11
Daiz ci Lazaru
1-2 Omor da̱ e̱e̱ti̱ ci een zara Lazaru, a̱kku̱ enne o̱rge̱ ci een zara Beteni, abak ciko Ma̱ri̱ya̱ ki ngooni ci een Marta o̱rge̱ neci bu̱k. E̱e̱ggi̱n nege ngonoggi Lazaru. U̱vu̱d ba̱li̱ye̱ Ma̱ri̱ya̱ zo̱o̱ cik Manyi Ye̱su̱ maale ci ongoli laala, kar zin ki̱ti̱vi̱la̱ maal neci immane ciginnek.
3 Baling i̱tto̱nte̱k ngonoggi Lazaru Ye̱su̱ zoz izettek ne, “Manyi, omor goonu wa zinino oroot.”
4 Baling izik Ye̱su̱ zoz neci, ize ne, “Iróng atin morizi neci een daiz. Anyike atin zar cik Ta̱mu̱ta̱dde̱no̱ ku̱bu̱lte̱, kar ol ki̱di̱ngdi̱nge̱t Ngerrti Ta̱mu̱ta̱dde̱no̱ morize necu.” 5 Irez Ye̱su̱ Lazaru ki ngonoggi Marta ki Ma̱ri̱ya̱. 6 Ma̱i̱je̱ baling izik enne ming omor goonia ci een Lazaru nu̱nu̱n, erahek zin ngin bali aave ke̱ i̱i̱nya̱ ram.
7 Ma bali vu̱rrta̱, izek zin Ye̱su̱ nuyak waginnek ke̱ ne, “Ki̱mi̱rte̱ ko̱ lo̱o̱ce̱ ci een Ju̱de̱ya̱.”
8 Izettek nege nonno ne, “De̱me̱zo̱i̱t, orongi wanai jor niko ko̱ ol cik e̱e̱ggi̱n Yo̱u̱d kovocci biyene. Orongi abarik bo̱do̱k i̱nna̱ mi̱re̱ bit nginati de?”
9 O̱bo̱de̱k zin Ye̱su̱ nogo, izek ne, “U̱u̱n wazini, ming owo e̱e̱ti̱ waz i̱llo̱i̱ gi̱i̱ ci adiri. 10 Abarik ming owo e̱e̱ti̱ ba̱a̱l, adir zin kaala cik meelek eci i̱llo̱i̱ tukuloc ci ataran lo̱o̱c.”
11 Baling u̱du̱wa̱ Ye̱su̱ zoz necu, kar zin kotorik zoz necu, azi ne, “Adunge gotoneti ci een Lazaru, kokko zin anna nginati kar kuk ki̱ti̱ngka̱.”
12 O̱bo̱dde̱k zin nuyaha ciginnek nonno, izettek ne, “Manyi, ming adunge, ingazi atidic labak.” 13 Ozoz Ye̱su̱ abarik daiz ci e̱e̱t ci een Lazaru, imma nuyaha ozoz ungnyak wak gon la̱du̱n ko̱.
14 U̱du̱wa̱k zin Ye̱su̱ nogo zoz ci een de̱de̱, ize ne, “A̱da̱k Lazaru de̱de̱. 15 Katalne zin zo̱ze̱ cunno̱ng eci iróng anna karumena ki nonno, kar atin abunna ming a̱tu̱yyu̱. Abarik koot zin i̱yo̱ko̱ rok nonno.”
16 Izek zin e̱e̱ti̱ ci een Tomas, wa bo̱do̱k een cuudenit nuyak u̱gge̱ ne, “Koot naga do̱o̱k bu̱k, icima ka̱da̱i̱ ki nonno.”
A̱gga̱m Ye̱su̱ ngonoggi Lazaru azzin
17 Baling uzuca Ye̱su̱ ce̱e̱z co Lazaru, amuda ele ci Lazaru abakttek ol ngi̱lo̱m edeca i̱i̱nya̱ we̱c. 18 Ojon da̱ orogi ci een Beteni ki Jerusalem. 19 I̱vi̱ta̱ da̱ ol cik e̱e̱ggi̱n Yo̱u̱d Jerusalema ovvo a̱gga̱ma̱ ciko Marta ki Ma̱ri̱ya̱ azzin u̱lu̱wa̱ne̱ ci gotoni cinne̱ng bali a̱da̱i̱ ke̱.
20 Baling izik Marta ming a̱kku̱ Ye̱su̱, uk u̱ru̱me̱k nonno gool, ma̱i̱je̱ Ma̱ri̱ya̱ irahek ce̱e̱za̱. 21 Izek zin Marta Ye̱su̱ ne, “Manyi, wo̱ye̱ da̱ ming a̱vvu̱ ngatu, iróng wo̱ye̱ da̱ gotona a̱da̱i̱. 22 Ma̱i̱je̱ zin anna ka̱gga̱ i̱yo̱ko̱ niko aanyi atidic Ta̱mu̱ta̱dde̱n gi̱i̱ ci a̱jji̱nni̱ i̱nna̱ ngatinne.”
