25
Abile Pa̱u̱lo̱ lo̱ki̱ko̱ ngati Vestasi
1 Mazing a̱kku̱na̱k Vestasi orog wa azi ne Keseria, omon i̱i̱nya̱ i̱i̱yo̱ kar zin kuk Jerusalema. 2 Ma̱i̱je̱ alaata wak wawaco Ce̱e̱ze̱ ci Ta̱mu̱ta̱dde̱no̱ ki lo̱ddi̱ki̱re̱ cik Yo̱u̱do̱ o̱tte̱ zoz ci Pa̱u̱lo̱ ngati alaan Vestas. 3 Bak ilalek Vestas kar ki̱ti̱ri̱z nogo ngati anyike Pa̱u̱lo̱ kuk Jerusalema, eci ozozzo zoz ci kar kot kedette Pa̱u̱lo̱ goola kar ku̱ru̱we̱t kadak. 4 O̱bo̱de̱k Vestasi nogo izek ne, “E̱ce̱bje̱ Pa̱u̱lo̱ o̱rge̱ wa een Keseria. Ma bu̱k anna ilya ka̱mi̱re̱ kokko nginati ataman. 5 Anycang alaat waggo̱k nginatu korkorta ko̱tta̱ Sisiriyakte, kar kot ko̱tta̱ e̱e̱t neci billet ming da u̱tu̱gu̱ gi̱i̱ ci gerze.”
6 Ma baling omon Vestasi i̱i̱nya̱ tu̱rge̱ obboc omoto Jerusalema, uk zin Keseriyakte. Ma i̱i̱te̱ne̱ cu a̱vvu̱ ce̱e̱ze̱ wa ro̱ni̱o̱, kar zin kanyik aciir kanyaktta̱k Pa̱u̱lo̱ ro̱ni̱.
7 Ma baling uzzuca Pa̱u̱lo̱ nginti ro̱ni̱o̱, ibilet Yo̱u̱di̱ balik a̱vvu̱ Jerusalema ke̱ kuburuwet nonno kar zin ku̱du̱ktta̱ no̱ngi̱tto̱n cik gerzek meelek idhanye nege Pa̱u̱lo̱ kar ko̱tte̱ billeta. A̱zze̱ bo̱do̱k zizong nogo bba̱co̱wa̱ to. 8 Ma̱i̱je̱ Pa̱u̱lo̱ ebek ele cinne zoza kar zin kizek Vestas ne, “I̱llo̱i̱ gi̱i̱ imma ci gerze mu̱nye̱nu̱ ci kogonik anna lo̱ti̱nno̱k wak Yo̱u̱do̱, rok Ce̱e̱z wa Ta̱mu̱ta̱dde̱no̱ , icima Kesari wa een alaan ci Romi a̱ddi̱ki̱re̱.”
9 Abarik ngiwa oronge Vestasi ol wak Yo̱u̱do̱ kirrezit nonno, i̱jji̱n Pa̱u̱lo̱ izek ne, “Elemna wo̱ye̱ nginti okkoye Jerusalema kar kuk kicine zoz cunne ko̱ nginati?”
10 Bak Obodeke Pa̱u̱lo̱ nonno a̱nne̱k ne, “Kemennak ungec ci koronge zoz ci nanni ko̱ kettede ngati i̱ro̱ne̱ Kesari alaani wa Romi a̱ddi̱ki̱re̱. Ngiwa a̱gga̱we̱ bu̱k i̱llo̱i̱ gi̱i̱ imma ci gerze ku̱tu̱gu̱we̱ya̱ Yo̱u̱d. 11 Ming da kabaca lo̱ti̱nno̱k, ku̱tu̱gu̱ gi̱i̱ ci gerze ci kaganona ki nginti apahonika daizi, iróng ka̱vi̱ri̱ gi̱i̱ye̱ necu. Ma zin abarik ming i̱llo̱i̱ bbacak cik a̱du̱wa̱ke̱t zoz ci omomozang annit ko̱, iróng wo̱ye̱ i̱nna̱ icima e̱e̱ti̱ imma anyik ol ne̱ko̱ ko̱tta̱n. Ming u̱tu̱gu̱ niko, korongi ming apaheka zoz necu Kesari.”
12 Baling oboddai Vestasi ki ol waginnek eela nonno zoz ci Pa̱u̱lo̱, obodek zin nonno izek ne, “Ma i̱yo̱ko̱ ming amace necu ko̱, ming orongi i̱nna̱ bit ngati Kesari. Okko i̱nna̱ okko ngati Kesari.”
Oobek Vestasi alaan Agrippa zoz ci Pa̱u̱lo̱
13 Ma i̱i̱nya̱ u̱gge̱, i̱vi̱ta̱ alaani wa een Agrippa ki ngooni wainne een Bernis a̱vvu̱na̱k orog wa een Keseria, kar ki̱vi̱ta̱ kizzac alaan wa een jor azi zar ne Vestas.
