14
Uwak Pa̱u̱lo̱ ki Barabas Aikoniyakte
1 Imma Aikoniyakte, ot Pa̱u̱lo̱ ki Barnabas Ce̱e̱ze̱ wa Lawinto kiwagon la̱du̱n, ot uwaktek ol zoz ci Ta̱mu̱ta̱dde̱no̱ komize ci Ta̱mu̱ta̱dde̱no̱, i̱vi̱ta̱k zin ol cik Yo̱u̱do̱ ki Gi̱ri̱k kar zin kelemtta zoz ci Ta̱mu̱ta̱dde̱no̱. 2 Ma̱i̱je̱ ol cik Yo̱u̱do̱ balik abure zoz ci Ta̱mu̱ta̱dde̱no̱ ke̱, ovolengtek ol wak iróng een Yo̱u̱d abunna ming iróng elemi zoz co Barabas ki Pa̱u̱lo̱, a̱du̱wa̱ zozok cik gerzek obod ki ciko Pa̱u̱lo̱ ki Barabas. 3 A̱vvu̱to̱ zin ciko Pa̱u̱lo̱ ki Barnabas nginati gwo̱o̱ye̱n cik meelek, uwahek ol kaviyak cik Manyi Ye̱su̱, bali aanyik zoz cinne kize deten, kar kaanyik nogo ku̱tu̱gu̱zzo̱ kaal cik a̱vu̱la̱ kar kicinet ol do̱o̱k. 4 Engerto zin ol cik orog neci zo̱ze̱ cinne̱ng. Elemi uggak zoz ci ol cik een Yo̱u̱d, ovvo uggak elemi zoz co to̱ni̱a̱k Pa̱u̱lo̱ ki Barabas.
5 Urumet zin ol cik Yo̱u̱do̱ ki ol wak iróng een Yo̱u̱d, Pa̱u̱lo̱ ki Barabas kar zin ku̱du̱ktta̱ zoz ci azi ne, kovoccit to̱ni̱a̱k cik Ye̱su̱ biyene. 6-7 Baling a̱gga̱c to̱ni̱a̱ha̱ zoz neci, i̱vi̱re̱t zin ot rok lo̱o̱c ci een Laikonia, o̱ro̱gjo̱k cik een zara Listra ki Derbe ki bo̱do̱k o̱ro̱gjo̱k cik aavtte ojonun, kar kuwaktek kaviyak cik abunna ol nginati.
8 Baling ngen nege aavtte o̱rge̱ ci een Listra, umudda zin Pa̱u̱lo̱ ki Barabas e̱e̱t ci anyangnyangi zoona. A̱ri̱ta̱i̱ da niko, ngen koto udut. 9 Azikne da ming uwahek Pa̱u̱lo̱ ol zoz ci Ta̱mu̱ta̱dde̱no̱, baling icin Pa̱u̱lo̱ e̱e̱t neci anyangnyangi zoona ko̱ ming anyak tu̱we̱ne̱t ci angarye wo̱ye̱ Ta̱mu̱ta̱dde̱n nonno. 10 Utu zin Pa̱u̱lo̱ nonno muluwe ci a̱bu̱le̱, a̱nne̱k ne, “Tinga je̱e̱na̱!” Kar zin e̱e̱ti̱ neci kingoz kitinga je̱e̱na̱ koto.
11 Baling icinet zu̱we̱ cik aziye zoz ko̱ gi̱i̱ ci ogon Pa̱u̱lo̱ ko̱, ozozzit zin zo̱ze̱ cinne̱ng azi zar ne Laikonia, anno ne, “I̱vi̱ta̱i̱t mininga ki ol cik diirik!” 12 Kar kizeto ne een Barnabas ta̱mu̱ta̱dde̱n ci ol cik een gi̱ri̱k azi zar ne Zuus, imma Pa̱u̱lo̱ bali uwak oroot ke̱, Aanycik zar ci ta̱mu̱ta̱dde̱n ci een Hermes. 13 Ma̱i̱je̱ ce̱e̱z wa alawe ol ta̱mu̱ta̱dde̱n wanne̱ng wa een Zuus ko̱, eenyce orog abanyca. Anyaha zin zu̱we̱ ki e̱e̱t wa wawaco wa ce̱e̱z ci ta̱mu̱ta̱dde̱n wa een zara Zuus ko̱ tiin cik een o̱le̱nya̱ rok aran. Orong kotodongtek to̱ni̱a̱k cik Ye̱su̱.
