11
A̱da̱ngi̱t ol wak een Yo̱u̱do̱ a̱tu̱ zoz ci Ye̱su̱ ko̱ Peturu
1 Ataman niko iziyet to̱ni̱a̱ha̱ cik Ye̱su̱ zinino ki gotonogi Ju̱de̱ya̱kte̱ zoz ci azi ne elemtta ol wak iróng een Yo̱u̱d bu̱k zoz ci Ta̱mu̱ta̱dde̱no̱. 2 Abarik baling okko Peturu arawa Jerusalem, egerenycek zin ol wak Yo̱u̱do̱ wak a̱tu̱ zoz ci Ye̱su̱ bu̱k Peturu. 3 A̱nne̱k ne, “I̱to̱wu̱ ce̱e̱zi̱ cik i̱do̱ngi̱ wak ngen kettedit kuuli kar bo̱do̱k adakto nga̱to̱de̱!”
4 Kar zin Peturu ku̱du̱wa̱k nogo kaal balik ogon ke̱ do̱o̱k. Azi ne, 5 “Anyak i̱i̱te̱n imma ba̱li̱ye̱ Jopakte kala Ta̱mu̱ta̱dde̱n, mazing ngen kala Ta̱mu̱ta̱dde̱n, adakta ungnyaha bak kacinni konoze. Kacinni gi̱i̱ imma ci ogon ki ru̱u̱m ci a̱ddi̱ki̱re̱ ci anyak ngeeto we̱c alucai ta̱mu̱-kenga. Abarik alucai immyan. 6 Baling okko kacinni ru̱u̱m ecito, amuda anyak elegje wak zarak, ki wak a̱vu̱vu̱ti̱, ki bo̱do̱k ibali wak ta̱mu̱-kengo iróng ol adai. 7 Bak kazi muluk ci azi ne, ‘Peturu tinga je̱e̱na̱, ru̱k kar daho.’
8 “Ko̱bo̱de̱ke̱ bo̱do̱k, kazi ne, “Iróng een niko Manyi, ngen kadak i̱i̱te̱n imma kaal wak akaka keere ci Yo̱u̱do̱.”
9 “Abarik iyowa mului ta̱mu̱-kenga bo̱do̱k azi ne, ‘Ming azi Ta̱mu̱ta̱dde̱n ne abunna gi̱i̱ neci, iróng wo̱ye̱ i̱nna̱ azi ne gerza.’
10 Azi bo̱do̱k ne, “I̱ye̱le̱ka̱ gi̱i̱ neci a̱kku̱ ta̱mu̱-kenga ke̱ ele o̱no̱zo̱we̱ lak i̱i̱yo̱, baling ngen ki̱mi̱re̱ kuk ta̱mu̱-kenga. 11 Ataman niko kacinni ol balik een i̱i̱yo̱ i̱tto̱na̱i̱ Keseria ke̱ uzzuca ce̱e̱z bali ka̱ti̱ye̱ne̱ ke̱. 12 A̱nne̱ka̱ zin Vongizi ci A̱li̱le̱ ne ma o̱ngo̱o̱le̱ ngati orkoryu azi ne een nege i̱do̱ngi̱. Inyamannta zin bo̱do̱k ol wak a̱tu̱we̱ een torkonom Jopakte , kar zin kuzuca ce̱e̱z ci Korneliosi bali i̱tto̱na̱ nogo ke̱. 13 U̱du̱wa̱i̱t zin gool bali i̱ye̱le̱ke̱ anjilo wa Ta̱mu̱ta̱dde̱no̱ nonno ele o̱no̱zo̱we̱ kar kiizek ne, ‘I̱tto̱n du̱ca̱i̱t imma rok Jopa kar kuk kanyaha Si̱mo̱ne̱ wa een Peturu. 14 A̱du̱wa̱ku̱ng atin i̱ge̱t do̱o̱k ce̱e̱za̱ gool ci amudanu ti̱rze̱ne̱t wa Ta̱mu̱ta̱dde̱no̱.’
15 “Kakate zin uwahai zoz ci Ta̱mu̱ta̱dde̱no̱ Kornelios ki ol waginnek, baling ngen kakanne niko, i̱ki̱ya̱k zin Vongizi ci A̱li̱le̱ nogo, ki bali ming a̱kku̱na̱ke̱t oowa ke̱. 16 Kar zin ki̱no̱na̱ zoz bali a̱du̱wa̱ Manyi Ye̱su̱, bali azi ne, ‘A̱gga̱me̱k Joni ol ba̱ti̱ti̱mo̱ ba̱li̱ye̱ mame, ma̱i̱je̱ atin i̱i̱te̱ne̱ cunno̱ng, a̱gga̱mnyu̱ atin ba̱ti̱ti̱mo̱ Vongize ci A̱li̱le̱. 17 Aanyik Ta̱mu̱ta̱dde̱n i̱do̱ngi̱ bu̱k wak elemtta zoz ci Manyi Ye̱su̱ Ki̱ri̱sto̱ ki i̱yo̱ko̱ ki bali ming aanyyet agit ke̱. Ke̱e̱ni̱ kucca anna ngene kar kalam zoz ci Ta̱mu̱ta̱dde̱no̱?”
