Bu̱k wa To̱ni̱a̱u̱
1
Aanyik Ta̱mu̱ta̱dde̱n ol Vongiz ci A̱li̱le̱
1 Keteherai anna Lu̱ka̱ i̱nne̱t To̱vi̱lo̱ kaal do̱o̱k wak obod ki kaal wak akati Ye̱su̱ bu̱we̱ bali nanni een oo ke̱, ki kaal balik ogon enne kar zin bo̱do̱k kedemezo ke̱, 2 zee rok wazin bali odongine enne kuk ta̱mu̱-kenga ke̱, ngati i̱ti̱lo̱we̱ to̱ni̱a̱k balik ahala ke̱, ti̱lo̱wi̱ne̱t go̱o̱le̱ wa Vongiz ci A̱li̱le̱. 3 Ngati adahe enne la̱du̱n. I̱ye̱le̱k ele ol ne̱ke̱ kar zin kanyik nogo do̱o̱k kelemtta zoz ci ngen da enne arugne ko̱. I̱ye̱le̱k nogo ele zee kedeccai i̱i̱nya̱ cik een moten we̱c kar zin kozoz zoz ci obod ki ba̱a̱li̱ne̱t ci Ta̱mu̱ta̱dde̱no̱. 4 I̱i̱te̱ne̱ immani da, ngati adaine ki nogo, anyik nogo ti̱lo̱wi̱ne̱t necu izek ne, “Ma ungneku Jerusalem lo̱o̱c; abarik erec mucenet bali allna la̱du̱n ngati Baba ke̱, bali iziktu ming ka̱du̱wa̱ku̱ng ke̱. 5 A̱gga̱me̱k Joni ol ba̱ti̱ti̱mo̱ mame, ma̱i̱je̱ abarik i̱ge̱t a̱gga̱mo̱ni̱ku̱ng atin ba̱ti̱ti̱mo̱ Vongize ci A̱li̱le̱.”
O̱do̱ngye̱ Ye̱su̱ ngota uk Ta̱mu̱-kenga
6 Ma baling urumte nuyaha nga̱to̱de̱, i̱jji̱ne̱t zin Ye̱su̱ izetek ne, “Manyi, okko atin i̱nna̱ obodeke Israil alaanzet wanne̱ng o̱lle̱ wak Romi?” 7 Iizek Ye̱su̱ nogo ne, “Iróng een i̱ge̱t cik a̱gga̱yyu̱ i̱i̱nya̱ ki wazinok wak u̱du̱wa̱ Baba komize wainne. 8 Ma̱i̱je̱ abarik atin niga a̱gga̱yyu̱ ming i̱ki̱ya̱u̱ng Vongizi ci A̱li̱le̱; kar atin izet bbacak cigannik Jerusalema, ki Ju̱de̱ya̱kte̱ do̱o̱k ki Samariyakte, rok nginti aṯurneke looci.” 9 Ma baling ize niko, odonge Ye̱su̱ ngati acine nege uk ta̱mu̱-kenga, kar zin di̱i̱z ku̱bu̱ng nonno ngati edevane. 10 Mazing ngen angamnik ta̱mu̱-keng niko, ataman niko abarik icinet ol cik een ram cik aburuc ru̱u̱ma̱ni̱ cik voorik per ibilet abanyce cinne̱ng. 11 “Ol cik Ga̱li̱li̱yo̱,” Azi nege, “abilu ngatu gagniko angamniku ta̱mu̱-keng nya?
“Ye̱su̱ necu ilya, i̱yo̱ko̱ odonge ngatinno̱ng uk ta̱mu̱-kenga ke̱, oboda loze immani go̱o̱le̱ neci acinu niga nonno ming okkoye ta̱mu̱-kenga ko̱.”
