t o̱ro̱bi̱ya̱ cik meelek, eci a̱du̱wa̱k du̱ca̱i̱ti̱ ol zoz ci abunna atin a̱kku̱ ke̱. 17 Unuwet zin ngaa neci agita ki Pa̱u̱lo̱, egereny, azi ne, “Een ol ciko to̱ni̱a̱k cik Ta̱mu̱ta̱dde̱no̱. A̱du̱wa̱ke̱t gool ci karubane ti̱rze̱ne̱t.” 18 Egereny niko gwo̱o̱ye̱n cik meelek komoze Pa̱u̱lo̱, kar zin kutuhuwek ngaa neci kar kiizek kuulo ne̱k aavtte ngaawe necu ne, “Kottoki zare cik Ye̱su̱ Ki̱ri̱sto̱, iyowa iliya ci ngaa necu.” Kar zin kuulo ne̱ke̱ kiyokta.
19 I̱llo̱i̱ zin gool bo̱do̱k ci amudane ma̱ci̱gi̱ du̱ca̱i̱t ci nga̱ye̱ o̱ro̱bi̱ya̱, a̱gga̱mi̱t zin Pa̱u̱lo̱ ki Sailas kar zin ko̱tte̱ alaate baala. 20 Egerenyit zin azi ne, “U̱lu̱lte̱t ol ne̱ko̱ orog do̱o̱k ol cik Yo̱u̱do̱ ko̱.” 21 Kar bo̱do̱k kizeto ne, “Edemez ol abunna ming abure keer ci ol cik Romi.”
22 Kacinni ulutai kolle ataman cik ovvo a̱ru̱k Pa̱u̱lo̱ ki Sailas, kar ddi̱ki̱ryo̱wa̱ cik orog neci ku̱du̱kta̱k kolle zoz ci azi ne arta ru̱u̱ma̱ni̱ cigge̱k, kar zin u̱ru̱we̱t nogo keene. 23 U̱ru̱we̱t zin ol Pa̱u̱lo̱ ki Sailas oroot kar zin kokolttek sikin. Kar zin irecantek ol aciirenit wa cikino keceb nogo ju̱rru̱m gerza ming a̱vi̱ri̱. 24 O̱tte̱ zin ciko Pa̱u̱lo̱ ki Sailas lagama ecito, kar zin keceb zo̱o̱ cigge̱k.
25 Imma ba̱li̱n kenga, alac Pa̱u̱lo̱ ki Sailas Ta̱mu̱ta̱dde̱n kar ke̱be̱nte̱k Ta̱mu̱ta̱dde̱n lo̱ngnyo̱k, ma̱i̱je̱ gonoggja lagama aziye niko. 26 Anyaha Ta̱mu̱ta̱dde̱n ki̱ri̱ki̱ri̱k, otomowe cikin meer lo̱o̱ta̱ lolonyai. O̱yye̱ tatugeta do̱o̱k, artai zin baru balik ecebe aciirenti ol cik lagama ke̱ do̱o̱k! 27 Ming okko aciirenti wa ebek ol lagama ingazi orong kicin ol, amuda tatuget ming o̱ye̱. I̱no̱n azi ne i̱vi̱re̱t ol wak E̱ce̱bje̱ ecito ko̱ do̱o̱k, idima zin illa cinne orong ku̱ru̱k ele. 28 Ma̱i̱je̱ da Pa̱u̱lo̱ acin niko, kar zin kegerenyik, a̱nne̱k ne, “Ma a̱ru̱i̱ ele cunne! Kaavtiya do̱o̱k ngatu.”
29 Utu zin aciirenti ci cikino ko̱ e̱e̱t imma kanyaha urez. A̱vi̱r zin okko lagama ecito kar ka̱ka̱te̱k u̱zu̱ngtti̱ lo̱o̱c ngati Pa̱u̱lo̱ ki Sailas. 30 Kar zin kanyahak re̱e̱nu̱n, kar ki̱jji̱n azi ne, “Ddi̱ki̱ryo̱i̱t, ma i̱yo̱ko̱ ku̱tu̱gu̱ nya kar kuruba baiz wa aave udut?”
31 O̱bo̱dde̱k zin, a̱nne̱k ne, “Abunna ming a̱tu̱ zoz ci Manyi Ye̱su̱ kar ruba atin ti̱rze̱ne̱t ki ol wak ce̱e̱ze̱ cunne do̱o̱k.” 32 Uwaktek zin nonno ki ol wak ce̱e̱z cinne zoz ci Manyi. 33 Imma i̱i̱te̱n neci ele, utuny aciirenti ci cikino ko̱ ngodocet cigge̱k, kar zin ka̱gga̱mte̱k nonno ki ol ciginnek do̱o̱k ba̱ti̱ti̱mo̱. 34 Anyahak zin aciirenti neci nogo ce̱e̱z cinne kar kaanyik da̱i̱ne̱t. Atalto zin ol do̱o̱k ce̱e̱za̱ eci nege a̱tu̱ zoz ci Ta̱mu̱ta̱dde̱no̱.
35 Imma i̱i̱te̱ne̱ ci reeng, i̱tto̱nta̱ alaata wak Romi bolicoc kar ku̱du̱wa̱k e̱e̱t ci cikino, a̱nne̱k ne, “Ooga ol wak E̱ce̱bje̱ ko̱!” 36 Iizek zin aciirenti ci ebek cikin Pa̱u̱lo̱ ki Sailas ko̱ ne, “Oogtaung ol ot labak.”
37 O̱bo̱de̱k zin Pa̱u̱lo̱ bolicoc a̱nne̱k ne, “I̱bi̱cce̱t ol ming ke̱e̱gi̱na̱ ol cik Romi niko. Ariket cikin, kar i̱yo̱ko̱ orong aranetu lo̱mu̱k ming ngen izet ne ka̱bba̱cca̱, aanycik alaat ki̱vi̱ta̱ koogtata e̱le̱tti̱ne̱.” 38-39 Oot zin rok cikin ovvo a̱nne̱k ciko Pa̱u̱lo̱ ki Sailas ne laleita. U̱ku̱lte̱k alaata je̱e̱n ming ovvo a̱gga̱ e̱e̱ggi̱n Pa̱u̱lo̱ ki Sailas ol cik Romi, kar zin koogta nogo kar bo̱do̱k ku̱du̱kta̱k abunna ming ovvo o̱rge̱ emmani. 40 I̱mi̱rte̱ zin Pa̱u̱lo̱ ki Sailas ot ce̱e̱ze̱ ci ngaa wa een zara Lidia ke̱, ngin bali ovvo a̱ru̱mo̱ne̱ ki ol wak a̱tu̱ zoz ci Ta̱mu̱ta̱dde̱no̱, kar zin ki̱ti̱lo̱ nogo baling ngen kutungtek orog neci lo̱o̱c.