9
Utuhu Saulu zinin elema zoz ci Ye̱su̱
1 Ngen Saulo emmena de a̱gi̱d nuyak wak a̱tu̱ zoz ci Manyi Ye̱su̱. Orong kidita ol ne̱ko̱ do̱o̱k kadaito, kar zin kuk ngati alaan wa a̱ddi̱ki̱re̱ wawaco Ce̱e̱ze̱ ci Ta̱mu̱ta̱dde̱no̱. 2 Okko a̱jji̱n waraga ci kar ki̱tto̱ni̱k Ce̱e̱zi̱ne̱ wak Lawintoa o̱rge̱ ci azi zara ne Damaskas, abunna ming eela ol ne̱ke̱ nonno keceb nuyak wak Ye̱su̱ balik a̱vi̱r ki orog neci. Orong ka̱gga̱m nogo (ngaai ki ol cik macik) kar kanyahak cikin Jerusalema.
3 Baling ojongoz Damaskas koze neci, ataman niko acin gwo̱o̱ ci alanyit kize vor per ci a̱kku̱ ta̱mu̱-kenga iime nonno (Saul). 4 Udduk zin Sauli lo̱o̱c, azi zin mului ci a̱kku̱ gwo̱o̱ye̱ neci ne, “Saul! Saul! Ma adawana?”
5 I̱jji̱n zin Saulu muluk neci azi ne, “E̱e̱ni̱ dim i̱nna̱ ngene, Manyi?
O̱bo̱de̱k zin mului a̱nne̱k ne, “Ke̱e̱ni̱ Ye̱su̱ ci adawa i̱nna̱ ko̱! 6 ‘I̱yo̱ko̱ zin tinga je̱e̱na̱ de̱ce̱k bit Damaskaste, ngen atin kokko ka̱du̱wa̱ki̱ gi̱i̱ ci atin ogoni i̱nna̱.”
7 Imma ol balik orkor ki Saul ke̱, ibilet li̱i̱m, appangente, abarik aziye muluk ci e̱e̱t ci ozozi, iróng zin ngen acin e̱e̱t imma udut! 8 Baling okko Sauli ingazi je̱e̱na̱, aruba ele cinne ize ruben. U̱tu̱gu̱re̱t zin ol nonno azzine rok Damaskas. 9 Kar zin Sauli ka̱vvu̱ i̱i̱nya̱ i̱i̱yo̱ ci iróng acine. Iróng bo̱do̱k adakye ecima aud maam.
10 Imma o̱rge̱ ci een Damaskas ko̱, anyak nuyait ci a̱tu̱ Ye̱su̱ ci azi zara Ananiyasi. Ozozike Manyi Ye̱su̱ nonno o̱no̱zo̱we̱, awu azi ne, “Ananiyasi”
O̱bo̱de̱k zin, azi ne, “Wee, Manyi!”
11 A̱nne̱k zin Manyi ne, “Bit go̱o̱le̱ wa azi zar ne okko ṯop, rok ce̱e̱z ci Judas. Ming urumu ce̱e̱z neci, ji̱n e̱e̱t ci azi zara ne Saul ci orog ci azi zar ne Tarasis. Alaya annit i̱yo̱ko̱ niko. 12 Ki̱ye̱le̱ya̱ nonno o̱no̱zo̱we̱ zoz ci e̱e̱t ci azi zara ne Ananiyas ci a̱kku̱ okko atadek azzin kar kalawek nonno Ta̱mu̱ta̱dde̱n, abunna ming o̱yye̱ ebere ciginnek kicine.”
13 O̱bo̱de̱k zin Ananiyasi, azi ne, “Manyi, kiziya kaal cik meelek gerzek u̱tu̱gu̱we̱k Sauli ol cik a̱tu̱ zoz ci Ta̱mu̱ta̱dde̱no̱ Jerusalema! 14 Kazikna bo̱do̱k azi ne i̱tto̱na̱ alaata wak wawaco ko̱ nonno kar kuk keceb ol wak tu̱we̱nta̱k do̱o̱k o̱rge̱ ci azi zar ne Damaskas.”
15 Iizek zin Manyi nonno ne, “Tinga bit diman gi̱i̱ ci ka̱du̱wa̱ki̱ ko̱. Een Sauli e̱e̱t ci katahala anna abunna ming okkoye kaviyak cigannik ol wak iróng een Yo̱u̱d ki alaate cigge̱k ki bo̱do̱k ol wak Israilo. 16 Kar zin ki̱ye̱le̱k nonno kaal cik okko enne appirnane zo̱ze̱ cinanni.”
