8
I̱gi̱d Saulo ol wak a̱tu̱we̱ kazzante
1 Imma Saulo bali aave to ke̱, atalne daize ci Istiveni. Imma i̱i̱te̱ne̱ neci, i̱ki̱ya̱k ol wak a̱tu̱we̱ gi̱de̱ne̱t ci a̱ppwe̱ Jerusalema. Azzante zin do̱o̱k Jerusalema ot ki Ju̱de̱ya̱kte̱ ki Samariya, kize to̱ni̱a̱k wak Ye̱su̱ zinino do̱ cik ngen erahek Jerusalema. 2 I̱vi̱tta̱ ol wak a̱di̱ngdi̱nga̱n Ta̱mu̱ta̱dde̱n adac Istiven kar zin ku̱tu̱lu̱zzo̱. 3 Ma̱i̱je̱ Sauli akate imice ol wak a̱tu̱we̱. I̱tto̱ ke̱le̱ci̱a̱nya̱ cik meelek, kar zin ku̱tu̱gu̱rta̱ ol cik macik ki ngaai kar zin keceb sikina.
A̱vvu̱ze̱t ci Vilipi Samariya
4 Ma̱i̱je̱ ol balik a̱tu̱ Ta̱mu̱ta̱dde̱n a̱vi̱r ke̱, ot azzantozik lo̱o̱co̱k do̱o̱k kar zin ku̱du̱kta̱k kaviyak wak abunna Ta̱mu̱ta̱dde̱no̱. 5 Uk Vilipi o̱rge̱ ci aave Samariya kar zin kuwahek ol zoz ci obod ki Ki̱ri̱sto̱ bu̱k nginati. 6 Ma baling iziyet Vilip ming ozoz, kar zin bo̱do̱k kicinet ming ogon kaal cik a̱vu̱la̱, izaktak ki̱vi̱ta̱ kiziyet no̱ngi̱tto̱n ju̱rru̱m. 7 Iyokta mininga cik meelek giir o̱lle̱ kar kegerenyit. I̱ti̱ri̱z Vilipi ol wak nganganyik zoona ki wak ngoolik kotozo. 8 Atalto zin ol wak Samariya kaale ne̱ko̱ oroot.
Si̱mo̱ne̱ wa een ngaari ci aguranu
9 Ma̱i̱je̱ nginati, aave da e̱e̱ti̱ ci een zara Si̱mo̱ne̱ ci gon da a̱ru̱k agura, kaanyik ol cik a̱tu̱we̱ ci Samariyo do̱o̱k ku̱ku̱lte̱k je̱e̱n ngaryinte neci ninne ke̱. Bak anyik ele kize e̱e̱t ci tiitinyi oroot. 10 Elemtta ol wak tiitinyik ki ol wak labak do̱o̱k kaal ne̱k ogon Si̱mo̱ne̱ ke̱ oroot, bak anno ne, kiziyet bali zoz wa obod ki komiz wa Ta̱mu̱ta̱dde̱no̱, komiz zin wa obod ki zoz ci Ta̱mu̱ta̱dde̱no̱ nenne ci anyak e̱e̱ti̱ cu ko̱.” 11 Elemtta zin olli Samariya nonno de̱de̱ ma̱rri̱t enne ming a̱ti̱ye̱ nogo tu̱ nginti da reeni. 12 Ma zin baling iziyet ngati Vilipi kaviyak cik abunna obod ki ba̱a̱li̱ne̱t ci Ta̱mu̱ta̱dde̱no̱ abale ol ki bo̱do̱k cik obod ki Ye̱su̱ Ki̱ri̱sto̱, a̱gga̱mi̱t ol cik macik ki ngaai do̱o̱k ba̱ti̱ti̱mo̱. 13 Elema Si̱mo̱ne̱ ilya bu̱k Ta̱mu̱ta̱dde̱n, kar zin baling a̱gga̱m ba̱ti̱ti̱mo̱, a̱vvu̱ ngati Vilipi ojonun. Ma baling icin kaal cik meelek a̱vu̱la̱ ogon Vilipi, u̱ku̱le̱k je̱e̱n oroot. 14 Ma baling iziyet to̱ni̱a̱ha̱ wak Ye̱su̱ Jerusalema ming elemtta olli Samariya zoz ci Ta̱mu̱ta̱dde̱no̱, i̱tto̱ni̱t Peturu ki Jon kot nginati. 