14 Mazing ovvo omoni nginati i̱i̱nya̱ u̱gge̱, oobek Vestasi zoz ci Pa̱u̱lo̱ alaan. Iizek ne, “Aave e̱e̱ti̱ imma ci E̱ce̱bje̱, ci bali ungnek Ve̱li̱ce̱ cikin. 15 Mazing kokko i̱i̱te̱n imma Jerusalema, anyaktta alaata wak wawaco ki lo̱ddi̱ki̱re̱ cik Yo̱u̱do̱ ro̱ni̱ ci edeze nege nonno. Bak abarik orongnya annit kettedik e̱e̱t necu gi̱i̱ ci gerze. 16 Bak ka̱nne̱i̱ nogo ne, wagon keere ci ol cik een Rom abunna ming kanyik e̱e̱t ci ovvoye ol lo̱ki̱ka̱ kozozzo arrak ki ol ne̱k ovvoye nonno ke̱, kar abunna ming anyak gool ci alitene. 17 Ma baling i̱vi̱ta̱ alaata ne̱ke̱ ngintu, ngen zin ka̱vvu̱ nginti reeni ki ming kaave kize e̱e̱t ci i̱ro̱ni̱ zoz neci, kar zin kizek aciir ne, “Anyaktta da e̱e̱t ba̱li̱ye̱ ngatu.” 18 Itingazzo ol balik ovvoye nonno ro̱ni̱a̱ ke̱, je̱e̱na̱. Abarik ki̱no̱na̱ kiize ne, obboc adic nege a̱du̱wa̱ kaal cik gerzek oroot ogon e̱e̱ti̱ necu. Abarik da i̱llo̱i̱ kaal cik ogon niko. 19 Een da zoz ci do̱o̱k anyak nege ko̱ zar dangonet ci obod ki tu̱we̱ne̱t cinne̱ng alawe Ta̱mu̱ta̱dde̱n bo̱do̱k zoz ci obod ki e̱e̱t imma ci da een zara Ye̱su̱ ci da adaha. Ma̱i̱je̱ abarik Pa̱u̱lo̱ azi ne ngen e̱e̱t neci een Ye̱su̱ ke̱ aruge. 20 A̱ma̱li̱le̱ annit oo, ilitawa gi̱i̱ ci kogoni kar kumudai keng ci zoz necu ju̱rru̱m. Ki̱jji̱na̱ zin Pa̱u̱lo̱ icima ming elemna we̱t ci okkoye wo̱ye̱ eene rok Jerusalem kar kuk kozoze zoz necinne ko̱ nginati. 21 Atamac zin abarik Pa̱u̱lo̱ zoz necinani ko̱, kar zin kize ne agano ming ebek ol nonno zee nginti i̱tto̱no̱ni̱k alaan wa Romi a̱ddi̱ki̱re̱, kar kuk ketted zoz cinne ko̱. Kerecaneya zin ol zoz ke̱be̱i̱t nonno zee nginti wazin imma ki̱tto̱ni̱k kuk ngati Kesar.”
22 Iizek Agrippa Vestas ne, “Korongi kizik e̱e̱t neci ilya.” O̱bo̱de̱k Vestasi nonno a̱nne̱k ne, “Ngen a̱zzi̱ nonno loza.”
Anyahak ol Pa̱u̱lo̱ nginti Agrippa ki Bernisi
23 Ma̱i̱je̱ nge̱rre̱t kwo̱o̱re̱ ci a̱ddi̱ki̱re̱, i̱vi̱ta̱ Agrippa ki ngooni wainne een Bernis i̱tto̱zzo̱ ki alaat wak aciiru ki ddi̱ki̱ryyo̱k wak o̱rgu̱ ce̱e̱z wagon alutene ol lo̱ki̱ka̱. Erecanek Vestasi aciir zoz kanyakta Pa̱u̱lo̱. 24 Ozoz zin Vestasi ize ne, “Alaan Agrippa ki ol cik a̱vvu̱tu̱ ngatu ko̱ do̱o̱k, icinet di̱ e̱e̱t cu. Anyahaka ol wak Yo̱u̱do̱ abarik ngatu ki Jerusalema do̱o̱k nonno lo̱ki̱ka̱ kar kettedeyi lo̱ki̱ko̱. Egerenyit izeto ne, anyik e̱e̱t necu kadak. 25 Ma̱i̱je̱ abarik i̱llo̱i̱ gi̱i̱ ci gerze karuba da ogon e̱e̱ti̱ cu kar wo̱ye̱ kaganto ki daiz. Ma baling atamaco enne, kar zin bo̱do̱k korong zoz necinne ko̱ kuk kicine alaane wa a̱ddi̱ki̱re̱ Romi, odola zin ki̱tto̱na̱ nonno kuk. 26 A̱zze̱ zin abarik annit zoz wa uturi kar keteherik alaan wa Romi a̱ddi̱ki̱re̱ to. Ma zin i̱yo̱ko̱ kanyaha nonno kidiwaki la̱du̱n i̱nne̱ta̱, alaan Agrippa, kar ming ke̱de̱cca̱ do̱o̱k mitaninet nonno, icima kamuda gi̱i̱ ci wo̱ye̱ keher obod ki nonno. 27 Ibil ki ci iróng abunna ngati nanni ming ki̱tto̱ni̱ e̱e̱t ci E̱ce̱bje̱ ming ngen ku̱mu̱dda̱ titiman cinne ju̱rru̱m.”