Bu̱k wa To̱ni̱a̱u̱ 13

I̱tto̱ni̱t ol wak a̱tu̱ zoz ci Ta̱mu̱ta̱dde̱no̱ Barnabas ki Saul

¹ Anyak ba̱li̱ye̱ ke̱le̱ci̱a̱ Antiyokte lo̱o̱ce̱ ci Suriyaw a̱ri̱tto̱k ki de̱me̱zzo̱k wak elemtta zoz ci Ta̱mu̱ta̱dde̱no̱ ki ciko Barnabas, ki Si̱mo̱ne̱ wa zara uggak ne Naiger, azi ungec cinne ne e̱e̱t ci o̱lle̱, ki Lucias wa a̱kku̱ o̱rge̱ ci een Sairin, ki Manen bali een goni alaan E̱ro̱d Antipas bali ngen e̱e̱ggi̱n dooli ki Saul. ² Imma i̱i̱te̱n imma baling ala ol ne̱ko̱ Manyi kar bo̱do̱k kiyayyo, iizek zin Vongizi ci A̱li̱le̱ nogo ne, “Atahalta Barnabas ki Saul ka̱vvu̱to̱ do̱, anyak li̱ngli̱ngo̱n ci kanyike nogo.” ³ I̱ya̱yyo̱ zin ol ne̱k a̱tu̱we̱ ko̱ kar bo̱do̱k kalac Ta̱mu̱ta̱dde̱n, a̱ta̱dde̱k zin azzin nogo e̱co̱de̱, e̱co̱de̱, alawek Ta̱mu̱ta̱dde̱n kanyik komiz, kar zin ki̱tto̱ni̱t.

Uwahek Pa̱u̱lo̱ ki Barabas zoz ci Ta̱mu̱ta̱dde̱no̱ lo̱o̱ce̱ ci Cypres

⁴ I̱tto̱n Vongizi ci A̱li̱le̱ Saul ki Barabas kot ku̱lu̱cce̱ rok orog ci een Celecia ci aave ti̱ti̱me̱ ci li̱i̱lu̱, kar zin ko̱to̱ddi̱t i̱bo̱ kot o̱rge̱ ci een Saiporos aave liil orgena. ⁵ Baling arayya orog ci azi zar ne Salamis, ot zin rok Ce̱e̱zi̱ wak Lawinto cik Yo̱u̱do̱ kar kuwahek ol zoz ci Ta̱mu̱ta̱dde̱no̱. Orkor ki Jon Marko kar keela nogo.

⁶ Eron zin nege o̱ro̱gjo̱we̱ cik lo̱o̱co̱k ne̱ke̱ do̱o̱k uwahek ol zoz ci Ta̱mu̱ta̱dde̱no̱, u̱zzu̱ca̱ zin orog ci azi zar ne Pavoc, ngin bali a̱ru̱me̱ne̱ ki a̱rya̱i̱t ci Yo̱u̱do̱, a̱ri̱to̱i̱t wa volongo azi zar ne Bar Ye̱su̱. ⁷ Een enne goni alaan Se̱ri̱jo̱ Pa̱u̱lo̱s, e̱e̱t ci a̱gga̱ zoz oroot. Utu zin alaani Se̱ri̱jo̱ Barnabas ki Saul abunna ming ovvo acin nonno, eci orong kizik zoz ci Ta̱mu̱ta̱dde̱no̱. ⁸ Imma a̱rya̱i̱ti̱ een zara Ilamas zo̱ze̱ ci Gi̱ri̱ko̱ ko̱, ovolengek alaan azi ne, ma edeconik zoz ci a̱du̱wa̱ Sauli ki Barabas. Orong a̱rya̱i̱ti̱ neci abunna ming iróng alaani elemi tu̱we̱ne̱t ci ol cik Ta̱mu̱ta̱dde̱no̱.

