10
Awa Kornelio Peturu
1 Anyak da e̱e̱t ci abak o̱rge̱ ci azi zar ne Keseria. Azi e̱e̱t neci zar ne Kornelio, “Ddi̱ki̱ri̱yo̱i̱t ci aciir cik Italiya.” 2 Elemi enne ki olline zoz ci Ta̱mu̱ta̱dde̱no̱ oroot, kar kirrezit Ta̱mu̱ta̱dde̱n wa ala ol cik Israilo. Amuc gon enne ol cik amati kaale, kar gon kala Ta̱mu̱ta̱dde̱n odohize.
3 Imma i̱i̱te̱n imma ngati okko ki yomon, i̱i̱ wa gon alawe Yo̱u̱di̱ Ta̱mu̱ta̱dde̱n, icin zin anjilo ci Ta̱mu̱ta̱dde̱no̱ o̱no̱zo̱we̱ ming a̱kku̱na̱k nonno. Ize zin anjilo ne, “Kornelio” 4 Egelem zin Kornelio anjilo neci ngolinta. Kar zin ki̱jji̱n nonno a̱nne̱k ne, “Orongi nya Manyi?” O̱bo̱de̱k zin anjilo wa Ta̱mu̱ta̱dde̱no̱ ko̱ nonno azi ne, “Uzzuca lawinet cunne ki kaal wak gon amuce i̱nna̱ ol balik amati ke̱ Ta̱mu̱ta̱dde̱n! 5 I̱yo̱ko̱ zin i̱tto̱n ol u̱gge̱ ku̱lu̱cce̱ kot rok orog ci een Jopa, kar kurubta e̱e̱t ci een zara Si̱mo̱ne̱ Peturu. 6 Abak enne ce̱e̱ze̱ ci Si̱mo̱ne̱ wa gon odode kwa̱ ko̱, aave ce̱e̱z cinne ngati ojono ki liil ti̱ti̱m. U̱du̱kta̱k anyik kerona rok agita.” 7 Baling i̱mi̱re̱ anjilo wa Ta̱mu̱ta̱dde̱no̱, utu zin Korneliosi du̱cca̱k ciginnek rama ki aciiroc wa irrez zoz ci Ta̱mu̱ta̱dde̱no̱ kar kirrez nonno bo̱do̱k gi̱i̱ imma niko. 8 U̱du̱wa̱k zin nogo o̱no̱zo̱k waginnek ke̱, kar zin ki̱tto̱n nogo kot rok Jopa.
Eron Peturu rok Kornelio
9 Bali i̱i̱te̱n ci reeng, baling ojongozit du̱cca̱ha̱ wak Korneliosi Jopa, uk zin Peturu otod le̱be̱le̱ ce̱e̱z ta̱dde̱n okko ala Ta̱mu̱ta̱dde̱n wazin kenga, 10 a̱da̱k da bo̱do̱k nonno magiz orong kadak gi̱i̱ imma. Baling ngen da̱i̱ne̱t a̱a̱kce̱, a̱gga̱mi̱t ungnyaha nonno. 11 Onoze zin, acin ta̱mu̱-keng ming o̱ye̱, acin gi̱i̱ ci ogon ki ru̱u̱m anyak ngeeto we̱c, alucai a̱kku̱na̱k lo̱o̱c.