Atahalai Matiyasi kar Ka̱ra̱gi̱z Judas
12 I̱mi̱rte̱ zin nuyaha wak Ye̱su̱ zinino Biye wa I̱ngi̱ro̱u̱ ojongzo ki Jerusalem, kar kot o̱rge̱ wa a̱ddi̱ki̱re̱ een Jerusalem. 13 Ma baling uzzuca Jerusalem, oot ce̱e̱ze̱ ci eenyconik ki ta̱dde̱n ki lebeleta wak atadzo ce̱e̱ze̱ ci da gon goni abahe nege. Een ol ne̱k balik aavtte to ke̱, Peturu, Jon, Je̱mi̱s, ki Andereya, Vilip, ki Tomas, Bartolomeyo ki Ma̱te̱yo̱, ki Je̱mi̱s, ngerrti Alipeyo, ki Si̱mo̱ne̱ wa gerze zinin gala cik Romi, ki Judas ngerrti Je̱mi̱si̱ 14 Kar zin nege do̱o̱k kebentek zo̱li̱ne̱t nga̱to̱de̱ odohize ngati alawe Ta̱mu̱ta̱dde̱n, ki ngaai bu̱k ki Ma̱ri̱ya̱ e̱e̱ti̱ Ye̱su̱ ki gotonogi Ye̱su̱. 15 Ibil i̱i̱nya̱ ne̱ke̱ Peturu je̱e̱na̱ orgene ci ol wak a̱tu̱ Ye̱su̱, een ucca zong obon co̱de̱ ki moten ram (120). 16 Kar zin kize ne, “Gotonogga, zoz bali e̱he̱rye̱ warage ci Ta̱mu̱ta̱dde̱no̱ a̱du̱wa̱ Vongizi ci A̱li̱le̱ bali renna utuge ci Da̱vi̱de̱ obod ki Judas ke̱, bali anyaha ol balik eceb Ye̱su̱ ke̱. 17 Een bali enne necu bu̱k e̱e̱t cinna ci a̱li̱ngli̱ng ki agit li̱ngli̱ngo̱ne̱ necu nga̱to̱de̱.” 18 Mucente neci bali amuda mu̱nye̱ne̱ ke̱, utuwa Judasi mana; u̱ru̱k zin lo̱o̱c ne ru̱k, eṯezane keng kiyokta uluktena re̱e̱nu̱n. 19 Iziyet ol do̱o̱k Jerusalema zoz necu, a̱ka̱tte̱k ol mana neci kize Akildom, imma zo̱ze̱ cinne̱ng azi ne nege ne; “Mana ci bi̱ye̱tu̱.” 20 “Eci,” Ize bo̱do̱k Peturu, “ E̱he̱rye̱ bu̱we̱ ci caliwono,
“ ‘azi ne, “Aanycik ngin neci kize li̱i̱k;
anyik ki̱i̱zi̱ e̱e̱ti̱ ci abahe ngineci to̱o̱,’ kar
“ ‘ Anyik e̱e̱t imma kuwe ddi̱ki̱rze̱t icima alaanzet cinne.’ 21 “ I̱yo̱ko̱ zin abunna ming kahala e̱e̱t co̱de̱ o̱lle̱ cik bali kaavtte bu̱k ngati bali kaavtte ki Manyi Ye̱su̱ ecito orgene cinna, 22 Akane ba̱ti̱ti̱mo̱ ci Joni zee rok i̱i̱ bali odongine Ye̱su̱ ngatinna kuk ta̱dde̱na̱ ke̱. Een atin necu bbacait ci korkor nga̱zi̱we̱ ci engane Ye̱su̱ daiza.” 23 Uuvta zin ol rama Yosevo ci een Barsabas (a̱gga̱ bo̱do̱k ol nonno zare cik een Justus) ki Matias 24 kar zin kalayo, kizeto ne, “Manyi, a̱gga̱ i̱nna̱ zi̱nze̱ti̱ cik o̱llu̱ do̱o̱k. Ye̱la̱i̱t da, jang o̱lle̱ cik een rama ko̱ ci atahala i̱nna̱. 25 Kar karagiz ngin bali a̱li̱ngli̱nge̱ Judas zoz ci Ta̱mu̱ta̱dde̱no̱ baling utungek lo̱o̱c kar kurubai daiz oowa ci edeze Ta̱mu̱ta̱dde̱n nonno.” 26 Kar zin kovoccit bibicoc, i̱ta̱k zin bibicoci Matias niko, otorozik zin to̱ni̱a̱k balik i̱nyi̱kta̱i̱ izeto omoto ki rama ki bali la̱du̱n.