⁹ Imma zin Sauli bo̱do̱k anyak zar cik een Pa̱u̱lo̱, anyak Vongiz ci A̱li̱le̱, egelem a̱rya̱i̱t neci ebere kar kize ne, ¹⁰ “E̱e̱ni̱ i̱nna̱ ngerrti lo̱rye̱nto̱, abahe gool ci a̱lu̱te̱ ol, kar ize mo̱dde̱ni̱t ci kaal cik abunna, alami wo̱ye̱ gool wa zoz ci Manyi Ta̱mu̱ta̱dde̱no̱ de̱de̱? ¹¹ Okko atin Manyi edezi ize ru̱be̱n arrak do̱yo̱i̱t.” Ataman niko ize enne ru̱be̱n, kar zin koto orong e̱e̱t imma ci kar keela nonno ku̱tu̱gu̱r azzine. ¹² Baling icin alaani kaal ne̱ke̱ ogone ke̱ do̱o̱k, u̱tu̱wo̱ enne bu̱k, eci u̱ku̱le̱k zoz ci Manyi Ye̱su̱.

Uwahek Pa̱u̱lo̱ zoz ci Manyi Ye̱su̱ orog ci een zara Antiyok

¹³ Itingazzo zin Pa̱u̱lo̱ ki gonoggi o̱rge̱ ci azi zar Pavoc kar zin ko̱to̱ddi̱t i̱bo̱ kot lo̱o̱ce̱ ci azi zar ne Pamvilia, ot zin u̱lu̱cce̱ o̱rge̱ ci aave ti̱ti̱ma̱ azi zar ne Perga. Imma nginati odotek Jon Marko nogo lo̱o̱c, kar zin ki̱mi̱re̱ kuk Jerusalema. ¹⁴ Ma̱i̱je̱ Barabas ki Pa̱u̱lo̱ itingazo Pergakte rok orog ci azi zar ne Antiyok ci aave lo̱o̱ce̱ ci een Pisidiya. Ot zin de̱mzi̱ne̱t Ce̱e̱ze̱ wa Lawinto I̱i̱te̱ne̱ wa Yu̱bze̱nto̱ Israilo. ¹⁵ Baling ovvo udut ke̱bi̱ne̱t lo̱ti̱nno̱k ki a̱ri̱to̱k, kar zin ol wak abal ol Ce̱e̱ze̱ wa Lawinto i̱tto̱nta̱k zoz necu azi ne, “Gotonogga ming anyakku ti̱lo̱wi̱ne̱t imma i̱vi̱ta̱ i̱ti̱lo̱z zu̱we̱ ciko!”

¹⁶ Elema zin Pa̱u̱lo̱ kar zin kitinga kodong a̱zzi̱t ki̱ti̱va̱n ol, kar kiizek ol ne, “Eh!! Ol wak Israilo ki i̱do̱ngi̱ wak elemtta gool wa alawe ol wak Yo̱u̱di̱ Ta̱mu̱ta̱dde̱n, iziktnag da.”

¹⁷ Ize zin bo̱do̱k Pa̱u̱lo̱ ne, “Atahala Ta̱mu̱ta̱dde̱n wa Israilo ji̱ji̱ti̱ga̱c kar zin kanyik eezzet Masire. Ara zin bo̱do̱k Ta̱mu̱ta̱dde̱n nogo du̱ca̱kze̱ta̱ ci Masiro. ¹⁸ Baling gerze nege nu̱nu̱n, ngen Ta̱mu̱ta̱dde̱n azune nogo balala de, e̱rki̱to̱k moten we̱c baling ilita nogo looci balala. ¹⁹ Kar zin Ta̱mu̱ta̱dde̱n ki̱li̱b lo̱o̱co̱k turgerem lo̱o̱ce̱ ci azi ne Kenan, aanyik lo̱o̱c neci kize cinne̱ng udut. ²⁰ Ogone kaala ne̱ko̱ do̱o̱k e̱rki̱te̱ ci een obet we̱c ki moten tu̱r (450). “Ma bali vu̱rrta̱, a̱gga̱mi̱t zin ol wak appak zoz ci illau lo̱o̱c, zee nginti a̱kku̱ne̱ a̱ri̱to̱i̱ti̱ ci een zara Samwel. ²¹ Imma i̱i̱nya̱we̱ ne̱ke̱ i̱jji̱ne̱t ol alaan wa ollu a̱ddi̱ki̱re̱, kar zin Ta̱mu̱ta̱dde̱n kaanyik nogo alaan ci azi zar ne Saul ngerrti Kisa, e̱e̱t wa bo̱o̱ri̱t co Be̱nje̱mi̱n, abal zin lo̱o̱c e̱rki̱nya̱ moten we̱c. ²² Baling aara Ta̱mu̱ta̱dde̱n Saul alaanzeta, kar zin karagizek alaan ci azi zar ne Da̱vi̱de̱. Ize zin Ta̱mu̱ta̱dde̱n ne, “Kumuda Da̱vi̱de̱ ngerrti Jesse, kirrezi nonno oroot, ogon atin kaal cik korongi anna do̱o̱k.”

