Hebreo
K'art'a Hebreorã pae bɨda
Nãɨ k'art'a hebreorã pae bɨda pasima. K'awadawẽa p'anɨma mãɨ k'aipa bɨsit'a. Chi eda waapẽarãmá Bernabepa, Apolopa, Silapa, Lucapa, Clemente Romanepemapa wa waapẽarãpa bɨsit'a. Naena chok'araɨrãpa k'ɨ̃risia p'anasidama Pablopa mãɨ bɨdat'a. Abapuru k'awa p'anɨma Hebreo k'art'a bɨda judio pasit'a. (Judiorãpa hebreo pedeade pedeapata pẽra hebreorãane apatama). Nãɨ k'art'a bɨdapa mãɨnepa chi k'art'a jitadada pida Timoteo unupachidama (13:23). Mãɨ awara ũpẽarã Italia tuadepemarã ome chi ũpẽa jĩra basima (13:24-25). Ãyo 70 naena bɨsima.
Nãɨ k'art'a ũpẽarã judiorã minachia mĩa be pae bɨsima Jesucristo itu bɨdaemaapa. Jesucristode ĩjãa p'anɨ k'orea ãchia uru be waapẽarãpa ẽemarisidama (10:32-34). Jõma nãɨ k'art'ade chi bɨdapa ãchia itu bɨdawẽa Cristode ĩjãa p'anɨt'a k'ɨ̃ria bɨma, Cristo chi atepe bɨẽra:
Cristo chi Tachi Ak'õrepa ɨt'aripa peedaɨrã k'aepẽra atepe piipará bɨma (1:1—2:18). Cristo Moisé k'aepẽra atepe piipará bɨma (3:1—4:13). Cristo chi p'aare judiorã k'aepẽra atepe piipará bɨma (4:14—7:28). Cristopa tachia nemietá oodada k'orea piuda k'orea p'aare judiorãpa oopataɨ k'aepẽra atepe piipará bɨma (8:1—10:39).
K'aadea chi k'art'a bɨdapa jara bɨma Tachi Ak'õrene ĩjãanai p'anɨma, ichia tachi pia unumẽrá (11:1—13:25). Chi pedea piipará bɨ tachia ũrinai p'anɨt'a 12:1ne bɨ bɨma: «Mãɨ ẽpẽerã minachia p'anɨrãpa Tachi Ak'õrene piarã ĩjãasida pẽra tachia pida ara mãɨ jĩra ĩjãa p'ananai p'anɨma. Chi tachiá itu ĩjãapik'aɨ mãɨnepa nemietaapa tachi pɨra uru baparí ãyá bɨdak'ari ãarea choa p'anɨnepa naa wãtɨma tachi wãnai p'anɨmá».