5
Ananiyas ki Savira
1 Aave da e̱e̱ti̱ imma ci een Ananiyas kar ngaa cinne kize zar ne Savira, utuwoi kaal u̱gge̱ cik da anyai. 2 Kar zin ku̱lu̱gu̱ny o̱ro̱bi̱ya̱ lo̱lo̱i̱t, a̱gga̱ ngaa cinne bu̱k, anyaha ne̱ke̱ ki̱vi̱ta̱ karttik to̱ni̱a̱k lo̱o̱c. 3 Iizek Peturu nonno ne, “Ananiyas, ma anyike Sitana ku̱lu̱tta̱i̱ i̱jjo̱ kar volongek Vongiz ci A̱li̱le̱ ngati a̱lu̱gnye̱ o̱ro̱bi̱ya̱ lo̱lo̱i̱t.” 4 Ma baling ngen mana kutuwe ke̱ iróng ba̱li̱ye̱ een mana cunne. Ma baling utuwoi, iróng ngen azune i̱nna̱. Odola zin da arrak zinine cunne tu̱we̱ne̱t mana neci nya? Iróng zin a̱lu̱ti̱ ol cik diirik, u̱lu̱tu̱ zin abarik Ta̱mu̱ta̱dde̱n.” 5 Baling izik Ananiyasi zoz necu, udduk lo̱o̱c niko adaha. A̱gga̱m ol dalanzet ci a̱ppwe̱ ka̱bba̱rri̱te̱t ol oroot zoz necu. 6 I̱vi̱ta̱ zin logoz umudmudanit ele cinne, kar zin ko̱tte̱ renna kot kadac. 7 Mazing ovvo edeccai canya cik een i̱i̱yo̱, i̱ki̱ya̱ ngaa cinne, iróng a̱gga̱ gi̱i̱ imma bu̱k. 8 A̱nne̱k zin Peturu nonno ne, “Du̱wa̱ di̱, utenu mana ki Ananiyas do̱o̱k orobiyai ne̱ko̱?” O̱bo̱de̱k ngaa azi ne, “I̱i̱ny, o̱ro̱bi̱ya̱ ne̱ke̱ do̱o̱k ne̱ko̱.” 9 Izek Peturu nonno ne, “Iróng weda niga ozozanu zoz necu ngati orongnyu itimanit Vongiz ci Manyi. Zik zin, ngen zoona cik logoz wak ada mac cunne ke̱ culahe, ovvo atidic odongnyi i̱nne̱t bu̱k. 10 Udduk zin lo̱o̱c zoone cik Peturu, kadak. I̱vi̱ta̱ zin logoz ne̱ke̱ ko̱do̱ngi̱t nonno kar zin kot kadac ngati e̱e̱t cinne abanyca. 11 A̱gga̱m dalanzet ol wak ce̱e̱z wa Ta̱mu̱ta̱dde̱no̱ do̱o̱k ki ol wak iziyet no̱ngi̱tto̱n ne̱ko̱ do̱o̱k bu̱k.
A̱ti̱ri̱z To̱ni̱a̱ha̱ ol cik meelek giir
12 U̱tu̱gu̱zzo̱ to̱ni̱a̱ha̱ kaal cik meelek a̱vu̱la̱ wazin neci. Urumte ol wak a̱tu̱we̱ do̱o̱k Ce̱e̱ze̱ ci Ta̱mu̱ta̱dde̱no̱ u̱ru̱me̱ wa Solomoni. 13 Ma̱i̱je̱ ol wak iróng a̱tu̱we̱ ming nu̱nu̱n wazin neci a̱di̱ngdi̱nga̱n to̱ni̱a̱ha̱ Ta̱mu̱ta̱dde̱n, iróng orong ke̱tte̱dda̱ talal ki Ananiyas ki Savira. 14 Ma i̱i̱nya̱we̱ ne̱ke̱, u̱tu̱we̱t ol cik macik ki ngaai bu̱k Manyi Ye̱su̱ kar zin kurumtozik ol wak tu̱we̱nto̱. 15 Mazing ovvo ol acin kaal ne̱k ogon to̱ni̱a̱ha̱ ke̱ niko, odongta ol cik omori kwane, kar zin kabaktek go̱llo̱k, kar abunna ming okko Peturu owo, kar ri̱ri̱to̱ni̱ cinne ki̱ta̱k icima ming anyike kizeto maye mo̱ri̱zo̱we̱. 16 A̱vvu̱ ol cik meelek o̱ro̱gjo̱we̱ wak ojongoz Jerusalem do̱o̱k, anyahak to̱ni̱a̱k ol cik omori, ki cik anyak kuulo wak lo̱rye̱nta̱k kar zin ki̱ti̱ri̱ze̱t nogo do̱o̱k.
Amartoi alaata cik Yo̱u̱da̱k To̱ni̱a̱k.