²³ Kar bo̱do̱k Pa̱u̱lo̱ kize ne, “Een Da̱vi̱de̱ ji̱ji̱ti̱ Ye̱su̱ bali u̱du̱wa̱ Ta̱mu̱ta̱dde̱n kar kaanyik kize Ti̱ri̱zo̱i̱t ci ol cik Israilo! ²⁴ Baling ngen kakate li̱ngli̱ngo̱n, uwahek zin arrak Jon Ba̱ti̱ti̱mo̱ ol cik Israilo zoz ci abunna uunge ba̱ci̱nno̱k kar koboddak Ta̱mu̱ta̱dde̱n abunna ming a̱gga̱me̱k ba̱ti̱ti̱mo̱. ²⁵ Baling edeca Joni li̱ngli̱ngo̱n waninne ke̱, kar zin ki̱jji̱n ol, azi ne, “I̱no̱nu̱ ke̱e̱ni̱ anna ngene? I̱no̱nu̱ ke̱e̱ni̱ anna e̱e̱t wa e̱re̱yyu̱ ko̱? Abarik e̱e̱ti̱ wa e̱re̱yyu̱ ko̱ ngen a̱kku̱ anuwana vu̱rrta̱, iróng atin kuuli li̱ngli̱ngo̱n cinne, een enne e̱e̱t ci a̱ddi̱ki̱re̱ ngatinani oroot ci iróng wo̱ye̱ kojongozi ki nonno.

²⁶ Ize zin bo̱do̱k Pa̱u̱lo̱ ne, “Eh!! Iziktnag zin da gotonogga, niga dooli cik Aburahami, kar zin niga bo̱do̱k ol wak e̱e̱gi̱nu̱ i̱do̱ngi̱ wak elemttau Ta̱mu̱ta̱dde̱n wa Israilo, een ti̱rze̱ne̱t ci Ta̱mu̱ta̱dde̱no̱ cinna do̱o̱k. ²⁷ Imma ol Jerusalema ki alaat cigge̱k u̱ru̱we̱t Ye̱su̱ kadak ki bali ming a̱du̱wa̱ a̱ri̱tto̱wa̱ cik Ta̱mu̱ta̱dde̱no̱ ke̱. Iróng zin i̱ye̱za̱ icima a̱gga̱ nonno ele bali a̱du̱wa̱ a̱ri̱tto̱wa̱ cik Ta̱mu̱ta̱dde̱no̱ ke̱, iziyet nu̱nu̱n zoz ci a̱ri̱to̱wu̱ ming ikebje odohize I̱i̱te̱ne̱ wa Yu̱bze̱nto̱. ²⁸ Amuda zin i̱llo̱i̱ zoz imma ci gerze kar kecebte nonno, abarik a̱jji̱n alaan Pilato abunna ming anyike nogo Ye̱su̱ kar ku̱ru̱we̱t.

²⁹ Emmena Pa̱u̱lo̱ zoza de, kar kize ne, “Baling otodoyyek Ye̱su̱ keet ci een ta̱la̱ke̱c ki bali ming a̱du̱wa̱ a̱ri̱tto̱wa̱ wak Ta̱mu̱ta̱dde̱no̱, arta zin keete neci kar zin ka̱da̱yye̱k ilomi. ³⁰ Ma̱i̱je̱ Ta̱mu̱ta̱dde̱n itingawe nonno daiza. ³¹ Imma vu̱rrta̱ i̱ye̱le̱k ele cinne lak cik meelek giir ol balik orkor ki nonno gon ke̱, ingazi o̱rge̱ ci azi ne Ga̱li̱li̱ya̱ ovvo o̱rge̱ ci een Jerusalem. E̱e̱ggi̱n ol ne̱ke̱ bbacak cik zoz ci Ta̱mu̱ta̱dde̱no̱ ngati ol cik Israilo.

