3
Adiman Peturu ki Jon e̱e̱t ci ngooli
1 Ovvo da i̱i̱te̱ne̱ immani Peturu ki Jon Ce̱e̱ze̱ wa Ta̱mu̱ta̱dde̱no̱ ngati okko ki yomon, i̱i̱we̱ wa lawinto. 2 Ma̱i̱je̱ nginati aave e̱e̱ti̱ ci da a̱ri̱ta̱i̱ kize nganynganye zoona, odongek ol da gon arana wa azi zar ne aran ci a̱zi̱ze̱, ala o̱ro̱bi̱ya̱ o̱lle̱ wak a̱vvu̱na̱k Ce̱e̱z wa Ta̱mu̱ta̱dde̱no̱ ko̱. 3 Baling icin Peturu ki Jon ming i̱zzo̱ Ce̱e̱z wa Ta̱mu̱ta̱dde̱no̱, ala zin enne nogo abunna ming anyik nonno o̱ro̱bi̱ya̱. 4 Bak egelemmi̱t Peturu ki Jon nonno, kar zin Peturu kiizek ne, “Cinet da ju̱rru̱m.” 5 Egelem zin nogo de̱de̱, abarik i̱no̱n zinina azi ne, icima atidic nege anyik nonno gi̱i̱ imma.
6 Kar zin Peturu kize ne, “I̱llo̱i̱ annit o̱ro̱bi̱ya̱ cik kaanyin, abarik zin kaanyi gi̱i̱ ci kanyai icu, zare cik Ye̱su̱ Ki̱ri̱sto̱ wa orog ci een Nazeret, ka̱nne̱ki̱ ne, tingaa kar to.”
7 Kar zin Peturu ka̱gga̱m nonno a̱zzi̱t ci a̱zzo̱, ngati eelane nonno kitinga je̱e̱na̱. Ataman niko, ubunntta zoona cik e̱e̱t neci. 8 Itinga ngati ingoze, kibil je̱e̱na̱ zoone, kar zin ku̱lu̱c lo̱o̱c. Kar zin korkorit ki nogo oot reena Ce̱e̱ze̱ wa Ta̱mu̱ta̱dde̱no̱ ecito, ngati owoye je̱e̱na̱ kar zin kingoz katal oroot kar bo̱do̱k kinnat Ta̱mu̱ta̱dde̱n. 9 Icinet ol do̱o̱k nonno ngati owoye, kar kinnat Ta̱mu̱ta̱dde̱n 10 Ma baling iyezta ol nonno ming een e̱e̱t wa gon alaye Ce̱e̱ze̱ wa Ta̱mu̱ta̱dde̱no̱ arane wa aka̱nne̱k ol kize aran ci a̱zi̱ze̱ ko̱, u̱ku̱lte̱k gi̱i̱ ci ogononik Ta̱mu̱ta̱dde̱n nonno ko̱.
Uwak Peturu a̱lu̱wa̱we̱ ci alawe ol Ta̱mu̱ta̱dde̱n
11 Baling icinet ol e̱e̱t neci ngati a̱gga̱mo̱ azzin ki Peturu ki Jon a̱lu̱wa̱we̱ wa aka̱nne̱k ol kize aran ci Solomoni, u̱ku̱lte̱k zin ol do̱o̱k je̱e̱n, kar zin ki̱vi̱rto̱zi̱k ol do̱o̱k nogo. 12 Ma baling icin Peturu ol u̱tu̱gu̱zzo̱ niko, uwahek zin zoz ci Ta̱mu̱ta̱dde̱no̱, azi ne, “Ol wak Israilo, ma a̱ku̱le̱ku̱ gi̱i̱ necu, ma icintetu, ma i̱no̱nu̱ annu ne agit cik kanyika e̱e̱t necu koto komize cinna̱ng. 13 Eci Ta̱mu̱ta̱dde̱n wa Aburahami, ki wa Isako ki Ya̱ko̱bo̱ ki ji̱ji̱ti̱ga̱c nenne wa anyik Ye̱su̱ wa een du̱ca̱i̱t cinne di̱ngdi̱ngo̱n wa ta̱mwo̱. Abarik zin ba̱li̱ye̱ a̱gga̱me̱ku̱ nonno gala, u̱tu̱bu̱rtu̱ nonno ngu̱me̱ ci alaan wa een Pilato, bak bali nu̱nu̱n ming orong Pilato koog kar kutung nonno ke̱. 