17 Awu alaani wa a̱ddi̱ki̱re̱ wawaco Ce̱e̱ze̱ ci Ta̱mu̱ta̱dde̱no̱ ki ol wak orkor ki nonno a̱nne̱k ne Saddocis, a̱ta̱ma̱te̱k kaal cik ogon to̱ni̱a̱ha̱ ko̱ kar zin kamarrtoi nogo korongit ku̱tu̱gu̱ze̱k kaal cik gerzek. 18 A̱gga̱mi̱t zin to̱ni̱a̱k kar zin kot ke̱be̱ce̱t lagama. 19 Abarik zin ba̱li̱n neci i̱ki̱ya̱ anjilo ci Manyi oo tatuge ci cikino kar zin to̱ni̱a̱ha̱ kiyokta re̱e̱nu̱n, kar zin kizek nogo ne, 20 “Oot Ce̱e̱ze̱ wa Ta̱mu̱ta̱dde̱no̱ u̱du̱kta̱k ol zoz wa rugeto een jor.” 21 Mazing aziye to̱ni̱a̱ha̱ zoz necu niko, oot de̱de̱ reene ci Ce̱e̱z wa Ta̱mu̱ta̱dde̱no̱ nge̱rre̱t ri̱ri̱wo̱na̱, kar zin kot kedemezit ol nginati.
Ma i̱i̱te̱ne̱ neci ele, utuuwa alaani wa a̱ddi̱ki̱re̱ wawaco ki ol wak orkor ki nonno lo̱ddi̱ki̱re̱ cik Israilo ki̱vi̱ta̱k ro̱ni̱ ci lo̱ki̱ko̱. Bak i̱tto̱n aciir kot kanyakta to̱ni̱a̱k lagama. 22 Imma abarik ming ovvo aciiri a̱ru̱m cikin, aruba to̱ni̱a̱k ming a̱zze̱ to. O̱bo̱dda̱k zin ngin wanai ro̱ni̱o̱ ke̱, bak ovvo a̱nne̱k ol ne, 23 “Kovvoya zee baling kot ku̱ru̱mta̱ cikin, kamudana tatug a̱ti̱lti̱la̱ne̱. Ma̱i̱je̱ bekcowa ebek tatug, mazing kooya, kar zin ki̱to̱za̱ ecito, acina i̱llo̱i̱ ol u̱gge̱!” 24 Mazing aziye alaani wa ol wak ebek Ce̱e̱z wa Ta̱mu̱ta̱dde̱no̱ ki alaat wak wawaco Ce̱e̱ze̱ wa Ta̱mu̱ta̱dde̱no̱ zoz necu niko, u̱ku̱lte̱k je̱e̱n kar zin kizeto ne “Oot ucca to̱ni̱a̱ha̱ ki i̱ni̱n?” 25 I̱ki̱ya̱k zin e̱e̱ti̱ imma nogo kar zin kizek ne, “Izikto di̱! Aavtte ol balik ariku lagam ke̱ reena Ce̱e̱ze̱ wa Ta̱mu̱ta̱dde̱no̱ edemez ol.” 26 Bak ingazi alaani wa aciiru ki ol waginnek ovvo anyaha to̱ni̱a̱k. Iróng ngen anyaha i̱ba̱ti̱ne̱ ngiwa ongooline ol gerza ming ovvoc nogo biyene. 27 Anyaktta̱k zin to̱ni̱a̱k lo̱ki̱ko̱, kar zin kanycik nogo kibilet lo̱ki̱ka̱ orgena kar zin alaani wa a̱ddi̱ki̱re̱ wawaco ku̱cu̱b nogo. 28 Izek ne, “Kerecanekung ka̱nne̱ku̱ng ne, ma bo̱do̱k edemezu ol zoz ci obod ki Ye̱su̱, icinet da niga u̱tu̱gu̱zzu̱ nya! Azzanteu de̱mzi̱ne̱t necino̱ng ko̱ Jerusalem veelek, kar zin bo̱do̱k orongit ming aanyetu kizeta ol cik ka̱ru̱ka̱ Ye̱su̱ kadak!” 29 O̱bo̱de̱k Peturu ki to̱ni̱a̱k izetek ne, “Abunna ming kongoolina Ta̱mu̱ta̱dde̱n kommog ol cik diirik. 30 Eci itingawe Ta̱mu̱ta̱dde̱n wa ji̱ji̱ti̱ga̱c Ye̱su̱ daiza, Ye̱su̱ bali a̱ru̱ku̱ kadak ngati i̱ri̱mnyu̱ te̱le̱ca̱ ke̱, 31 uwe zin Ta̱mu̱ta̱dde̱n nonno kar zin kuk karik ka̱vvu̱ a̱zzi̱t cinne a̱zzo̱ kize ngerinne wa zinino, kar kize Alaan ki Ti̱ri̱zo̱i̱t ci kar kanyik olli Israilo koboddai zi̱nze̱ti̱ ba̱ci̱no̱we̱ wak mu̱nye̱nu̱, kar kalalek Ta̱mu̱ta̱dde̱n nogo. 32 Ke̱e̱gi̱na̱ zin bbacak kaale ne̱ko̱, kar zin bo̱do̱k Vongizi ci A̱li̱le̱ bu̱k i̱ye̱le̱i̱t kaal cik meelek ogon Ta̱mu̱ta̱dde̱n.”
