2
I̱ki̱ya̱k Vongizi ci A̱li̱le̱ ol wazin bali izeto i̱i̱nya̱ moten tu̱r
1 Baling i̱ki̱ya̱ wazini wa yu̱bze̱nto̱ a̱nne̱k ol ne i̱i̱ bali a̱kku̱na̱k Vongizi ci A̱li̱le̱ ol, aavtte da ol wak a̱tu̱ Ye̱su̱ do̱o̱k nga̱to̱de̱ Jerusalema. 2 Ataman niko i̱ki̱ya̱ mului ci ogon ki ngoti ci a̱vvu̱wa̱n ki i̱lo̱li̱ ci ti̱ri̱ a̱kku̱ ta̱mu̱-kenga atakuza ce̱e̱z bali aavtte nege ke̱ do̱o̱k 3 Icinet kaal cik ibili ki ahati cik gwo̱o̱ya̱k ming engero kar zin ki̱vi̱ta̱ ka̱ta̱do̱zzi̱k nogo do̱o̱k co̱de̱ co̱de̱.
4 U̱u̱m Vongizi ci A̱li̱le̱ kidera ol do̱o̱k bak akane ozoz zozok cik ol u̱gge̱ ki ming anyik vongizi kuulet ka̱gga̱c zoz neci. 5 Aavtte da Jerusalema Yo̱u̱di̱ cik o̱ngo̱o̱le̱ Ta̱mu̱ta̱dde̱n a̱vvu̱ o̱ro̱gjo̱we̱ ne̱k lo̱o̱ta̱ ta̱mu̱-kenga ko̱ do̱o̱k. 6 Ma baling iziyet muluk necu, u̱lu̱tta̱i̱ kollena nga̱to̱de̱ ka̱ma̱li̱ltte̱ o̱o̱ti̱, ma̱rri̱t ngengene izik ol wak anu Ye̱su̱ ming ozoz zo̱ze̱ ci kollen ne̱k wanai ko̱ do̱o̱k. 7 Ma baling a̱ma̱li̱ltte̱ o̱o̱ti̱ oroot, i̱jji̱nto̱ izeto ne, “Iróng ne̱k ozoz ko̱ do̱o̱k utug ci Ga̱li̱li̱yo̱? 8 Ogon zin i̱yo̱ko̱ ku̱ ming kaziye ozoz ol ne̱ke̱ zoz ci gon ngengene ngatinna ko̱? 9 A̱vvu̱ uggak lo̱o̱co̱we̱ cik Partia, Media, Elamitia, abak ne̱ke̱ Mesopotomiakte, Ju̱de̱ya̱kte̱, ki Kapadosiakte, Pontas, ki Asiyakte, 10 Vagiriyakte ki Pamviliakte, Masira ki Atzinkte, ci Libio ngati ojongzo ki Sairin, ki erenok Romakte 11 Yo̱u̱d ki ol wak u̱tu̱hu̱ye̱ kizeto Yo̱u̱d, ol cik Kereta ki Arabz kaziye nogo do̱o̱k ming abung li̱ngli̱ngo̱n ci abunna Ta̱mu̱ta̱dde̱no̱. Ming ozoz zo̱zo̱we̱ cigga̱c!” 12 Ma baling a̱ma̱li̱ltte̱ o̱o̱ti̱, i̱jji̱nto̱ e̱le̱tti̱ izeto ne, “Nya i̱ye̱ ci ogon nege ne̱ko̱? Azi i̱ye̱ ungec ci zoz necu ne?” 13 Ma̱i̱je̱ abarik ol uggak atararte nogo kar zin kizeto ne, “I̱bba̱k ol ne̱ko̱ merte ci ette een imidik a̱du̱ve̱ akatkati.”
Uwahek Peturu kollen ne̱ko̱ zoz
14 Kar zin Peturu kibilet ki nuyak wak een omoto ki co̱de̱ ko̱ je̱e̱na̱, odong muluk kar zin kozozik kolle kizek ne, “Ol wagannik een Yo̱u̱d ki i̱ge̱t do̱o̱k wak abaku Jerusalema, icang ku̱du̱wa̱u̱ng ungec ci zoz cu, iziyet zoz ci kozozi ko̱ ju̱rru̱m. 15 Iróng ol ciko i̱bba̱kce̱; ki i̱yo̱ko̱ ming i̱no̱nu̱ ko̱. Ngen ri̱t looci een nge̱rre̱ti̱n lili! 16 A̱zze̱ to, een zoz necu zoz bali ozoz a̱ri̱to̱i̱ti̱ wa een Jowel ke̱:
17 Azi Ta̱mu̱ta̱dde̱n ne, “I̱i̱nya̱we̱ ne̱k atin a̱vvu̱ vurta ke̱,
ka̱ddu̱ta̱k atin vongiz cinanni ol do̱o̱k,
ikeb atin bu̱llu̱wa̱ cik dooli ciggo̱k do̱o̱k zoz cinanni.