14 Een enne ba̱li̱ye̱ e̱e̱t ci abunna a̱li̱le̱ oroot, uburtu abarik nonno, kar zin abarik i̱jji̱ne̱t Pilato abunna ming oogakung e̱e̱t wa mu̱nye̱nu̱. 15 U̱ru̱ktu̱ abarik e̱e̱t wa anyik ol ruget kadak, ma̱i̱je̱ Ta̱mu̱ta̱dde̱n itingawe daiza, ke̱e̱gi̱nna̱ zin bbacak bu̱k zo̱ze̱ necu. 16 Komiz zin ci a̱kku̱ zare ciginnek nenne ci anyik e̱e̱t wa ngooli ko̱ kitinga koto. Tu̱we̱ne̱t zin wa ka̱tu̱yya̱ Ye̱su̱ nenne ci anyik e̱e̱t necu kubunna ngati acinu do̱o̱k ko̱ nenne. 17 “Ma̱i̱je̱ zin i̱yo̱ko̱ niko ko̱ gotonogga, ka̱gga̱ niko gi̱i̱ bali ogoniku niga ki alaat waggo̱k Ye̱su̱ ke̱, ogonnu zin niko eci ngen a̱gga̱c ming een da necu e̱e̱t bali ahalai ke̱. 18 U̱du̱wa̱ bali la̱du̱n Ta̱mu̱ta̱dde̱n waraganyai wak eher a̱ri̱tto̱wa̱ wak zoz ci Ta̱mu̱ta̱dde̱no̱ do̱o̱k pirnanet ci kar ki̱ki̱ya̱ kippirai Ki̱ri̱sto̱ cinne. Anyik zin de̱de̱ Ta̱mu̱ta̱dde̱n gi̱i̱ neci bali a̱du̱wa̱ ko̱ ki̱ta̱ go̱o̱le̱ neci. 19 I̱yo̱ko̱ zin abunna ming elemnanu ba̱ci̱nno̱k ciggo̱k mu̱nye̱nu̱ kar zin obboddak Ta̱mu̱ta̱dde̱n, kar zin kalaleung ba̱ci̱nno̱k ciggo̱k mu̱nye̱nu̱ . 20 Kar icima Ta̱mu̱ta̱dde̱n i̱tto̱nna̱ku̱ng ta̱lni̱ne̱t ci a̱ppwe̱ zi̱nze̱ti̱ waggo̱k, kar zin bo̱do̱k bu̱k ki̱tto̱nna̱u̱ng Ta̱mu̱ta̱dde̱n Ki̱ri̱sto̱ bali la̱du̱n atahalung enne wa een Ye̱su̱ ke̱. 21 Irahek arrak atin ta̱mu̱-kenga zee ki̱vi̱ta̱ arrak atin kaala do̱o̱k kidimante kize joor ki bali ming u̱du̱wa̱ Ta̱mu̱ta̱dde̱n go̱o̱le̱ ci a̱ri̱tto̱k wak a̱li̱le̱ balik abak bali reena ke̱. 22 Eci bali azi Musesi ne, “I̱tto̱nna̱ku̱ng atin Manyi wa een Ta̱mu̱ta̱dde̱n a̱ri̱to̱i̱t ci zoz waninne ki i̱yo̱ko̱ ming i̱tto̱na̱ enne ko̱, kar zin atin kize e̱e̱t cinno̱ng. Abunna zin ming aziknu kaal ne̱k a̱du̱wa̱ku̱ng ke̱ do̱o̱k. 23 Ize zin bo̱do̱k Musesi ne, ‘Imma e̱e̱ti̱ wa iróng aziye zoz wa a̱du̱wa̱ a̱ri̱to̱i̱ti̱ necu, engeryai o̱lle̱ wak Ta̱mu̱ta̱dde̱no̱ koto do̱.’ 24 U̱du̱ktta̱ a̱ri̱tto̱wa̱ do̱o̱k rok Samwel, ki a̱ri̱tto̱k balik anuwa nonno ke̱, kaal ne̱k kar ki̱ki̱ya̱ ku̱tu̱gu̱ Ye̱su̱ ko̱. 25 A̱ra̱gi̱zzu̱ zin ngintik a̱ri̱to̱u̱ kar zin Ta̱mu̱ta̱dde̱n ki̱tto̱nna̱u̱ng Ye̱su̱ bali ogon ki ji̱ji̱ti̱go̱k olom ke̱. A̱nne̱k bali Ta̱mu̱ta̱dde̱n Aburaham ne, ‘Kamuyui atin ol do̱o̱k lo̱o̱ta̱ ngati zo̱ze̱ cunne.” 26 Atahala zin Ta̱mu̱ta̱dde̱n du̱ca̱i̱t waninne kar zin arrak ki̱tto̱nna̱u̱ng ki̱ki̱ya̱ ku̱mu̱yu̱ng, kar zin ko̱bo̱da̱u̱ng go̱o̱le̱ wa gerze (ba̱ci̱no̱we̱).”