15 Baling arayya Samariya, alayek Ta̱mu̱ta̱dde̱n ol wak a̱tu̱we̱ abunna ming a̱gga̱ma̱ Vongiz ci A̱li̱le̱. 16 Ma̱rri̱t baling ngen a̱gga̱m ba̱ti̱ti̱mo̱ zare cik Manyi Ye̱su̱ do̱, ngen bu̱k Vongizi ci A̱li̱le̱ ki̱ta̱k nogo. 17 Kar zin Peturu ki Jon ka̱ta̱dde̱k azzin cigge̱k ku̱mu̱yu̱e̱t nogo, kar zin i̱ye̱ ka̱gga̱mta̱ Vongiz ci A̱li̱le̱ niko. 18 Icin Si̱mo̱ne̱ Vongiz ci A̱li̱le̱ anyozik ol wak a̱tu̱we̱ baling a̱ta̱ddi̱k to̱ni̱a̱ha̱ azzin ngati a̱mu̱yu̱we̱ nogo. Kar zin Si̱mo̱ne̱ kanyik Peturu ki Jon o̱ro̱bi̱ya̱, 19 kar kize ne, “Icang da bu̱k katkaton necu, kar ming katadik e̱e̱t imma azzin kar ka̱gga̱m Vongizi ci A̱li̱le̱.” 20 Kar zin Peturu kiizek ne, “Ovvoyo atin i̱nna̱ ki o̱ro̱bi̱ya̱ cigunnek many ozoroc mining ngati i̱no̱ne̱ aziwe ne, uuta wo̱ye̱ muci ci Ta̱mu̱ta̱dde̱no̱ orobiyai! 21 Iróng i̱nna̱ anyai li̱ngli̱ngo̱n imma egeme cinna̱ng ko̱, ma̱rri̱t zinin cunne ming aave gerzet ngati edenyane Ta̱mu̱ta̱dde̱n. 22 I̱yo̱ko̱ zin e̱tte̱ddo̱ ki mu̱nye̱n ne̱k angarine ko̱ zo̱o̱, kar zin la Manyi kar kalalai ba̱ci̱nno̱k ne̱k i̱no̱ne̱ i̱nna̱ zoz ci ibil ki necu ko̱. 23 Ma̱rri̱t ming kacinni a̱ppwa̱ i̱nne̱t zinin oroot zee kecebti ba̱ci̱no̱wa̱.” 24 Kar zin Si̱mo̱ne̱ kizek Peturu ki Jon ne, “Alayeang zin Manyi abunna ming iróng a̱vvu̱na̱ka̱ kaala cik a̱du̱wa̱nu̱ ko̱.”
25 Ma baling udutet Peturu ki Jon ngati uwaheke ol zoz ci obod ki Manyi, i̱mi̱rto̱zzi̱k Jerusalem. Imma goola uwakttek ol kaviyak wak abunna Ta̱mu̱ta̱dde̱no̱ o̱ro̱gjo̱we̱ cik meelek Samariya.
Vilip ki e̱e̱t ci een Nubajenit
26 I̱ki̱ya̱ anjilo ci Manyi izek Vilip ne, “Tinga je̱e̱na̱ ceb i̱jjo̱ kar zin bit i̱do̱lya̱ nuu gool wa Jerusalemo okko ki Gaza” (I̱mi̱zmi̱ze̱ gool neci, i̱yo̱ko̱ iróng ol ngen owoye.) 27 Itinga zin Vilipi olowa. Ma̱i̱je̱ goola uruba e̱e̱t ci een ddi̱ki̱ri̱yo̱i̱t ci een Abacjenit. Abarik da̱ e̱e̱ti̱ necu een e̱e̱t ci ka̱gga̱m o̱ro̱bi̱ya̱ do̱o̱k cik alaan ci een ngaa een zara Kandas, ci abal lo̱o̱c ci Abacu. Eron da i̱i̱te̱ne̱ immani okko Jerusalema kar kuk ki̱di̱ngdi̱nga̱n Ta̱mu̱ta̱dde̱n nginanti. 28 Kar zin da i̱mi̱re̱ okko Nubane ngati otode toromile ci a̱gu̱ru̱t zi̱gi̱ri̱. Ikebje da bo̱do̱k, ikeb zoz ci e̱he̱rye̱ bu̱we̱ ci a̱ri̱to̱i̱t wa een Izaya.