12 Imma ru̱u̱me̱ neci anyak elegje wak a̱vu̱vu̱t kengtine ki bo̱do̱k ibali wak ta̱mu̱-kengo iróng a̱da̱k ol. 13 Kar zin Peturu kizik muluk ci azi ne, Peturu tinga je̱e̱na̱ ru̱k elegje ne̱ko̱ kar dau.” 14 O̱bo̱de̱k zin Peturu muluk neci a̱nne̱k ne, “Iróng een niko Manyi ngen anna i̱i̱te̱n co̱de̱ baize cinanni kadak e̱le̱gi̱t ci iróng ol cik Yo̱u̱do̱ adai, ming a̱du̱wa̱ lo̱ti̱nno̱wa̱ cik Ta̱mu̱ta̱dde̱n.” 15 Ozoz mului bo̱do̱k, azi ne, “Ma azi da̱i̱ne̱t u̱gge̱ ne iróng a̱zi̱ze̱, imma ngatu anyik Ta̱mu̱ta̱dde̱n ki̱zi̱zi̱.” 16 Obodonik zin o̱no̱zo̱wa̱ ne̱ke̱ Peturu lak i̱i̱yo̱. Kar ru̱u̱m neci bo̱do̱k ki̱mi̱re̱ kuk ta̱mu̱-kenga. 17 Odoi zin Peturu zinin o̱no̱zo̱we̱ ne̱ke̱ oroot, orong ka̱gga̱ ungec ci zoz neci. Baling ngen Peturu i̱no̱n o̱no̱zo̱k ne̱ke̱, arayya zin du̱cca̱ha̱ balik i̱tto̱na̱ Korneliosi ke̱ ce̱e̱z ci Si̱mo̱ne̱, kar a̱vvu̱to̱ arana. 18 I̱jji̱nto̱ zin azi ne, “Abak e̱re̱no̱i̱ti̱ ci een zara Si̱mo̱ne̱ Peturu ngatu?” 19 Baling ngen Peturu odoi zinin o̱no̱zo̱k ne̱ke̱ i̱no̱n orong ka̱gga̱ ungeti, izek zin Vongizi ci A̱li̱le̱ nonno ne, “Anyak ol cik een i̱i̱yo̱ aavtte arana orongnyi i̱nne̱ta̱. 20 Lucai bit ki nogo, ma aburi ngati orkoryu ki nogo. Abunna oroot, annita ci ki̱tto̱na̱ nogo.” 21 Kar zin Peturu kulucai kuk ngatinne̱ng, kar kize ne, “Annit e̱re̱no̱i̱t wa orongnyu ko̱ icu. A̱vvu̱nu̱ ngaa?” 22 Izeto zin ne, “I̱tto̱na̱ni̱t Korneliosi, ddi̱ki̱ri̱yo̱i̱t wa aciir ci olli Romi. Een enne e̱e̱t ci elemi Ta̱mu̱ta̱dde̱n wa ala ol cik Israilo, kar zin ol cik Yo̱u̱do̱ o̱ngo̱o̱le̱ nonno oroot. A̱du̱wa̱k anjilo ci Ta̱mu̱ta̱dde̱no̱ a̱li̱le̱ nonno zoz cu kar zin ki̱tto̱na̱i̱t agit ngatunne abunna ming okko rok ce̱e̱z cinne kar du̱wa̱k kaviyak cik Ta̱mu̱ta̱dde̱no̱ 23 Aanyik zin Peturu e̱re̱no̱k ciginnek kataguzo kaal. Bali nge̱rre̱ti̱n ci reeng, itinga inyaman nogo ki ol wak a̱tu̱ zoz wa Ta̱mu̱ta̱dde̱no̱ Jopakte. 24 Arayya zin orog ci azi zara ne Keseria i̱i̱te̱n ci reeng. Imma da Korneliosi u̱lu̱tta̱ bo̱o̱r ki gonoggi veelek, ere nege ku̱ru̱mto̱ ki Peturu. 25 Baling okko Peturu i̱zzo̱ ce̱e̱z ci Korneliosi, akatek zin Korneliosi u̱zu̱ngtti̱ lo̱o̱c ngati a̱ru̱me̱ke̱ Peturu tatug. 26 A̱gga̱m zin Peturu azzin ciginnek, kar kize ne “Tinga je̱e̱na̱ ke̱e̱ni̱ e̱e̱t ci diiri ki i̱nna̱!” 27 Itinga Korneliosi ibil je̱e̱na̱, kar zin Peturu kozozzo ki nonno, i̱tto̱zzo̱ zin ce̱e̱zto̱ ngati alutene ol cik meelek giir.