33 Mazing ovvo ol wak ro̱ni̱o̱ aziye zoz necu niko, utuburet nong oroot, bak orong abarik ku̱ru̱we̱t to̱ni̱a̱k kadaito. 34 Ma̱i̱je̱ da e̱e̱ti̱ imma ci een Gamilia aave da to. Een enne ol wak een Varacis kar zin bo̱do̱k kize e̱e̱t ci edemezek ol lo̱ti̱nno̱k. O̱ngo̱o̱le̱ da gon ol do̱o̱k nonno, aziknek zoz, itinga zin je̱e̱na̱ lo̱ki̱ka̱, kar zin kizek ol ne, “Aanycik arrak di̱ ol ne̱ko̱ ki̱yo̱i̱t kot renna do̱yo̱i̱t.” 35 Ma baling i̱yo̱i̱t to̱ni̱a̱ha̱, izek ol cik ro̱ni̱o̱ ko̱ ne, “Ol wak Israilo, i̱no̱ni̱t di̱ arrak gi̱i̱ ci kar orongnyu u̱tu̱gu̱ze̱k ol ne̱ko̱ ju̱rru̱m. 36 A̱gga̱yyu̱ e̱e̱t bali azi zar ne Tedeyos anyik ele kize e̱e̱t ci a̱di̱ngdi̱nge̱ ke̱, zee bak anu ol cik een obet we̱c (400) nonno. Ma bali vu̱rrta̱ u̱ru̱we̱t ol nonno. Kazzante ol balik orkor ke̱, imma de̱mzi̱ne̱t bali ninne ke̱ adaiku lo̱o̱c. 37 Ma bo̱do̱k bali vu̱rrta̱, i̱ye̱la̱i̱ e̱e̱ti̱ imma ci een zara Judas wa Ga̱li̱li̱yo̱ i̱i̱nya̱we̱ wak a̱gi̱le̱ gala olli o̱rgu̱. A̱gga̱mi̱t bo̱do̱k ol cik meelek de̱mzi̱ne̱t neci ninne ko̱. Ma bali vu̱rrta̱ u̱ru̱we̱t bo̱do̱k ol nonno kadak, ma̱i̱je̱ ol balik orkor ke̱ azzante. 38 Ka̱nne̱ku̱ng zin zo̱ze̱ necu ne, ma ogoniku ol ne̱ko̱ gi̱i̱ ci gerze. Utunget kotozo labak, eci ming een de̱mzi̱ne̱t ki li̱ngli̱ngo̱n cinne̱ng ko̱ ci ogon e̱e̱ti̱ ci diiri, ngen atin adai daiz cinne do̱. 39 Ming een Ta̱mu̱ta̱dde̱n ci eela, i̱llo̱i̱ gool ci kar kommogte nogo udut. Ming u̱tu̱gu̱ze̱u̱ ol ne̱ko̱ gi̱i̱ imma ci gerze, iróng zin bu̱k ka̱gga̱ obboc abarik ucca ming ogoniku gi̱i̱ neci gerze ke̱ Ta̱mu̱ta̱dde̱n.”
Ma baling iziyet olli ro̱ni̱o̱ zoz neci a̱du̱wa̱ Gamlili ko̱, 40 u̱tu̱yya̱ to̱ni̱a̱k ki̱vi̱ta̱ ecito kar zin kanycik aciir ki̱bi̱cce̱t a̱lle̱ne̱, kar zin bo̱do̱k kerecantek zoz ci a̱nne̱ke̱ ne, ma bo̱do̱k ngen ozozu zoz ci obod ki Ye̱su̱, oogta zin nogo kot.
41 Iyokta zin to̱ni̱a̱ha̱ lo̱ki̱ka̱ talninta ma̱rri̱t ming icinet e̱le̱tti̱ cigge̱k ming anyik Ta̱mu̱ta̱dde̱n nogo kippirta zare ne̱k Ye̱su̱ ko̱. 42 Bak ovvo odohize reene ci Ce̱e̱ze̱ wa Ta̱mu̱ta̱dde̱no̱ ki ce̱e̱zi̱ne̱ cik ol wak a̱tu̱we̱ de̱mzi̱ne̱t ol kar zin bo̱do̱k kuwaktek ol kaviyak wak abunna Ye̱su̱ ci een Ki̱ri̱sto̱.