4
Abile Peturu ki Jon Ro̱ni̱a̱ lo̱ki̱ka̱
1 Ma baling ngen Peturu ki Jon ozozik ol, i̱vi̱ta̱k zin olli wawaco cik Ce̱e̱z wa Ta̱mu̱ta̱dde̱no̱ ki cik aciiru ebek ngin neci ki kolle ci een Saddocisa wa iróng elemi zoz ci azi ne ingazi atin ol daiza. 2 O̱mo̱zze̱ oroot zo̱ze̱ ci azi ciko Peturu ki Jon ne ingazi atin ol daiza de̱de̱ ki bali ming ingazi Ye̱su̱ ke̱. 3 A̱gga̱mi̱t zin Peturu ki Jon eci looci een yomon kar zin kanycik kataguzu lagama kaal. 4 Ma̱i̱je̱ da ol balik iziyet kaviyak ne̱ke̱, kelemit zoz ci Ye̱su̱, ortorte ol cik a̱tu̱ zoz ci Ta̱mu̱ta̱dde̱no̱ izeto lodet tu̱r (5000). 5 Ma bali nge̱rre̱t, u̱lu̱tte̱ alaata, ki lo̱ddi̱ki̱re̱ ki de̱me̱zzo̱k wak lo̱ti̱nno̱u̱ Jerusalema. 6 Uwaihit Annas alaan wa a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ ki bo̱do̱k Kaipasi ki Jon ki Alizanduru ki ol cik bo̱o̱r wa alaan wa a̱ddi̱ki̱re̱ wawaco. 7 Baling anyaktta̱k ol Peturu ki Jon, a̱ka̱tte̱ zin i̱jji̱ne̱t nogo izetek ne, “Komize dim icima zare cik ngene ci ogonnu zoz necu ko̱?”
8 Baling ulucak Peturu Vongizi ci A̱li̱le̱, iizek zin ol ne, “Alaat ki lo̱ddi̱ki̱re̱ wak ollu! 9 Ming a̱wu̱ye̱tu̱ la̱du̱n wazin necu kar ki̱vi̱ta̱ kimitanteung gi̱i̱ ci een bunnat adimanonik e̱e̱t ci ngooli ki̱ti̱ri̱ze̱ ko̱ ku̱? 10 A̱gga̱c zin ki olli Israilo zoz cu zare cik Ye̱su̱ Ki̱ri̱sto̱ wa Nazereti bali otoddoyu te̱le̱ca̱ kadak ke̱, kar zin Ta̱mu̱ta̱dde̱n kitingaai daiza kurug ke̱ ci anyik e̱e̱t ci abile o̱o̱we̱ cinno̱ng ko̱ ki̱ti̱ri̱ze̱. 11 Een enne
lolac bali u̱tu̱bu̱rtu̱
arrak tehenyaha ke̱ ize abarik ci abiliz ce̱e̱z do̱o̱k ju̱rru̱m.
12 A̱zze̱ e̱e̱ti̱ imma ci a̱ti̱ri̱ze̱t to, ngiwa azune imma lo̱o̱ta̱ ta̱mu̱-kenga la̱du̱n ci kar ki̱ti̱ri̱ze̱t to, kize Ye̱su̱ do̱ niko.” 13 Ma baling icinet Peturu ki Jon ming ozoz ju̱rru̱m ngati ngen nege da bu̱k kot de̱mzi̱ne̱t sukula, izeto ne, a̱gga̱c ming eela Ye̱su̱ nogo zoza niko. 14 Baling icinet e̱e̱t neci bali a̱ti̱ri̱ze̱ ke̱ ming abile ki nogo abanyca, i̱zzi̱ zoz ci gerze ci a̱du̱wa̱ alaata to. 15 Ottoit zin alaata Peturu ki Jon kot reena lo̱ki̱ka̱ kar zin ko̱to̱mo̱mi̱t do̱ kizeto ne, 16 “Kar ucca ku̱tu̱gu̱ze̱k ol ne̱ko̱ nya?” Ming a̱jji̱no̱ do̱. “A̱gga̱c ol ne̱k abak Jerusalema ko̱ do̱o̱k ming u̱tu̱gu̱zzo̱ nege kaal cik a̱vu̱la̱ oroot de̱de̱, iróng wo̱ye̱ kamikzene. 17 Ming korong kibilizet kaal ne̱ko̱ ngati azikne ol do̱o̱k, kegerenycek kizetek ne, ma bo̱do̱k abungnyu zar cik Ye̱su̱ abungeku ol u̱gge̱ udut.”
18 Utec zin bo̱do̱k Peturu ki Jon kot a̱du̱va̱/baali ecito, kar zin kerecantek zoz necu kizeto ne, “Ma bo̱do̱k abungnyu zar cik Ye̱su̱ icima edemezu ol zar ne̱ko̱ udut. 19 Abarizeke Peturu ki Jon nogo izetek ne, “Engeret da do̱ e̱le̱tti̱ne̱ ciggo̱k icima wo̱ye̱ abunna ming kazikna zoz cinno̱ng kar kutuburta ci Ta̱mu̱ta̱dde̱no̱? 20 Iróng wo̱ye̱ bo̱do̱k naga kuula kijaktewa li̱i̱m ci iróng kikebja kaal wak abunna wak kicinta eberene kar zin bo̱do̱k kizikta iine.”
21 Egerenycek zin alaata ciko Peturu ki Jon bo̱do̱k, imma bali vu̱rrta̱ oogta zin nogo kot ngiwa azune gool ci ecebe to, ma̱rri̱t bo̱do̱k ol do̱o̱k nginati innatit Ta̱mu̱ta̱dde̱n kaale ne̱k abunna ogon nege ke̱. 22 Ngiwa e̱e̱ti̱ wa amuda ti̱rze̱ne̱t zo̱ze̱ wa a̱vu̱la̱ ko̱, i̱ddi̱ki̱r ommogit e̱rki̱to̱wa̱ ciginnek moten we̱c (40).