28 Iizek zin Peturu nogo ne “A̱gga̱yyu̱ bu̱k akaka keere wa ol cik Yo̱u̱do̱ ming arumze icima i̱zzo̱ ce̱e̱zi̱ cik i̱do̱ngi̱nu̱ ce̱e̱zi̱ne̱ cigge̱k ki i̱yo̱ko̱ icu. Abarik Ta̱mu̱ta̱dde̱n i̱ye̱le̱ka̱ o̱no̱zo̱we̱ azi ne ma a̱ru̱me̱nu̱ ki ol cik iróng een Yo̱u̱d, atubo ol ngu̱me̱ cinne. 29 I̱yo̱ko̱ zin i̱tto̱ni̱ ba̱li̱ye̱ ol abunna ming a̱vvu̱na̱ka̱ annita, ki̱ki̱ya̱ zin. I̱dda̱ ki̱jji̱ni̱n, azi ungec ci i̱tto̱no̱ka̱ ol ne̱ke̱ nya? 30 O̱bo̱de̱k zin Korneliosi Peturu, a̱nne̱k ne, kala Ta̱mu̱ta̱dde̱n balantali ce̱e̱za̱ baling i̱ginge̱ i̱i̱ yomona. Kacinni abarik e̱e̱t ci anyak ru̱u̱ma̱ni̱ cik ataltali ibil ngu̱me̱ cinanni, 31 a̱nne̱ka̱ zin ne, “Kornelio, izik Ta̱mu̱ta̱dde̱n lawinet cunne, icin bo̱do̱k Ta̱mu̱ta̱dde̱n kaal cik eelane i̱nna̱ ol wak amati ko̱! 32 I̱yo̱ko̱ zin, i̱tto̱n ol u̱gge̱ kot o̱rge̱ ci azi zar Jopa kar kot kutuyya e̱e̱t ci azi zara ne Si̱mo̱ne̱ Peturu abak ce̱e̱ze̱ ci Si̱mo̱ne̱ wa gon odode kwa̱ ko̱, aave ce̱e̱z ti̱ti̱me̱ ci mo̱ru̱ 33 Kar zin ki̱tto̱na̱i̱ ol ne̱ko̱ niko, abunna zin i̱ki̱ya̱ de̱de̱. I̱yo̱ko̱ zin kereya ngatunne kaviyak cik Manyi Ta̱mu̱ta̱dde̱n balik a̱a̱nyi̱ ke̱, abunna ming a̱du̱wa̱ke̱ta̱.
U̱du̱wa̱k Peturu i̱do̱ngi̱ kaviyak cik abunna
34 O̱bo̱de̱k zin Peturu zoz wa Korneliosi, azi ne, “Kacinni de̱de̱, iróng Ta̱mu̱ta̱dde̱n enger ol ciginnek, a̱ti̱ri̱z ol do̱o̱k kutubto. 35 Elemi ol lo̱o̱co̱we̱ do̱o̱k wak a̱gga̱ma̱ zoz cinne kar bo̱do̱k ku̱tu̱gu̱zzo̱ kaal cik abunna. 36 Ka̱gga̱ ri̱t iziktu kaviyak cik abunna uwaktek a̱ri̱tto̱wa̱ cik ol cik Israilo, azi ne kanyaka gano ki Ta̱mu̱ta̱dde̱n ngati Ye̱su̱ Ki̱ri̱sto̱, wa een Manyi ol do̱o̱k. 37 A̱gga̱yyu̱ kaal balik ogone Ju̱de̱ya̱kte̱, akane Ga̱li̱li̱kte̱, bali vu̱rrta̱ ngati a̱du̱nye̱k Joni ol mam abunna i̱ye̱la̱ utunget ol ba̱ci̱nno̱k, ngati a̱gga̱me̱k ba̱ti̱ti̱mo̱. 