15
Atubo i̱do̱ngi̱ ki Yo̱u̱d ngu̱me̱ ci Ta̱mu̱ta̱dde̱no̱
1 Baling ngen ciko Pa̱u̱lo̱ ki Barabas aavtte o̱rge̱ ci een zara Antiyok lo̱o̱ce̱ ci ol cik een Suria, i̱vi̱ta̱ zin ol uggak o̱rge̱ ci een zara Ju̱de̱ya̱ kar zin ka̱ka̱te̱ de̱mzi̱ne̱t Kiristian. A̱nne̱k zin nogo ne, “Ming iróng azunnu lo̱ti̱nno̱k balik edemez Musesi ke̱ kar bo̱do̱k iróng etteddu vi̱ca̱vi̱ce̱t, iróng amudanu ti̱rze̱ne̱t.” 2-3 Iróng zin Pa̱u̱lo̱ ki Barnabas elemi zoz neci, adangtto zin oroot u̱u̱mu̱c. Bali vu̱rrta̱, i̱tto̱ni̱t zin ol Pa̱u̱lo̱ ki Barabas kot Jerusalema, inyaman ol cik a̱tu̱ zoz ci Ta̱mu̱ta̱dde̱no̱ ko̱ nogo, ovvo ozozek to̱ni̱a̱k ki lo̱ddi̱ki̱re̱ zoz ci a̱tu̱we̱ i̱do̱ngi̱ Ta̱mu̱ta̱dde̱n. Baling ot ol balik atahaltai ke̱, imma goola i̱tto̱zzo̱ zin lo̱o̱co̱k cik azi zar ne Vonicia ki Samariya, ovvo acin ol wak a̱tu̱ zoz ci Ta̱mu̱ta̱dde̱no̱. U̱du̱kta̱k zin nogo talninta zoz ci ogonek Ta̱mu̱ta̱dde̱n ol wak iróng een Yo̱u̱d bu̱k.
4 Baling uzzuca Pa̱u̱lo̱ ki Barabas Jerusalem, a̱gga̱mta̱ zin ol wak a̱tu̱ zoz ci Ta̱mu̱ta̱dde̱no̱ do̱o̱k nogo, idongzze ki to̱ni̱a̱k ki bo̱do̱k lo̱ddi̱ki̱re̱. Oobtek zin Pa̱u̱lo̱ ki Barabas kaal cik ogonik Ta̱mu̱ta̱dde̱n i̱do̱ngi̱ li̱ngli̱ngo̱nte̱ cinne̱ng. 5 Ma̱i̱je̱ ol uggak balik anu zoz ci Varacisoa baling izeto Kiristian, itingazzo je̱e̱na̱ kar kizeto ne, “Anyik i̱do̱ngi̱ cik macik kettedit vi̱ca̱vi̱ce̱t kar zin kunec lo̱ti̱nno̱k wak Musesi.”
6 U̱lu̱tte̱ zin to̱ni̱a̱ha̱ ki lo̱ddi̱ki̱re̱ wak Ce̱e̱z ci Ta̱mu̱ta̱dde̱no̱ Jerusalema nga̱to̱de̱ kar zin ki̱no̱ni̱t zoz neci. 7 Imma uwahainta baling adangtto oroot, itinga zin Peturu je̱e̱na̱ kar kize ne, “Gotonogga, a̱gga̱yyu̱ niga do̱o̱k atahala Ta̱mu̱ta̱dde̱n orgene cunno̱ng ba̱li̱ye̱ kar zin abunna ming kokko kuwahek zoz cinne ol wak iróng een Yo̱u̱d kar kiziyet kaviyak cik abunna kar zin ku̱tu̱we̱t zoz neci. 8 Imma zin Ta̱mu̱ta̱dde̱n wa a̱gga̱ zi̱nze̱ti̱ cik ollu do̱o̱k, i̱ye̱le̱ke̱t zin gool wa eleme i̱do̱ngi̱, eci anyik nogo Vongiz ci A̱li̱le̱, ki bali ming anyet agit ke̱. 9 I̱ye̱la̱ zin tubzenet ci katubone do̱o̱k ki i̱do̱ngi̱, eci enne bu̱k aara mu̱nye̱n zi̱nze̱ti̱nne̱ cigge̱k tu̱we̱nte̱ ci anyak nege. 10 Nya zin ming timanu Ta̱mu̱ta̱dde̱no̱, ngati a̱gi̱ddu̱ nuyak wak Ye̱su̱ ko̱? A̱gi̱ddu̱ nogo zo̱ze̱ ci a̱di̱ngdi̱nge̱, iróng wo̱ye̱ niga icima ji̱ji̱ti̱ga̱c uule zoz ci ogon ki neci. 11 Kelemnya de̱de̱, kurubta ti̱rze̱ne̱t do̱o̱k go̱o̱le̱ co̱de̱, eci eelannet Ta̱mu̱ta̱dde̱n ngati Manyi Ye̱su̱ ki i̱yo̱ko̱ ming eela i̱do̱ngi̱ ko̱.”