Acin atin dooli ciggo̱k macik ki cik nga̱a̱ye̱k kaal cik meelek o̱no̱zo̱we̱,
kar zin bo̱do̱k ol wak a̱ddi̱ki̱re̱ ko̱no̱zze̱ o̱no̱zo̱k.”
18 Rok du̱cca̱k bu̱k, ol cik macik ki cik nga̱a̱ye̱k,
ka̱ddu̱ta̱k atin vongiz cinanni i̱i̱nya̱ ne̱ke̱,
kar zin ku̱du̱kta̱k ol zozok cik i̱nna̱.
19 Ki̱ye̱la̱ atin kaal cik a̱vu̱la̱ ta̱mu̱-kenga,
ki bayen lo̱o̱ta̱ todowai,
okko nyelowi ukce ki̱bbi̱r ṯeṯ ki bi̱ye̱ta̱
ngati ngen wazini wa a̱ddi̱ki̱re̱ Manyonni ki̱ki̱ya̱.
21 Eelai atin ol wak au
zar cik Manyonni kuruget.”
22 Kar zin Peturu kize ne “Iziyet da zoz cu, ol wak Israilo, bali Ye̱su̱ wa Nazereti anyung Ta̱mu̱ta̱dde̱n go̱o̱le̱ wa ogone kaal cik a̱vu̱la̱, ki kaal wak anine ki bayen balik ogonikung Ta̱mu̱ta̱dde̱n ngatinne, ngati ri̱t a̱gga̱yyu̱ e̱le̱tti̱ne̱. 23 Odola bali Ta̱mu̱ta̱dde̱n la̱du̱n ize ne, anyonikung atin Ye̱su̱ azzin ciggo̱k; ngati eelanung mu̱ju̱lnya̱ wak een Romi wak mu̱nye̱nu̱, kar zin u̱ru̱we̱t kadak ngati o̱do̱ddi̱ku̱ te̱le̱c. 24 Odonga zin abarik Ta̱mu̱ta̱dde̱n nonno daiza, ooga u̱ce̱ze̱ ci daiza, ngiwa iróng daizi u̱llne̱ ce̱bi̱nta̱. 25 Ozoz Da̱vi̱de̱ zoz ci obod ki nonno azi ne,
“ ‘Kedenya Manyi odohize o̱o̱we̱ cinanni.
Ma̱rri̱t ming aave a̱tte̱ ci nanni a̱zzo̱,
iróng wo̱ye̱ ka̱bba̱rri̱ti̱.
26 I̱yo̱ko̱ zin zinin cinanni atalne gi̱i̱ye̱ necu,
ma wo̱ye̱ nu̱nu̱n ming kadai loza, ka̱gga̱ niko i̱llo̱i̱ gi̱i̱ ci gerze a̱kku̱na̱ka̱n.
27 Ma̱rri̱t i̱nna̱ Ta̱mu̱ta̱dde̱n ming iróng ungnek vongiz wanani lo̱o̱c ci daizo,
icima iróng ungnei du̱ca̱i̱t wanunne A̱li̱le̱ o̱de̱ ku̱mu̱ lo̱o̱wa̱. q1 28 I̱ye̱le̱ya̱ ba̱li̱ye̱ gool ci kar kuk bo̱do̱k kuruge.
Katallne oroot zo̱ze̱ ci karumene ki i̱nne̱ta̱.
29 Gotonogga, abunna zin ming ka̱du̱wa̱ku̱ng kaal wak obod ki ji̱ji̱ti̱na̱ wa ikebje oroot een alaan Da̱vi̱de̱. Adak de̱de̱ kar zin kadawe, rok ilomi wainne bu̱k aave ngatu rok i̱yo̱ko̱. 30 Een zin bali enne a̱ri̱to̱i̱t ci a̱gga̱ olom bali a̱du̱wa̱k Ta̱mu̱ta̱dde̱n nonno ke̱, odola bali Ta̱mu̱ta̱dde̱n zoz ci a̱nne̱ke̱ Da̱vi̱de̱ ne kanyik atin ngerinne imma karagiz alaanzet cinne. 31 Icin Da̱vi̱de̱ gi̱i̱ ci kar ku̱tu̱gu̱ Ta̱mu̱ta̱dde̱n niko kar zin kozoz gi̱i̱ ci obod ki nga̱zi̱ ci Ki̱ri̱sto̱ daiza ize ne, “Iróng Ta̱mu̱ta̱dde̱n ungnek nonno lo̱o̱c ci daizo, kar zin bo̱do̱k ele wainne ku̱mu̱ lo̱o̱wa̱.” 32 Itingawe zin Ta̱mu̱ta̱dde̱n Ye̱su̱ daiza de̱de̱. I̱yo̱ko̱ zin naga do̱o̱k kizeta bbacak zo̱ze̱ necu. 33 Uwe Ta̱mu̱ta̱dde̱n nonno ta̱mu̱-kenga, kar zin kuk karik a̱zzi̱t wainne a̱zzo̱, kar zin kanyik Vongiz ci A̱li̱le̱ ki bali u̱du̱ya̱k lo̱o̱c ke̱. Ma i̱yo̱ko̱ ci acinu bak aziknu ko̱, Vongiz ci A̱li̱le̱ amuccet Ta̱mu̱ta̱dde̱n. 34 Ngen bali Da̱vi̱de̱ kuk rok ta̱mu̱-keng, ulla zar enne u̱du̱wa̱ zoz ci obod ki Ye̱su̱ azi ne,
“ ‘A̱nne̱k Ta̱mu̱ta̱dde̱n Manyi wanani ne,
a̱vvu̱ annit a̱tte̱ ci a̱zza̱ zee,
35 bak ka̱a̱nyi̱ mog mo̱ddo̱ wagunnek
a̱vvu̱wo̱i̱ ngenye.”