17 Uk zin Ananiyasi kar kuruba Saul, kar zin katadek azzin oo ci Sauli kalawek Manyi, kar kize ne, “Gotona Saul, i̱tto̱na̱na̱ Manyi Ye̱su̱ bali atahalai bali i̱ye̱le̱ki̱ ele goola ke̱, abunna ming acine labak, kar bo̱do̱k ruba Vongiz ci A̱li̱le̱.” 18 Ataman niko, i̱ta̱zzo̱ kaala cik ogon ki tabballanga cik u̱lu̱gta̱k, icine zin Sauli bo̱do̱k. Kar zin itinga uk a̱gga̱m ba̱ti̱ti̱mo̱. 19 Bali vu̱rrta̱, a̱da̱k da̱i̱ne̱t kokom ele cinne kak.
Uwak Sauli zoz ci Manyi Ye̱su̱ Damaskate
Abak Sauli ki nuyak wak Ye̱su̱ Damaskate gwo̱o̱ye̱n u̱gge̱. 20 Kar zin gon kuk Ce̱e̱zi̱ne̱ wak Lawinto, uwahek ol zoz wa Ye̱su̱, azi ne, “Een Ye̱su̱ de̱de̱ Ngerrti Ta̱mu̱ta̱dde̱no̱!”
21 U̱ku̱lte̱k zin ol wak iziyet zoz cinne ba̱li̱ye̱ ke̱ je̱e̱n. Kar ki̱jji̱nto̱ kizeto ne, “Iróng e̱e̱t bali a̱ru̱k nuyak wak Ye̱su̱ ko̱ Jerusalema ele necu? A̱kku̱ kar ki̱ki̱ya̱ keceb ol ngatu kar zin kuwe alaate wak wawaco Ce̱e̱ze̱ ci Ta̱mu̱ta̱dde̱no̱ Jerusalema.”
22 Imma uwahai ci Sauli ommogo veelek, kar zin ol cik Yo̱u̱do̱ cik aavtte o̱rge̱ ci Damaskasi iróng ngen adang nonno zo̱ze̱ ci azi enne ne, een Ye̱su̱ de̱de̱ Ki̱ri̱sto̱. 23 Baling edeca Sauli gwo̱o̱ye̱n u̱gge̱, orongit ddi̱ki̱ro̱wa̱ cik Yo̱u̱da̱k ku̱ru̱we̱t nonno. 24 U̱du̱wa̱k zin e̱e̱ti̱ imma zoz ci orong ku̱ru̱kte̱ nonno ke̱, ere zin ol nonno arane ci orog neci ba̱li̱n ki wazin niko.
25 Imma ba̱li̱n imma, itingazzo nuyaha cik Ye̱su̱ ko̱, o̱tte̱ nonno kar zin karttik dho̱nku̱ ci a̱ddi̱ki̱re̱, o̱do̱ngi̱t zin kar ki̱tto̱nti̱k a̱lu̱wa̱ eeci goola.
26 Baling uzzuca Sauli Jerusalem, orong ku̱ru̱mto̱ ki nuyak wak Ye̱su̱, imma nege o̱ngo̱o̱le̱ nonno. I̱no̱ni̱t azi ne a̱lu̱te̱t Sauli azi ne kiize nuyait ci Ye̱su̱ bu̱k. 27 Kar zin Barnabasi kuwe nonno ngati to̱ni̱a̱u̱ kar ku̱du̱wa̱k nogo Manyi Ye̱su̱ bali acin Sauli go̱o̱le̱ wa Damaskasi. U̱du̱wa̱k bo̱do̱k Barnabasi nogo zoz bali a̱du̱wa̱k Manyi Ye̱su̱ Saul kar zin kuwahek ol zoz ci obod ki Ye̱su̱ oroot o̱rge̱ ci een Damaskas. 28 A̱vvu̱to̱ zin Sauli Jerusalema labak ki nogo, ozoz zoz ci obod ki Manyi kokom utugi kak. 29 Adangtto ki ol cik Yo̱u̱do̱ wak a̱gga̱ni̱k zoz ci ol cik een Gi̱ri̱k, abarik orongit ku̱ru̱we̱t nonno. 30 Baling iziyet ol wak a̱tu̱we̱ ko̱ niko, o̱tte̱ zin nonno o̱rge̱ ci azi zar ne Keseria kar zin kovoganit kuk o̱rge̱ cinne Tarasisa.