12 Baling oobtek Barnabas ki Pa̱u̱lo̱ nogo kaal balik ogon Ta̱mu̱ta̱dde̱n a̱vu̱la̱ orgene ci ol wak iróng een Yo̱u̱d ke̱, ijakte zin, iróng e̱e̱ti̱ imma ngen adang nogo.
13 Baling e̱de̱cca̱ Pa̱u̱lo̱ ki Barabas zoz, itinga zin Je̱mi̱si̱ je̱e̱na̱, kar kize ne, “Gotonogget, iziktang. 14 Oobekket Si̱mo̱ne̱ zoz wa akunake Ta̱mu̱ta̱dde̱n ol cik iróng een Yo̱u̱d, orong kengera ol ciginnek orgene cinne̱ng. 15 Atubo zoz ci adongone ol zo̱ze̱ wa i̱do̱ngi̱nu̱ ko̱ ki wa bali eher a̱ri̱to̱i̱ti̱ ci zoz ci Ta̱mu̱ta̱dde̱no̱ wa een zara Amuz, azi ne,
16 ‘Kokko atin anna koboda,
kar kidiman alaanzet wa Da̱vi̱de̱.
Kadimani bo̱do̱k ngin bali egerzane,
kar kibil kokom kak.
17 Kar zin ol wak erahek a̱tu̱we̱, orong atin nege Manyi,
kar ol wak iróng een Yo̱u̱d do̱o̱k wak a̱gga̱ zar cigannik, orongnya atin nege annit bu̱k,
ming a̱du̱wa̱ Manyi, ci ogon kaal ne̱ko̱.’
18 Aanyik ol ka̱gga̱c zoz neci bali renna ke.
19 “Een necu zoz cinanni, ma zin a̱gi̱ddu̱ ol wak iróng een Yo̱u̱d wak a̱tu̱ zoz ci Ta̱mu̱ta̱dde̱no̱, 20 abarik wette keherike nogo ka̱du̱wa̱k abunna ming iróng a̱da̱k i̱di̱ng ci aburcene ol zo̱ze̱ ci a̱ri̱to̱ni̱ke̱ e̱e̱ti̱ ngaa, icima a̱da̱k elegje cik a̱da̱lle̱ kadaito ki bi̱ye̱ ki ming a̱du̱wa̱ keeri ci Yo̱u̱do̱. 21 Eci lo̱ti̱nno̱we̱ wak Musesi, uwahek ol ol ba̱li̱ye̱ Ce̱e̱zi̱ne̱ wak Lawinto o̱ro̱gjo̱we̱ do̱o̱k, I̱i̱te̱ne̱ wa Yu̱bze̱nto̱ bu̱llo̱k ki bu̱llo̱k.”
Waraga ci i̱tto̱na̱k i̱do̱ngi̱ ol wak a̱tu̱we̱
22 U̱lu̱tte̱ zin to̱ni̱a̱ha̱ ki lo̱ddi̱ki̱re̱ ki ol wak a̱tu̱ zoz Ta̱mu̱ta̱dde̱no̱ do̱o̱k, kar katahalta ol u̱gge̱, kar zin ki̱tto̱ni̱t kot ki ciko Pa̱u̱lo̱ ki Barnabas o̱rge̱ ci een Antiyok, lo̱o̱ce̱ ci ol cik een Suria, abunna ovvo oobek ol zoz bali uwak nege Jerusalema ke̱. Imma ol balik ahala nege ke̱ een lo̱ddi̱ki̱re̱ cik a̱tu̱ zoz ci Ta̱mu̱ta̱dde̱no̱, zar cigge̱k iciko: Judas azi bo̱do̱k zar u̱gge̱ ne Barnabas ki goni ci een zara Sailas. 23 Icu zin waraga bali eher ke̱ kar kaanyik nogo ko̱tte̱:
Een ol cik eher waraga cu to̱ni̱a̱k ki lo̱ddi̱ki̱re̱ cik a̱tu̱ zoz ci Ta̱mu̱ta̱dde̱no̱ Jerusalema. Eherik ol wak iróng een Yo̱u̱d wak a̱tu̱ zoz ci Ta̱mu̱ta̱dde̱no̱ orog ci Antiyok, ki lo̱o̱c ci Suriya ki Cilicia.
Kizzayung do̱o̱k!