23 Izek zin Ye̱su̱ nonno ne, “Ingazi atidic gotonu daiza kurug bo̱do̱k.”
24 O̱bo̱de̱k zin Marta nonno, izek ne, “Ka̱gga̱ niko ming ingazi atin enne wazin wa ingane ol do̱o̱k daiza.”
25 Izek Ye̱su̱ nonno ne, “Annit ci kingane ol daiza kuruget. Ming a̱tu̱ya̱ e̱e̱ti̱ annita, ming a̱da̱k nu̱nu̱n, aruge atin. 26 Ming aruge e̱e̱ti̱ kar ku̱tu̱ zoz cinanni, iróng atin a̱da̱i̱. A̱tu̱yyu̱ zoz necu de̱de̱?”
27 Izek Marta Ye̱su̱ ne, “I̱i̱ny Manyi, elemna anna e̱e̱ni̱ i̱nna̱ Ki̱ri̱sto̱ wa bali atahalai, Ngerrti Ta̱mu̱ta̱dde̱no̱ wa bali azi ne a̱kku̱nna̱k atin lo̱o̱c.”
28 Baling edeca enne zoz ki Ye̱su̱, kar zin kuk ku̱tu̱ ngooni wa een zara Ma̱ri̱ya̱, uwe abanyca, kar zin kizek ne, “Aave de̱me̱zo̱i̱ti̱ ngatu, a̱jji̱nni̱n, orong kicinin.” 29 Baling izik Ma̱ri̱ya̱ zoz necu, itinga je̱e̱na̱ ataman kar zin kuk ngatinne. 30 Ngen zin da̱ Ye̱su̱ ki̱tto̱ orogto, ngen abarik da̱ aave ngin bali a̱ru̱me̱ke̱ Marta nonno gool ke̱. 31 Baling icinnet ol balik e̱e̱ggi̱n Yo̱u̱d cik ovvo a̱gga̱m nogo azzin u̱lu̱wa̱na̱ ce̱e̱za̱ ke̱ Ma̱ri̱ya̱ ming ingazi ataman, i̱no̱nni̱t nege izetto ne okko i̱yo̱ko̱ enne ngi̱lo̱ma̱ u̱lu̱wa̱, unuwet zin Ma̱ri̱ya̱ vu̱rrta̱.
32 Baling uzuca Ma̱ri̱ya̱ ngin bali aave Ye̱su̱ ke̱, kar zin edenya nonno, udduk lo̱o̱c zone cik Ye̱su̱ kar zin kize ne, “Manyi, ming wo̱ye̱ da̱ a̱vvu̱ ngatu, iróng wo̱ye̱ da̱ gotona a̱da̱i̱.”
33 Baling icin Ye̱su̱ nonno ming a̱lu̱, kar bo̱do̱k ol balik e̱e̱ggi̱n Yo̱u̱d orkora ki nonno ke̱ bo̱do̱k ming a̱lu̱, u̱u̱c nonno zinin oroot.
34 I̱jji̱n zin Ye̱su̱ nogo izek ne, “Abahekku da̱ Lazaru i̱ni̱n?” Izettek zin nege nonno ne, “I̱jja̱ kar cin ngi̱lo̱m neci, Manyi.”
35 U̱tu̱lu̱ zin Ye̱su̱.
36 Izetto zin ol ne̱k e̱e̱ggi̱n Yo̱u̱d ko̱ ne, “Icinnet, irez Ye̱su̱ Lazaru oroot!”
37 Abarik uggak ngatinne̱ng azi ne, “Iróng weda e̱e̱ti̱ ci oo ol ebere kicinte ko̱, abiliz daiz ci a̱ru̱k Lazaru?”
Ingane Ye̱su̱ Lazaru daiza
38 U̱u̱c zin bo̱do̱k Ye̱su̱ zinin oroot kar zin kuk ngi̱lo̱ma̱, a̱ri̱ta̱nne̱k da̱ ol ngi̱lo̱m neci bee utug ku̱bu̱ng. 39 Izek zin Ye̱su̱ nogo ne, “I̱pi̱ktta̱ bee neci ngi̱lo̱ma̱ utuga ko̱.”
Ize zin Marta ngooni Lazaru ne, “Manyi, edeca ele ci Lazaru i̱i̱nya̱ we̱c ngi̱lo̱ma̱, u̱u̱mu̱ i̱yo̱ko̱ gerzet.”
40 Ize zin Ye̱su̱ ne, “Ngen ba̱li̱ye̱ ku̱du̱wa̱i̱n, ming a̱tu̱ zoz cinanni, acinni atin doiz ci Ta̱mu̱ta̱dde̱no̱?”
41 I̱pi̱ktta̱ zin ol bee neci ngi̱lo̱ma̱ utuga ke̱, icin zin Ye̱su̱ ta̱mu̱-keng, kar zin kize ne, “Baba kaanyi zany, iziyu i̱nna̱ zoz cinanni. 42 Ka̱gga̱ gon niko ming aziknnan, ka̱du̱wa̱ zin zoz necu kar kiziyet ol cik abile ngatu ko̱, kar kelemtta ming een i̱nne̱t ci i̱tto̱na̱na̱n.”