18 Baling iziyet ol uggak zoz ci Peturu ko̱, ijakte! Kar zin kinnatit Ta̱mu̱ta̱dde̱n, kizeto ne, “Aanyik Ta̱mu̱ta̱dde̱n ol wak iróng een Yo̱u̱d bu̱k gool ci kar kutungte ba̱ci̱nno̱k cigge̱k, kar ku̱mu̱dda̱ ruget wa aave udut.”
Ol cik Ce̱e̱z ci Ta̱mu̱ta̱dde̱no̱ o̱rge̱ ci azi zar ne Antiyok
19 Azzante zin ba̱li̱ye̱ ol wak a̱tu̱ zoz ci Ta̱mu̱ta̱dde̱no̱ baling u̱ru̱we̱t ol Istiven Jerusalema ke̱ rok lo̱o̱co̱ ci een Vonicia, a̱vi̱r bo̱do̱k uggak ovvo ki lo̱o̱c ci azi zar ne Saiporos ki bo̱do̱k orog ci een Antiyok. Uwaktek zin nege kaviyak cik abunna ol cik Yo̱u̱do̱ do̱. 20 Imma ol wak a̱tu̱ zoz ci Ta̱mu̱ta̱dde̱no̱ ko̱ uggak balik ingazi lo̱o̱ce̱ ci azi Saiporos ki Sairin, ot o̱rge̱ ci een Antiyok, akate zin uwahai ci uwahek Gi̱ri̱k bo̱do̱k zoz ci Manyi Ye̱su̱. 21 Aanyik Ta̱mu̱ta̱dde̱n nogo komiz kar zin ol cik meelek i̱do̱ngi̱ne̱ kelemtta zoz ci Manyi Ye̱su̱.
22 Baling iziyet ol cik ke̱le̱ci̱a̱k Jerusalema zoz neci do̱o̱k, i̱tto̱ni̱t zin Barnabas kuk rok Antiyok. 23 Baling arawa enne Antiyok, icin mu̱yu̱we̱ne̱t wa a̱mu̱yu̱we̱ Ta̱mu̱ta̱dde̱n ol ne̱ke̱, atal zin oroot, kar kirrez nogo abunna ming a̱gga̱m zoz ci Manyi Ye̱su̱ ju̱rru̱m. 24 Een da Barnabas e̱e̱t ci abunna, anyak bo̱do̱k Vongiz ci A̱li̱le̱ kar zin kanyak tu̱we̱ne̱t zo̱ze̱ ci Ta̱mu̱ta̱dde̱no̱. Elemtta zin kolle ci a̱ppwe̱ zoz ci Manyi Ye̱su̱.
25 Kar zin Barnabas kuk o̱rge̱ een Tarasis, okko orong Pa̱u̱lo̱ wa een zara uggak bo̱do̱k ne Saul. 26 Baling umuda nonno, orkorta zin bu̱k rok Antiyok. A̱vvu̱to̱ zin Sauli ki Barnabas ke̱le̱ci̱a̱ e̱rki̱t co̱de̱, edemez ol cik meelek. Akanai zin zara cik een Kiristian Ce̱e̱ze̱ ci Ta̱mu̱ta̱dde̱no̱ Antiyokte. Kiristian een nuyak wak atahalta e̱le̱tti̱ kunuwet Ye̱su̱.
27 Imma i̱i̱nya̱we̱ ne̱ke̱, eronit zin a̱ri̱tto̱wa̱ wak zoz ci Ta̱mu̱ta̱dde̱no̱ Jerusalema ot rok Antiyok. 28 Azi co̱de̱ zar ne Agabas, itinga je̱e̱na̱ u̱du̱wa̱k ol magiz ci a̱ddi̱ki̱re̱ a̱kku̱na̱k atin lo̱o̱co̱k do̱o̱k, ming a̱du̱wa̱k Vongizi ci A̱li̱le̱. Adak ol magiz neci baling ngen Kalaudio een alaan. 29 Kar zin nuyaha wak a̱tu̱ zoz ci Ta̱mu̱ta̱dde̱no̱ ce̱e̱ze̱ cinne Antiyokte, ku̱lu̱tta̱ da̱i̱ne̱t, i̱tto̱nta̱k da̱i̱ne̱t ne̱ke̱ gonoggi wak a̱tu̱we̱ lo̱o̱ce̱ ci azi zar ne Ju̱de̱ya̱. 30 U̱lu̱tta̱ zin da̱i̱ne̱t ne̱ke̱ kar zin kanycozik Barnabas ki Saul abunna ming ovvo anyike ol cik a̱ddi̱ki̱re̱ Ce̱e̱ze̱ ci Ta̱mu̱ta̱dde̱no̱ Jerusalema.