14 Baling iziyet to̱ni̱a̱ha̱ Barnabas ki Pa̱u̱lo̱ gi̱i̱ wa orong ku̱tu̱gu̱zzo̱ ko̱, ereccit zin ru̱u̱ma̱ni̱ cigge̱k e̱le̱tti̱ne̱ o̱mo̱zze̱ kar ki̱vi̱re̱t kegerenyit kizeto ne, 15 “Gonoget! Ma ogonnu kaal ne̱ko̱. Ke̱e̱gi̱na̱ ol cik diirik ki i̱yo̱ko̱ niga ko̱. Ka̱vvu̱nna̱ kanyakung kaviyak cik abunna, kar zin utunget kaal cik gerzek, u̱tu̱gu̱z kaal cik abunna Ta̱mu̱ta̱dde̱no̱ bali eenyca ta̱mu̱-keng ki lo̱o̱c, eenyca liil ki kaal cik aavtte ecito do̱o̱k. 16 Bali renna aanyik Ta̱mu̱ta̱dde̱n ol cik lo̱o̱cu̱ do̱o̱k ku̱tu̱gu̱zzo̱ kaal cik orong zi̱nze̱ti̱ cigge̱k labak, 17 kar bo̱do̱k gon ku̱tu̱gu̱ kaal cik abunna, aanyyet ta̱mu̱-kenga kitiliza da̱i̱ne̱t kar zinin cunne ka̱vvu̱ labak.” 18 Baling adang ol ne̱ke̱ zoz orong kotodongtozzik nogo, alammit zin Pa̱u̱lo̱ ki Barabas nogo.
19 I̱yo̱ko̱ zin i̱vi̱ta̱ ol cik een Yo̱u̱d o̱rge̱ ci een Antiyok ki Aikoniya, ovvo ovolengek ol. Ovoccit zin Pa̱u̱lo̱ biyene kar zin ku̱tu̱gu̱re̱t ko̱tte̱ orog renna, izeto ne adaha. 20 Baling ovvo nuyaha wak Ye̱su̱ abilnnek nonno, itinga zin je̱e̱na̱ kar kuk orgato. Imma i̱i̱te̱n ci reeng itingazzo ki Barnabas ot rok Derbe.
Amironik Pa̱u̱lo̱ ki Barabas orog ci een Antiyok
21 Baling edeca Pa̱u̱lo̱ uwahai kaviyak cik abunna nuyaha cik Ye̱su̱ meelek Derbekte, i̱mi̱rte̱ zin bo̱do̱k Pa̱u̱lo̱ ki Barabas ot o̱ro̱gjo̱we̱ cik Listra, ki Aikoniya ki bo̱do̱k rok Antiyok lo̱o̱ce̱ ci Pisidiya, 22 kar keelta nuyak wak Ye̱su̱. “Izocek zin nogo abunna ming a̱tu̱ zoz ci Ta̱mu̱ta̱dde̱no̱ odohize, abunna ming amuda ba̱a̱li̱ne̱t ci Ta̱mu̱ta̱dde̱no̱ go̱o̱lo̱we̱ cik apirnane ol oroot.” 23 Atahalta zin Pa̱u̱lo̱ ki Barnabas lo̱ddi̱ki̱re̱ ke̱le̱ci̱a̱nya̱i̱ do̱o̱k, kar zin kalayek nogo Manyi Ye̱su̱ iyawinta, aanyik Manyi keela nogo, eci a̱tu̱ nonno.
24 Kar zin ki̱mi̱rte̱ kot lo̱o̱ce̱ ci Pisidiya rok lo̱o̱c ci een Pamvilia. 25 Kar bo̱do̱k kuwaktek ol zoz ci Ta̱mu̱ta̱dde̱no̱ o̱rge̱ ci een zara Perga, kar zin kot rok orog ci een zara Atalia.
26 Bali vu̱rrta̱, o̱to̱di̱t i̱bo̱ kar kot lo̱o̱ce̱ ci een zara Antiyok ci aavtte ol cik een Suria, ngin bali i̱tto̱ne̱ ol nogo abunna ming ovvo uwahek ol zoz ci Ta̱mu̱ta̱dde̱no̱ ke̱, e̱de̱cca̱ zin li̱ngli̱ngo̱n cinne̱ng.
27 Baling arayya lo̱o̱c ci een Antiyok, u̱tu̱yya̱ zin ol cik Ce̱e̱z ci Ta̱mu̱ta̱dde̱no̱ do̱o̱k, kar zin ku̱du̱kta̱k we̱t cinne̱ng, a̱du̱wa̱k kaal cik ogon Ta̱mu̱ta̱dde̱n do̱o̱k, kar bo̱do̱k keela ol cik iróng een Yo̱u̱d ku̱tu̱we̱t zoz ci Ta̱mu̱ta̱dde̱no̱. 28 A̱vvu̱to̱ zin nginati ki nuyak wak Ye̱su̱ o̱rge̱ ci een Antiyok ko̱ gwo̱o̱ye̱n cik meelek.