43 Baling u̱du̱wa̱ Ye̱su̱ zoz necu, utu zin daizoit muluwe ci a̱bu̱le̱, ize ne, “Lazaru, iyowa re̱e̱nu̱n!” 44 Iyowa zin e̱e̱ti̱ neci bali a̱da̱k ke̱ re̱e̱nu̱n, a̱lu̱ce̱ azzina ciginnek ki zo̱o̱ ki ngu̱m ru̱u̱ma̱ne̱ne̱ cik voorik. Izek zin Ye̱su̱ nogo ne, “Aarta ru̱u̱ma̱ni̱ ne̱k daizak ko̱ kar zin aanycik nonno kuk.”
A̱da̱yya̱ ol Ye̱su̱ oronggit ku̱ru̱we̱t ka̱da̱k
(Ma̱te̱yo̱ 26:1-5; Marko 14:1-2; Lu̱ka̱ 22:1-2)
45 Baling icinnet olli Yo̱u̱d balik ovvo a̱gga̱m a̱zzi̱t ci Ma̱ri̱ya̱ u̱lu̱wa̱ne̱ ci gotononi ko̱ kaal cik ogon Ye̱su̱, u̱tu̱we̱t zin nonno. 46 Abarik ol uggak ngatinne̱ng oot ngati ol wak een Varacis, u̱du̱ktta̱k kaal balik ogon Ye̱su̱ ke̱.
47 Utuwet zin alaata wak wawaco ki Varacis zu̱we̱ ro̱ni̱ ci lo̱ki̱ko̱. Kar kizeto ne, “Ku̱tu̱gu̱z nya? U̱tu̱gu̱ e̱e̱ti̱ necu kaal cik a̱vu̱la̱ meelek giir. 48 Ming kuunge nonno ku̱tu̱gu̱ kaal cik a̱vu̱la̱ niko, ovvo atin ol do̱o̱k a̱tu̱ nonno, kar zin atin bo̱do̱k gaala cik Romi ki̱vi̱ta̱ kegerzanit ngintik a̱li̱le̱ ko̱ ki lo̱o̱c cinna.”
49 Ozoz zin alaani wa a̱ddi̱ki̱re̱ wawaco, een zara Kaipas, ize ne, “Iróng niga a̱gga̱yyu̱ gi̱i̱ imma udut. 50 Iróng a̱gga̱yyu̱ abunna ming a̱da̱i̱ e̱e̱ti̱ co̱de̱ ṯok ngati ol do̱o̱k, ngati wete a̱da̱kne̱ olli lo̱o̱c cinna do̱o̱k.”
51 Iróng ba̱li̱ye̱ enne a̱du̱wa̱ zoz neci zinine cinne do̱, eci enne een alaan wa a̱ddi̱ki̱re̱ wawaco, aanyik Ta̱mu̱ta̱dde̱n nonno ku̱du̱wa̱ zoz ci okko Ye̱su̱ a̱da̱kne̱ kar atin kuruget zu̱we̱ ci Yo̱u̱do̱. 52 Iróng een zu̱we̱co̱c ci Yo̱u̱do̱ do̱, abarik ki dooli cik Ta̱mu̱ta̱dde̱no̱ azanonnik lo̱o̱cco̱k do̱o̱k, kar kanyaha nogo nginto̱de̱ kize orog co̱de̱. 53 Akane zin wazin neci ele, a̱da̱yya̱ zin Yo̱u̱di̱ Ye̱su̱ orong ku̱ru̱we̱t ka̱da̱k.
54 Iróng zin Ye̱su̱ ngen owo kicinnet olli Yo̱u̱do̱ do̱o̱k. U̱lu̱g abarik uk lo̱o̱ce̱ ci ojono ki balal, o̱rge̱ ci een Evram, kar zin ka̱vvu̱to̱ nginati ki nuyak waginnek.
55 Baling ize ojon Kwo̱o̱r wa Va̱rda̱ngi̱nto̱ Yo̱u̱do̱, oot ol cik meelek o̱rge̱ ci een Jerusalem ovvo aburuc e̱le̱tti̱ ming ngen kwo̱o̱r neci ki̱tta̱. 56 Oronggit olli Yo̱u̱do̱ Ye̱su̱, baling ovvo abile reena Ce̱e̱ze̱ wa Ta̱mu̱ta̱dde̱no̱, i̱jji̱ntto̱ nege do̱, izetto ne, “I̱no̱nnu̱ niga a̱kku̱ dim atidic e̱e̱ti̱ wagon ko̱ kwo̱o̱r necu de̱de̱?”
57 Arakttek da̱ abarik alaata wak wawaco ki Varacis zoz lo̱o̱c, ci azi ne, ming icin e̱e̱ti̱ imma Ye̱su̱, anyik ku̱du̱wa̱k nogo kar kecebe.