29 Bak a̱nne̱k vongizi wa Ta̱mu̱ta̱dde̱no̱ Vilip ne, “Bit jongoz toromile neci.” 30 I̱vi̱ro̱zi̱k Vilipi e̱e̱t neci, kar zin kizik ming ikeb waraga wa a̱ri̱to̱i̱t wa een Izaya. I̱jji̱n zin nonno izek ne “Ma dim i̱yo̱ko̱ gi̱i̱ ci ikebi ko̱ a̱gga̱?” 31 Bak obodek Vilip izek ne, “Iróng wo̱ye̱ ka̱gga̱ ming i̱llo̱i̱ e̱e̱t ci oobika ungec ci zoz cu ju̱rru̱m.” Kar zin kutu Vilip kotoda toromile ki̱vi̱ta̱ kurumte bu̱k. 32 Azi zoz neci bali ikeb warage ci Ta̱mu̱ta̱dde̱no̱ ke̱ ne,
“Atubo enne ki a̱zze̱t ci ovvoye ol kar kot ko̱to̱do̱ngi̱t,
atubo bo̱do̱k ki nyon ci a̱zze̱to̱
ci iróng bu̱k orok ngati avicane ol imma, i̱llo̱i̱ rok zoz ci a̱du̱wa̱ udut.
33 Ebezbezanit ol nonno, bak i̱llo̱i̱ rok e̱e̱t ci apahek nonno zoz ci elemi.
I̱llo̱i̱ atin rok e̱e̱t ci a̱gga̱ ol,
ngati a̱ru̱we̱ ol nonno kadak kiditai pid.” 34 Bak a̱jji̱n e̱e̱ti̱ ci een Nubajenit Vilip a̱nne̱k ne, “Du̱wa̱ka̱ di̱ ozoz a̱ri̱to̱i̱ti̱ zoz ci obod ki ngene ngatu? Ozoz dim zoz ci obod ki nonno yo ozoz da zoz ci obod ki e̱e̱t imma?” 35 Kar zin Vilipi akate uwak zoz ci Ta̱mu̱ta̱dde̱no̱, akane zo̱ze̱ cu zee ku̱du̱wa̱k kaviyak wak abunna obot ki Ye̱su̱ wa atahalai. 36 Ma baling ngen aluce gool, umudda mam u̱gge̱, kar zin Nubajenti kiizek Vilip ne, “La gga̱me̱ka̱ ba̱ti̱ti̱mo̱” 37 Bak a̱jji̱n Vilipi nonno a̱nne̱k ne, “Ming elema de̱de̱ Ye̱su̱ zinine wainne do̱o̱k, ka̱gga̱me̱ki̱ wo̱ye̱ ba̱ti̱ti̱mo̱ labak.” Izek Nubajenti Vilip ne, ka̱gga̱ma̱ de̱de̱.” 38 Iizek zin Nubajenti e̱e̱t ci a̱gu̱ru̱t zi̱gi̱r ko̱ ne bilo kar zin enne ki Vilip ki̱to̱zo̱ mam, ka̱gga̱me̱k nonno ba̱ti̱ti̱mo̱ niko. 39 Ma baling iyokta mame, u̱ku̱k zin Vongizi ci Manyi Vilip ne dakdak, ki̱zzi̱ ci iróng bo̱do̱k Nubajenti acin nonno bu̱k, ma̱i̱je̱ enne uk go̱o̱le̱ cinne de ngati atalne oroot. 40 Uk zin Vilipi i̱ye̱la̱i̱ ize pell o̱rge̱ ci een Azotuz lo̱o̱ce̱ ci Gaza, kar zin koto o̱ro̱gjo̱we̱ cik meelek uwahek ol zoz ci Ta̱mu̱ta̱dde̱no̱ zee kuzuca nginti a̱nne̱k ol ne Keseria.