31 Imma i̱i̱nya̱we̱ ne̱ko̱, abaito ol wak a̱tu̱ zoz ci Ta̱mu̱ta̱dde̱no̱ ko̱ labak, akane lo̱o̱co̱we̱ ciko: Ju̱de̱ya̱kte̱, Ga̱li̱li̱ya̱, ki Samariya. I̱ti̱ri̱z zin Vongizi ci A̱li̱le̱ nogo, bak kacin ol wak a̱tu̱we̱ ko̱ odoit kak tu̱we̱nta̱, kar zin ol cik meelek kotortozik nogo. Abaito zin ngoolinte ci Manyi Ye̱su̱.
A̱ti̱ri̱z Peturu e̱e̱t ci anyangnyangi
32 Eron Peturu o̱ro̱gjyo̱we̱ acin ol wak a̱tu̱we̱ zo̱ze̱ wa Ta̱mu̱ta̱dde̱no̱, arawa zin orog ci azi zara Lidda ci abahe ol cik Ta̱mu̱ta̱dde̱no̱. 33 Imma nginati urumto ki e̱e̱t ci azi zara ne Anyec ci omori anyangnyangi ele, oong kwe̱e̱na̱ e̱rki̱nya̱ torkoc. 34 Iizek zin Peturu ne, “La! Anyec angaruyi Ye̱su̱ Ki̱ri̱sto̱ i̱nne̱ta̱! Tinga je̱e̱na̱ kar luuc kwe̱e̱n cunne!” Kar zin kubunna ataman niko. 35 Kar zin zu̱we̱ ci orog ci azi zar ne Lidda ci lo̱o̱c ci een Charon elemtta zoz ci Manyi Ye̱su̱ baling icinet Anyec oto labak.
Aruguz Peturu ngaa imma daiza
36 Anyak ngaa imma ci een nuyait ci Ye̱su̱ o̱rge̱ ci azi zara ne Jopa, azi zar cik ngaa neci ne Tabita een nuyait ci Ye̱su̱, imma ecinne̱ng Gi̱ri̱ko̱ azi zar ne, Dorkas. Anyak zinin ci abunna, ogonik ol kaal ci abunna kar bo̱do̱k keela ol cik amati. Een Dorkasi Meger zo̱ze̱ ci ol cik een Gi̱ri̱k.
37 Imma i̱i̱te̱ne̱ neci a̱gga̱m morizi nonno kar zin kadak. Alangodet gonoggja kar zin kabaktek arrak ce̱e̱zto̱. 38 Abarik iziyet nuyaha ming aave Peturu ojonun o̱rge̱ ci azi zara ne Lidda wa ojongzo ki Jopa, i̱tto̱ni̱t zin ol rama kar kilaltek nonno, azi ne, “Vira rok agita ataman!”
39 I̱mi̱rte̱ zin ki Peturu ataman, baling ovvo arawa Jopa, o̱tte̱ zin Peturu ce̱e̱ze̱ wa abaheke ol daizoit ke̱. Auze da ngaai cik boyek ce̱e̱to̱, a̱lu̱ kar zin ki̱ye̱lte̱k nonno ru̱u̱ma̱ni̱ balik alulek Dorkasi nogo ke̱. 40 Ma̱i̱je̱ Peturu a̱jji̱n nogo do̱o̱k kiyokta re̱e̱nu̱n; kar zin ka̱ka̱te̱k u̱zu̱ngtti̱ lo̱o̱c kala Ta̱mu̱ta̱dde̱n. Kar zin kutuhuwe kicin daizoit, kar kize ne, “Tinga je̱e̱na̱, Tabita!” Oo zin enne ebere, baling icin Peturu kar zin kitinga ka̱vvu̱ je̱e̱na̱. 41 I̱tto̱ne̱k zin Peturu nonno azzin ciginnek kar keela nonno kitinga je̱e̱na̱. Kar zin kutu ol wak a̱tu̱ zoz ci Ta̱mu̱ta̱dde̱no̱ do̱o̱k een da uggak ngaai cik boyek kar ku̱du̱wa̱k nogo kizek ne aruge Tabita.