38 A̱gga̱yyu̱ aanyik Ta̱mu̱ta̱dde̱n Ye̱su̱ wa Nazereti komiz ki bo̱do̱k Vongiz ci A̱li̱le̱. Kar zin Ye̱su̱ ku̱lu̱c o̱ro̱gjo̱k a̱li̱ngli̱ng kaal cik abunna, kar bo̱do̱k kangaru ol wak aminye lo̱rye̱nt, eci Ta̱mu̱ta̱dde̱n aave ngati een nonno. 39 Kicinta naga to̱ni̱a̱ha̱ kaal ne̱k ogon enne ke̱ do̱o̱k lo̱o̱ce̱ ci Yo̱u̱do̱ veelek kommogo Jerusalema. U̱ru̱we̱t zin ol nonno kadak keete ci een te̱le̱c 40 Ma̱i̱je̱ Ta̱mu̱ta̱dde̱n itingawe nonno kurug i̱i̱nya̱we̱ cik een i̱i̱yo̱ 41 kar zin Ta̱mu̱ta̱dde̱n iróng ngen i̱ye̱le̱k nonno zu̱we̱ veelek, ci abarik i̱ye̱le̱ke̱t agit ol balik atahalait Ta̱mu̱ta̱dde̱n kizeta ol cik ka̱du̱wa̱ka̱ zu̱we̱ kaviyak ciginnek. Ke̱e̱gi̱na̱ ol balik kadaktowa kar bo̱do̱k kaudewa ki nonno, baling okko enne ingazi daiza. 42 Kar zin ki̱ti̱lo̱we̱t agita zoz ci azi ne uwaktek zoz wa Ta̱mu̱ta̱dde̱no̱ lo̱o̱co̱k do̱o̱k, kar u̱du̱kta̱k ol izet ne “Ye̱su̱ do̱ ci aanyik Ta̱mu̱ta̱dde̱n kize alaan ci appak zoz ci ol wak aruge ki daizok. 43 Ozoz ba̱li̱ye̱ a̱ri̱to̱wa̱ wak Ta̱mu̱ta̱dde̱no̱ zoz ci Ye̱su̱ azi ne, “Ming a̱tu̱we̱nu̱ zare cik Ye̱su̱, alalnekung atin Ta̱mu̱ta̱dde̱n ba̱ci̱nno̱k ciggo̱k mu̱nye̱nu̱.”
I̱ki̱ya̱k Vongizi ci A̱li̱le̱ i̱do̱ngi̱
44 Baling ngen Peturu a̱du̱wa̱k nogo zoz neci, i̱ki̱ya̱k Vongizi ci A̱li̱le̱ ol balik aziye kaviyak ne̱ke̱ ke̱. 45 Ma̱i̱je̱ ol wak Yo̱u̱do̱, balik elemtta zoz ci Ye̱su̱ orkora ki Peturu ke̱, u̱ku̱lte̱k je̱e̱n, eci Ta̱mu̱ta̱dde̱n aanyik ol wak iróng een Yo̱u̱d Vongiz ci A̱li̱le̱ bu̱k. 46 Iróng zin nege ngen adang zoz neci, eci iziyet ol wak iróng een Yo̱u̱d ming ozoz zo̱zo̱we̱ cik aavtte do̱ do̱ innat Ta̱mu̱ta̱dde̱n.
I̱jji̱no̱ zin Peturu, azi ne, 47 “I̱llo̱i̱ wo̱ye̱ e̱e̱t imma ci alam i̱do̱ngi̱ ciko ngati a̱gga̱me̱ ba̱ti̱ti̱mo̱. I̱yo̱ko̱ zin i̱ki̱ya̱k Vongizi ci A̱li̱le̱ ki bali ming a̱kku̱nna̱ke̱t ke̱.” 48 Iizek zin Peturu nogo ne, udunycozik mam a̱gga̱mi̱t ba̱ti̱ti̱mo̱ zare cik Ye̱su̱ Ki̱ri̱sto̱. Bali vu̱rrta̱, i̱jji̱n Korneliosi Peturu abunna ming abak arrak ki nogo do̱yo̱i̱t i̱i̱nya̱ u̱gge̱.