36 “Abunna zin niga ol wak Israilo do̱o̱k ming a̱gga̱yyu̱ zoz neci ju̱rru̱m. Ye̱su̱ bali ododdoyu niga keete bali een te̱le̱c ke̱, nenne ci aanyik Ta̱mu̱ta̱dde̱n kize Manyi ki Ki̱ri̱sto̱!
37 Ma baling iziyet ol do̱o̱k zoz necu, otongoolte lo̱o̱c, kar zin izetek Peturu ki to̱ni̱a̱k u̱gge̱ ne, “Gotonogga kar zin ucca ku̱tu̱gu̱za̱ nya?” 38 Iizek zin Peturu nogo ne, “E̱tte̱ddo̱ do̱o̱k ki mu̱nye̱n waggo̱k zo̱o̱, kar zin a̱gga̱mi̱t ba̱ti̱ti̱mo̱ zare wak Ye̱su̱ Ki̱ri̱sto̱, kar Ta̱mu̱ta̱dde̱n kalaleung ba̱ci̱no̱we̱ wak mu̱nye̱nu̱ . Ming u̱tu̱gu̱zzu̱ niko, kar zin ucca Ta̱mu̱ta̱dde̱n kumucung Vongize ci A̱li̱le̱. 39 Eci kaala cik abunna odola Manyi Ta̱mu̱ta̱dde̱n een kaal cik kar ki̱ki̱ya̱u̱ng Vongizi ci A̱li̱le̱ i̱ge̱t ki dooli waggo̱k, ki ol wak reeni many, rok ol wak awa Ta̱mu̱ta̱dde̱n kizeto olline.”
40 Uwahek Peturu nogo zozok go̱o̱lo̱we̱ cik meelek giir, kar zin ki̱ti̱lo̱wi̱k bu̱k zoz ci azi ne, “E̱e̱lla̱ e̱le̱tti̱ ciggo̱k de̱zi̱nte̱ ci a̱kku̱na̱k ol wak gerzek abure Ta̱mu̱ta̱dde̱n!” 41 Iziyet ol cik meelek zoz neci kar zin unuwet Ye̱su̱, bak a̱gga̱mto̱zi̱k ol cik wo̱ye̱ azuca lodet i̱i̱yo̱ [3000] ba̱ti̱ti̱mo̱ kotortozik to̱ni̱a̱k i̱i̱te̱ne̱ neci. 42 Bak edemez to̱ni̱a̱ha̱ nogo zozok wak Ta̱mu̱ta̱dde̱no̱, kar zin kurumte do̱o̱k zo̱li̱nta̱ da̱i̱nte̱ ki lawinet Ta̱mu̱ta̱dde̱n nga̱to̱de̱.
Baiz ci ol wak a̱tu̱ zoz ci Ta̱mu̱ta̱dde̱no̱
43 Ogon to̱ni̱a̱ha̱ kaal cik a̱vu̱la̱ komize ci Ta̱mu̱ta̱dde̱no̱ ku̱ku̱lte̱k olli Jerusalemo do̱o̱k je̱e̱n. 44 Emmena ol wak a̱tu̱ zoz ci Ta̱mu̱ta̱dde̱no̱ a̱gga̱wo̱ orkor ju̱rru̱m, eelo e̱le̱tti̱ kaale cik anyak nege. 45 U̱tu̱yo̱i̱ kaal ki i̱jjo̱ cigge̱k, kar zin kengerit o̱ro̱bi̱ya̱ go̱o̱lo̱we̱ cik gon ette elleno ki ngenene. 46 Alute odohize reena Ce̱e̱ze̱ wa Ta̱mu̱ta̱dde̱no̱,a kar zin ko̱zo̱li̱t da̱i̱ne̱t ce̱e̱zi̱ne̱, adakto talninta, zi̱nze̱ti̱nne̱ cik alali kuc. 47 Kar zin kinatit Ta̱mu̱ta̱dde̱n oroot, kar zin ol do̱o̱k kelemit nogo baize wanne̱ng arumonik ol cik een jor nogo baize wanne̱ng zee bak otorek Manyi ol cik a̱tu̱we̱ kizeto meele giir.