³² A̱nne̱k bo̱do̱k Pa̱u̱lo̱ ol ne, “I̱yo̱ko̱ zin ka̱vvu̱nna̱ ki Barabas abunna ming anyahaka ol kaviyak cik abunna Ta̱mu̱ta̱dde̱no̱. Imma zoz bali a̱du̱wa̱k Ta̱mu̱ta̱dde̱n ji̱ji̱ti̱ga̱c ize de̱de̱ e̱rki̱te̱ cu. ³³ Itingawe zin Ta̱mu̱ta̱dde̱n Ye̱su̱ daiza. Icu zin zoz ci e̱he̱rye̱ bu̱we̱ ci caliwono obod ki Ye̱su̱ azi ne,

Eni i̱nna̱ ngeranne;

‘Atahala Ta̱mu̱ta̱dde̱n Ngerinne kize ti̱ri̱zo̱i̱t ci ollu.’

³⁴ U̱du̱wa̱ Ta̱mu̱ta̱dde̱n zoz ci okko enne ingane Ye̱su̱ daiza, iróng atin adai udut. E̱he̱rye̱ zoz necu baibola azi ne,

“‘Kaanyi atin eezzet wa nanni de̱de̱ bali ku̱du̱wa̱ kazi ne kaanyi atin ji̱ji̱tu̱nne̱ Da̱vi̱de̱ ke̱, een atin enne alaan ci aave udut.’ ³⁵ Oob zin bo̱do̱k bu̱wi̱ ci caliwono imma, azi ne,

“‘Iróng i̱nna̱ ungna ngerunne wa ahalai ku̱mu̱ iloma.’

³⁶ Iróng zin zoz neci ozoz daiz wa Da̱vi̱de̱, eci baling edeca Da̱vi̱de̱ ba̱a̱li̱ne̱t bu̱u̱l cinne ki bali ming a̱du̱wa̱k Ta̱mu̱ta̱dde̱n nonno, adak zin kar ka̱da̱yye̱k ilomi, u̱mu̱ zin ele cinne to. ³⁷ Ozoz zoz ci ingane e̱e̱ti̱ daiza ko̱, e̱e̱t co̱de̱ do̱, e̱e̱t co̱de̱ wa ingane Ta̱mu̱ta̱dde̱n nonno daiza ko̱ een Ye̱su̱ wa atahalai, ngen zin ele cinne ku̱mu̱.

³⁸ I̱ti̱lo̱wo̱ zin Pa̱u̱lo̱ azi ne, “Iziktnag da gotonogga, alalek Ta̱mu̱ta̱dde̱n ba̱ci̱nno̱k ciggo̱k mu̱nye̱nu̱ ngati Ye̱su̱. ³⁹ Ming a̱tu̱ e̱e̱ti̱ imma Ye̱su̱, ooga Ta̱mu̱ta̱dde̱n ba̱ci̱nno̱k ciginnek ki̱ze̱c ba̱ci̱no̱wa̱ ngatinne to, een ooginet neci ci iróng lo̱ti̱nno̱wa̱ cik Musesi uule. ⁴⁰ U̱zzu̱te̱ e̱le̱tti̱, egenyit, ma anyiku zoz bali a̱du̱wa̱ a̱ri̱tto̱wa̱ cik Ta̱mu̱ta̱dde̱no̱ ke̱ ki̱ki̱ya̱ kize cunno̱ng. Eci nege azi ne,

⁴¹ ‘Kogoni gi̱i̱ imma bu̱u̱le̱ cunno̱ng ko̱, gi̱i̱ ci iróng atin elemnyyu, ming a̱du̱wa̱ku̱ng e̱e̱ti̱ imma nu̱nu̱n, izikto da ol cik aburnnu zoz ci Ta̱mu̱ta̱dde̱no̱ ko̱, a̱ku̱le̱ku̱ atin je̱e̱n zee bak adaknnu!”’