24 “Kazikna ngatu niko zoz ci ovvo ol uggak a̱gi̱ddu̱ng de̱mzi̱nte̱ cinne̱ng, kamirna zin iróng een agit cik ki̱lo̱ti̱ka̱ nogo de̱mzi̱ne̱t ci ogon ki neci. 25 Kurumtewa kar zin katahalta ol rama ngatinna, kar zin ki̱tto̱nta̱ ol cik een zo̱o̱ cigga̱k korkorit ki ciko Barnabas ki Pa̱u̱lo̱, 26 balik abaza e̱le̱tti̱ cigge̱k li̱ngli̱ngo̱nte̱ ci Manyitinna Ye̱su̱ Ki̱ri̱sto̱. 27 I̱yo̱ko̱ zin ki̱tto̱nta̱ Judas ki Sailas abunna a̱du̱wa̱ku̱ng ungeti cik zoz bali a̱jji̱nnu̱ ke̱.
28 “Abunna zin ngatinna ki Vongiz ci A̱li̱le̱ ming iróng ka̱a̱nyu̱ng i̱ge̱t lo̱ti̱nno̱k cik okkomi ommog ciko:
29 Ma adakku da̱i̱ne̱t cik adimanai ol gi̱i̱ ci a̱du̱wa̱ ngari, ma bo̱do̱k adakku i̱di̱ng ci e̱le̱gi̱t ci a̱da̱lle̱ ma̱rri̱t ming anyak bi̱ye̱, ma owoyu ngaai ki dooli cik ollu. Ming azunnu ti̱lo̱wi̱ne̱t cu, abaku atin labak.”
30 Ot zin ol balik een we̱c i̱tto̱n nege ko̱tte̱ waraga ke̱ e̱co̱de̱ rok orog ci een Antiyok, u̱lu̱tte̱ zin ol cik a̱tu̱ zoz ci Ta̱mu̱ta̱dde̱no̱ cik meelek, kar kaanycik waraga bali i̱tto̱na̱ ol cik a̱tu̱ zoz ci Ta̱mu̱ta̱dde̱no̱ Jerusalema ke̱. 31 Anyak ol balik ovvo ol ikebek waraga neci ke̱ ta̱lni̱ oroot.
32 Ozozzit zin Judas ki Sailas balik een a̱ri̱to̱k wak a̱tu̱ zoz ci Ta̱mu̱ta̱dde̱no̱ ko̱ zoz wa Ta̱mu̱ta̱dde̱no̱ ki nogo u̱u̱mu̱c, i̱lo̱t nogo abunna ming anyak motiz ki komiz zo̱ze̱ ci a̱tu̱we̱ Ta̱mu̱ta̱dde̱n. 33 Baling a̱vvu̱to̱ nginati gwo̱o̱ye̱n cik meelek, i̱tto̱ni̱t zin Judas ki Sailas ki̱mi̱rte̱ kot Jerusalema, agatanit zin nogo ki ol balik i̱tto̱n kot Jerusalema ke̱. 34 Ma̱i̱je̱ Sailasi a̱vvu̱ iróng ngen a̱mi̱re̱. 35 A̱vvu̱to̱ zin Pa̱u̱lo̱ ki Barnabas o̱rge̱ ci een Antiyok, kar keelta ol cik meelek balik edemez ol, kar bo̱do̱k kuwaktek ol kaviyak cik Manyi.
Engerto Pa̱u̱lo̱ ki Barabas
36 Imma i̱i̱nya̱we̱ ugganik, a̱nne̱k Pa̱u̱lo̱ Barnabas ne, “Ki̱mi̱rte̱ ko̱ o̱ro̱gjo̱we̱ balik kuwahek kaviyak cik Manyi wak abunna, kovvo kacin gotonogget ki ngonogget nginati, kar bo̱do̱k ku̱mu̱dda̱ ming aavtte ku̱.” 37 Elema zin Barnabas kar korong kuwe Jon Marko bu̱k. 38 Ma̱i̱je̱ Pa̱u̱lo̱ utubur nong zo̱ze̱ ci Jon Marko, eci Jon Marko odotek nogo lo̱o̱c ba̱li̱ye̱ o̱rge̱ ci azi zar ne Pamvilia, ngen zin ki̱li̱ngli̱nge̱t ki nogo nga̱to̱de̱. 39 Adangtto zin oroot, engerto zin niko, korkorit Barnabas ki Marko kar zin ko̱to̱ddi̱t i̱bo̱ kot lo̱o̱ce̱ ci azi zar ne Saiporos ci aave liil orgena. 40 Imma Pa̱u̱lo̱ engera ele cinne kar zin korkorit ki Sailas. I̱tto̱ni̱t zin ol wak a̱tu̱