1 Pedro
Chi naapema k'art'a Pedropa bɨda
Pedropa nãɨ k'art'a bɨsima. Jesupa ichi t'ɨ̃side beta jɨrɨparí pasima (Marco 1:16-18). Maamina Jesupa jɨrɨ atadaɨrãnepema Pedro chi atepe basima. Ichiapuru Jerusalene Tachi Ak'õre te minachia bɨde judiorã́ Jesucristo k'orea pia jarateasima (Hecho 2:14-41) mãɨnepa judiorãwẽmá Jesú k'orea jarade wãsima (Hecho 10:1-48). Ãyo 67de romanepemarãpa ichi k'ĩra edá k'urusude barijira bɨk'ari peasidama.
Ãyo 64de Roma p'uuru paawãsima. Chok'araɨrãmá chi minachia k'awa bɨ Nero apataɨpa paapisima te chiwidi ook'oai k'orea. Maamina nepɨrade baemaapa Neropa jarasima Cristode ĩjãapataɨrãpa mãɨya oosidaɨt'a. Mãɨpuru romanepemarãpa tua becha ũpẽarã ẽp'ẽ p'aneesidama piawẽa oodai k'orea. Mãɨ k'orea Pedropa nãɨ k'art'a bɨsima. Romanepa ũpẽarã́ tua becha peesima minachia mĩa p'anɨmina Cristode ĩjãa p'ananamẽrá (2:18-25; 3:8-18; 4:12-19; 5:8-11).
Nãɨ k'art'adepema k'ɨ̃risia aba pia bɨt'a 2:21ne nãɨpɨ: «Cristo mãra k'orea minachia mĩana pẽra Tachi Ak'õrepa mãra t'ɨ̃sima mĩanamẽrá. Cristo mĩaside unupisima mãra nepɨra paraautade sãmaasã́ nipadai p'anɨ».
Nãɨ k'art'ade Pedropa bɨsima Tachi Ak'õrepa Jesucristodepa tachi atasit'a ichi p'uuru padamẽrá (1:1-11; 2:1-10). Mãɨpuru tachi ne ãareaɨne jĩp'a nipadai p'anɨma (1:1—3:7; 4:1-11; 5:1-11). Tachi ĩjũanepema ley mãɨnepa chi minachia berã pedea ĩjãanai p'anɨma (2:13-17). Maamina nejõma k'aepẽra Jesucristode ĩjãanai p'anɨma (3:13-16).