⁴² Mazing ovvo ciko Pa̱u̱lo̱ ki Barnabas ungnek Ce̱e̱z wa Lawinto lo̱o̱c I̱i̱te̱ne̱ wa Yu̱bze̱nto̱, i̱jji̱ne̱t bo̱do̱k ol cik Yo̱u̱do̱ nogo abunna ming oboda biranoce co̱de̱ ke̱ kar kuwaktek zoz bali Ta̱mu̱ta̱dde̱no̱ a̱du̱wa̱ ke̱. ⁴³ Ma baling ovvo ol azzane, korkorit zin Yo̱u̱di̱ ki i̱do̱ngi̱ wak ala Ta̱mu̱ta̱dde̱n go̱o̱le̱ ci Yo̱u̱do̱, unnec zin ol cik Yo̱u̱di̱ ki i̱do̱ngi̱ Pa̱u̱lo̱ ki Barnabas vu̱rrta̱, izetek zin Pa̱u̱lo̱ ki Barabas nogo ne, “A̱vvu̱t labak eezzete ci Ta̱mu̱ta̱dde̱no̱.”

Uwahek Pa̱u̱lo̱ i̱do̱ngi̱ zoz ci Ta̱mu̱ta̱dde̱no̱

⁴⁴ Imma I̱i̱te̱ne̱ wa Yu̱bze̱nto̱ Yo̱u̱di̱ emmani, i̱vi̱ta̱ ol cik lo̱o̱c neci ki̱vi̱ta̱ kiziyet uwahai ci zoz ci Manyi Ye̱su̱. ⁴⁵ Baling ovvo alaata cik Yo̱u̱da̱k acin kolle ci a̱vvu̱na̱k uwai ci Pa̱u̱lo̱, anyait zin meder zi̱nze̱ti̱nne̱, kar bo̱do̱k ka̱da̱ngi̱t zoz ci a̱du̱wa̱ enne.

⁴⁶ Ozozit zin Pa̱u̱lo̱ ki Barnabas mazeta oroot. A̱nne̱k zin ol cik Yo̱u̱do̱ ne, “Riil oroot de̱de̱ ming kuwahek kaviyak cik abunna Ta̱mu̱ta̱dde̱no̱ ko̱ arrak ol cik Yo̱u̱do̱. Uburtu abarik, ettedu zin baiz cinno̱ng baize ci aave udut ke̱. Abunna zin kuwaheka atin ol wak iróng een Yo̱u̱d. ⁴⁷ Een zin icu zoz ci a̱du̱wa̱ke̱t Manyi Ta̱mu̱ta̱dde̱n, azi ne, ‘Ki̱tto̱nu̱ng izet ol cik uwaheku zoz cinanni ol wak iróng een Yo̱u̱d, kar u̱du̱kta̱k ti̱rze̱ne̱t cinanni ol cik lo̱o̱cu̱ do̱o̱k.”’

⁴⁸ Baling iziyet ol cik iróng een Yo̱u̱d ko̱ zoz neci, a̱ta̱li̱t zin oroot, kar kaanycik Manyi Ye̱su̱ zany. U̱tu̱we̱t zin ol balik atahaltai kize ci amuda ruget wa aave udut ko̱ Manyi Ye̱su̱. ⁴⁹ Ozob zin zoz ci Manyi Ye̱su̱ lo̱o̱c neci veelek.

⁵⁰ Kar zin alaata cik Yo̱u̱do̱ ovolengtek ngaai wak een i̱do̱ngi̱ a̱tu̱ zoz ci Ta̱mu̱ta̱dde̱no̱ ki lo̱ddi̱ki̱re̱ cik o̱rgu̱ abunna ming abure zoz co Pa̱u̱lo̱ ki Barnabas, kar kotoit nogo. ⁵¹ Imma zin Pa̱u̱lo̱ ki Barabas izetek nogo ne, i̱re̱tu̱ colo, eci u̱tu̱bu̱rtu̱ zoz ci Ta̱mu̱ta̱dde̱no̱ ize ne̱ko̱ ciggo̱k, kar zin kot o̱rge̱ ci een Aikoniya. ⁵² Ma̱i̱je̱ nuyaha, anyak Vongiz ci A̱li̱le̱ zi̱nze̱ti̱nne̱, kar zin katalto oroot.