Lawinet wa alawe ol wak a̱tu̱we̱ Ta̱mu̱ta̱dde̱n
23 Ma baling utungta Peturu ki Jon, i̱mi̱rte̱ ot o̱lle̱ wak a̱tu̱ zoz ci Ta̱mu̱ta̱dde̱no̱, ot u̱du̱kta̱k zoz bali u̱du̱wa̱k nogo alaata wak wawaco ki lo̱ddi̱ki̱re̱ ke̱ do̱o̱k. 24 Ma baling iziyet ol wak a̱tu̱we̱ zoz neci, alac zin Ta̱mu̱ta̱dde̱n mulukwane cik a̱bu̱le̱ oroot, izetek Ta̱mu̱ta̱dde̱n ne, “Manyi ye̱i̱, i̱nne̱t ci eenyca ta̱mu̱-keng ki lo̱o̱c ki li̱i̱lo̱k, ki kaal do̱o̱k ne̱k abak to ke̱. 25 Ozozi i̱nna̱ Vongize ci A̱li̱le̱ utuge ci du̱ca̱i̱t wa nu̱nne̱ ji̱ji̱ti̱nna̱ wa een Da̱vi̱de̱, azi ne,
“‘Nya da ming o̱mo̱zze̱ ol lo̱o̱co̱we̱ do̱o̱k ko̱,
kar zin bo̱do̱k ol kadaya gaganiko kaale cik iróng bu̱k eela nogo ko̱ nya?
26 Ait alaata cik lo̱o̱tu̱ i̱do̱ngi̱nu̱ ki alaat wak Yo̱u̱da̱k koz,
kar zin ku̱wa̱i̱t nga̱to̱de̱ illa ci kar
ki̱ga̱ngto̱zi̱k Manyi
ki e̱e̱t wa bali Atahalai.
27 U̱u̱wa̱i̱t de̱de̱ E̱ro̱di̱ ki Pontos Pilato nga̱to̱de̱ o̱rge̱ cu ki ol cik iróng een Yo̱u̱d ki olli Israilo zoz ci amage nege ngerunne wa a̱li̱le̱, du̱ca̱i̱t wa een Ye̱su̱ bali atahala kar zin kumuyuk ke̱.
28 U̱lu̱tte̱ kar zin ku̱tu̱gu̱zzo̱ kaal do̱o̱k balik elema i̱nna̱ ilya komize wa nu̱nne̱ odola ize ne abunna ming akati mo̱o̱le̱t ke̱. 29 I̱yo̱ko̱ zin Manyi i̱ya̱b gernyi necine̱ng ko̱ izong, kar zin anyik du̱cca̱k cigunnek ku̱du̱kta̱k ol zoz cunne ngati animne zoz. 30 I̱tto̱n komiz cunne ki̱ti̱ri̱z ol kar zin anyik kaal cik anine ki wak a̱vu̱la̱ ku̱tu̱gu̱ze̱ zare cik du̱ca̱i̱t wa nu̱nne̱ a̱li̱le̱ een Ye̱su̱.”
31 Ma baling e̱de̱cca̱ lawinet, utomo abarik ce̱e̱z bali alutene uwahe ke̱. I̱tto̱ Vongizi ci A̱li̱le̱ nogo do̱o̱k kar zin a̱ka̱tte̱ ozozzit ol kaviyak cik Ta̱mu̱ta̱dde̱no̱ ngati animne zoz.
Ozol ol wak a̱tu̱ Ta̱mu̱ta̱dde̱n i̱jjo̱ cigge̱k
32 O̱do̱ye̱ ol wak elemi Ta̱mu̱ta̱dde̱n zi̱nze̱ti̱ ṯok. I̱llo̱i̱ rok ci azi ne, een i̱jjo̱ ciginnek cik obod ki nonno do̱, abarik ozol i̱jjo̱ ne̱ge̱k ke̱ nga̱to̱de̱, 33 komize ci aanyik Ta̱mu̱ta̱dde̱n a̱ppwe̱, u̱du̱kta̱k to̱ni̱a̱ha̱ zoz ci izeto nege bbacak balik icinet Manyi Ye̱su̱ baling itinga daiza, kar zin Ta̱mu̱ta̱dde̱n kaanyik eezzet. 34 A̱zze̱ bali ngatinne̱ng e̱e̱ti̱ ci amati gi̱i̱ imma to. U̱tu̱yo̱i̱ ol balik anyak manen ki tiin ki kaal ne̱ge̱k ke̱ do̱o̱k kar zin kanyakta kaal ne̱k utene ke̱ ki̱vi̱ta̱ 35 kanycik to̱ni̱a̱k, kar zin orobiyana kengertozik nogo do̱o̱k ki gon ngengene ci ette gon orongi. 36 Imma da e̱e̱ti̱ imma ci een Yosevo ci bo̱o̱r co Le̱vi̱, a̱ri̱ta̱i̱ ngati een Saiporos. Aka̱nne̱k da to̱ni̱a̱ha̱ nonno kize Barnabas, azi ungec ci zar ne̱ko̱ ne Ngerrti E̱e̱t wa irrez ol. 37 Utuwoi mana ci da ninne kar zin kanyaha o̱ro̱bi̱ya̱ ki̱ki̱ya̱ karik lo̱o̱c nginti abilnne to̱ni̱a̱ha̱ abunna ming ovvo eelane ol cik amati.