Bu̱k wa To̱ni̱a̱u̱ 6

Tahalanet ol wak a̱li̱ngli̱ng een turgerem

¹ Ma vu̱rrta̱ i̱i̱nya̱we̱ wak o̱to̱rni̱ne̱ nuyaha wak edemeza Ye̱su̱ adangtto Yo̱u̱do̱ wak ozoz zo̱ze̱ ci Gi̱ri̱ko̱ do̱ ki Yo̱u̱d wak ozoz Aramaik abak Jerusalema. Azi Yo̱u̱di̱ wak ozoz utug ci een Gi̱ri̱k ko̱ ne, “Iróng ngaai waga̱k boyek ngen aruba da̱i̱ne̱t wak gon engeronik ol wak amati a̱tu̱ Ta̱mu̱ta̱dde̱n. ² Ma zin zo̱ze̱ necu u̱tu̱yya̱ nuyaha wak Ye̱su̱ zinino een omoto ki rama ol wak a̱tu̱we̱ do̱o̱k nga̱to̱de̱, kar zin izetek nogo ne, “Iróng agano ngatinna̱ng ming kungna de̱mzi̱ne̱t ol zoz ci Ta̱mu̱ta̱dde̱no̱ kar zin kot kengerteya ol da̱i̱ne̱t. ³ I̱yo̱ko̱ zin gotonogga, engerta ngatinno̱ng ol turgerem wak a̱gga̱yyu̱ anyak Vongiz ci A̱li̱le̱ kar zin bo̱do̱k kanyait genyiz kar ki̱vi̱ta̱ kanycik ki̱li̱ngli̱nge̱t egem necu. ⁴ Kar zin egem ciinna̱ng kize lawinet ki u̱wa̱i̱nne̱t zoz ci Ta̱mu̱ta̱dde̱no̱.”

⁵ A̱ta̱li̱t ol wak a̱tu̱we̱ do̱o̱k zoz ci a̱du̱wa̱ to̱ni̱a̱ha̱ ko̱, kar zin katahalta Istiven e̱e̱t ci a̱tu̱we̱ kar bo̱do̱k kanyak Vongiz ci A̱li̱le̱ oroot. Atahalta bo̱do̱k Vilip ki Porokoras, ki Nikanora, ki Timon, ki Parmena, ki Nikola ci orog ci een Antiyok wa bali anyike ele tu̱we̱ne̱t ci ol wak een Yo̱u̱d arrak kar bo̱do̱k kelema Ye̱su̱. ⁶ Anyaktta̱k zin ol wak ahalai ke̱ to̱ni̱a̱k kar kutunyet nogo ngati alaweke Ta̱mu̱ta̱dde̱n keela nogo ngati a̱li̱ngli̱nge̱ li̱ngli̱ngo̱n necu ju̱rru̱m. Utunyet zin nogo ngati atadike azzin kar kalayek Ta̱mu̱ta̱dde̱n. A̱ta̱dde̱k azzin een gool ci unye Yo̱u̱di̱ ol.

⁷ Iddera zin zoz ci Ta̱mu̱ta̱dde̱no̱ ol cik meelek. O̱to̱ryye̱ nuyaha cik elemna zoz ci Ye̱su̱ zee bak ovvo meele giir Jerusalema. U̱tu̱we̱t ol wak wawaco Ce̱e̱ze̱ ci Ta̱mu̱ta̱dde̱no̱ Yo̱u̱da̱k bu̱k Ye̱su̱.

Eceb ddi̱ki̱ryo̱wa̱ cik Yo̱u̱do̱ Istiven

⁸ Een da Istiveni e̱e̱t ci amuyuk Ta̱mu̱ta̱dde̱n oroot kar zin kanyik komiz ci ogone kaal cik a̱vu̱la̱. ⁹ Abure zin da ol uggak nonno. Een ol ne̱ke̱ wagon ala Ta̱mu̱ta̱dde̱n Ce̱e̱ze̱ wa Lawinto ci ol wak iróng een du̱cca̱k. E̱e̱ggi̱n ol ne̱ke̱ Yo̱u̱d cik orog ci Alikzandria, ki lo̱o̱co̱we̱ cik Sairin ki Cilicia, ki Asiya. Utuburet Istiven zee bak adango. ¹⁰ Anyak Istiven Vongiz ci A̱li̱le̱ kar vongizi neci kanyik nonno genyiz ci a̱gga̱we̱ zoz ci etezane ol ne̱ke̱. ¹¹ Oot zin i̱ta̱bi̱t ol u̱gge̱ kar ki̱vi̱ta̱ kovolongte Istiven kizeto ne, “Kizikta i̱i̱te̱n imma Istiven ming odom Muses ki Ta̱mu̱ta̱dde̱n.” ¹² Mazing ovvo aziye ol wak a̱ddi̱ki̱re̱ Yo̱u̱do̱ ki de̱me̱zzo̱k wak lo̱ti̱nno̱u̱, utuburet nong kar zin ki̱vi̱ta̱ ka̱gga̱mi̱t Istiven ko̱tte̱ o̱lle̱ wak lo̱ki̱ka̱. ¹³ Anyaktta zin volongnyok u̱gge̱ ki̱vi̱ta̱ kovolongte Istiven kizeto ne, “Ozoz odohize e̱e̱ti̱ necu kaal cik gerzek akati ngint wa a̱li̱le̱ een Ce̱e̱z wa Ta̱mu̱ta̱dde̱no̱ ki lo̱ti̱nno̱k wak Musesi. ¹⁴ Kizikta nonno ming azi ne, a̱li̱b wazin imma Ye̱su̱ wa Nazereti ce̱e̱z wa Ta̱mu̱ta̱dde̱no̱ kar zin kutuhu baiz ki keerani balik anyet Musesi ke̱ karagizek baiz ci aave do̱.” ¹⁵ Ma̱i̱je̱ ol balik aavtte lo̱ki̱ka̱ ke̱ do̱o̱k egelemmit Istiven, bak acin ngu̱m cinne u̱du̱kto̱ ki ngu̱m ci anjilo ci Ta̱mu̱ta̱dde̱no̱.