Santiago
K'art'a Santiagopa bɨda
Jesú ũpẽa Santiagopa nãɨ k'art'a bɨsima. Mãɨ Santiagopa naena Jesude ĩjãawẽa basima (Juan 7:1-9). Maamina ichi Jesude ĩjãapataɨrã t'ãena chi minachia k'awa bɨ pasima. Hecho k'art'ade tachia mãɨ unupatama (Hecho 12:17; 15:12-21; 21:17-19). Santiago Jerusalene bapachima. Ãyo 62de ichia Jesude ĩjãa bɨ k'orea peasidama.
Santiagopa nãɨ k'art'a Israeldepema doce warrarãnepa chedaadarã tuacha berã pae bɨsima. Waapẽarãmá mãɨpa jara bɨma ũpẽarã judiorã pae bɨsit'a. Waapẽarãmá jara bɨma ãarea Jesude ĩjãapataɨrã pae bɨsit'a.
Santiagopa nãɨ k'art'a bɨsima k'awapii k'orea sãmaasã́ nãɨ ĩjũane nipadai p'anɨt'a. 1:1-18de bɨ bɨma Tachi Ak'õre k'ɨ̃risia k'orea mãɨnepa jõma choa bai ɨt'aa chiidi p'ananai k'orea. Mãɨ ɨ̃ari Tachi Ak'õrene piarã ĩjãa bai k'orea bɨ bɨma (1:19—2:26). Mãɨ ɨ̃ari bɨ bɨma tachi k'ĩramenepa mietá pedeapidaemaa p'ananai k'orea mãɨnepa nãɨ ĩjũanepema k'ɨ̃rianaiwẽa p'anɨ k'orea (3:1—5:6). K'aadea bɨ bɨma tachia jõma choa p'anɨne waapẽarã́ pia oodai p'anɨ k'orea (5:7-20).
Chi k'art'adepema k'ɨ̃risia aba pia bɨt'a nãɨpɨ 2:8de: «Mãrapa Moisepa bɨdadepema chi atepe bɨ piarã oo p'anɨpɨra, pia oo p'anɨma. Tachi Ak'õre pedeade mãɨ Moisepa bɨdade nãɨya jara bɨma: “Abaɨ k'ɨ̃riase ara pɨchi k'ɨ̃ria bɨ jĩra”».